Read abua 2 Ạbudaam 17 Bible Online

2 Ạbudaam 17 - abua bible

2 Ạbudaam 17

¹Omuneniom ḍioph rꞌịyal ạsia Ehaz ạda bọ Juda kụ amem dị aHosia ọony phọ Ela amiigh ọda Ịzirel. Kụ ọdi ạda bọ esugha ạsia ẹpe Sameria.

²Kụ ọdi aḍighi yogh ịkaraph risigh Ọmoogh-we phọ kụ kọ́do ịpe ạbudaam Izirẹl oḍighi yogh bọ, bụphe oḍia bọ kụ ọdi atum bọ.

³ASalmaneser ogbogh ọdaam mọ Asiria aru azuom Hosia ẹgham. Kụ aHosia aḍighi ẹbene aSalmaneser, kụ asogh ghan iisogh ạghiom nyọdi.

⁴Kụ ẹteeny mem dị aHosia rorom rụukpaany rọghiom So ọdaam mọ Ijipt mọ ạloghonaan nyịno ḍịghaagh, ómeera mun osogh iisogh ọghiom ọdaam mọ Asiria, ịdipho dị aḍighi ghan bọ ạlha etum lhạ. Kụ ọdaam mọ Asiria asiph Hosia ạphaḍi, ạsighe ạghi ạlogh ikoli.

⁵Kụ ogbogh ọdaam mọ Asiria ạghi ạsighe oomo ade phọ ẹsighe ẹghi esiemi Sameria akpobiom bịdi, eenom bịdi ẹgham ịraar ạsia.

⁶Ẹman bọ esugha ạsia phọ aHosia ạda bọ kụ amem mọ ọdaam mọ Asiria ạsighe bọ Sameria, ạsighe Ịzirel ạpham agheelom Asiria, arughemi bịdi ẹpe phọ. Buniin ọdi aseere ẹpe ẹmha Hala, buniin ọgbal Ọphiiny aHabor ẹpe ade aGozan, bụeri phọ ẹpe ạramha phọ aMedia.

⁷Ịphen phọ imiteghu ni loor esi ịkaraph phọ ịpe awe phọ Ịzirel oḍighi bọ esi Ọmoogh-we Ẹnaan phọ ạbidi, ọpo ạsighe bọ bịdi ạḍuanam ẹpe ade phọ Ijipt, akpetenaan bọ bịdi ḍịghaagh ọdaam eelhe phọ Ijipt. Kụ bịdi ọḅile ghan rọoḅereghi ghan ịnon ạrumugh.

⁸Ọdaph reten ạbuo aruru phọ kụ roḍighi ghan, bụphe Ọmoogh-we phọ ạar bọ de phọ ạbidi risigh awe phọ Ịzirel, ọḅile ọdaph eḍighinom ạraraar phọ ịpe ạbudaam mọ Ịzirel oḍighi bọ.

⁹Awe phọ Ịzirel omian ghan kụ oḍighi yogh ghan rạraar dị íseleman risigh Ọmoogh-we Ẹnaan phọ ạbidi. Bịdi ọloghoḍinaan loor ạbidi rạphan dị ephoph sịphe oomo ạramha phọ ạbidi, emiigh ịbam ạramha phọ kụ ẹteeny igbogh ạramha phọ.

¹⁰Bịdi ọsighe ịkaaghineen ạrumugh rꞌigbudu um-ạke Asera ọḅamaghi ạnyu oomo aroogbolom mọ rꞌiizin oomo ạrogboko phọ.

¹¹Kụ ọsuughi ghan ịnsens ạnyu oomo aroogbolom mọ, ịdipho bụo aruru phọ roḍighi ghan bọ, bụphe Ọmoogh-we phọ aphorogh bọ ạsighe esomanan ạbidi. Bịdi oḍighi yogh ọdo kịrokiro ịkaraph dị ephin ologhi Ọmoogh-we phọ,

¹²rooseeny ghan ịkaaghineen ạrumugh ịpe Ọmoogh-we phọ ạḅeni bọ ni bịdi mọ kúḍighi ghan.

¹³Ọmoogh-we phọ arom ghan rụukpaany rꞌariil mọ ọḅeni Ịzirel rꞌaJuda mọ, “Ịbile ẹkaraph eḍighinom ạraraar phọ anyina eeko ghan iilogh phọ ạmi rꞌịtooghi phọ ạmi, ẹdaph oomo Ologh phọ ọpo mị ạlogh bọ ạngo bụrude phọ anyina, ịpe mị arom bọ butelhedom mọ ạmi riil phọ mọ oru ịḅeni inyina.”

¹⁴Rꞌẹnum ịdi bịdi ọnaghanan ịphen phọ ílho. Bịdi ụḅaar ri ẹmhu, ịdipho ạburude phọ ạbidi. Bịdi úmeeraam Ọmoogh-we Ẹnaan phọ ạbidi.

