Read abua 1 Ạbudaam 8 Bible Online

1 Ạbudaam 8 - abua bible

1 Ạbudaam 8

¹Kụ ạSolomon aakpomoghi oomo ikumoor awe phọ Ịzirel, oomo ikumoor awe arughunughun phọ rꞌiipolo phọ ạbidi; kụ awe phọ Ịzirel ookpomoghan kꞌạSolomon ọdaam mọ Ịzirel ẹpe Jeruselem, ịlo kọsighe Igbe Ịyo Ọmoogh-we phọ ẹpe Zạyon ẹmha phọ aDevid ọlogh ologhi Otu Ịiḅereghi phọ.

²Kụ oomo awe phọ Ịzirel ookpomoghan ọghi kꞌạSolomon ọdaam mọ olhe ẹyaal ụnwanyu Etanim, oḍual ụnwanyu esi ạlha phọ.

³Kụ oomo ikumoor awe phọ Ịzirel ookpomoghan eniin esi, kụ ariil ạrikia phọ ọsighe Igbe Ịyo phọ ọghi ọlogh ẹpe ologhi Otu Ịiḅereghi phọ. Kụ ariil ạrikia rꞌạbuo aLivai ụḅaram ni Ogbogo Ạdol Ọmoogh-we phọ rꞌoomo ạraraar arukumuan iigbia phọ ẹrol bọ sịphe phọ.

⁴

⁵Kụ ạSolomon rꞌaḍita awe phọ ạbuphe rꞌọdi ookpomoghan bọ kụ ụrol elhor Igbe Ịyo phọ, kụ ọsighe ịminighan iyool-ịga oḍighinom rạraar aghuḍum, rꞌạsinam dị kótue ogbi omuneni.

⁶Pọ kụ amem dị ariil ạrikia phọ ọsighe Igbe Ịyo Ọmoogh-we phọ ọlogh ologhi Otu Ịiḅereghi phọ oseere ẹpe Ọgbanaghi phọ, ọkaraghi ịsiphe Ạdol Iigbia phọ sịphe eeḍian ạruukpaany aghuḍuul phọ ẹmoogh bọ raphaaph phọ.

⁷Araphaaph phọ ạbidi ẹetaranu eghoph Igbe Ịyo rꞌạrokolom ọgbanam mọ edi bọ ẹpe ạnyu phọ.

⁸Kụ oḍurogh rọkolom mọ omitiom ọbo ọmiin ghan ruukuna ạrokolom mọ, ẹpe ạdol iigbia phọ ẹpe eekuna Ẹphan phọ; ụ́tol ghan ẹphen erugh phọ ụ́miin. Kụ bịdi odi ghan sịphe phọ kꞌarodon.

⁹Ẹnon ịyaar ílho ologhi Igbe Ịyo phọ, omuton ịyal ikulha ạrana phọ ịpe aMozis ạlogh bọ ologhi ịsiphe phọ Eegum aSainai, ẹpe Ọmoogh-we phọ rꞌawe phọ Ịzirel oghiran bọ ịyo phọ mem mọ bịdi ọḍua bọ eelhe phọ Ijipt omite.

¹⁰Mem dị ariil ạrikia phọ rọḍua komite, bịn ọotu amuza Otu Ạdol Ọmoogh-we phọ.

¹¹Bịn ariil ạrikia phọ útue mun úmeera úḍighi oḍighi phọ ạbidi loor esi ọotu phọ, ịdi eḍighi bọ eegu Ọmoogh-we phọ emuza sịphe Otu Ọmoogh-we phọ.

¹²Kụ ạSolomon ạghaaph mọ, “Nạ, Ọmoogh-we, maḍighi esi ạdol ẹpe okuaḍio phọ ẹlo erumuḍio phọ, kụ ọlo nạ mạḅem mọ nạ katugh sịphe ologhi ọkikiph ufiri.

¹³Mị mạlhoghonaan nyịna otu amarugh dị nạ katugh sịphe kꞌagee-pọ.”

¹⁴Kụ ọdaam mọ akiton asoman kụ ạseph oomo ạbuo ookpomoghan phọ Ịzirel. Kụ oomo awe phọ ookpomoghan bọ oḅerenu ọmeera.

¹⁵Kụ ọdi ạḅem mọ, “Ạḍiseph ẹrolonaan Ẹnaan phọ Ịzirel Ọmoogh-we phọ, ọpo ạghaaph bọ rꞌọnhu ọdi ạḅeni Devid ọde phọ ạmi, kụ ạsighe rạghaagh ọdi aḍighi amuneni ạḅem mọ,

¹⁶‘Kꞌaḍio phọ mị ạsighe bọ we phọ ạmi ạḍuanam ẹpe Ijipt, mị ụ́saḅar ẹmha sịphe oomo iipolo phọ Ịzirel dị mị kạlogh otu dị aḍien ạmi kẹtol sịphe; mị ụsaḅar Devid mọ ọdi aphogh ghan we phọ ạmi Ịzirel.’”

