Read abua 1 Ạbudaam 6 Bible Online

1 Ạbudaam 6 - abua bible

1 Ạbudaam 6

¹Inya okuron rꞌọphaanyadi ạsia reten emiigh mem mọ awe phọ Ịzirel ọḍua bọ Ijipt, ạSolomon mạda Ịzirel ẹman inya ạsia, omuneniom ịyal ụnwanyu phọ, ụnwanyu aZiv, kụ ạSolomon amiigh ọlogh Otu Ịiḅereghi phọ.

²Ologhi phọ aḍighi 27 akuḅu ḍịdoony, 9 akuḅu ẹreghe ḅịle 13.5 akuḅu ḍiphoph.

³Osoph ẹphen kọḍua bọ oḍigh ạman 4.5 akuḅu ḍịdoony, ḅịle 9 akuḅu ẹreghe, ạdaphan ẹreghe Otu Ịiḅereghi phọ.

⁴Iikpe Otu Ịiḅereghi phọ ịmoogh ni ropogh dị ẹkololo ẹpe erugh phọ kụ ẹpe reḍigh bọ otu phọ ẹregh.

⁵Ọkpaariom iikpe phọ, ẹpe ịigaany phọ ḅịle rꞌọman Otu Ịiḅereghi phọ, ụlogh ni otu ạnyu ịraar ẹedanieen otulom, eniin ẹedanieen ẹman ghan 2.2 akuḅu ḍiphoph.

⁶Oniin osoph ẹphen ẹḅel ẹedanieen phọ ẹman ghan 2.2 akuḅu ẹreghe, ẹedanieen ẹpe ogbo phọ ịman ghan 2.7 akuḅu ẹreghe, ḅịle ẹedanieen ẹpe ạnyu phọ ẹman ghan 3.1 akuḅu ẹreghe. Iikpe Otu Ịiḅereghi phọ ịlo ạdeki lọ odi ạnyu ighom ghan ni epu ẹedanieen lọ edi ude bịn iisoph phọ ẹḅamian ghan ạnyu iikpe phọ, ụ́kan ghan sịotogh ụ́logh iikpe phọ.

⁷Sighiigh phọ ọloghom bọ Otu Ịiḅereghi phọ uugbo ni kụ oseere, kụ iḍighi kụ ẹḍogh ọkanam, sikubu, mụghumo ịnon ọdo ạraraar dị eḍighi okuron ị́tol mem mọ rọlogh bọ Otu Ịiḅereghi phọ.

⁸Ọnhu-aḍibuo ẹedanieen phọ ẹpe ẹkaraghi bọ esoorom sịphe otu phọ otulom bọ ạrol ạga esoorom Otu Ịiḅereghi phọ, kụ ạmooghom ni esi ọoda ọghi ẹedanieen phọ ẹpe emuneniom bọ ịyal ḅịle rꞌẹpe emuneniom bọ ịraar phọ.

⁹Kụ iḍighi kụ ạSolomon ọdaam mọ ạlogh bọ Otu Ịiḅereghi phọ ạmadan. Kụ ọdi ạsighe ipoḍi ọsaga kụ asilom otu phọ.

¹⁰Otu ịraar ẹedanieen phọ otulom bọ, eniin ẹedanieen iḍighi ghan 2.2 akuḅu ḍiphoph, kụ ụlogh otumeniom iikpe Otu Ịiḅereghi phọ, kụ ogbonoghi sịotogh ọsaga kụ ẹḅar iikpe ekeeny phọ rꞌelhiom mọ etul.

¹¹Ọmoogh-we phọ ạḅeni Sọlomon mọ,

¹²“Eḍighi ịyaar lọ nạ aako oomo phọ iilogh phọ ḅịle rꞌịtooghi phọ ạmi, pọ mị kaḍighinaan ni nyịna ịpe mị aguanaan bọ ọde phọ ạna Devid.

¹³Mị katughan rꞌawe phọ ạmi Ịzirel sịen Otu Ịiḅereghi phọ ọphon nạ rạlogh bọ, ḅịle mị kạ́ḅitonaan bịdi bịn emuneen.”

¹⁴Kụ ạSolomon ạlogh Otu Ịiḅereghi phọ ạmadan.

¹⁵Ẹpe ologhi phọ ipoḍi ọsaga kụ ọrurogh ookpereghiom iikpe phọ emiigh ude kụ esi ạnyu, kụ ude phọ ụkan ipoḍi oreeny ạḍiipioph.

¹⁶Osoph ologhi phọ dị oghol mọ Ẹphan phọ ạrol li ẹpe eekuna Otu Ịiḅereghi phọ. Osoph phọ aḍighi esugha akuḅu ḍịdoony kụ ọsighe sụpo ọsaga kụ ọḅagh osophom emiigh ude kụ esi ạnyu.

¹⁷Osoph phọ ọpo ạrol bọ risigh Ẹphan phọ ạman ḍioph rꞌọphaanya akuḅu ḍịdoony.

