Read abua 2 Ạbudaam 18 Bible Online

2 Ạbudaam 18 - abua bible

2 Ạbudaam 18

¹Ẹman bọ ịraar ạsia aHosia ọony phọ Ela ạda bọ Ịzirel, kụ amem dị ạHezekaya ọony phọ Ehaz amiigh ọda Juda.

²Ọdi ạman bọ ịyaldi rꞌoogh ạsia kụ dị agbi bọ ọda phọ. Ọdi ạda bọ ịyaldi rꞌesugha ạsia ẹpe Jeruselem. Ḍien onhiin ọdi ughol mọ Abaija ọnyani phọ ạZekaraya.

³Ọdi aḍighi ghan ịdi eseleman ghisigh Ọmoogh-we phọ, ạdaph oomo eḍighinom ạraraar phọ ịpe aDevid ọde phọ ọdi aḍighi ghan bọ kụ aḍighi.

⁴Ọdi aphiemi riisi ooseeny aruru phọ, aḅomoghi ịkaaghineen ạrumugh phọ rꞌigbudu um-ạke Asera, aḅomoghi ẹkaraph-ịyaar phọ ọkaam bọ enaba phọ ịpherepe, nyẹpe aMozis ạka bọ, nyẹpe oghol ghan bọ mọ aNehustan. Awe phọ Ịzirel ụsuughi ghan ịnsens oghueniom tụtu ẹteeny bọ ḍio phọ ạḍiphe phọ.

⁵ẠHezekaya aḍuom ologhi Ọmoogh-we Ẹnaan phọ Ịzirel. Omuton nyọdi bịn, ọnon ọdaam dị ạghigh nyọdi ólho sịphe oomo ạbudaam mọ aJuda, ghạlamo ạbuḅel ạbuphe oḍia bọ kụ egbi bọ ọteeny ọdi.

⁶Ọdi aḍighom ni Ọmoogh-we phọ. Rꞌamem dị ọdi ạgbatanaan ọdaph Ọmoogh-we phọ ị́tol. Ọdi aako ghan ni iilogh phọ Ọmoogh-we phọ ạlogh bọ ạngo Mozis.

⁷Ọmoogh-we phọ ạrolan rꞌọdi dị oomo ạraraar phọ ịpe ọdi aḍighi bọ, Ọmoogh-we phọ ạngo ghan ẹeḍiom. Kụ ọdi ạmoogh oḅom ẹmhu esi ọdaam mọ Asiria, óoseeny ghan mun nyọdi.

⁸Ọdi ạkpar apu bụo aFilistia aphorogh bịdi ẹpe oomo ạrughulukul ade phọ ạbidi, emiigh sịphe otu ạnyu abukoriom mọ ẹsighe esiemi kꞌẹpe Gaza egbogh ẹmha phọ.

⁹Ẹman bọ inya ạsia ạHezekaya ạda bọ Juda, pọ kụ amem dị ẹman oḍual ạsia aHosia ạda bọ Ịzirel, kụ aSalmaneser ogbogh ọdaam mọ Asiria ạghi azuom Sameria akpobiom aruphiom bịdi ẹgham.

¹⁰Eekuna ịraar ạsia bịn bịdi ọsighe ẹmha phọ. Mem mọ ạmuphe, mẹman odiiny ạsia ạHezekaya ạda bọ Juda, mẹman esugha ạsia aHosia ạda bọ Ịzirel.

¹¹Kụ ogbogh ọdaam mọ Asiria ạpham oomo Ịzirel ạḍuanam agheelom Asiria kụ arughemi bịdi ẹpe phọ. Buniin ọdi aseere ẹpe ẹmha Hala, buniin ọgbal Ọphiiny aHabor ẹpe ade aGozan, bụeri phọ ẹpe ạramha phọ aMedia.

¹²Ịphen phọ imiteghunaan weye phọ Ịzirel ịdi eḍighi bọ bịdi ụ́naghanan ghan ẹḍogh Ọmoogh-we Ẹnaan phọ ạbidi, ọḅile ọḅitonaan ịyo phọ ọdi rꞌoomo iilogh phọ ịpe aMozis otelhedom Ọmoogh-we phọ ạlogh bọ ạngo bịdi. Bịdi ụ́naghan; bịdi ụ́tuugh ịpe phọ kụ oḍighi ghan.

¹³Mem dị ạHezekaya mạda bọ ḍioph rꞌinya ạsia bịn ạSenakerib ogbogh ọdaam mọ Asiria aḅetenu ạghi azuom oomo ạramha phọ aJuda ịpe ọkuami bọ ọlhogh, ạsighe rạmha phọ.

