Read abua 2 Ạbudaam 23 Bible Online

2 Ạbudaam 23 - abua bible

2 Ạbudaam 23

¹AJosaya ọdaam mọ arom kụ ọghi ookpomoghi oomo ikumoor awe aJuda rꞌaJeruselem.

²Kụ ọdaam mọ ạghi aḍigh sịphe Otu Ịiḅereghi phọ, ọdi rꞌariil ạrikia phọ rꞌariil phọ rꞌoomo awe phọ aJuda rꞌạbuphe orugh bọ ẹpe Jeruselem, bụbam rꞌabugbogh. Kụ ọdi ạal adoghoḍi reḅeri ạbidi oomo ịpe edi bọ sịphe ạḍinya ịyo phọ ḍịphe ọmiin bọ sịphe Otu Ịiḅereghi phọ.

³Kụ ọdaam mọ ạmeera atuman ẹko kụ aghir ịyo risigh Ọmoogh-we phọ ọdaph ọdi rꞌooko ghan iilogh phọ ọdi rꞌịtooghi phọ ọdi, ọsighe oomo ologhi phọ ọdi rꞌuwaloor ọdi kụ oḍighinom ghan ikpo ọnhu ịyo phọ ọge bọ sịen ạḍinya iilogh phọ ạḍien. Kụ oomo awe phọ ọmeregha sịphe ịyo phọ.

⁴Kụ ọdaam mọ ạlogh ologh ạngo Hịlkaya uwo ẹmhu oyil ạrikia phọ rꞌariil ạrikia phọ bụphe omuneniom bọ ịyal phọ, rꞌạbuphe rokori ghan bọ sịphe ọnhu-aḍibuo phọ mọ ịki ẹsighiogh oomo ạraraar phọ ịpe oḍighinaan bọ Baal rꞌum-ạke Asera rꞌoomo aḍita ịpe kꞌạke phọ edi bọ sịphe Otu Ịiḅereghi phọ. Kụ ọdi ạsighe oomo phọ ạraraar phọ akitonom Jeruselem ạghi asi Eḍiiny ạKidron aguom nịan. Kụ ọdi aḅeer ọoru phọ ạghi azu ẹpe Bẹtel.

⁵Kụ ọdi aḍighi ịdi ariil ạrikia ạbuo aruru phọ ọwile, bụphe ạbudaam mọ aJuda oseere bọ mọ ọsuughi ghan ịnsens ạnyu aroogbolom mọ edi bọ ẹpe oomo ạramha phọ aJuda rꞌoomo ịpe eko bọ Jeruselem ekitonom. Aḍighi kẹn ịdi bụphe rọsuughinaan ghan bọ ịnsens Baal rꞌerumuḍio rꞌụnwanyu rꞌạraanaan rꞌoomo ịpe edi bọ kꞌạke phọ ọwile, úḍighi mun riil.

⁶Kụ ọdi aruphuron igbudu um-ạke Asera phọ ẹrol bọ sịphe Otu Ịiḅereghi phọ ạsighe akitonom Jeruselem ạghi asi ẹpe eḍiiny phọ ạKidron kụ aguom nịan ẹpe phọ kụ ạgbe kụ aḅeer ọoru phọ azuughi ạnyu iiḍi ạnmuny awe phọ.

⁷Kụ ọdi alhereghi ruutu akunakuna phọ etuman bọ sịphe Otu Ịiḅereghi phọ, sịphe ạnmariir phọ rolooghinaan ghan bọ ịkomom Asera.

⁸Kụ ọdi ạsighe ạghi Jeruselem bụpinyon rịkia phọ bụphe ọrol ghan bọ ẹpe ạramha phọ aJuda, kụ ọdi ạapu renmeny phọ ọphinyon ghan bọ rịkia aruru phọ. Ọdi aḅomoghi renmeny phọ ọloghonaan bọ ruru ạrutu-ịga phọ ịpe etuman bọ ọnhu-aḍibuo phọ aJosua uwo ẹmha phọ ạlogh bọ, edi ḍịghaagh ekeeny nạ raḍigh ẹmha phọ.

