Read abua 2 Ạbudaam 25 Bible Online

2 Ạbudaam 25 - abua bible

2 Ạbudaam 25

¹ẠZedekaya ạḅaar ẹmhu esi ạNebukadnezar ọdaam mọ ạBabilon. Omuneniom ḍioph aḍio omuneniom ḍioph ụnwanyu esi ạlha dị emuneniom esugha dị ạZedekaya mạda bọ, ạNebukadnezar ọdaam mọ rꞌaḍita awe ẹgham mọ ọdi ọghi ozuom ẹgham Jeruselem. Adoghoḍi rugbogo akitonom, adoghoḍi ruutu ẹgham akoom Jeruselem.

²Akpobiom ẹmha phọ aruphiom ẹgham tụtu ẹteeny lhạ dị ẹman ḍioph rꞌaḍiniin ạlha ạZedekaya ạda bọ.

³Omuneniom esugha aḍio omuneniom inya ụnwanyu ạlha phọ ạḍiphe phọ, ịgbakuro mẹphughan sịphe ẹmha phọ. Eḍien dị awe ịsiphe ẹmha phọ kole ị́tol.

⁴Kụ okputon iikpe ẹmha phọ. Awe ạbuo ạBabilon oko ẹmha phọ okitonom mem mọ ạmuphe phọ ozuom ẹgham, kụ oomo awe ẹgham mọ aJuda osumughu ḍughul eten ịsiphe eḍighom ẹmha phọ sịphe ịbaay ịyal phọ iikpe phọ edi bọ sịphe ịigaany oghoony ozo ọdaam mọ; kụ ọdaam mọ asuma agheel ẹpe Eḍiiny ạJodan.

⁵Kụ awe ẹgham mọ ạBabilon ọdaph ọman ọdaam mọ ophorogh nyọdi ọteeny ẹpe ẹdala phọ aJeriko; kụ awe ẹgham mọ ọdi ọwile nyọdi sịphe phọ osumughu.

⁶Kụ bịdi ọsighe Zẹdekaya ọghiom ọdaam mọ ạBabilon ẹpe Ribla, kụ bịdi osophonaan nyọdi ọoruen.

⁷Kụ bịdi ọze nmụny phọ ạZedekaya risigh ọdi, kụ ọponyon riḍien ạZedekaya ọsighe iḍigh ọphaḍiom nyọdi kụ ọsighe nyọdi ọpham ọghi osiom Bạbilon.

⁸Omuneniom ḍioph aḍio omuneniom oogh ụnwanyu esi ạlha dị emuneniom ḍioph rꞌesugha dị ạNebukadnezar mạda bọ Bạbilonia, ạNebuzaradan otomoghiom ọdaam mọ rꞌoḍiemiom ẹgham mọ, aru asi Jeruselem.

⁹Ọdi ạsu nịan Otu Ịiḅereghi phọ rꞌotu ọdaam mọ rꞌaruutu oomo igbogh awe phọ orugh bọ ẹpe Jeruselem,

¹⁰ḅịle awe ẹgham mọ ọdi olhereghi oomo iikpe phọ ekoom bọ ẹmha phọ.

¹¹ẠNebuzaradan ạsighe ạpham ạḍuanam bụphe osugha bọ sịphe ẹmha phọ rꞌạbueri phọ awe ạmaka phọ rꞌạbuphe osumughu bọ ọtuonom ọdaam mọ ạBabilon.

¹²Arukulom mọ rꞌighiil ạagia awe bịn kụ ạbudi uwo ẹmhu awe ẹgham mọ ạwile sịphe eelhe phọ aJuda mọ bịdi ọzuphogh ghan iizo avain, oḅephogh ghan iizo sịphe ade phọ.

¹³Awe phọ ạBabilon uḅomoghi ni ọogbighiḍi rọko enaba phọ rꞌarughuugh-ude phọ ẹrol bọ sịphe Otu Ịiḅereghi phọ rꞌogbogh aguugh enaba rꞌoomo arabana, ọsighe ọpham ogheelom Bạbilon.

¹⁴Bịdi ụsighenom kẹn ni rụsua rꞌaretelheleeny dị rookoroghiom ghan ịpherepe ạraraar sịphe enmeny phọ, rạraar lọ rọḅamam ghan ịtozi, rụkpa lọ rokonom ghan ịḅaal lọ rẹteph mem ạrikia, rụkpa osuom ghan ịnsens rꞌoomo ịnon ạraraar lọ oḍighinom enaba dị roḍighinom ghan rạraar sịphe Otu Ịiḅereghi phọ.

¹⁵Uw-ẹmhu awe ẹgham mọ ạpham sịmogo phọ rꞌạsipani rꞌoomo ạraraar phọ oḍighinom bọ gol rꞌasilva ạḍuanam.

¹⁶Ẹemor ạraraar phọ ọlhemom bọ enaba phọ ịpe ạSolomon aḍighinaan bọ ạngo Otu Ịiḅereghi phọ, ịyal phọ ạroko phọ rꞌarughuugh-ude phọ rꞌogbogh oghuugh phọ, ịphughan ni orool.

