Read abua 1 Ạbudaam 22 Bible Online

1 Ạbudaam 22 - abua bible

1 Ạbudaam 22

¹Esi ịyal ạsia ạSiria rꞌỊzirel úbe mun ẹgham.

²Kụ ọlo lhạ phọ ạḍiphe emuneniom bọ ịraar phọ, ạJehosafat ọdaam mọ aJuda ạghi ạteeny Ehab ọdaam mọ Ịzirel.

³Kụ Ehab apuru butelhedom mọ ọdi mọ, “Nyina elegheri ni mọ aRamot Gịliad ọlo ayira; kụ yira ọbilenaan bọ bịn úziton bọ ụsighe ḍịghaagh ọdaam mọ ạSiria?”

⁴Kụ ọdi apuru Jẹhosafat mọ, “Nạ kụdaph ni ịmi yira ọki obe ẹgham ẹpe Ramot Gịliad?” Kụ ạJehosafat ạḅeni ọdaam mọ Ịzirel mọ, “Mị rꞌạna ọḅophan ni. Awe phọ ạmi, pọ awe ạna; awe phọ ạna, pọ awe ạmi. Ạrusu phọ ạmi ịdipho ạrusu phọ ịpe ạna.”

⁵Kụ ạJehosafat ạḅeni ọdaam mọ Ịzirel mọ, “Seseeny pụr apuru ịlo Ọmoogh-we phọ kạḅem bọ.”

⁶Kụ ọdaam mọ Ịzirel aakpomoghi riil phọ Ẹnaan egina esi, ọman bọ inya okuron awe, kụ apuru bịdi mọ, “Mị ụki ni uzuom ẹgham Ramot Gịliad kụ mị ụminoghom bịn ḍụghum?” Kụ bịdi ọḅeni nyọdi mọ, “Ḅetenu ạghi azuom ẹgham. Ọmoogh-we phọ kạḅogh ni bịdi ạlogh ḍịghaagh ạna.”

⁷Kụ ạJehosafat apuru nyọdi mọ, “Ọnon oyil kꞌỌmoogh-we phọ ólho sịen, dị yira kọḅile opuru?”

⁸Kụ Ehab ạḅeni Jẹhosafat mọ, “Oniin oyil asugha ni dị yira kopuru ịlo Ọmoogh-we phọ, aMikaya ọony phọ Imla. Mị ạlogh ni nyọdi ḍien ịdi eḍighi bọ ọdi ịmi rụ́miinaan ghan igey ịmiin.” Kụ ạJehosafat ạḅeni ọdaam mọ mọ, “Kạ́ḅem ịduon.”

⁹Kụ ọdaam mọ Ịzirel ạmagh oniin oye oḍighi ọdi kụ arom mọ, “Gboogborion ạghi ạpham Mikaya ọony phọ Imla arumom.”

¹⁰Kụ Ehab ọdaam mọ Ịzirel rꞌạJehosafat ọdaam mọ aJuda ụkpologhian rụsuoma ạbudaam-ẹmha kụ oye ye ạrolom ạgada ọdaam ẹmha phọ ọdi, sịphe rọgbe ghan bọ ịbiakpa phọ eḍighom ẹmha phọ aSameria, kụ oomo ariil phọ ọrol risigh ạbidi rọmiinogh ịmiin.

¹¹Kụ oniin ọnyo ạbidi ạZedekaya, ọony phọ aKenaana, ạsighe okuron ạlemom rụkuodu ịlo ọdi kụ ạḅeni Ehab mọ, “Ọmoogh-we phọ ạḅem ịduon mọ, ‘Nạ kạsighe ịphen phọ kụ anyuughiom bụo ạSiria phọ apiemi.’”

¹²Oomo ạbueri phọ ariil phọ ụmiin ghan ịduon mọ, “Kịa ẹpe Ramot Gịliad. Ẹghi ạna ẹnighe! Ọmoogh-we phọ kạsighe ni bịdi ạlogh ḍịghaagh ạna.”

¹³Kụ ọokpaany phọ ọpo ạghi bọ ọmagh aMikaya ạḅeni nyọdi mọ, “Nyịidipho, nạghan. Oomo ịpe ạbueri phọ ariil phọ rọkaaph bọ eḍeenaan ni mọ kẹnighenaan ni ọdaam mọ. Seseeny, mị rạaḅereghi ni nyịna, ikpo ọnhu phọ ạna ẹrol ịdipho oniin ọnyo ạbidi ạghaaph bọ. Kạaph ịpe ẹnighe bọ.”

