Read abua 2 Ạbudaam 20 Bible Online

2 Ạbudaam 20 - abua bible

2 Ạbudaam 20

¹Riiḍio phọ ịpe phọ, ạHezekaya ạarurughian bịn kookolobian ịlo aḍuugh. Kụ oyil Azaya, ọony phọ Amoz, ạghi ạteeny nyọdi kụ ạḅeni mọ, “Ọmoogh-we phọ ạḅeni nyịna mọ mạar asereghi rạraar phọ kꞌạna, ịdi eḍighi bọ nạ káḍum. Kookolobian ḍuugh.”

²Kụ ạHezekaya akiton risigh ọdi asoman iikpe kụ ạaḅereghi:

³“Ọmoogh-we, seseeny, tụutughian nyịidipho mọ mị mạdaph ni nyịna rꞌoomo ologhi ạmi kụ mị ụkparagha ni oḍighi ghan ịdi eseleman risigh ạna.” Kụ ọdi amiigh omoghi yogh.

⁴Azaya kőrelhe osi ẹpe erugh otu kꞌọdaam mọ, kụ ikpo ọnhu Ọmoogh-we phọ ẹteeny nyọdi kụ ẹḅeni mọ,

⁵“Ḅula ạghi ạḅeni Hẹzekaya uwo ẹmhu awe Ọmoogh-we phọ mọ, ‘Mị Ọmoogh-we phọ Ẹnaan phọ aDevid ọde phọ ạna mạnaghan ni ịiḅereghi phọ ạna. Mị mạmiin ni izin phọ ạna. Mị kaakonom nyịna nạ aḍum; kụ rẹman ịraar aḍughul-otu, ạghi aḍigh Otu Ịiḅereghi phọ.

⁶Mị kạdoonye siḍughul-otu phọ ạna ạḅaram ḍioph rꞌoogh ạsia. Mị kạatoghion ni nyịna rꞌẹmha phọ ẹphen ạsighe ḍịghaagh ọdaam mọ Asiria, ạpel ẹmha phọ ẹphen loor ẹmhu ạmi rꞌaloor ẹmhu aDevid otelhedom mọ ạmi.’”

⁷Kụ Azaya ạḅeni butelhedom ọdaam mọ mọ, “Ịsighe ịizughum ạfig.” Kụ bịdi ọsighe ọḅam loor ofuku phọ ịlo oḍume ọdi.

⁸Kụ ạHezekaya apuru Azaya mọ, “Eeghe kụ keḍighi eḍeenaan mọ Ọmoogh-we phọ kuukonom ni ịmi kụ mị ạki aḍigh sịphe Otu Ịiḅereghi phọ esi ịraar aḍughul-otu phọ?”

⁹Azaya ạphagharanaan mọ, “Ẹphen kụ eḍeenaan phọ nạ kạmoogh bọ mọ Ọmoogh-we phọ kaḍighi ni ịpe ọdi ạghaaph bọ. Uba erumuḍio kạdoony ni ạki ẹpe risigh ḍioph ạrada, kụ aḅula ọman ḍioph ạrada ḍụghum?”

¹⁰Kụ ạHezekaya mọ, “Edughanaan ni uba phọ ọdoony ọghi arisigh ḍioph ạrada. Uba phọ aḅula ni aḍigh ọman ḍioph ạrada.”

¹¹Kụ Azaya oyil phọ amoghiom Ọmoogh-we phọ kụ ọdi ạsighe uba phọ aḅulemi ọman ḍioph ạrada sịphe ẹsiinyom otu ạnyu phọ Ehaz ọdaam mọ aḍighi bọ.

¹²Mem mọ ạmuphe phọ ọdaam mọ ạBabilon, aMerodak Bạladan ọony phọ ạBaladan, ạge ḍịnya ạḅaram rꞌaruunmo ạghiomonaan Hẹzekaya, loor esi dị ọdi ạnaghan mọ ạHezekaya ómoon.

¹³Kụ ạHezekaya ạnaghanan bịdi kụ aḍeenaan oomo igey ạraraar phọ edi bọ sịphe otu phọ ọdi: silva rꞌagol, rꞌoomo ạraraar phọ ịpe rọsaam ghan bọ ịisa, rꞌamugey ạmunum mọ ọdi, rꞌoomo ạraraar ẹgham mọ ọdi edi bọ sịphe otu phọ ọdi, rꞌoomo ạraraar phọ edi bọ sịphe ọdi raakoom ghan bọ ikpoki. Ịyaar ósugheeny sịphe otu phọ ọdi rꞌoomo eelhe phọ ẹpe ọdi ạda bọ dị ạHezekaya bịdi úḍeenaan.

¹⁴Kụ Azaya oyil phọ Ẹnaan ạghi ạteeny Hẹzekaya ọdaam mọ kụ apuru mọ, “Awe phọ ạbuen phọ rọḅem ghan mọ eeghe? Bụen phọ ọḍua ẹghen kụ oru bọ kꞌạna?” Kụ ạHezekaya ạḅem mọ, “Bịdi ụḍua ni kꞌegher ẹmha kụ oru bọ, kꞌẹpe ẹlo ạBabilon.”

¹⁵Kụ ọdi apuru mọ, “Bịdi ụmiin eeghia sịen otu phọ ạna?” Kụ ạHezekaya ạphagharanaan mọ, “Oomo ạraraar phọ edi bọ sịen otu phọ ạmi bịdi mọmiin ni. Ịyaar ísugha sịphe ookoom ikpoki phọ ạmi dị mị bịdi úḍeenaan.”

¹⁶Kụ Azaya ạḅeni Hẹzekaya mọ, “Nạghan ịdi Ẹnaan Oomo Ịikpo ạḅem.

¹⁷Aḍio retu ni dị oomo ạraraar phọ edi bọ sịen otu phọ ạna rꞌoomo aruphua phọ ịpe ọde-otu phọ ạna aseere bọ edi bọ kꞌarodon, kotool li ọsighiogh ọpam okeelom Bạbilonia. Ọmoogh-we phọ ạḅem ịduon mọ rꞌịyaar kósugheeny.

¹⁸Buniin alephiri ạnmuny phọ ạna bụphe nạ kạmar bọ, bịdi kosiphi ni ọḍuanam, kụ bịdi opo nmụny phọ ạbuen phọ kụ ọsighe oḍighi rẹbene sịphe ogbogh otu ọdaam mọ ạBabilon.”

¹⁹Kụ ạHezekaya ạḅeni Azaya mọ, “Ẹnighe ni, ikpo ọnhu phọ Ọmoogh-we phọ ịpe nạ ạghaaph bọ.” Kụ ọdi apuru mọ, “Ị́nighe ḍụghum, dị ẹboroph rꞌọgba igey kụ edi siḍughul-otu phọ ịphen ạmi?”

²⁰Oomo ịnon ịlo ạHezekaya rꞌiiḍighi phọ ịpe ọdi aḍighi bọ rꞌigbogh phọ ọdi rꞌịpe ọdi aguph bọ ọodu amitiom mụum sịphe ẹmha phọ ọge ni sịphe ạḍinya phọ ịpe emiteghu bọ mem ạbudaam mọ aJuda.

²¹ẠHezekaya amugh ạtuonom bụrude phọ ọdi, kụ ạManase ọony phọ ọdi ạsighe dọl phọ ọdi ạda.