Read abua 2 Ạbudaam 14 Bible Online

2 Ạbudaam 14 - abua bible

2 Ạbudaam 14

¹Ẹman bọ ịyal ạsia ạJehoas ọony phọ ạJehoahaz ạda bọ Ịzirel, kụ amem dị Amazaya ọony phọ aJoas amiigh ọda Juda.

²Ọdi ạman bọ ịyaldi rꞌoogh ạsia kụ dị amiigh bọ ọda phọ. Ọdi ạda bọ ẹman bọ ịyaldi rꞌesugha ạsia ẹpe Jeruselem. Ḍien onhiin ọdi ughol mọ aJehoadan ọlo aJeruselem.

³Ọdi aḍighi ni ịdi eseleman ghan ghisigh Ọmoogh-we phọ, kụ ọlo ị́kigh ịpe aDevid ọde phọ ọdi. Oomo eḍighinom mọ ọdi ịghigh ịdipho aJoas ọde phọ.

⁴Kụ ọlo ọdi óphiemi riisi ooseeny aruru phọ, kụ awe phọ ụghi ghan ni ọphinyon rịkia ọḅile ọsuughi ịnsens sịphe aroogbolom mọ.

⁵Kụ mem dị ạdol ẹmoogh ọda phọ ọdi rẹmeera, kụ Amazaya ạze butelhedom mọ ọdi bụphe oghiigh bọ ọde phọ ọdi ọdaam mọ.

⁶Ọdi ọ́ze nmụny ạrookom-enu phọ, ọdaph ịpe ọge bọ sịphe ạḍinya Ologh phọ aMozis ọpo Ọmoogh-we phọ ạlogh bọ kụ ạḅem mọ, “Kẹ́tuan ẹkaraph eḍighinom ạraraar ạnmuny ẹze bụrude, kẹn kẹ́tuan ẹkaraph eḍighinom ạraraar ạburude ẹze nmụny, ịdi eḍighi bọ uwo ịkaraph ọdi kụ katelhian ghan ịkaraph ọdi.”

⁷Amazaya ạze we ẹgham Idom dị ọman ḍioph ọonir awe ẹpe Eḍiiny Aboph phọ, ạsighe Sẹla mem ẹgham mọ, kụ aghol esi phọ mọ aJokteel kꞌarodon.

⁸Amazaya arom rụukpaany mọ ọghi ọḅeni ạJehoas Ọdaam mọ Ịzirel mọ ọdi aru bụno kobe ẹgham.

⁹Kụ ạJehoas Ọdaam mọ Ịzirel arom dom ạghiom Amazaya Ọdaam mọ aJuda ạḅeni mọ, “Ooḅurom ọpo odi bọ ạnyu ạraaḅaraph ạLebanon arom ạghiom ọsaga phọ ẹpe Lẹbanon ạḅeni mọ ạngo ọnyani phọ ọdi mọony phọ ọno dị aphin. Kụ elhom ẹnam ẹlo ạLebanon dị reten ekul ooḅurom eler.

¹⁰Nạ Amazaya mạze Idom ageny, kụ ologhi ạna maphoophe nyịna ạkiom ạnyu. Arughuenian phọ ạna edi bọ ḍịghaagh ạna ẹrol sịphe otu phọ ạna. Esi ika kụ nạ ạtu bọ aphoophe loor loor ịkaraph phọ ịphen phọ? Esi ika kụ ẹdi nạ rạwa bọ ịiḅaghami ẹrol dị nạ ameel, aJuda ọdaph nyịna omeel.”

¹¹Amazaya ọ́naghan, kụ ạJehoas Ọdaam mọ Ịzirel aḅetenu ạghi. Kụ ọdi rꞌAmazaya ọdaam mọ aJuda ozuan ẹgham ẹpe Bẹt Semes aJuda kụ ọmoogh bọ.

¹²Kụ Ịzirel ọkpar opu Juda; kụ bịdi osumughu uwo kꞌọdi asuma agheel kꞌọdi.

¹³Kụ ạJehoas Ọdaam mọ Ịzirel asiph Amazaya ọdaam mọ aJuda ẹpe Bẹt Semes ạkasaghiom. Kụ aten ạghi asi Jeruselem alhereghi iikpe oghoony ẹmha phọ emiigh sịphe Ọnhu-aḍibuo Ifraim ẹsighe esiemi ẹpe Ọnhu-aḍibuo Ẹkol, ẹdoony esi dị ẹwa ọman ịyal okuron akuḅu.