¹⁷Kụ ạSolomon mọ, “Kụ ịrol ghan ni ologhi aDevid ọde phọ ạmi ịlo ọloghonaan otu ḍien Ọmoogh-we Ẹnaan phọ Ịzirel,

¹⁸kụ Ọmoogh-we phọ ạḅeni ọde phọ ạmi mọ, ‘Ịpe edi bọ sịphe ologhi phọ ạna ịlo ọloghonaan aḍien phọ ạmi otu, ẹnighe ni agey ịitughian phọ ịphen edi bọ sịphe ologhi phọ ạna.

¹⁹Nạ kụ kạ́logh bọ otu phọ; kụ ọony dị kọmaranaan nyịna, ọdi kụ kạloghonaan bọ ḍien phọ ạmi otu phọ.’

²⁰“Kụ Ọmoogh-we phọ maḍighi ịpe ọdi ạghaaph bọ, kụ mị mamite ạsighe esi aDevid ọde phọ ạmi, ạtolom ạgada ạda Ịzirel, ịdipho Ọmoogh-we phọ aguanaan bọ, kụ mị mạlhoghonaan Otu Ịiḅereghi phọ ḍien Ọmoogh-we Ẹnaan phọ Ịzirel.

²¹Sịphe phọ mị maḍighinaan esi ẹlo Igbe Ịyo phọ. Ologhi ịsiphe phọ kụ esi dị ịyo phọ ịpe Ọmoogh-we phọ rꞌạburude phọ ayira oghiran bọ kụ edi, mem mọ dị ạsighe bọ bịdi ạḍuanam ẹpe eelhe phọ Ijipt.”

²²Kụ ạSolomon ạmeera sịphe enmeny ạrikia Ọmoogh-we phọ, sịphe esomanan oomo awe ookpomoghan phọ Ịzirel, kụ ạlhel rạghaagh ọdi aphoghomi kẹ, kụ ọdi ạḅem mọ,

²³“Ọmoogh-we Ẹnaan phọ Ịzirel; ẹnon Ẹnaan dị ẹrol ịdipho ạna ílho, mꞌẹpe ạnyu ạke phọ kẹn mꞌịsien ade phọ. Nạ ạpamanam ni ịyo phọ ạna rꞌọnma ighirigiir phọ ạna esi abutelhedom mọ ạna, bụphe ọsighe bọ oomo iloghi phọ ạbidi kụ rotelhiom ghan esomanan ạna.

²⁴Nạ ụphamanam ni otelhedom mọ ạna Devid ọde phọ ạmi ịpe nạ ạḅeni bọ nyọdi. Ịpe nạ ạsighe bọ ọnhu ạna ạghaaphom, nạ mạsighe ḍịghaagh ạna aḍighinom rodon.

²⁵Kụ iḍighi nyịidipho Ọmoogh-we Ẹnaan phọ Ịzirel maḍighinaan otelhedom mọ ạna Devid ọde phọ ạmi ịpe nạ aguanaan bọ kụ ạḅem mọ kẹ́bile bịn dị esi phọ ạna dị oye kạ́tol dị kạtolom ạgada ọdaam eelhe phọ Ịzirel eru mạar dị ạnmuny phọ ạna ọphamaghan ni siloor ạbidi orelhe ghan egbodo ạmi ịdipho nạ arelhe ghan bọ egbodo ạmi.

²⁶Kụ nyịidipho mị rạaḅereghi ni nyịna Ẹnaan phọ Ịzirel mọ seseeny ḍighi ni ọghaaph phọ ạna amuneni, ịpe nạ ạḅeni bọ otelhedom mọ ạna Devid ọde phọ ạmi.

²⁷“Kụ keḍighi ni ịdi Ẹnaan katugh sịen aḅirini phọ ḍụghum? Ạke phọ rꞌokuaḍio phọ nyịna káḍigh. Kụ ọphon phọ, Otu phọ ọphon mịna ạlogh bọ kụ ạmanam ghan eeghe ịyaar?

