Read abua 2 Ạbudaam 16 Bible Online

2 Ạbudaam 16 - abua bible

2 Ạbudaam 16

¹Ẹman bọ ḍioph rꞌoḍual ạsia ịpe aPeka ọony phọ ạRemalaya ạda bọ Ịzirel kụ amem dị Ehaz ọony phọ aJotam amiigh ọda aJuda.

²Ehaz ạman bọ ịyaldi ạsia kụ dị amiigh bọ ọda phọ. Kụ ọdi ạda bọ ḍioph rꞌodiiny ạsia ẹpe Jeruselem, kụ ọdi óḍighi ghan ịlo eseleman risigh Ọmoogh-we Ẹnaan phọ ọdi, ọ́daph reten aDevid ọde phọ ọdi.

³Ọdi ạdaph ghan reten ạbudaam mọ Ịzirel; kụ kẹn ọdi aḍighi ịdi ọony ọdi arelhe egu ạnian kụ aten; ạdaph ḅạphanya ạbuo awe areelhe phọ bụphe Ọmoogh-we phọ aphorogh bọ kụ awe phọ Ịzirel ọsighe bọ de phọ ạbidi.

⁴Kụ ọdi ạphighironaan ẹkia ạsuughi ịnsens, ẹpe oomo aroogbolom mọ rꞌiizin oomo ạrogboko phọ ịpe edi bọ ẹpe phọ.

⁵ARezin ọdaam mọ ạSiria rꞌaPeka ọdaam mọ Ịzirel ọghi oruphiom ẹgham Jeruselem, kụ bịdi ụ́kpar úpu Ehaz.

⁶Amem mọ ạmuphe phọ kụ ẹdi ọdaam mọ Idom ạar bọ Elat aḅulemi ạngo Sịria, aphorogh bụo aJu phọ ẹpe Elat, kụ bụo ạSiria ogheel ẹpe Elat otugh ẹpe phọ kꞌarodon.

⁷Ehaz arom dom ạghiom Tịglat Pileser ogbogh ọdaam mọ Asiria mọ, “Mị otelhedom ạna; mị ọony phọ ạna. Tue ụutoghion ịmi ạsighe ḍịghaagh ọdaam mọ ạSiria rꞌạḍighaagh ọdaam mọ Ịzirel. Bịdi oḅetenu bịn otu uzuom ịmi.”

⁸Kụ Ehaz ạsighe gol rꞌasilva phọ ọmiin bọ sịphe Otu Ịiḅereghi phọ rꞌoomo ikpoki phọ ọmiin bọ sịphe otu ọdaam mọ, ạsighe ạghiom aanmoom ruunmo ogbogh ọdaam mọ Asiria.

⁹Kụ ọdaam mọ Asiria ạnaghanan nyọdi kụ ạghi azuom ẹgham Dạmaskos ạsighenom, aghiigh Rezin kụ ạsighe we phọ ạDamaskos ạghi arughemi ẹpe Kir.

¹⁰Ehaz ọdaam mọ ạghi Dạmaskos ozuan Tịglat Pileser ogbogh ọdaam mọ Asiria, kụ ạmiin enmeny ạrikia dị edi ẹpe Dạmaskos. Kụ Ehaz arom ạghiom Yuraya oyil ạrikia phọ ọdo ịpe enmeny ạrikia phọ ẹrol bọ rꞌẹloghom enmeny phọ, rꞌoomo ịpe oḍighi yogh bọ.

¹¹Kụ aYuraya oyil ạrikia phọ ạlogh enmeny ạrikia ạdaph oomo ịpe Ehaz ọdaam mọ ạḅeni bọ nyọdi, ạlogh ạmadan kụ egbi ọteeny amem dị Ehaz ọdaam mọ ạḍua ẹpe Dạmaskos kụ aru.

¹²Ọdaam mọ rọḍua ẹpe Dạmaskos roru rosi kụ rọmiin enmeny ạrikia kụ aḍuraan ạabeeph sịphe enmeny ạrikia phọ.

¹³Kụ ọdi aḍighi ịyaar aghuḍum oguom ạnian dị repur ịma eḍu, aḍighi kẹn ịyaar aghuḍum ịbiakpa, ạḅile amoroghi miim ẹkia phọ, ạsighe ịḅaal ịyaar aghuḍum ẹboroph phọ ạsaraghi sịphe ạnyu enmeny ạrikia phọ.

¹⁴Kụ ọdi ạsighe enmeny ạrikia phọ oḍighinom bọ enaba ẹrol bọ sịphe elhor phọ Ọmoogh-we phọ sịphe esomanan Otu Ịiḅereghi phọ, matuman ịigaany enmeny ạrikia phọ rꞌOtu Ịiḅereghi phọ, kụ aseere ạga ephunom enmeny ạrikia phọ.

¹⁵Ehaz ọdaam mọ ạlogh ologh ạngo Yuraya oyil ạrikia phọ kụ ạḅeni mọ, “Sịphe ạnyu egbogh enmeny ạrikia phọ kụ esi dị nạ kaḍighi ghan rạraar aghuḍum mọ ịphen: ịyaar aghuḍum oguom ạnian ẹlo ạḍiroor, rꞌẹkia ịbiakpa ẹlo adulhe, ịyaar aghuḍum oguom ạnian ẹlo ọdaam mọ rꞌẹkia ịbiakpa ẹlo ọdi, rꞌịyaar aghuḍum oguom ạnian ẹlo oomo awe ạbuphe ịsiphe ade phọ rꞌẹkia ịbiakpa ạbidi rꞌẹkia amiim mọ ạbidi. Kụ ạsighe oomo ịḅaal ạrikia mọ rꞌạrikia phọ ạsaraghi sịphe ạnyu. Enmeny ạrikia nyẹpe enaba phọ keḍighi ni ịlo idike ạmi bịn.”

¹⁶AYuraya oyil ạrikia phọ ạdaph oomo ịpe Ehaz ọdaam mọ ạḅeni bọ nyọdi kụ aḍighi.

¹⁷Ehaz ọdaam mọ ạgbarion rughuugh phọ ọlhemom bọ enaba phọ ẹrol ghan bọ sịphe Otu Ịiḅereghi phọ, ạsighiogh rụkpa phọ ẹrol bọ ạnyu phọ ạbidi. Ọdi ạḅile ạsighe guugh phọ ọlhemom bọ enaba phọ ẹpe ọman aḍioph rꞌịyal ilephiri ạsinam enaba phọ, kụ ạḅam ạnyu ạrana.

¹⁸Esi oḍighi ịlo kẹḅeeraan ogbogh ọdaam mọ Asiria, Ehaz ạgbarion kẹn ni sịphe Otu Ịiḅereghi phọ esi phọ rọḅam ghan bọ ạgada ọdaam mọ. Ọdi ạḅile kẹn ni aḍueghi ọnhu-aḍibuo phọ ọdaam mọ rakiton ghan bọ kaḍigh Otu Ịiḅereghi phọ.

¹⁹Oomo ịnon ịlo Ehaz rꞌiiḍighi phọ dị aḍighi yogh bọ, ọge ni sịphe ạḍinya ịpe emiteghu bọ mem ạbudaam mọ aJuda.

²⁰Ehaz amugh kụ oḍi nyọdi otumeniom bụrude phọ ọdi ẹpe Jeruselem ẹmha phọ aDevid ọde phọ ọdi, kụ ạHezekaya ọony phọ ọdi ạsighe dọl phọ ọdi ạda.