Read abua 1 Ạbudaam 21 Bible Online

1 Ạbudaam 21 - abua bible

1 Ạbudaam 21

¹Ịphen phọ reru reten aḍighiton imite ni ẹlo ozo ireeny avain aNebot ọlo ạJezreel. Ozo phọ ạrol ẹpe Jẹzreel atuman otu Ehab ọdaam mọ aSameria.

²Ehab ạḅeni Nebot mọ, “Ụngaani ịmi ozo phọ ạna mị ụzuph aani ịizupha ịdi eḍighi bọ atuman ogiga ạmi. Mị kạngo nyịna ozo iimuma avain dị ạnighe apu nyọon. Kụ eru dị ẹḅeeraan ni nyịna, pọ mị kạngo nyịna ikpoki ịpe dị ạman bọ.”

³Kụ aNebot ạḅeni Ehab mọ, “Ọmoogh-we phọ kúmeera dị mị kạsighe ozo iimuma avain ạburude phọ ạmi mị alhe bọ erua phọ ạngo nyịna.”

⁴Kụ Ehab ạghi aḍigh otu rꞌọghagh ologhi akire loor ịphen phọ aNebot ọlo ạJezreel phọ ạḅeni bọ nyọdi mọ, “Mị kạ́ngo nyịna erua ạburude phọ ạmi mị alhe bọ.” Kụ ọdi ạghi ạmina sịphe ẹmina phọ ọdi akururu asoman ẹpe ẹḅagh phọ, ómeera olhe eḍien.

⁵Kụ ạJezebel ạnir phọ ọdi ạghi ạteeny nyọdi kụ apuru mọ, “Eeghe ịyaar kụ rẹeḅaghami bọ nyịna kụ aghin bọ eḍien?”

⁶Kụ ọdi ạḅeni ạnir phọ ọdi mọ, “Ịdi eḍighi bọ mị ụḅeni Nebot ọlo ạJezreel phọ mọ ọdi ụngo ịmi ozo iimuma avain phọ ọdi mị uko, kẹn mị ụsighe ọnon ozo ụngo nyọdi, kụ ọdi ụphagharanaan ịmi mọ, ‘Mị rạ́ngo nyịna ozo phọ ạmi.’”

⁷Kụ ạJezebel ạnir phọ ọdi apuru nyọdi mọ, “Nạ kụ ọ́da bọ Ịzirel nyịidipho? Ḅetenu alhe eḍien, ologhi ạna ạḅaal. Mị kạngo ni nyịna ozo ịghol phọ aNebot ọlo ạJezreel phọ.”

⁸Kụ ạnir phọ ạsighe ḍien Ehab ạgeeghiom rịnya, ạsighe eḍeenaan ạḍighaagh ọdi ạdaphariom kụ ạsighe rịnya phọ ạghiom ikumoor rꞌikpolom awe phọ ạbuphe rꞌEhab orugh bọ sịphe ẹmha phọ.

⁹Ạnir phọ ạge ịduon sịphe ạrinya phọ mọ, “Ogbeel mọ ọkaagh ẹḍogh, ọsighe Nebot ọrolomi egey esi sịphe ogbo awe phọ,

¹⁰kụ ọsighe ịyal awe ịkaraph ạsiagba ọrol osoman nyọdi, kụ awe phọ ọgbaaghi apum ọḅam ẹmhu ọdi mọ ọdi mạagbaam Ẹnaan rꞌọdaam mọ ịdi ítu ịne kụ awe phọ ạbuphe phọ ọpham nyọdi ọḍuanam oroḅol nyọdi ikpo oghiigh.”

¹¹Kụ awe iiḍighi ẹmha phọ rꞌikumoor awe phọ ọtuugh ịpe ạJezebel ạḅem bọ oḍighi, ịdipho ạnir phọ ạge bọ sịphe ạḍinya phọ ạghiom bịdi.

¹²Kụ bịdi ogbeel mọ ọkaagh ẹḍogh ọsighe Nebot ọrolomi egey esi ogbo awe phọ.

¹³Ịyal phọ awe ịkaraph ạsiagba phọ ọghi ọrol esomanan Nebot kụ ọgbaaghinaan ịkaraph Nebot ịlo orue sịphe ogbo awe phọ mọ aNebot maafolomi Ẹnaan rꞌọdaam mọ; kụ bịdi ọsighe nyọdi ọḍuanam sịphe ẹmha phọ oroḅol nyọdi ikpo oghiigh.

¹⁴Kụ bịdi orom ọghiom Jẹzebel ọḅeni mọ yoor moroḅol ikpo nyọdi okiigh.