¹⁴Kụ aMikaya ạḅeni nyọdi mọ, “Ịdipho Ẹnaan phọ edi bọ ni, ịpe Ọmoogh-we phọ kụḅeni bọ ịmi kụ ịdi mị kạtuugh ni ạḅeni nyọdi.”

¹⁵Kụ ọdi ạghi asi kꞌọdaam mọ, kụ ọdaam mọ apuru nyọdi mọ, “Mikaya, yoor ọghi ni ẹgham mọ ẹpe Ramot Gịliad, kụ yoor ọminoghom ḍụghum?” Kụ ọdi ạphagharanaan mọ, “Kịa ni; ẹghi ẹnighe. Ọmoogh-we phọ mạḅogh ni bịdi ạlogh ḍịghaagh ạna.”

¹⁶Kụ Ehab mọ, “Ika amem kụ ẹdi mị rakunya ghan bọ kạḅeni nyịna mọ kápogh ghan ịnon bịn ạghaaph ghan ụḅeni ịmi omuton ịpe eru bọ ịne esi aḍien Ọmoogh-we phọ?”

¹⁷Kụ aMikaya ạḅem mọ, “Mị ụmiin oomo Ịzirel dị ọwalala ẹpe aruugum mọ ịdipho iyool-ịga dị okoriom úlho. Kụ Ọmoogh-we phọ ạḅem mọ, ‘Bụen phọ ụ́moogh ọde-otu. Tọrobo oye agheel kꞌọdi rꞌedughom rꞌẹepho.’”

¹⁸Kụ ọdaam mọ Ịzirel ạḅeni Jẹhosafat mọ, “Mịna nyịna ụ́ḅeni mọ ọdi kụ́miinan ghan ịmi igey ịmiin, omuton ịkaraph bịn?”

¹⁹Kụ aMikaya ạḅeni nyọdi mọ, “Nạghan ịdi Ọmoogh-we phọ ạghaaph. Mị ụmiin ni Ọmoogh-we phọ dị ạrolom ạgada ạbudaam mọ ẹpe kꞌạke kụ aḍita ạruukpaany phọ ọmeregha otuman nyọdi, buniin ḍịghaagh elhiom buniin ḍịghaagh ekeeny.

²⁰Kụ Ọmoogh-we phọ apuru mọ, ‘Ạnhian kụ kaakeleghi bọ Ehab mọ ọdi ạghi amugh ẹpe Ramot Gịliad?’ Kụ ịpe ạruukpaany phọ ọghaaph bọ ị́ḅophan.

²¹Kụ oniin uwaloor aru ạmeera ghisigh Ọmoogh-we phọ kụ ạḅem mọ, ‘Mị kaakeleghi ni nyọdi.’

²²Kụ Ọmoogh-we phọ apuru nyọdi mọ, ‘Nạ kaḍighi ika?’ Kụ uwaloor phọ mọ, ‘Mị kạki aḍighi uwaloor dị rạgba ghan ọkpe sịphe ọnhu aḍita ariil phọ Ehab.’ Kụ ọdi ameera mọ, ‘Nạ kaakeleghi ni nyọdi. Nạ ạkpar apu nyọdi. Kịa aḍighi ịduon phọ.’

²³“Nyịidipho nạghan. Ọmoogh-we phọ mạsighe uwaloor ọkpe ạlogh ọnhu aḍita ariil phọ ạna ạbuen. Kụ ọlo Ọmoogh-we phọ ạkaaph ịkaraph dị kemitenaan nyịna.”

²⁴Kụ ạZedekaya ọony phọ aKenaana aḍuraan ạabeeph aḅor Mikaya kụ apuru mọ, “Uwaloor Ọmoogh-we phọ aḍighi ika kụ ạḍua ẹphen mị odi bọ utenom ịmi kụ atu ạkaaph ịyaar ạḅeni nyịna?”

²⁵AMikaya ạḅeni nyọdi mọ, “Nạ kalegheri ni ḍio phọ ạḍiphe nạ kakiil bọ ạki aḍigh osoph obughotu kụ ạbooghian.”

²⁶Kụ Ehab ọdaam mọ Ịzirel ạḅem mọ, “Isiph Mikaya ẹsighe ẹghiom Ạmon uwo ẹmha phọ rꞌaJoas ọkpana ọony ọdaam mọ.

