Read abua 2 Ạbudaam 5 Bible Online

2 Ạbudaam 5 - abua bible

2 Ạbudaam 5

¹ANemon uwo ẹmhu awe ẹgham ọdaam mọ ạSiria, ogbogh oye esi ọde-otu phọ ọdi rꞌarughuenian, ịdi eḍighi bọ esi ọdi kụ ẹdi Ọmoogh-we phọ aten bọ ạphel Sịria ạsighe; ḅịle kẹn ọdi ophelegbe ẹgham, kụ ẹzegh ọku ufe eḍighi.

²Eniin aḍio awe ạSiria phọ ọḍua bụo ẹku rꞌẹku, kụ osiph oniin ọbam ọnyani ọlo Ịzirel ọpham ọḍuanam. Kụ ọnyani phọ aḍighi ọnyani-otu ạnir phọ aNemon.

³Ọnyani phọ ạḅeni onhiin-otu phọ ọdi mọ, “Kịḅeeraan ni ịmi dị ọde-otu phọ ạmi kạki kꞌoyil phọ Ẹnaan ọpo ọdi bọ ẹpe Sameria aakonoma loor phọ ọdi ẹzegh ọku ufe phọ aḍum.”

⁴ANemon ạghi aḍigh ẹpe ologhi otu phọ kụ ạghaaph ịpe phọ ọnyani ọlo Ịzirel phọ ạḅem bọ ạḅeni ọde-otu phọ ọdi.

⁵Ọdaam mọ ạSiria ạḅeni mọ, “Kịa ni, mị kạngo nyịna ḍịnya ạpham ạghiom ọdaam mọ Ịzirel.” ANemon aten rạki kụ ạpham ịraardi ọonir ipoḍi asilva rꞌodiiny ọonir ipoḍi agol rꞌiḍioph areenmenemineen ạrusuoma.

⁶Kụ ọdi ạpham ḍịnya phọ ạghi ạngo ọdaam mọ. Ịphen kụ ịdi ạḍinya phọ ẹghaaph bọ, “Mem dị ạḍinya phọ ạḍien eru ẹteeny nyịna, pogh, mị mạsighe Nemon otelhedom mọ ạmi aruom nyịna nạ kaakonom nyọdi ẹzegh ọku ufe ọdi aḍume.”

⁷Kụ mem dị ọdaam mọ Ịzirel ạal bọ ḍịnya phọ kụ ọdi ạphaanyi rukpe ọdi kụ ạḅem mọ, “Mịna kụ Ẹnaan phọ katue bọ akiigh oye, ạḅile aakonom oye aḍume, kụ oye phọ ọphon arom bọ mọ ụḅeni ịmi mọ mịna uukonom oye ọno dị ẹzegh ọku ufe eḍighi. Tụutughian ạmiin mọ ọdi rụwa ịmi ọruonu.”

⁸Mem dị Ilaisa oyil phọ Ẹnaan ạnaghan bọ mọ ọdaam mọ Ịzirel mạphanyi rukpe ọdi, kụ ọdi arom ạghiom ọdaam mọ kụ apuru mọ, “Eeghe kụ iḍighi kụ nạ ạphanyi bọ rukpe phọ ạna? Bịle ọdi aru ụteeny ịmi. Ọdi kalegheri ni mọ oyil Ẹnaan odi ni Ịzirel.”

⁹ANemon ạpham rụsu phọ ọdi rꞌoghuugh-ude phọ ọdi ạghi asoor ọnhu-aḍibuo otu phọ Ilaisa.

¹⁰Ilaisa arom otelhedom ọdi mọ, “Ḅẹni nyọdi mọ, ‘Kịa aḍiiny oḍual amem sịphe Ọphiiny ạJodan bịn aḍizu phọ ạna keḅula ni ẹtol ịdipho ẹrol ghan bọ bịn nạ ạkua aseleman.’”

¹¹Kụ ẹghagh ologhi aNemon kụ amite aten rạḍua kụ ạḅem mọ, “Mị ugbi mọ ọdi kamite atu rụteeny ịmi ạmeera ạmagh ḍien Ọmoogh-we Ẹnaan phọ ọdi ạḅogh esi phọ aakonom ẹzegh ọku ufe phọ.

¹²Ạbana rꞌạFaapar ạriphiiny phọ ạDamaskos kụ ịnighe ipu oomo ạriphiiny phọ Ịzirel ḍụghum? Mịna mubura sịphe phọ bịn uḍum?”