⁹Ạbupinyon rịkia phọ bụphe ẹpe aroogbolom mọ útu ghan ẹpe Jeruselem sịphe enmeny ạrikia Ọmoogh-we phọ, kụ bịdi rꞌabumor phọ ạbidi ule ghan ni ạbred phọ ọpo yist rọ́logh ghan bọ.

¹⁰Kụ aJosaya ọdaam mọ ạphueghi Tofet ẹpe Eḍiiny aHinom mọ oye kụ́sighe ghan mun ọony ọdi mꞌọnyani ọdi úpighironom ẹkia ooseenyom ạMolek.

¹¹Kụ ọdi ạsighiogh ịnam-ạsu phọ ịpe ạbudaam mọ ọngo bọ erumuḍio phọ sịphe ọnhu-aḍibuo eḍighom Otu Ịiḅereghi phọ aroḅologhi matuman ọgbal osoph phọ aNetan Mẹlek opoghom iisoph phọ sịphe erugh otu phọ, kụ ạsighe oomo arughuugh-ude phọ ọngo bọ erumuḍio phọ aguom nịan.

¹²Kụ ọdi alhereghi renmeny ạrikia phọ ịpe ẹrol bọ ẹpe ạnyu ologhi otu phọ Ehaz ịpe ạbudaam mọ aJuda ọkanagh bọ, ḅịle rꞌarenmeny ạrikia phọ ịpe ạManase ọdaam mọ ạkanagh bọ sịphe ịyal phọ aroghoony Otu Ịiḅereghi phọ aruph ạsighiogh kụ ạsighe oomo ạbidi ạghi aroḅologhi ẹpe okol ạmuum mọ ạKidron.

¹³AJosaya ọdaam mọ ạḅile kẹn ạphue roogbolom mọ ịpe koten bọ kụ ọteeny Jeruselem edi bọ ḍịghaagh esoorom sịphe Eegum Ọlivs, ẹpe Sọlomon Ọdaam mọ Ịzirel ạloghonaan bọ Astarte ẹya-eru phọ awe aSaidon ḅịle rꞌaKemos ḅạphanya awe ạMoab ḅịle rꞌạMolek ḅạphanya awe Amon.

¹⁴Ọdi aḅomoghi oomo ạraraar aruru phọ ạbidi ạkiriph aḍighi ịpherepe. Ọdi ạphueghi oomo igbudu um-ạke Asera, kụ ạsighe ịḅarara awe asereghi riisi phọ ịpe phọ.

¹⁵Kụ aJosaya ạḅile kẹn aḅonyon enmeny ạrikia phọ ẹpe ẹrol bọ ẹpe Bẹtel, rꞌịpe aJeroboam ọony phọ Nebat ọpo aḍighi bọ ịdi Ịzirel ọtuan oḍighi ịkaraph ạkanagh bọ; ọdi aḅonyon alhereghi enmeny ạrikia phọ aguom nịan ạsighe ẹphurukpu ạkiriph, ạḅile ạphueghi riisi ooseeny phọ, aguom nịan igbudu um-ạke Asera ẹkaaneen eru phọ.

¹⁶Kụ aJosaya akiton aphogh ọman kụ ạmiin riiḍi phọ edi bọ sịphe esi phọ, kụ arom ọghi ọsighe ịḅarara phọ sịphe iiḍi phọ, ạsighe aguom nịan sịphe ạnyu enmeny ạrikia phọ ạphueghi, ạdaph ikpo ọnhu ịpe Ọmoogh-we phọ ạghaaph bọ, ịpe oyil phọ Ẹnaan agbeel bọ.