¹⁴Kụ ọdi ạsighiogh oomo asilva rꞌagol, rꞌoomo ạsimogo phọ ịpe ẹrol bọ sịphe Otu Ịiḅereghi phọ, rꞌoomo ikpoki phọ ẹrol bọ sịphe otu ọdaam mọ rꞌaruphua dị oseere. Kụ ọdi asiphi we ạḍuanam kụ agheelom Sameria.

¹⁵Kụ oomo ịnon ịlo ạJehoas, rꞌịikpo phọ ọdi, rꞌịpe ọdi rꞌAmazaya ọdaam mọ aJuda eeghi bọ ẹgham mọ, ọge ni sịphe ạḍinya phọ ịpe emiteghu bọ mem ạbudaam mọ Ịzirel.

¹⁶Kụ ạJehoas amugh ạtuonom bụrude phọ ọdi, kụ oḍi nyọdi otumeniom bụdaam mọ Ịzirel ẹpe Sameria, kụ aJeroboam II ọony phọ ọdi ạsighe dọl phọ ọdi ạda.

¹⁷Kꞌamem mọ ạJehoas ọdaam mọ Ịzirel amugh bọ, Amazaya ọdaam mọ aJuda ạda ḍioph rꞌoogh ạsia kụ agbi omugh aani.

¹⁸Kụ oomo ịnon ịlo Amazaya, ọge ni sịphe ạḍinya phọ ịpe emiteghu bọ mem ạbudaam mọ aJuda.

¹⁹Awe uḅian oghiigh Amazaya ẹpe Jeruselem, kụ ọdi asuma agheel ẹpe Lakis. Kụ bịdi ọtuonom nyọdi ẹpe phọ kụ oghiigh.

²⁰Kụ bịdi ọsighe nyọdi ọsaany ạnyu ạsu ọpham nyọdi arighelom Jeruselem kụ oḍi nyọdi otumeniom bụrude phọ ọdi ẹpe ẹmha phọ aDevid.

²¹Kụ oomo aweye phọ aJuda ọsighe Uzaya dị mạman ḍioph rꞌodiiny ạsia kụ oḍighi ọdaam dọl phọ Amazaya ọde phọ ọdi.

²²Ọde phọ ọdi romugh bọ kụ Uzaya eenan Elat aḅulemi ạngo Juda.

²³Rẹman ḍioph rꞌoogh ạsia dị Amazaya ọony phọ aJoas mạda Juda kụ aJeroboam ọony phọ aJoas aḍighi ọdaam mọ Ịzirel ạrol ghan ẹpe Sameria kụ ạtooghi esi inyadi rꞌoniin ạsia.

²⁴Kụ ọdi aḍighi yogh ịkaraph ghisigh Ọmoogh-we phọ. Ọdi ọ́wile oomo ịkaraph phọ ịpe aJeroboam ọony phọ aNebat aḍighi yogh bọ, ọpo aḍighi bọ ịdi Ịzirel ọtuan oḍighi yogh ịkaraph.

²⁵Kụ ọdi aḅulemi ọku ade phọ Ịzirel emiigh eḍighom ạHamat ẹsighe esiemi ẹpe oboom Ọphiiny-Ạla ọdaph ịpe Ọmoogh-we Ẹnaan phọ Ịzirel ạghaaph bọ ạḅeni Jona otelhedom mọ ọdi, ọony phọ Amitai, oyil phọ ạGat Hefer.

²⁶Ọmoogh-we phọ ạmiin mọ ịminimiin phọ Ịzirel rekiḍim kẹphughan. Oye ósugha dị rạ́miinom, mꞌọnyo arisigh mꞌọnyo ẹbene. Oye ọloghonaan ạḍighaagh Ịzirel ólho.

²⁷Ọmoogh-we kọ̋ḅem ghan mọ ọno kagbuurogh ḍien phọ Ịzirel ạsighe ẹpe kꞌạke; kụ esi ạḍighaagh aJeroboam II ọony phọ aJoas kụ ẹdi dị ạsighe bọ ạphelom Ịzirel.

²⁸Kụ oomo ịnon ịlo aJeroboam II, rꞌịikpo phọ ọdi, rꞌạraagham mọ ịpe ọdi eeghi bọ, rꞌịpe ọdi ạsighe bọ Dạmaskos rꞌạHamat eru bọ ịlo aJuda ạngo Ịzirel ọge ni sịphe ạḍinya ịpe emiteghu bọ mem ạbudaam mọ Ịzirel.

²⁹AJeroboam II amugh ạtuonom bụrude phọ ọdi kụ oḍi nyọdi otumeniom bụdaam mọ Ịzirel. Kụ ạZekaraya ọony phọ ọdi ạsighe dọl phọ ọdi ạda.