²⁷Kụ ẹḅeni mọ ọdaam mọ ạḅem ịduon mọ ịsighe mạar phọ ẹphen ẹlhogh ikoli, ẹngo ghan nyọdi eḍien ịminimiin rꞌạmuum ịminimiin tụtu mị arigheel rꞌẹepho.”

²⁸Kụ aMikaya ạḅem mọ, “Eru mạar dị nạ ạpham ẹboroph kụ arighelom, pọ Ọmoogh-we phọ kụ rạ́kaaph bọ ịphen ẹḍua bọ ọnhu ạmi emite.” Kụ ọdi ạḅile ạḅem mọ, “Ịnaghan ọghaaph phọ ạmi, oomo aḍita anyina.”

²⁹Kụ Ehab ọdaam mọ Ịzirel rꞌạJehosafat ọdaam mọ aJuda ọghi ẹpe Ramot Gịliad.

³⁰Kụ Ehab ạḅeni Jẹhosafat mọ, “Mị kanmeeghian loor ạmi ạki ẹgham, kụ nạ munughian ni rukpe ọdaam mọ ạna.” Kụ ọdaam mọ Ịzirel anmeeghian ạghi ẹpe ẹgham mọ.

³¹Kụ ọdaam mọ ọpo ạSiria ạlogh ologh ạngo ịraardi rꞌịyal awe phọ ạbuphe ropogh ghan bọ rughuugh-ude phọ ọdi, kụ ạḅeni mọ íbiom ghan ẹgham mọ, mꞌọbam mꞌogbogh, omuton ọdaam mọ Ịzirel bịn.

³²Kụ mem dị ạbuo ạrumhu ạbuphe arughuugh-ude phọ ọmiin bọ Jẹhosafat kụ ogbi mọ ọdi kụ ọdaam mọ Ịzirel, kụ bịdi ooghiraan osoman nyọdi eenom ọdi ẹgham mọ, kụ ạJehosafat ạlooghi.

³³Kụ mem dị bụo ạrumhu arughuugh-ude phọ ọmiin bọ mọ ọdi kọ́daam mọ Ịzirel, kụ bịdi oḅula ọwile nyọdi úporogh mun.

³⁴Kụ oniin oye aḍur kụmugh ọdi raakia ghan ólhegheri ọdo phọ oye phọ kụ apu bịn ạkpatan kụmugh phọ ọdi ạraph Ehab ọdaam mọ Ịzirel. Kụ ẹkpina phọ emeelom ogbo ạraraar ẹgham mọ ọdi rꞌibura ẹgham mọ ọdi. Kụ ạḅeni nyọpo rạzoghiom bọ oghuugh-adool phọ mọ, “Kiton ḍịnon ạḍighaagh ụsighe ịmi ạḍuanam sịen ẹgham mọ, muḍighi ịmi ịyaar ụlogh ịmi ẹgha.”

³⁵Ẹgham mọ ilhom ni iboom ḍio phọ ạḍiphe phọ, kụ Ehab ọdaam mọ ạrol sịphe oghuugh-adool phọ ọdi kụ ooḅeghogh osomori weye ạSiria phọ. Kụ rẹteeny dulhe bịn amugh, kụ ịḅaal ẹḍua ghan sịphe oḍighi bọ nyọdi ịyaar phọ ekil ghan eḍiku ologhi oghuugh-adool phọ ọdi.

³⁶Kụ ogbeel okitonom sịphe aḍita ạbuo ẹgham mọ Ịzirel, mem dị erumuḍio remeel ighool, mọ, “Tọrobo oye agheel ẹmha ạbidi, tọrobo oye agheel eelhe ạbidi.”

³⁷Kụ Ehab ọdaam mọ amugh kụ ọpham nyọdi ogheelom Sameria; kụ oḍi ọdaam mọ ẹpe Sameria.

³⁸Kụ bịdi ootol oghuugh-adool phọ ọdi ẹpe matuman ọodu aSameria, kụ asuogh ẹlaay ịḅaal phọ ọdi. Kụ bịdi ootologh rạraar ẹgham mọ ọdi, ọdaph ikpo ọnhu phọ ịpe Ọmoogh-we phọ ạghaaph bọ.

³⁹Oomo ịnon ịlo Ehab rꞌoomo iiḍighi phọ ọdi ịpe ọdi aḍighi yogh bọ, rꞌogiga phọ ọdi ạlogh bọ, rꞌoomo ạramha phọ ịpe ọdi adoghoḍi bọ, ọsighe ni ịphen phọ ọge sịphe ạḍinya ịpe emiteghu bọ mem ạbudaam mọ Ịzirel.

