Read abua 1 Ạbudaam 7 Bible Online

1 Ạbudaam 7 - abua bible

1 Ạbudaam 7

¹ẠSolomon ạḅile kẹn ni ạlogh ogiga ọlo ọdi, kụ ịsighe nyọdi ḍioph rꞌịraar ạsia.

²Ogbotu ḍi oghol mọ Ẹekpua ạLebanon ạman 44 akuḅu ḍịdoony, 22 akuḅu ḍịregh, ḅịle 13.5 akuḅu ḍiphoph. Ạmoogh ịraar ạsikool ạroko ọsaga, ḍioph rꞌoogh ḍịkool, kụ ẹmoogh ikpo oreeny ọsaga dị ọḅamam ghan. Ụḅaghagham ịgurom ọsaga, kụ epeelogh ghan eḍighom iisoph ooko ghan aruphua, iisoph phọ uḅegheghom rọko.

⁴Esi ịyal phọ iikpe ịphalagbal phọ iniin iikpe ịmoogh ghan ịraar ạsikool arughuugh-ookuugh.

⁵Ạrunhu-aḍibuo phọ ḅịle rꞌarughuugh-ookuugh phọ ịmoogh ịḅagham dị ẹkololo, ḅịle ịraar phọ ạsikool arughuugh-ookuugh phọ ẹrol bọ sịphe iikpe ịphalagbal phọ iisomonan yogh ni.

⁶Esi dị oghol mọ Ogbotu Ạroko ẹman 22 akuḅu ḍịdoony ḅịle 13.5 akuḅu ḍịregh kụ ạmooghom avaranda dị ogimi rọko kụ ọkan.

⁷Osoph Ạgada Ọdaam ẹmha phọ, oghol aani bọ kẹn mọ Ogbotu Ịiruen phọ, sịphe ạSolomon ạrol ghan bọ aagbo ịiruen phọ, ạmoogh ipoḍi ọsaga ọgoghoghomi yogh emiigh ude kụ esi ẹpe ịkala otu phọ.

⁸Iisoph ịpe ạSolomon ịrol ọnon otu, ebughotu Ogbotu Ịiruen phọ, ụlogh aani kẹn ni ịdipho ịpheri phọ aruutu phọ. Ọdi ạlogh kẹn ni ọdo otu phọ ọphon ạngo ạnir ọdi, ọdaam ẹmha phọ Ijipt.

⁹Oomo phọ aruutu phọ ịphen ḅịle rꞌogbogh otu phọ, ụloghom ịma asighiigh emiigh ude kụ esi ẹpe ịteph-ọlophia phọ. Sighiigh phọ uugbo ghan ẹpe roogbo ghan bọ sighiigh phọ; ḅịle ụtooghi ghan ni kụ ọsighe ịfokofoko ọophiom ologhi phọ rꞌerugh phọ.

¹⁰Uphighiom ruutu phọ rꞌigbogh asighiigh dị oogbo ẹpe roogbo ghan bọ sighiigh phọ, iniin ạbidi iḍighi ni ịraar akuḅu rꞌegbem ḍịdoony, iniin eḍighi inya akuḅu ḍịdoony.

¹¹Ạnyu ịphen phọ ụḅam ni ịnon asighiigh dị ọto ghan kụ osoph, ḅịle rꞌikpo ọsaga dị ogbonoghi ghan.

¹²Ogbotu ọdaam mọ, osoph ologhi sịphe Otu Ịiḅereghi phọ, ḅịle rꞌosoph ọḍua-oḍigh Otu Ịiḅereghi phọ ịmoogh iikpe dị ogborori ghan ọsaga tọro amem lọ mọḅiir ịraar ạsiadam asighiigh phọ oogbo bọ.

¹³ẠSolomon ọdaam mọ arom ni ọmagh oye dị oghol mọ aHuram, oye ẹmaar ạmaka dị arugh ghan ẹmha dị oghol mọ aTaya kụ ạmaar ọsighe enaba kụ ọkaaghiom ạraraar.

¹⁴Ọde phọ ọdi, dị mamugh, aḍighi ghan ọlo aTaya phọ, kụ ạmaar ghan kẹn ọsighe enaba ọlhemom ạraraar; onhiin phọ ọdi ọlo eghun ạNaftalai. AHuram asilor ri ẹmaar oḍighi ạḍighaagh phọ ọdi. Ọdi ạnaghanan ni ḍịmagh phọ ạSolomon ọdaam mọ ạmagh bọ nyọdi mọ ọdi kụ ạmeera esi oomo iiḍighi lọ koḍighinom enaba.