¹⁵Kụ bịdi oghel oomo ịtooghi phọ ọdi rꞌịyo phọ ịpe ạburude phọ ạbidi rꞌọdi oghiran bọ, rꞌareḍeenaan phọ ịpe ọdi aḍeenaan bọ bịdi. Bịdi oofolomi bịn, ụ́maghami ịyaar, ọdaph bụo aruru phọ oko bọ bịdi okitonom bụphe Ọmoogh-we phọ ạtu bọ kụ ạlhogh ologh mọ bịdi kụ́daph ịpe bịdi roḍighi bọ kụ oḍighi aani.

¹⁶Kụ bịdi ọwile oomo iilogh Ọmoogh-we Ẹnaan phọ ạbidi. Ọḅologh ịyal igbudu ịbam ilephiri ạsinam, ọsighe oḍighi ẹmugh ạbidi, ọḅol igbudu ọoḅereghi ghan um-ạke Asera rꞌoomo ọdo kịrokiro ạraanaan ọḅile ooseeny Baal.

¹⁷Kụ bịdi ọsighe nmụny rꞌạnmanyaan phọ ạbidi oḍighinom yogh rịkia ạnian ọngo ịnon ạrumugh. Bịdi ropuru ghan ḍipuru, rodike ghan idike. Oboola loor phọ ạbidi rꞌoḍighi yogh ghan ịkaraph ghisigh Ọmoogh-we phọ kụ eḍighi ịdi ẹghagh ologhi Ọmoogh-we phọ.

¹⁸Kụ Ọmoogh-we phọ ạghagham ologhi Ịzirel oboom ọghagh ologhi, amutonaan bịdi ạsighe loor ọdi. Rꞌoye ósugheeny, omuton eghun aJuda bịn.

¹⁹Ḅịle kẹn, aJuda úuko ghan iilogh Ọmoogh-we Ẹnaan phọ ạbidi, ụdaph ghan eḍighinom ạraraar phọ ịpe Ịzirel.

²⁰Ọmoogh-we phọ aghel oomo ọophi phọ Ịzirel ạkpiloghom bịdi ạḅogh bịdi ạlogh ḍịghaagh ạbumulogh-ḍien phọ, tụtu ạḅitonaan bịdi amutonaan ạsighe ghisigh ọdi.

²¹Mem dị Ọmoogh-we phọ ạgbatan Ịzirel ạsighe sịphe ẹemara kꞌaDevid, kụ bịdi ọsighe Jeroboam ọony phọ aNebat oḍighi ọdaam. Kụ ọdi ạḅeni Ịzirel mọ kụ́daph mun Ọmoogh-we phọ tụtu eḍighi ịdi Ịzirel oḍighi yogh iboom ịkaraph.

²²Awe phọ Ịzirel ọdaph oomo ịkaraph phọ aJeroboam aḍighi yogh bọ kụ oḍighi aani;

²³tụtu Ọmoogh-we phọ aghel Ịzirel, ạḅogh bịdi ạngo Asiria. Kụ bịdi ọsighe Ịzirel sịphe ade phọ ạbidi ọḍuanam ọsighe ọghi ẹpe Asiria, ịdipho abutelhedom mọ ọdi ariil phọ ọghaaph ghan bọ. Kụ ịphen phọ eḍighi kụ bịdi odi ghan ẹpe phọ kꞌarodon.

²⁴Ogbogh ọdaam mọ Asiria ạsighe we ẹpe Bạbilon rꞌẹpe Kut rꞌẹpe Iva rꞌạHamat rꞌaSefaavaim arughemi ẹpe oomo ạramha phọ aSameria. Bụo Asiria ọsighe esi phọ awe phọ Ịzirel, ọmoogh Sameria, orughogh rạmha phọ edi bọ ẹpe phọ.

²⁵Ẹḅel emiighom amarugh phọ ạbidi bịdi úkiilaan Ọmoogh-we phọ kụ iḍighi ịdi ọdi arom ạnam-dịka ọghi oḍigh sịphe ogbo phọ ạbidi ọze buniin ạbidi.

²⁶Kụ ọghaaph ọḅeni ọdaam mọ Asiria mọ, “Bụo areelhe phọ ịpe nạ ạsighiogh bọ ạsighe ạghi arughemi ẹpe ạramha phọ aSameria úlegheri eḍighinom ạraraar ẹmugh phọ ẹpe ẹmoogh bọ de phọ ạḍiphe, kụ ẹmugh phọ ẹpe phọ merom ạnam-dịka mọ ẹze weye phọ.”