²⁸Kụ nạ rakueni ghan ni ịiḅereghi otelhedom mọ ạna rꞌịlom ạghusan phọ ọdi. Ọmoogh-we Ẹnaan phọ ạmi, nạghan ni emoghi phọ ạmi rꞌịiḅereghi phọ ịpe otelhedom mọ ạna rạaḅereghi bọ egbodo phọ ạna rodon,

²⁹ạḅarion riḍien phọ ạna asomoriom Otu phọ ọphon ḍughul rꞌootaany, asomoriom esi phọ ịsien nạ ạḅem bọ mọ aḍien phọ ạna kẹtol sịphe phọ, ạnaghanan ịiḅereghi phọ ịpe otelhedom mọ ạna rạaḅereghi bọ, ịlo esi phọ ịsien phọ.

³⁰Ạnaghanan ịlom ạghusan otelhedom mọ ạna rꞌawe phọ Ịzirel, mem lọ bịdi rọoḅereghi ịlo esi phọ ẹphen, kụ ạrol ẹpe amarugh phọ ạna ẹpe kꞌạke ạnaghanan, kụ mem lọ nạ ạnaghan, sạr ạwilenaan.

³¹“Eru mạar dị oye ạpioman matuman ọdi kụ oseenaan ịyo, kụ aru oghir ịyo phọ egbodo enmeny ạrikia phọ ạna sịen Otu phọ ọphon,

³²pọ tọl ẹpe kꞌạke ạnaghan, aḍighi, asophonaan ọoruen butelhedom mọ ạna, aphume nyọpo ạpioman bọ, ạsighe ịkaraph phọ ọdi ạḅam ẹmhu ọdi; kụ nyọpo agbiom mọ ọdi oye aruukuan, kụ aḅulemian nyọdi ịlo oye aruukuan.

³³“Mem lọ ạmulogh-ḍien rạze we phọ ạna Ịzirel loor esi ịkaraph phọ ạbidi, ịpe bịdi oḍighi bọ nyịna, kụ eru mạar dị bịdi ologhoma kụ okiton osoman nyịna kụ olegheri ḍien phọ ạna, kụ ọoḅereghi kụ ọlom ghụsan sịen Otu phọ ọphon,

³⁴kụ nạ ạrol ẹpe kꞌạke ạnaghan, pọ sạr ạwilenaan ịkaraph awe phọ ạna Ịzirel, ạsighe bịdi asiemi ẹpe ade phọ ạḍiphe nạ ạngo bọ bụrude phọ ạbidi.

³⁵“Kụ mem lọ oghughi ẹpe ạke phọ kụ ọlophia ụ́loph loor ịkaraph dị oḍighi oru esi ạna, kụ eru mạar dị bịdi oru egbodo esi phọ ịsien kụ ọoḅereghi kụ olegheri ḍien phọ ạna, kụ okiton esi ịkaraph phọ ạbidi mem dị nạ rạliom bịdi,

³⁶pọ nạghanan bịdi ẹpe kꞌạke phọ nạ odi bọ ạsar ạwilenaan ịkaraph abutelhedom mọ ạna awe phọ ạna Ịzirel, ạtughemi bịdi igeny areten ịpe bịdi kotelhe ghan bọ, aseere ọlophia sịphe ade phọ ạḍiphe nạ ạngo bọ we phọ ạna mọ ọmoogh phọ.

³⁷“Eru mạar dị ịgbakuro edi sịphe ade phọ; eru mạar dị mꞌolia mꞌọogbi ade mꞌaroowo mꞌigirubia mꞌisunu, mem lọ ạmulogh-ḍien phọ ạbidi asophoghom bịdi sịphe eḍighom ẹmha phọ tọrobo ẹepoph rꞌạtorobo ẹzegh;

³⁸tọrobo ịiḅereghi rꞌạtorobo ịlom dị oye ạaḅereghi kụ ạlom, mụghumo oomo awe phọ ạna Ịzirel dị tọrobo oye kalegheri ni sịphe ologhi phọ ọdi ịpe rọliom bọ nyọdi, rꞌạghelhe phọ kụ ạlhel rạghaagh ọdi asumeriom Otu phọ ọphon;

³⁹pọ tọl sịphe amarugh phọ ạna ẹpe kꞌạke ạnaghan, ạsar ạwilenaan, kụ aḍighi ạngo tọrobo oye ịdipho nạ alegheri bọ ni ologhi phọ ọdi, kụ ạdaph reten phọ ọdi. Nạ bịn kụ ulegheri oomo iloghi ạnmuny awe phọ ạna,

⁴⁰ọbo bịdi oghiilaan ghan nyịna oomo asuḍughul-otu phọ ịpe bịdi kọtol bọ sịphe ade phọ ạḍiphe nạ ạngo bọ bụrude phọ ayoor.