¹⁷Kụ ọdi apuru mọ, “Ẹpe mị ạmiin bọ eeghe ịyaar? Oḍi ạnhian?” Kụ awe ạbuo ẹmha phọ ọḅeni nyọdi mọ, “Oḍi oyil phọ Ẹnaan ọpo ạḍua bọ Juda kụ aru kụ agbeel bọ ịpe nạ aḍighi bọ enmeny ạrikia phọ ạBetel.”

¹⁸Kụ aJosaya ạḅem mọ, “Ịbile nyọdi. Oye kụ́ḅogh ịḅarara phọ ọdi.” Kụ bịdi ọwile ịḅarara phọ ọdi rꞌịḅarara oyil phọ ọpo ạḍua bọ ẹpe Sameria kụ aru.

¹⁹AJosaya ạphueghi oomo ariisi ịiḅereghi aruru phọ ịpe ẹrol bọ ẹpe ạramha phọ aSameria, aḅonyon alhereghi oomo igbudu phọ ịpe ạbudaam mọ Ịzirel ọḅologh bọ ịpe ẹghagh ologhi Ọmoogh-we phọ, kụ ạtuugh ịdipho ọdi aḍighi bọ ẹpe Bẹtel aḍighi.

²⁰Kụ ọdi ạze oomo ariil ạrikia aruru ạnyu arenmeny phọ bịdi mooseeny ghan bọ, ạḅile ạphophoghi ịḅarara awe ạnyu ạtorobo enmeny, kụ aḅula ẹpe Jeruselem.

²¹Kụ aJosaya ọdaam mọ ạlogh ologh ạngo oomo awe phọ kụ ạḅeni mọ, “Iiko ghan ẹyaal ọphel otene phọ Ọmoogh-we Ẹnaan phọ anyina, ịdipho ọge bọ sịphe ạḍinya ịyo phọ.”

²²Agey ni, úle ghan mun ẹyaal phọ ẹphen phọ oomo asiḍughul-otu ạbuo ịiruen phọ, bụphe oogboonaan ghan bọ we phọ Ịzirel, kẹn, rꞌoomo asiḍughul-otu ạbudaam mọ Ịzirel rꞌoomo asiḍughul-otu ạbudaam mọ aJuda.

²³Ịman ḍioph rꞌọphaanya ạsia mem mọ aJosaya ạda bọ, kụ ẹdi olianaan bọ Ọmoogh-we phọ ẹyaal ọphel otene phọ ẹphen ẹpe Jeruselem.

²⁴Kụ kẹn, bụphe rodike yogh ghan bọ idike ịkaraph aruwaloor phọ, rꞌạruḅaghama phọ, rꞌịkaaghineen ạrumugh phọ, rꞌoomo ariisi ooseeny aruru phọ rꞌoomo ạsiḅaphanya phọ ọmiin bọ de phọ aJuda rꞌẹpe Jeruselem, aJosaya ạsighiogh aroḅologhi, ạdaph ikpo ọnhu iilogh phọ ịpe ọge bọ sịphe ạḍinya phọ ḍịphe ạHilkaya oyil ạrikia phọ ạmiin bọ sịphe Otu Ịiḅereghi phọ.

²⁵Ọdaam dị ạghigh nyọdi dị ạrol ịdipho ọdi ọ́rol. Ọdi akiton asoman Ọmoogh-we phọ rꞌoomo ologhi phọ ọdi rꞌoomo uwaloor phọ ọdi rꞌoomo ịikpo phọ ọdi, ạdaph oomo Ologh phọ aMozis. Kụ emuton nyọdi ọnon ọdi ạḅile ạrol ịdipho ọdi ọ́rol.

²⁶Rꞌẹnum Ọmoogh-we phọ ọ́wile olhom ọghagh ologhi phọ ọdi nyọpo ọdi ạghagham bọ Juda loor esi oomo ịpe ạManase atiroghom bọ nyọdi kụ ẹghagh bọ ologhi phọ ọdi.