²⁷Kụ ọdaam mọ Asiria ạlogh ologh ạngo bịdi ạḅeni mọ, “Ịsighe oniin oyil ạrikia sịphe ạbuphe nyina ẹpham bọ ẹpe phọ erumom dị ạghi arugh ẹpe phọ, dị ạtughemi ghan bịdi rọozo eḍighinom ạraraar ẹmugh phọ ẹpe ẹmoogh bọ de phọ ạḍiphe.”

²⁸Kụ oniin oyil sịphe ạbuphe bịdi ọsighe bọ ẹpe Sameria ọḍuanam ạghi arugh ẹpe Bẹtel, ạtughemi ghan bịdi ịlo bịdi kokiilaan ghan Ọmoogh-we phọ.

²⁹Kụ bụphe ọsighe bọ orughemi ẹpe Sameria ụkaaghi ghan rụmugh, tọrobo eelhe ẹlo ạbidi, ọsighe odoghoḍi iloghi aruutu phọ ịpe bụo Ịzirel phọ ọlogh bọ ạnyu ạraaḅaraph phọ, tọrobo ẹmha ẹlo ạbidi.

³⁰Awe ạBabilon ụkaaghi rụmugh aSukot Benot; awe aKut rụmugh aNegal; awe ạHamat rụmugh Ạsima;

³¹awe Iva rụmugh aNibhaz rꞌaTatak; awe aSefaavaim ọkpooniom ghan nmụny ạbidi nịan ọngo Ạdramelek rꞌẠnamelek, rụmugh phọ ạbidi.

³²Bịdi ughiilaan ghan ni Ọmoogh-we phọ kụ ọlo bịdi ụsighe sịphe ogbo phọ ạbidi ọdo kịrokiro awe oḍighi riil ạrikia sịphe aruutu phọ edi bọ ẹpe ạnyu ạraaḅaraph phọ, bụdi kọpinyon ghan rịkia sịphe aruutu phọ ẹdi bọ sịphe ạnyu ạraaḅaraph phọ.

³³Bịdi ooseeny ghan Ọmoogh-we phọ, kụ ooseeny ghan kẹn ọdo kịrokiro aruru phọ bịdi ooseeny ghan bọ ẹpe ạramha phọ bịdi ọḍua bọ kụ oru.

³⁴Ẹteeny kꞌarodon bịdi ọdaph ghan ni igbaany ạroozo phọ rꞌịtooghi phọ ạbidi kụ roḍighi ghan. Bịdi úkiilaan Ọmoogh-we phọ. Rọ́daph ghan oomo ịḅel ịtooghi phọ ạbidi rꞌạroozo phọ edi bọ rꞌiilogh phọ ịpe Ọmoogh-we phọ ạlhogh bọ ạngo nmụny ạJekob bụphe dị aghol bọ mọ Ịzirel,

³⁵bụphe dị rꞌạbidi oghiran bọ ịyo, kụ ạtooghi bọ ạḅeni bịdi mọ, “Kékiilaan ghan ịnon ạrumugh. Kékpuḍian ghan ẹngo bịdi. Kéeseeny ghan bịdi. Kéḍighi ghan rạraar aghuḍum ẹngo bịdi.

³⁶Ighiilaan ghan ịmi Ọmoogh-we phọ ọpo ịsighe bọ inyina ẹpe ade phọ Ijipt rꞌiboom ịikpo rꞌạḍighaagh iphelegbe phọ ạmi, ịiḅereghi ghan ịmi, eḍighi ghan rạraar aghuḍum ịngo ghan ịmi.

³⁷Ịtooghi phọ rꞌịiruen phọ, rꞌạroozo phọ rꞌiilogh phọ ịpe mị ạlogh bọ, ịpe ọge bọ sịphe ạḍinya phọ ịngo inyina: ịphen phọ kụ ịdi nyina kekiririom ghan epogh kꞌagee-pọ, kụ nyina kékiilaan mun rụmugh kịrokiro phọ.

³⁸Rꞌịyo phọ ịpe mị rꞌanyina eghiran bọ, íbula ghan, kẹn kékiilaan ghan ịnon ạrumugh.

³⁹Ikiilaan Ọmoogh-we Ẹnaan phọ anyina, kụ mị kịtagharan ni inyina ạsighe ḍịghaagh ạbumulogh-ḍien phọ anyina.”

⁴⁰Oomo phọ ịphen phọ ịlo bịdi ọnaghanan ị́tol. Bịdi ụdaph ni igbaany ạroozo phọ rꞌeḍighinom ạraraar phọ ạbidi kụ oḍighi ghan.

⁴¹Awe phọ ạbuen phọ ughiilaan ghan ni Ọmoogh-we phọ kụ ụḅile ghan ni ooseeny ịkaaghineen ạrumugh phọ ạbidi, bịdi rꞌạnmuny ạbidi rꞌạnmuny ạnmuny ạbidi. Ịdipho ạburude phọ ạbidi oḍighi yogh bọ kụ ịdi bịdi oḍighi yogh aani kẹn.