⁴⁰Ehab amugh ạtuonom bụrude phọ ọdi; kụ Ahazaya ọony phọ ọdi ạsighe dọl phọ ọdi ạda.

⁴¹Ẹman bọ inya ạsia ịpe Ehab ạda bọ Ịzirel, kụ ạJehosafat ọony phọ Ạsa amiigh ọda aani aJuda.

⁴²ẠJehosafat ạman bọ ịraardi rꞌoogh ạsia kụ ọdi amiigh bọ ọda phọ. Ọdi ạda bọ Jeruselem ịyaldi rꞌoogh ạsia. Ḍien onhiin ọdi ughol mọ Azuba ọnyani aSilhi.

⁴³Ọdi ạdaph oomo ịpe Ạsa ọde phọ ọdi aḍighi bọ kụ ạtuugh ghan aḍighi ghan. Ọdi ónme ịnon ịlo ọdi kụ aḍighi ghan. Ọdi aḍighi ghan ịdi ẹḅeeraan Ọmoogh-we phọ. Rꞌẹnum kụ ọlo oḍi ólhereghi rubughotu iiḅereghị aruru phọ rꞌarenmeny ạrikia phọ ọphinyon ạrikia, rꞌọsuughi ịmuwa sịphe ariisi phọ ephophogh bọ ẹghi ạnyu.

⁴⁴Kụ ạJehosafat aḍighi ni ịdi ọdaam mọ Ịzirel rꞌọdi ọphomoghian.

⁴⁵Oomo ịnon ịlo ạJehosafat rꞌoomo iiḍighi phọ ịpe ọdi aḍighi yogh bọ ịpe esugha bọ, rꞌịikpo phọ ọdi ịpe ọdi aḍeenaan bọ rꞌịpe ọdi eeghi bọ rạagham mọ, ọsighe ni ịphen phọ ọge sịphe ạḍinya ịpe emiteghu bọ mem ạbudaam mọ aJuda.

⁴⁶Kụ ịyal-ikpo ạbumina rịiniom mọ rꞌabulhiom ẹmha osugha bọ mem mọ Ạsa ọde phọ ọdi, aphorogh ni ạsighiogh sịphe ade phọ.

⁴⁷Mem mọ ạmuphe phọ ọdaam ọ́rol ẹpe Idom; ọdaam mọ aJuda kụ ạma ghan opoghom ạbidi.

⁴⁸ẠJehosafat ạsighe ireeny ạkaam rụnwunyaru ọghi ghan ẹpe Ofir ọsaany agol, kụ ạrunwunyaru phọ eḅiighi eḅomoghian ẹpe Ezion Geber bịn esi ị́ki mun.

⁴⁹Kụ Ahazaya ọdaam mọ Ịzirel, ọony phọ Ehab, ạḅeni Jẹhosafat mọ, “Meera mọ abutelhedom mọ bụen ạmi ọdaph butelhedom mọ bụphe ạna ọghi aani.” Kụ ạJehosafat ómeera.

⁵⁰ẠJehosafat amugh ạtuonom bụrude phọ ọdi kụ ọsighe nyọdi oḍi ẹpe oḍi bọ bụrude phọ ọdi ẹpe ẹmha aDevid ọde phọ ọdi. Kụ ạJehoram ọony phọ ọdi ạsighe dọl phọ ọdi ạda.

⁵¹Ẹman bọ ḍioph rꞌoḍual ạsia ịpe ạJehosafat ọdaam mọ aJuda ạda bọ, kụ Ahazaya ọony phọ Ehab amiigh ọda aani Ịzirel ẹpe Sameria. Ọdi ạda bọ Ịzirel ịyal ạsia.

⁵²Kụ ọdi aḍighi yogh ịkaraph ghisigh Ọmoogh-we phọ, ạdaph oomo areten eḍighinom ạraraar Ehab ọde phọ ọdi, rꞌareten eḍighinom ạraraar ạJezebel onhiin phọ ọdi, rꞌareten eḍighinom ạraraar phọ aJeroboam ọony phọ aNebat, ọpo aḍighi yogh bọ ịdi Ịzirel ọtuan oḍighi ịkaraph.

⁵³Ọdi aaseeny ghan Baal ạaḅereghi ghan Baal tụtu eḍighi ịdi ẹghagh ologhi Ọmoogh-we Ẹnaan phọ Ịzirel; ạdaph oomo ịpe ọde phọ ọdi aḍighi yogh ghan bọ.