²⁷Kụ Ọmoogh-we phọ ạḅem mọ, “Ịdipho mị ạḅitonaan bọ Ịzirel kụ ịdi mị kạḅitonaan Juda amutonaan Jeruselem ẹmha phọ ẹpe mị ạsaḅar bọ ạsighe rꞌOtu phọ ọpo mị ạḅem bọ mọ aḍien ạmi kẹtol sịphe.”

²⁸Oomo ịnon ịlo aJosaya rꞌiiḍighi phọ ịpe ọdi aḍighi yogh bọ ọge ni sịphe ạḍinya phọ ịpe emiteghu bọ mem ạbudaam mọ aJuda.

²⁹Mem mọ aJosaya ạda bọ kụ ẹdi aNeko ọdaam mọ Ijipt rꞌawe ẹgham mọ ọdi onyeene bọ ọghi ẹpe Ọphiiny aYufratis ọloghonaan ogbogh ọdaam mọ Asiria ḍịghaagh, kụ aJosaya ọdaam mọ ómeera kụ ạghi ozuom ọdi. Kụ aNeko aghiigh nyọdi ẹpe Megido.

³⁰Kụ abutelhedom ọdi orool nyọdi ọsighe, ọsaany oghuugh-ude osiom Jeruselem, kụ oḍi nyọdi sịphe oḍi phọ ọdi. Kụ awe ịsiphe ade phọ ọsaḅar Joahaz ọony phọ aJosaya ọsighe mụnum-ịko ọsagharan ẹmhu ọdi dị ạsighe dọl ọde phọ ọdi ạda.

³¹AJoahaz ạman bọ ịyaldi rꞌịraar ạsia kụ ọdi agbi ọda Juda. Kụ ọdi ạda bọ ịraar ụnwanyu ẹpe Jeruselem. Ḍien onhiin phọ ọdi ughol mọ aHamutal ọnyani aJerimaya ọlo aLibna.

³²Kụ ọdi aḍighi yogh ịdi ị́nighe risigh Ọmoogh-we phọ, ạdaph oomo ịpe ạburude phọ ọdi oḍighi yogh bọ kụ aḍighi ghan.

³³Kụ aNeko Ọdaam mọ ạphaḍi nyọdi ẹpe Ribla ẹpe ade ạHamat mọ ọdi kụ́ḍa mun Jeruselem, kụ aJuda asogh ịraar ọonir rꞌinya okuron igbogh ịtoom ẹemor asilva rꞌịraardi rꞌinya igbogh ịtoom ẹemor agol ạngo nyọdi.

³⁴Kụ aNeko Ọdaam mọ Ijipt aḍighi ịdi Ẹliakim ọony phọ aJosaya ạsighe dọl aJosaya ọde phọ ọdi ạda kụ anme ḍien phọ ọdi aghol mọ aJehoyakim. Kụ ạsighe Joahaz agheelom ẹpe Ijipt ạrolomi tụtu ọdi amugh.

³⁵AJehoyakim ọdaam mọ ạanyi ghan iisogh we phọ ọdaphan ghan ẹelha lọ oye phọ ạmoogh, ạanyi ghan osogh phọ ọbo ọmoogh ikpoki ọkpiom ịpe ọdaam mọ Ijipt ạto bọ ạngo bịdi.

³⁶AJehoyakim ạman bọ ịyaldi rꞌoogh ạsia kụ amem dị agbi ọda Juda. Kụ ọdi ạda bọ ḍioph rꞌaḍiniin ạsia ẹpe Jeruselem. Ḍien onhiin phọ ọdi ughol mọ aZebida ọnyani aPedaya ọlo aRuma.

³⁷Kụ ọdi aḍighi yogh ịdi ị́nighe risigh Ọmoogh-we phọ, ạdaph oomo ịkaraph phọ ạburude phọ ọdi oḍighi yogh bọ kụ aḍighi ghan.