¹⁴Kụ ạHezekaya ọdaam mọ aJuda arom dom ạghiom ogbogh ọdaam mọ Asiria ẹpe Lakis ạḅeni mọ, “Mị ạpioman ni. Ụwile ịmi ạghi ḍịo ạna. Tọro ịlo nạ ạḅem, mị kạkpe ni.” Ogbogh ọdaam mọ Asiria amuulaan Hẹzekaya ọdaam mọ aJuda mọ ạkpe nyịno ḍioph ọonir igbogh ịtoom ẹemor asilva rꞌoniin ọonir igbogh ịtoom ẹemor agol.

¹⁵Kụ ạHezekaya ạsighe oomo ipoḍi asilva ọmiin bọ sịphe Otu Ịiḅereghi phọ ạghiom nyọdi rꞌoomo ịpe ọmiin bọ sịphe kꞌọdaam mọ.

¹⁶Amem mọ ạmuphe kụ ẹdi ạHezekaya ạsighiogh bọ gol phọ ạrol bọ sịphe arughuugh Otu Ịiḅereghi phọ rꞌasigol phọ ịpe ọdi rꞌaloor kụ ạdamaghi bọ sịphe ịnhu-aḍibuo phọ, ạsighe ạghi ạngo ọdaam mọ Asiria.

¹⁷Ọdaam mọ Asiria arom ḍita awe ẹgham ẹpe Lakis mọ ọghi ozuom ẹgham ạHezekaya ẹpe Jeruselem: ịraar igbogh awe ẹgham kụ uḍiemiom we phọ. Bịdi ọghi osi Jeruselem kụ ọghi ọrol ẹpe eten abuloom arukpe phọ rọtol ghan bọ, ọgbal okol ọodu phọ ẹpe ephunom mọ.

¹⁸Kụ bịdi orom mọ ọghi ọmagh ọdaam mọ Ịzirel, kụ ịraar ikpolom awe ọdi ọghi ọteeny we phọ: Ẹliakim ọony ạHilkaya ọpo rapogh ghan bọ otu phọ rꞌaSebna ọgeeghiom mọ rꞌaJoa ọony Asaf opoghom ạrinya phọ, bịdi kụ ụghi bọ.

¹⁹Oniin oḍiemiom awe phọ Asiria ạḅeni bịdi mọ ogbogh ọdaam mọ Asiria rạwa olegheri esi phọ oḍuom ologhi phọ ạHezekaya odi bọ.

²⁰Ọdi apuru mọ, “Nạ ragbiom ghan mọ oopho ikpo ọnhu ketue ni eeleeny ẹmaar ḅịle kẹn rꞌịikpo elephiri? Nạ uḍuom ologhi ạnhian kụ nạ rạ́naghan ghan bọ ịlo ạmi?

²¹Nạ aḍuom ologhi Ijipt, pọ nạ ạsighe ḍikpu kụ aḍighi ịkpara orelhiom — kebunaan ni egim ḍịghaagh ạna. Ịduon kụ ịdi ọdaam eelhe phọ Ijipt ạrolom oomo ạbuphe oḍuom bọ nyọdi ologhi.”

²²Kụ oye ọlo Asiria phọ ạḅemom mọ, “Eru mạar dị nạ ụḅeni ịmi mọ nạ aḍuom ologhi Ọmoogh-we Ẹnaan phọ anyina, ọpo phọ kụ kọ́di ạHezekaya ạphueghi yogh bọ renmeny ạrikia phọ ịpe rọtol ghan bọ kọpinyon rịkia phọ, mem mọ ọdi ạḅeni bọ weye phọ aJuda rꞌaJeruselem mọ sịphe enmeny phọ aJeruselem bịn kụ ẹdi awe kọoḅereghi?

²³Kụ iḍighi, nyịidipho mị ạsighe ḍien ọdaam mọ Asiria ọde-otu phọ ạmi kụ ramuulaan nyịna. Mị kạsighe ịyal ọonir ạrusu aruom nyịna mụghumo nạ katue ni amitiom rꞌaloor ạna we dị kokiilom ghan.

²⁴Nạ ọ́man rꞌọbam esi abutelhedom ọde-otu phọ ạmi. Esi ika kụ ẹdi nạ ạtu bọ kụ ạḅitonaan ạgumom ọman uwo ẹmhu awe ẹgham mọ Asiria, kụ nạ aḍuom ologhi Ijipt ịlo arughuugh-ude rꞌawe dị rokiilom ghan rụsu?