¹⁷Ịyal phọ ạroko phọ ịighighighan ni. Aḍiphoph eniin ẹko ẹman bọ ọphaanya akuḅu, ẹpe eekuna ạnyu ẹko phọ enaba; aḍiphoph eekuna enaba phọ oniin rꞌoolemi-odi ịraar akuḅu, rꞌinme phọ rꞌiimuma ekpetughe phọ oḍighinom enaba okitonom, oomo phọ ịdi uḍighinom enaba. Ịduon phọ kẹn kụ ịdi ẹko phọ ẹpe emuneniom bọ ịyal phọ ẹrol.

¹⁸ẠNebuzaradan uwo ẹmhu ạbuo ẹgham mọ asiph Seraya uwo ẹmhu oyil ạrikia phọ rꞌạZefanaya oyil ạrikia phọ atum bọ pạ rꞌịraar awe phọ ạbuphe rokori ghan bọ sịphe ọnhu-aḍibuo Otu Ịiḅereghi phọ ạpham ạḍuanam.

¹⁹Sịphe ẹmha phọ, ọdi asiph nyọpo ạda bọ we ẹgham mọ, rꞌoogh awe dị rotomoghiom ghan ọdaam mọ dị osugha sịphe ẹmha phọ, rꞌotum uwo ẹmhu ẹgham mọ dị rạgeeghi ghan ịlo ẹgham, ḅịle rꞌodiinydi ikpolom awe ẹmha phọ.

²⁰ẠNebuzaradan ạpham bụen phọ ạghiom ọdaam mọ ạBabilon ẹpe Ribla.

²¹Kụ ọdaam mọ ạgurogh bịdi ạze ẹpe Ribla ẹpe ade phọ ạHamat. Ịdipho kụ ịdi osiphi bọ weye aJuda ọpham ọḍuanam sịphe ade phọ ạbidi osiom eeruen ekpisi.

²²ẠNebukadnezar ọdaam mọ ạBabilon ạsighe Gedalaya ọony phọ Ahikam ọony phọ aSafan aḍighi uwo ẹmhu dị kapogh ghan we phọ ạbuphe ọwile bọ ẹpe ade phọ aJuda.

²³Mem dị ạbuo ạrumhu awe ẹgham mọ aJuda, bịdi rꞌawe phọ ạbidi, ọnaghan bọ mọ ọdaam mọ ạBabilon mạsighe Gedalaya aḍighi oye dị rapogh ghan bọ Juda, kụ ọghi ọteeny Gedalaya ẹpe Mizpa. Bụen phọ kụ ạrumhu phọ: Ịsmael ọony phọ aNetanaya, rꞌaJohanan ọony phọ aKaria, rꞌaSeraya ọony phọ aTanhumet ọlo aNetofa, rꞌaJezanaya ọlo aMaaka.

²⁴AGedalaya aghunyian rꞌawe phọ ạbuen kụ ạḅeni bịdi mọ, “Aruugu inyina kísiph oḍighi ạnmuny-otu ạBabilon. Itugh ẹpe ade phọ eeseeny ghan ọdaam mọ ạBabilon bịn kịnighenaan ni inyina.”

²⁵Ịphen phọ reru reten esi oḍual ụnwanyu bịn Ịsmael ọony phọ aNetanaya ọony phọ Elisama ọlo ạbuphe rọda ghan bọ ẹmha phọ, ọdi rꞌiḍioph awe, ọghi ọgurogh Gedalaya oghiigh, ọḅile ọze bụo aJu phọ rꞌạbuo ạBabilon phọ bụphe rꞌọdi ọrol bọ ẹpe Mizpa.

²⁶Kụ oomo awe phọ, bụbam rꞌabugbogh rꞌạbuo ạrumhu awe ẹgham mọ, oḅerenu ogheel loor esi dị bịdi ughiilaan ni we ạBabilon. Bịn bịdi osuma ogheel ẹpe Ijipt.

²⁷Lhạ phọ ạḍiphe Evil Merodak aḍighi bọ ọdaam-ẹmha phọ ạBabilon, ọdi ạnma ni ighirigiir Jehoyasin ọdaam mọ aJuda kụ ạtagharan nyọdi ẹpe otu ikoli phọ. Ịphen phọ imite ḍio dị emuneniom ịyaldi rꞌoḍual, ụnwanyu dị amuneniom ḍioph rꞌịyal esi ạlha dị emuneniom ịraardi rꞌoḍual dị ọsighe bọ Jehoyasin ọḍuanam ịdipho ọnyo-ikoli.

²⁸Evil Merodak ạsighe oodugha ọnhu kụ ạphamam nyọdi, kụ ạsighe ạgada igbogh ạngo nyọdi apuemi bụeri phọ ạbudaam mọ, bụphe rꞌọdi ọrol bọ sịphe Bạbilonia.

²⁹Ameera mọ aJehoyasin ạkporonaan iinmenan ikoli phọ ọdi kụ ale ghan eḍien sịphe ịdaabili ọdaam mọ oomo asiḍughul-otu aghuḍum mọ ọdi.

³⁰Tọrotoro aḍio esi oomo asiḍughul-otu aghuḍum mọ ọdi, ụkpe ghan ni nyọdi ikpoki dị ọdi ạrolom ghan.