⁴¹“Ịdipho kẹn, mem lọ ooruen dị útu ọlo kꞌawe phọ ạna Ịzirel, dị ạḍua egher ẹmha kụ aru loor aḍien phọ ạna,

⁴²(ịdi eḍighi bọ bịdi mọnaghan ni ịlo aḍigbogh aḍien phọ rꞌaḍilom ạḍighaagh phọ ạna, rꞌosele aḍikpe phọ ạna) mem lọ dị aru rạaḅereghi sịen Otu phọ ọphon,

⁴³tọl sịphe amarugh phọ ạna ẹpe kꞌạke ạnaghan, ạdaph oomo phọ ịpe ooruen phọ ạtu bọ kụ ạmagh nyịna, ẹrol dị oomo awe ịsien aḅirini phọ olegheri nyịna, oghiilaan nyịna, ịdipho awe phọ ạna Ịzirel roḍighi ghan bọ; ọbo bịdi olegheri mọ ughol ḍien phọ ạna kụ ọlogh bọ otu phọ ọphon.

⁴⁴“Eru mạar dị awe phọ ạna ọghi eenom ẹgham rꞌạbumulogh-ḍien phọ ạbidi, tọrobo esi nạ katom bọ bịdi, kụ bịdi ọoḅereghi ọngo Ọmoogh-we phọ osomoriom ẹmha phọ ẹpe nạ azua bọ rꞌOtu phọ ọpo mị aghol bọ ḍien ạna kụ ạlogh,

⁴⁵pọ tọl ẹpe kꞌạke ạnaghan ịiḅereghi phọ ạbidi rꞌịlom mọ ạbidi kụ aḍighinaan ịpe bịdi rọlom bọ, rọwa bọ.

⁴⁶“Kụ eru mạar dị bịdi oḍighi ịkaraph oru esi ạna (ịdi eḍighi bọ oye ólho dị ịkaraph ráḍighi ghan) kụ nạ ạghagham bịdi ologhi kụ ạḅogh bịdi ạngo bụmulogh-ḍien phọ ạbidi kụ osiphi bịdi ọpham ọḍuanam ọpham bịdi ogheelom ẹpe ade ạbumulogh-ḍien phọ ạbidi mꞌẹkel mꞌeesulom,

⁴⁷kụ iloghi phọ ạbidi ekitonu enmia ẹkonono yogh regbiriba ẹpe ade phọ osiphi bọ bịdi ọpham ogheelom, kụ bịdi okiton kụ ọlom nyịna kụ ọḅem mọ, ‘Yoor moḍighi ni ịkaraph esi ạna, yoor mọpioman ni oḍighi ịdi ị́nighe,’

⁴⁸eru mạar dị bịdi ọsighe ni oomo iloghi phọ ạbidi rꞌuwaloor phọ ạbidi, kụ okiton osoman nyịna, ẹpe de ạbumulogh-ḍien phọ ạbidi, bụphe osiphi bọ bịdi, kụ ọoḅereghi osomoriom de phọ ạbidi, ḍịphe nạ ạngo bọ bụrude phọ ạbidi, ẹmha phọ nyẹpe nạ ạsaḅar bọ, rꞌOtu phọ ọpo mị ạloghonaan bọ ḍien phọ ạna,

⁴⁹pọ tọl ẹpe kꞌạke sịphe amarugh phọ ạna ạnaghan ịiḅereghi phọ ạbidi rꞌịlom ạghusan phọ ạbidi, aḍighinaan bịdi ịpe bịdi rọwa bọ.

⁵⁰Ạsar ạwilenaan we phọ ạna ịkaraph phọ bịdi oḍighi bọ esi ạna rꞌoomo ọpioman phọ bịdi ọpioman bọ nyịna. Mọoghom bịdi ọnma ighirigiir egbodo ạbuphe osiphi bọ bịdi, ọbo bịdi ọnma aani bịdi ighirigiir,

⁵¹loor esi dị bịdi phọ awe phọ ạna rꞌẹmoogh ạna, bụphe nạ ạsighe bọ ẹpe eelhe phọ Ijipt ạḍuanam ogbo ẹghologhol ooni ạnian phọ.

⁵²“Oboom oboom Ọmoogh-we, ḅạrion riḍien ạna aphoghomiom ịlom ạghusan otelhedom mọ ạna, rꞌịlom ạghusan awe phọ ạna Ịzirel, ạnaghanan bịdi esi oomo ạraraar phọ ịpe bịdi ọmagh bọ nyịna.