¹⁵AHuram ạlhem ni ịyal ạroko enaba, eniin ịman ghan 8 akuḅu ḍiphoph ḅịle 5.3 akuḅu ooghironom kụ ogim ọnhu-aḍibuo Otu Ịiḅereghi phọ.

¹⁶Ọdi ạlhem kẹn ni ịyal areme enaba, eniin iḍighi ghan 2.2 akuḅu ḍiphoph dị kọḅam ạnyu ạroko phọ.

¹⁷Ạnyu ạroko phọ ịnme ịrol li dị oḍighinom izime,

¹⁸ḅịle rꞌịyal ạsikool arughuuny ekpetughe dị ọlhemom enaba.

¹⁹Ariigida ạnyu ạroko phọ ịman ghan odiiny ạrada ḍiphoph, ẹghigh ipoola iipoghoḍian.

²⁰Kụ ọḅam ghan esi dị eeghiraan ạnyu izime phọ. Ịrol ịyal okuron arughuuny ekpetughe ịyal ạsikool kụ eeghironom tọro tọro eme.

²¹AHuram agimogh rọko enaba phọ ịphen phọ esomanan ọnhu-aḍibuo Otu Ịiḅereghi phọ: eniin ạga esoorom mọ kụ oghol mọ aJakin, ḅịle eniin ẹpe ephunom mọ kụ oghol mọ ạBoaz.

²²Areme enaba phọ ịrol ạnyu ạroko phọ. Kụ iḍighi kụ oḍighi ạroko phọ amuneen.

²³AHuram ạsighe enaba kụ ạkaam oghuugh dị aaghiraan, 2.2 akuḅu ḍịkel ude, 4.4 akuḅu ogborori ọḅeeny, ḅịle 13.2 akuḅu oko okitonom.

²⁴Oko okitonom iigbom oghuugh phọ ụkpooghi ịyal ạsikool ote dị ọkaam enaba kụ ọḅaraghiom oghuugh phọ.

²⁵Oghuugh phọ ụḅam ọman aḍioph rꞌịyal ilephiri ạsinam enaba dị ephogh ẹpe erugh, ịraar ịne iphogh ghan pạkiri.

²⁶Oogbiim eekoom ạmuum mọ ạman ẹkulom ạḍighaagh. Ẹpe ọnhu phọ ịrol ịdipho ạmogo, enyoroghian ịdipho ipoola iipoghoḍian. Eekoom ạmuum mọ ịpham ghan inyadi ọonir aruuku ạmuum.

²⁷AHuram ạsighe kẹn ni enaba ạlhem ḍioph arughuugh-adool; oniin ạman ghan odiiny ạrada ḍịdoony, odiiny ạrada ḍịregh, ḅịle inya rꞌegbem ạrada ḍiphoph.

²⁸Ụlhemom ipoḍi dị inya phọ ạraghaagh phọ eeleeny kụ ọḅaghagh ruukuna phọ.

²⁹Ạnyu ipoḍi phọ uḍighi omitiom oogho ạnam-dịka, ilephiri ạsinam rꞌạruukpaany aghuḍuul dị ẹmoogh raphaaph; kụ ạnyu ịḅagham mọ ẹrol bọ ạnyu rꞌeeḍian ạnam-dịka phọ ḅịle rꞌạsinam mọ ịmoogh ni rạraar dị oghuunyogh.

³⁰Tọrotoro oghuugh-adool ạmoogh inya idighila ḅịle rꞌọokpo-ogbo enaba. Inya phọ aruukuna phọ ịmoogh reḅeri enaba dị kọḅam bạfu. Reḅeri phọ ụlogh ni ịnme dị oghuuny.

³¹Ụḅagh ni ạnyu phọ ooghiremiom ịlo ọḅam ghan ạbafu phọ. Iḅughughu ẹghi ạnyu oniin rꞌegbem ạrada emiigh ạnyu oghuugh-adool phọ ḅịle ịyal abin inya ạrada ḍịkel ude ologhi oghuugh phọ. Ụkaaghi ni rạraar okitonom.

³²Idighila phọ ịman ịyal abin inya ạrada ḍiphoph, kụ ẹrol eeḍian ipoḍi phọ, ḅịle ọokpo-ogbo phọ utulom ni rughuugh-adool phọ.

³³Idighila phọ ịghigh ịlo oghuugh ẹgham; ọokpo-ogbo phọ, iigbom mọ, rꞌinanzi phọ ạbidi iḍighi enaba.

³⁴Uḅeghom ni inya ạraraar eeḍian aruukuna ạtorotoro oghuugh dị otulom ghan oghuugh phọ.

