Read abua 2 Ạbudaam 11 Bible Online

2 Ạbudaam 11 - abua bible

2 Ạbudaam 11

¹Mem dị Atalaya onhiin phọ Ahazaya ạmiin bọ mọ ọony phọ ọno mamugh, bịn dị aḅetenu aphiemi oomo ọophi arughunughun phọ ịpe rẹda ghan bọ.

²AJehoseba ọnyani ạJehoram ọdaam mọ, umarani Ahazaya, ạsighe Joas ọony phọ Ahazaya ạḍuanam esi ạbuphe bịdi rọwa bọ ịlo ọze sịphe ogbo ạnmuny ạbudaam mọ. AJehoseba ạaghi nyọdi rꞌoobia phọ ọdi ẹpe osoph ẹmina sịphe Otu Ịiḅereghi phọ, akpetenaan nyọdi ghisigh Atalaya ọbo kokiigh ghan bọ nyọdi.

³Ọdi ạrol bọ ḍịghaagh ạnir phọ odiiny ạsia. Ọdi rꞌạnir phọ ạaghian sịphe Otu Ịiḅereghi phọ, kụ Atalaya ạda de phọ.

⁴Rẹman oḍual ạsia kụ ạJehoyada arom kụ ọghi ookpomoghi bụo ạrumhu phọ ropogh bọ we ẹgham dị opel oniin okuron awe, ọḅaram bụo ịtooghi phọ rꞌạbuo eghiil phọ, kụ ọsighe bịdi oruomonaan nyọdi sịphe Otu Ịiḅereghi phọ, ọdi rꞌạbidi oghiran ịyo, kụ ọdi aḍeenaan bịdi mọony ọdaam mọ.

⁵Kụ ạlogh ologh ạngo bịdi kụ ạḅeni bịdi mọ, “Ịduon kụ ịdi nyina keḍighi. Muniin abin esi ịraar asibin phọ anyina bụphe roḍigh ghan bọ sịen ḍio iigbia phọ, nyina kụ kekori ghan eghuugh otu ọdaam mọ.

⁶Muniin abin esi ịraar phọ, nyina kụ kẹtol sịphe Ọnhu-aḍibuo aSur phọ. Muniin abin esi ịraar phọ, nyina kụ kẹtol ọman ạbuo eghiil phọ ẹrol dị nyina ekori ghan eghuugh otu phọ, ọbo konyuughi ghan bọ olereghi.

⁷Ịyal abin esi anyina ạbuphe romite ghan bọ ḍio iigbia phọ kọḍua, nyina kụ kekori ghan epogh Otu Ịiḅereghi phọ, ekoom ọdaam mọ.

⁸Nyina eko ọdaam mọ ekitonom, tọrobo oye ạpham rạraar ẹgham ịlo odi ḍịghaagh. Tọrobo oye lọ aru ạabeeph sịphe nyina edi bọ, pọ ikiigh oye phọ ọpo. Ịtol sịphe kꞌọdaam mọ, dị amite ạghi aḅula aḍigh.”

⁹Kụ aḍita ạbuo ạrumhu phọ ropogh bọ we ẹgham dị opel oniin okuron awe phọ ọdaph ghan oomo ịpe ạJehoyada oyil ạrikia phọ ạḅeni bọ bịdi kụ oḍighi ghan. Tọrobo oye ạsighe we bụphe ọdi: bụphe rotu ghan bọ koḍigh ḍio iigbia phọ rꞌạbuphe komite bọ ọḍua ḍio iigbia phọ; kụ ọghi ọteeny Jẹhoyada oyil ạrikia phọ.

¹⁰Kụ bụo ạrumhu awe ẹgham mọ opel bọ oniin okuron, bịdi kụ ạbudi oyil ạrikia phọ ạsighe bọ ịsoph rꞌạrusuaram aDevid ọdaam mọ ạngo, ịdi ẹrol sịphe Otu Ịiḅereghi phọ.