²⁵Nạ ragbi ghan mọ mị uru azuom ẹgham ẹmha phọ ạna aphiemi dị Ọmoogh-we phọ kụ ịmi ḍịghaagh ụ́loghonaan? Ọmoogh-we phọ rꞌaloor ọdi kụ ụḅeni ịmi ozuom ẹgham ẹmha phọ ophiemi.”

²⁶Ẹliakim rꞌaSebna rꞌaJoa ọḅeni ọnyo oḍighi Asiria phọ mọ, “Seseeny ḅạ ghan ọnhu Aramaik kụ ạghaaphom ghan ạḅeni butelhedom mọ ạna loor esi dị yoor ọnaghan ni ọnhu phọ ọpo phọ. Kạ́sighe ghan ọnhu aHibru kụ ạghaaphom ghan ụḅeni iyoor; awe phọ ạbuphe odi bọ sịphe iikpe phọ kọnaghan.”

²⁷Kụ oye phọ ạḅeni bịdi mọ, “Nyina regbi mọ ọde-otu phọ ạmi urom ịmi oru ọghaaph ịphen phọ ọḅeni ọde-otu phọ anyina rꞌanyina bịn? Ọdi urom ịmi mọ mị ụki ụkaaph aani ịdi awe phọ ạbuphe odi bọ sịphe iikpe phọ kọnaghan. Bịdi kịdaph inyina ole ghan rịir ạbidi, ọpughol ghan munum ạbidi.”

²⁸Kụ ọnyo oḍighi Asiria phọ ạmeera kụ ạlho eboom ẹḍogh kụ ạghaaphom ọnhu aHibru ạḅeni bịdi mọ, “Ịnaghan ịdi ogbogh ọdaam mọ Asiria ạghaaph.

²⁹Ọdaam mọ ạḅem ịduon mọ, ‘Kémeera ạHezekaya iikeleghi inyina. Ọdi kátue ịitoghion inyina ạsighe ḍịghaagh ạmi.

³⁰Kémeera ọdi iikeleghi inyina ạḅem mọ iḍuom ologhi Ọmoogh-we phọ, mọ Ọmoogh-we phọ kịitoghion inyina ạsighe, mọ ọdi kámeera ọdaam mọ Asiria ạsighe ẹmha phọ anyina ạmoogh.’

³¹Kẹ́naghanan Hẹzekaya. Ọdaam mọ Asiria ạḅem ịduon mọ, ‘Itu omuulaan, itu iḍighom ịmi, elhe ghan tọrobo oye obusi ọdi, tọrobo oye alhe ghan ikpo ạfig ọdi, tọrobo oye ạphughol ghan mụum aghuḍia ọdi,

³²tụtu mị aru ịsighe inyina ạghi aseere de dị ẹghigh de phọ anyina, de ịbiakpa rꞌamiim ịya, de eḍien rꞌịghol, de ạmunum-ọliv rꞌẹnuum aḍiowo, ọbo nyina erugh ẹpe phọ, ọbo nyina kémugh ghan bọ. ẠHezekaya riikeleghi inyina mem dị ọdi ạḅem mọ Ọmoogh-we phọ kịitoghion inyina ạsighe; kẹ́naghanan nyọdi.

³³Ẹmugh edi ni sịphe aḍita ạrumugh areelhe phọ dị mạar ghan de phọ ọdi ḍịghaagh ọdaam mọ Asiria ḍụghum?

³⁴Ạrumugh phọ ạHamat rꞌApad edi ẹghen? Ạrumugh phọ aSefaavaim rꞌaHena rꞌIva edi ẹghen? Ẹghen ẹmugh kụ ịphel Sameria?

³⁵Ẹghen ẹmugh sịphe oomo ạrumugh phọ kụ irue ẹphel ẹmha phọ ọdi? Ịduon kẹn kụ ẹdi Ọmoogh-we phọ kátue bọ ạpel Jeruselem?’”

³⁶Kụ awe phọ aJuda oḅoorian bịn nham, ụ́pagharanaan nyọdi rꞌekpo ọnhu ịdi eḍighi bọ ạHezekaya ạto ạḅeni bịdi mọ kụ́pagharanaan ghan ịyaar.

³⁷Kụ Ẹliakim rꞌaSebna rꞌaJoa ọphanyi rukpe phọ ạbidi loor ọto kụ ọghi ọteeny ạHezekaya kụ ọḅeni oomo ịpe ogbogh oye ọlo Asiria phọ ạghaaph bọ.