⁵³Nạ mạgbatan ni bịdi ạsighe esi oomo awe ịsien aḅirini phọ, ạsighe aḍighi bụo ạna, ịdipho nạ ạghaaph bọ ạḅeni Mozis otelhedom mọ ạna mem mọ nạ Ogbogh Ọmoogh-we phọ ạsighe bọ bụrude phọ ayoor ạḍuanam ẹpe eelhe phọ Ijipt.”

⁵⁴Mem dị ạSolomon ạmadan bọ oomo ịiḅereghi phọ ọdi ịphen rꞌịlom mọ ọdi esi Ọmoogh-we phọ, kụ ọdi aḅetenu ạmeera ạghiom rạghaagh ọdi ạnyu

⁵⁵ạseph ḍita oomo ookpomoghan phọ Ịzirel rꞌeboom ẹḍogh kụ ạḅem ghan mọ,

⁵⁶“Ạḍiseph ẹrolonaan Ọmoogh-we phọ ạngo bọ ẹepho we phọ ọdi Ịzirel, ạdaph oomo ịpe ọdi aguanaan bọ. Rꞌeniin ekpo ísugha esi oomo igey phọ ịpe ọdi aguanaan bọ Mozis otelhedom mọ ọdi.

⁵⁷Ọmoogh-we Ẹnaan phọ ayoor ụrolonaan ni iyoor ịdipho ọdi ạrolonaan bọ bụrude phọ ayoor. Ọdi iyoor kụ́wile, ḅịle kẹn iyoor kúghel.

⁵⁸Ọdi aselemi iloghi phọ ayoor, yoor oḍuom ghan nyọdi ologhi, ọdaph ghan oomo areten phọ ọdi kụ orelhe, ooko ghan iilogh phọ ọdi rꞌịtooghi phọ ọdi rꞌịiruen phọ ọdi ịpe ọdi ạlogh bọ ạngo bụrude phọ ayoor.

⁵⁹Ikpo ọnhu phọ ạmi ịphen mị ạlomom bọ ghụsan Ọmoogh-we phọ etuman ni Ọmoogh-we Ẹnaan phọ ayoor ḍughul rꞌootaany kụ aḍighinaan otelhedom mọ ạna ịpe ọdi rạwa bọ,

⁶⁰ọbo oomo awe ịsien aḅirini phọ olegheri mọ Ọmoogh-we phọ kụ Ẹnaan phọ, ẹnon ílho.

⁶¹Ịḅam iloghi esi Ọmoogh-we Ẹnaan phọ ayira erelhiom ghan ịtooghi phọ ọdi rꞌooko ghan iilogh phọ ọdi, ịduon nyina edi bọ rodon.”

⁶²Kụ ọdaam mọ rꞌoomo awe phọ Ịzirel rꞌọdi ọphinyon rịkia egbodo Ọmoogh-we phọ.

⁶³Kụ ạSolomon ạphighiron ẹkia ẹboroph ạngo Ọmoogh-we phọ ịyaldi rꞌịyal ọonir ạsinam rꞌokuron rꞌịyaldi ọonir iyool-ịga. Kụ ọdaam mọ rꞌoomo awe phọ Ịzirel ọḅogh Otu Ịiḅereghi phọ ọngo Ẹnaan.

⁶⁴Eniin phọ aḍio phọ kụ ẹdi ọdaam mọ ạasa oghoony phọ odi bọ esomanan Otu Ịiḅereghi phọ ạlogh iigbia, ịdi eḍighi bọ dị aḍighi ịyaar aghuḍum oguom ạnian, rꞌịyaar aghuḍum ịnam, rꞌịyaar aghuḍum ẹboroph. Enmeny enaba phọ ekom ni ẹpughan ọphighironom oomo ạrikia mọ ịphen.

⁶⁵ẠSolomon alhe ẹyaal mem mọ ạmuphe phọ, ọdi rꞌoomo aḍita awe phọ Ịzirel. Bịdi ọḍuaghu ẹpe eḍighom ạHamat, ẹsighe ẹghi esiemi ẹpe Ọphiiny Ijipt, oru ookpomoghan egbodo Ẹnaan phọ ayoor Ọmoogh-we phọ olhe ẹyaal phọ oḍual aḍughul-otu.

⁶⁶Rẹman ọphaanya aḍughul-otu, kụ ọdaam mọ ạḅeni we phọ mọ ogheel. Kụ bịdi ọseph ọdaam mọ, kụ oḅerenu uwo otu agheel otu ọdi rꞌibo rꞌọḅaal ologhi, loor esi oomo iiḅi phọ ịpe Ọmoogh-we phọ aḍighi bọ Devid otelhedom mọ ọdi rꞌỊzirel awe phọ ọdi.