¹⁵ẠJezebel rọnaghan bọ mọ bịdi moroḅol ikpo Nebot okiigh, bịn ạḅeni Ehab mọ, “Ḅetenu ạghi ạsighe ozo iimuma avain phọ aNebot, ọpo úmeera bọ nạ ạkpe nyọdi ikpoki phọ. ANebot ólho, mamugh.”

¹⁶Kụ Ehab rọnaghan bọ mọ aNebot mamugh bịn aḅetenu ạghi ọsighe ozo iimuma avain phọ aNebot ọlo ạJezreel phọ ọmoogh.

¹⁷Kụ ikpo ọnhu Ọmoogh-we phọ eru ẹteeny Ilaija ọlo aTisbe phọ mọ,

¹⁸“Ḅetenu ạghi ạteeny Ehab ọdaam mọ Ịzirel odi bọ ẹpe Sameria. Pogh, ọdi odi ẹpe ozo iimuma avain phọ aNebot. Ọdi mạghi ọsighe ozo phọ ọmoogh.

¹⁹Ḅẹni nyọdi mọ mị Ọmoogh-we phọ ạḅem ịduon mọ, ‘Nạ maghiigh kụ ratu ọsighe ọmoogh?’ Ḅẹni nyọdi ịduon mọ, ‘Ọmoogh-we phọ ạḅem ịduon mọ esi phọ ịsiphe asuogh phọ ẹlaay bọ ịḅaal phọ aNebot, ịsiphe kẹn kụ esi dị asuogh kẹlaay aani ịḅaal phọ ịpe ạna.’”

²⁰Kụ Ehab ạḅeni Ilaija mọ, “Sey, nạ ạmulogh-ḍien phọ ạmi, nạ mụwa ịmi ạmiin?” Kụ ọdi mọ, “Mị mạmiin ni nyịna, ịdi eḍighi bọ nạ kụ aalha loor ạna aḍigh uzuan ghan, uzuan ghan risigh Ọmoogh-we phọ.

²¹Ọmoogh-we phọ ạḅem ịduon mọ, ‘Mị kạsighe ni sịpioghom mọ ạna ạḅam ẹmhu ạna. Mị kạkaraghi ni ạboorogh we phọ ạbuphe osugha bọ ạsighiogh, kụ mị kasoph ni akpere oḍigh ạtorobo olephiri ọony Ehab mꞌọnyo arisigh mꞌọnyo ẹbene sịphe Ịzirel.

²²Kụ mị kaḍighi ọto kꞌạna ịdipho mị aḍighi bọ ọto phọ kꞌaJeroboam ọony phọ aNebat rꞌịdipho mị aḍighi bọ ọto phọ kꞌaBaasa ọony phọ Ahaija loor esi ịpe nạ aḍighi bọ kụ rẹkagh bọ ologhi ạmi; kụ ḅịle kẹn nạ maḍighi ịdi Ịzirel moḍighi yogh aani ịkaraph.’

²³Kụ ịlo ạJezebel Ọmoogh-we phọ ạḅem ịduon mọ, ‘Asuogh kụ kẹba Jẹzebel sịphe iikpe phọ ạJezreel.’

²⁴Kụ tọrobo ọlo aru ọlo kꞌEhab lọ amugh sịphe ẹmha phọ, pọ asuogh kụ kẹba ghan; kụ tọrobo ọlo aru ọlo kꞌọdi lọ amugh ologhi eḍum, pọ ịnun okuaḍio phọ kụ kẹba ghan.”

²⁵(Ọnon oye dị ạghigh Ehab ólho dị ạsighe loor ọdi aalha sịpioghom, ạJezebel ạnir phọ ọdi kụ ạkpuughiom ghan.

²⁶Ọdi aḍighi yogh ni ịminighan ạsiḅaphanya, ạdaph ghan ịkaaghineen ạrumugh ịdipho Ạmorait phọ oḍighi yogh bọ, bụphe Ọmoogh-we phọ aphorogh bọ ạsighiogh ogbo awe phọ Ịzirel.)

²⁷Mem dị Ehab ạnaghan bọ ịpe Ilaija ạghaaph bọ ạḅeni nyọdi kụ ọdi ạphaanyi rukpe ọdi, kụ ạsighe rukpe-ọto amunughian, aghin ómeera olhe eḍien akururu rạḅooma.

²⁸Kụ ikpo ọnhu Ọmoogh-we phọ eru ẹteeny Ilaija ọlo aTisbe phọ mọ,

²⁹“Tụ nạ ạmiin ni mọ Ehab masooromi loor phọ ọdi esi ạmi? Loor ịduon phọ ọdi masooromi bọ loor phọ ọdi esi ạmi, mị kạ́sighe mun ịkaraph phọ atu sịen asuḍughul-otu phọ ọdi; mem ọony phọ ọdi kụ mị ạsighe ịkaraph phọ ạlogh sịphe ọto phọ kꞌọdi.”