¹¹Kụ bụo eghiil phọ ọmeregha sịphe phọ, tọrobo ọnyo ạbidi ạpam ni rạraar ẹgham ịlo ọdi ḍịghaagh, oko ọdaam mọ okitonom emiigh ẹpe ạḍighaagh esoorom mọ Otu Ịiḅereghi phọ ẹghi esiemi ẹpe ạḍighaagh ephunom Otu Ịiḅereghi phọ, ịigaany enmeny ạrikia phọ rꞌịigaany Otu Ịiḅereghi phọ.

¹²Kụ ạJehoyada ạsighe mọony ọdaam mọ amitiom kụ ạsighe eghoony ọdaam ẹmha phọ azu, ạsighe ḍịnya iilogh phọ ạngo. Ọsighe nyọdi oḍighi ọdaam ookuom nyọdi elho, kụ okpoolha rạghaagh ạbidi kụ ọḅem ghan mọ, “Ighiph ẹpham orum ọdaam mọ!”

¹³Mem dị Atalaya ạnaghan bọ ọyugh ạbuphe rokori ghan bọ esi phọ rꞌawe phọ, kụ ọdi ạghi ạteeny we phọ sịphe Otu Ịiḅereghi phọ.

¹⁴Kụ ạnir phọ aphogh. Kụ, pogh aani, ọdaam mọ ạmeera ịigaany ẹko, ọdaph eḍighinom ịyaar ịpe roḍighi ghan bọ, kụ bụo ạrumhu phọ rꞌaruuḍue ạbidi ọmeera otuman ọdaam mọ, kụ oomo awe ekpisi phọ ẹpe phọ robo ropula yogh ghan ruuḍue. Kụ Atalaya ạphanyi rukpe ọdi loor ọto kụ ramoghi mọ, “Ịphen phọ areekeleghian. Ịphen phọ areekeleghian.”

¹⁵ẠJehoyada oyil ạrikia phọ ạlhogh ologh ạngo bụo ạrumhu awe ẹgham mọ opel bọ oniin okuron awe rꞌạbuphe ropogh ghan bọ we ẹgham mọ, kụ ạḅeni bịdi mọ, “Ịsighe ạnir phọ rꞌạbuphe ọdaph bọ nyọdi emitiom ẹmeremi sịphe ịbaay ạsikool phọ.” Ịyaar phọ eḍighi bọ oyil ạrikia phọ ạḅeni bịdi mọ kúkiigh ạnir phọ sịphe Otu Ịiḅereghi phọ.

¹⁶Kụ bịdi ozin ạnir phọ ọghimom otu ọdaam mọ kụ oghiigh sịphe Ọnhu-aḍibuo Ịnam-ạsu phọ.

¹⁷ẠJehoyada aghire ịyo aghuḍuul mọ ọdaam mọ rꞌawe phọ aJuda oḍighi we Ọmoogh-we phọ.

¹⁸Kụ oomo awe ạbuo ẹpe ade phọ ọghi oḍigh sịphe otu phọ aBaal ogbonyon renmeny ạrikia phọ rꞌigbudu phọ olhereghi, ọḅaram rạraar phọ ịpe ọkaaghi bọ oḅomoghi, okiririph bịdi, oghiigh Matan oyil ạrikia phọ aBaal sịphe esomanan ạrikia phọ. Kụ ạJehoyada ạma we dị kopogh ghan Otu Ịiḅereghi phọ.

¹⁹Kụ ọdi ạsighe bụo ạrumhu awe ẹgham dị opel oniin okuron awe rꞌạbuo ịtooghi rꞌạbuphe ropogh ghan bọ esi phọ, rꞌoomo awe bụo ịsiphe ade phọ; kụ bịdi ọsighe ọdaam mọ omitiom sịphe Otu Ịiḅereghi phọ. Bịdi ọsighe nyọdi orelhiom ẹpe Ọnhu-aḍibuo Oghoony phọ. Ạbuo eghiil phọ ọghi oḍigh otu ọdaam mọ, kụ ọrolomi nyọdi ạgada ạbudaam mọ.

²⁰Kụ oomo awe ạbuo ịsiphe ade phọ robo, kụ ẹmha phọ enhamian, loor esi dị moghiigh Atalaya matuman otu ọdaam mọ.

²¹AJoas ạman bọ oḍual ạsia kụ amiigh bọ ọda aJuda.