¹⁸Ikpooghi ọsaga phọ ịmoogh ni sịfalaway dị ọkaaghi ọnighemiom; oomo phọ ẹpe ologhi phọ ụḅaghagham sụpo ọsaga, bịn oye ụ́miin ghan sighiigh phọ ọḅiirom bọ iikpe phọ.

¹⁹Ẹpe ọman Otu Ịiḅereghi phọ ụlogh ni osoph ologhi. Ịpa kụ esi dị koseere ghan bọ Igbe Ịyo Ọmoogh-we phọ.

²⁰Osoph ologhi phọ ọphon phọ aḍighi esugha akuḅu ḍịdoony, esugha akuḅu ẹreghe, ḅịle esugha akuḅu ḍiphoph, kụ ookpereghiom oomo phọ ọdi ogey agol. Enmeny phọ uukpereghiom sụpo ọsaga.

²¹Ẹpe ologhi Otu Ịiḅereghi phọ ụdamaghi gol, kụ ọsighe izime dị oḍighinom gol ọkpo osophom ọnhu-aḍibuo osoph ologhi phọ, ọpo ọdamaghi aani bọ kẹn ni gol phọ.

²²Oomo ologhi Otu Ịiḅereghi phọ ụdamaghi gol, ghạlamo rꞌenmeny phọ ẹrol bọ ni ẹpe Ẹphan phọ.

²³Ụsighe ni oreeny-ọliv kụ ọkaam ịyal ạruukpaany aghuḍuul dị ẹmoogh raphaaph kụ oseere ẹpe ologhi Ẹphan phọ; oniin ọnyo ạbidi aḍighi ghan 4.4 akuḅu ḍiphoph.

²⁴Ịyal phọ ịdi iileeny ni ẹḅile ẹeghighighan. Oniin ạmoogh ghan ịyal araphaaph, oniin ophaaph aḍighi ghan 2.2 akuḅu ḍịdoony, kụ iḍighi kụ ọḍua eniin eekuna ophaaph osi ẹpheri phọ eekuna phọ iḍighi 4.4 akuḅu.

²⁷Usereghi bịdi oniin ạrol ọogaany oniin sịphe ologhi Ẹphan phọ, kụ iḍighi kụ ịyal araphaaph phọ ạbidi ọrar bọ oniin atir ri nyoniin sịphe ogbo osoph phọ, ḅịle ịpheri phọ ịyal araphaaph phọ etir iikpe phọ.

²⁸Bịdi ugbul li gol ịyal ịkaaneen ạruukpaany aghuḍuul phọ ẹmoogh bọ raphaaph phọ.

²⁹Iikpe ogbotu phọ ḅịle rꞌịpe osoph ologhi phọ ịmoogh ni ịnme dị eḍighi ịkaaneen ạruukpaany aghuḍuul dị ẹmoogh raphaaph, reelhe ḅịle rꞌạsifalawa.

³⁰Ghạlamo rꞌude phọ bịn ụdamaghi ni gol.

³¹Eghuugh ịyal ipoḍi dị ọkaam oreeny-ọliv kụ ẹdi ọlogh ọnhu-aḍibuo Ẹphan phọ; ẹpe ạnyu eghuugh phọ ịsiosio ni kụ ekugunu.

³²Arughuugh phọ ịmoogh ni ịnme dị eḍighi rụukpaany aghuḍuul dị ẹmoogh raphaaph, reelhe, ḅịle rꞌạsifalawa. Ụdamaghi gol rughuugh phọ, ịkaaneen ạruukpaany aghuḍuul phọ, ḅịle rꞌareelhe phọ.

³³Ụsighe oreeny-ọliv kụ ọkaam eghuugh ọnhu-aḍibuo ogbotu phọ.

³⁴Ẹrol bọ ịyal arughuugh dị kotue ni ọkpooghi kụ ọkaam oreeny ạḍiipioph;

³⁵ḅịle ụkaaghi rụukpaany aghuḍuul dị ẹmoogh raphaaph, reelhe ḅịle rꞌạsifalawa kụ odoghoḍiom ịnme kụ ọdamaghi oomo phọ ịdi gol.

³⁶Ụlogh ni ogbotu ẹpe arisigh Otu Ịiḅereghi phọ, iikpe phọ ugborori ghan ọsaga tọrotoro amem lọ mọḅiir ịraar ạsiadam asighiigh.

³⁷Uphighi Otu Ịiḅereghi phọ omuneniom ịyal ụnwanyu, ụnwanyu aZiv, omuneniom inya ạlha dị ạSolomon mạda.

³⁸Omuneniom ọphaanya ụnwanyu, ụnwanyu aBul, omuneniom aḍioph rꞌaḍiniin ạlha dị ạSolomon mạda kụ ẹdi ọlogh bọ Otu Ịiḅereghi phọ ọmadan, ẹtuugh ịpe ogbiighi bọ. Ịsighe Sọlomon oḍual ạsia ọlogh phọ.