³⁵Ụmoogh ni ịyaar dị ẹman 22 ẹkulom ạḍighaagh dị okpogh okitonom ạnyu ạtorotoro oghuugh; areḅeri phọ ẹpham bọ ḅịle rꞌipoḍi phọ itulom oghuugh phọ.

³⁶Areḅeri phọ ḅịle rꞌipoḍi phọ ịmoogh ni ịnme ạruukpaany aghuḍuul dị ẹmoogh raphaaph, ạnam-dịka, ḅịle rꞌareelhe, tọrotoro esi lọ eepoogh ẹrol ọḅaram rạraar dị oghuuny okitonom.

³⁷Ịphen kụ ịdi ọlhem bọ rughuugh-adool phọ; bịdi ịighighi ghan ni esi ẹlhemom mọ rꞌẹbughom.

³⁸AHuram ạlhem kẹn ni ḍioph igbogh ạsibafu, oniin ọlo oniin oghuugh-adool. Oniin ogbogh ạbafu ạman ghan 1.8 akuḅu ogborori ọḅeeny, kụ katue ni ạpam 800 aruuku ạmuum.

³⁹Ọdi aseere ni oogh arughuugh-ude phọ ẹpe esoorom Otu Ịiḅereghi phọ, ịpheri phọ oogh phọ ẹrol ephunom mọ; oghuugh enaba phọ ạrol ọgbal elhiom esoorom mọ ḅịle rꞌemitenom erumuḍio phọ.

⁴⁰AHuram ạlhemogh ni suugh, rụsua ḅịle rꞌạrukpa. Ọdi ạmadan ni oomo oḍighi phọ ọdi aḍighinaan bọ Sọlomon ọdaam mọ ịlo Otu Ịiḅereghi Ọmoogh-we phọ: Ịyal ạroko ogbo phọ Ịyal areme phọ ẹrol bọ ạnyu ạroko ogbo phọ Ịnme izime phọ eeteneghian bọ ạnyu areme phọ Inya okuron arughuuny ekpetughe enaba phọ ịyal ạsikool, oniin okuron ḍịkool ekitonom ịnme ạtorotoro eme Ḍioph arughuugh-ude phọ Ḍioph igbogh ạsibafu phọ Oghuugh enaba phọ Ḍioph rꞌịyal ilephiri ạsinam mọ ẹpham bọ oghuugh enaba phọ Asuugh, ạrusua rꞌạrukpa phọ Oomo ạraraar Otu Ịiḅereghi phọ ịphen aHuram ạsighe ẹser-sẹr enaba kụ ạlhemenaan bọ Sọlomon odaam mọ.

⁴¹

⁴²

⁴³

⁴⁴

⁴⁵

⁴⁶Kụ ọdaam mọ ạmiin ni mọ ọlem oomo ạraraar phọ ịphen sịphe rosu ghan bọ ịka ọozaghami arukuron phọ igbo aSukot rꞌaZaretan, ẹpe Eḍiiny phọ ạJodan.

⁴⁷ẠSolomon ọ́tooghi ọmiin ẹemor ạraraar enaba phọ ịphen loor esi dị ạraraar phọ iḍiza ni ẹphughan, kụ iḍighi kụ ẹemor phọ ạbidi úlegheri.

⁴⁸ẠSolomon ạmoogh kẹn ni rạraar dị ọlhemom gol sịphe Otu Ịiḅereghi phọ: enmeny phọ, ịdaabili ọḅam ghan ạbred lọ mọngo Ẹnaan,

⁴⁹ḍioph ịmeremiom ịtozi phọ ịpe ẹmeera bọ risigh Ọgbanaghi phọ, oogh ịne ẹrol ẹpe esoorom mọ ḅịle oogh ịne ẹpe ephunom mọ; ạsifalaway phọ, ịtozi rꞌikpapham mọ;

⁵⁰ạsimogo, ạsinziri osophom ghan eeḅu ọtozi, ạrukpa, ạrukpepere ọlogh ghan ịnsens, rꞌạrumughiom oghophom ghan iiḅu ạnian; ịkomom arughuugh Ọgbanaghi phọ ḅịle rꞌiniin arughuugh Otu Ịiḅereghi phọ. Oomo ạraraar phọ ịphen ulhemom gol.

⁵¹Mem dị ạSolomon ọdaam mọ ạmadan bọ Otu Ịiḅereghi phọ, ọdi asereghi ni sịphe iisoph ooko ghan aruphua oomo ạraraar phọ ọde phọ ọdi Devid mạḅogh bọ ạngo Ọmoogh-we phọ — silva, gol ḅịle rꞌịnon ọdo ịkpirikpiri ạraraar.