¹³Kụ abutelhedom mọ ọdi ọghi otuman nyọdi kụ ọḅeni nyọdi mọ, “Ọde-otu ayoor, eru mạar dị oyil phọ Ẹnaan ạḅeni nyịna oḍighi ịdi ẹbugh epu ịphen phọ, nạ múḍighi? Uḍighi ika kụ nạ kạ́ki bọ aḍiiny mụum mọ oḍual phọ amem mọ ạmoogh rookonom?”

¹⁴Kụ ọdi ạghi aḍiiny mụum mọ sịphe Jọdan oḍual amem, ạdaph ịpe oye phọ kꞌẸnaan ạḅeni bọ nyọdi; bịn aḍizu phọ ọdi eḅula, ẹrol ịdipho aḍizu ọbumoony, bịn dị aḍum.

¹⁵Kụ ọdi aḅula ạghi ạteeny oye phọ kꞌẸnaan, ọdi rꞌaḍita oomo awe phọ bụphe ọdaph bọ nyọdi. Kụ ọdi ạghi ạmeera risigh oyil phọ kụ ạḅem mọ, “Nyịidipho kụ ẹdi mị malhegheri mọ ẹnon ẹmugh ílho sịen oomo aḅirini phọ, emuton Ịzirel bịn. Kụ iḍighi mị rạaḅereghi ni nyịna, seseeny, tiin ruunmo ạḍiseph phọ ịphen ḍịghaagh otelhedom mọ ạna.”

¹⁶Kụ Ilaisa ạḅeni mọ, “Ịdipho Ọmoogh-we phọ odi bọ ni ọpo mị ạmeera bọ risigh ọdi, mị nyịna rạ́ar.” Kụ aNemon ạkpaariom nyọdi mọ ạsighe, kụ dị ómeera.

¹⁷Ọdi ạḅem mọ, “Nạ úmeera bọ ụ́sighe, pọ seseeny ụngo ịmi otelhedom mọ ạna de dị ẹkasian ịyal ịnam adool orool, mị uḍighinom ịyaar aghuḍum. Ịdi eḍighi bọ ẹsighe rodon kụ ẹghiom risigh, otelhedom mọ ạna káḍighi ghan mun ịyaar aghuḍum oguom ạnian mꞌẹnon ịyaar aghuḍum ạngo ẹnon ẹmugh, emuton Ọmoogh-we phọ.

¹⁸Ọmoogh-we phọ ạsar ịphen phọ ạwilenaan otelhedom mọ ạna, tọro amem lọ ọde-otu phọ ạmi ạghi aḍigh otu phọ ạRimon ọoḅereghi kụ ạbedenom rạghaagh ạmi kụ mị akpuḍian azumeri loor ạmi sịphe otu phọ ạRimon. Ọmoogh-we phọ ạsar ịphen phọ ạwilenaan otelhedom mọ ọdi.”

¹⁹Kụ ọdi ạḅeni nyọdi mọ, “Egheel ạna ẹnighe, eten ẹlo ạna.” Kụ aNemon ạḍua sịphe kꞌọdi arelhe ede dị ị́man ịyaar sịphe eten phọ,

²⁰kụ aGehazi otelhedom mọ Ilaisa oye phọ kꞌẸnaan aloghoma loor kụ ạḅem mọ, “Mịin, ọde-otu phọ ạmi mạwile Nemon ọlo ạSiria phọ, ómeera ạar rạraar phọ ọdi ạpham bọ aruom nyọdi. Ịdipho Ọmoogh-we phọ odi bọ ni, mị kaporogh nyọdi ạteeny nyọdi ạboor iniin ạraraar.”

²¹Kụ aGehazi aphorogh Nemon, kụ aNemon ạmiin oye dị ạḍua ọman ọdi ratu, kụ ọdi ạḍua ologhi oghuugh-ude phọ ọdi asoor ạghi azuan nyọdi kụ apuru mọ, “Ụ́ga ni?”

²²Kụ aGehazi ạphagharanaan mọ, “Ii. Ụga ni. Ọde-otu phọ ạmi kụ urom ịmi mọ mị utu ạteeny nyịna, ạḅem mọ, ‘Nạ rạḍua bọ bịn awe ọḍua ẹpe ẹmha aroogbolom mọ ẹpe Ifraim oru rꞌịyal awe sịphe aḍita ariil phọ, kụ ạḅem mọ seseeny mọ ngọ bịdi ịraar ọonir ipoḍi asilva rꞌịyal areenmenemineen.’”

²³Kụ aNemon ạḅeni nyọdi mọ, “Ẹ́gbaanyan ni nyịna, sịghe odiiny ọonir ipoḍi asilva.” Kụ ọdi ạkpaariom nyọdi kụ ọdi ạsighe odiiny ọonir ipoḍi asilva adoghoḍi ologhi ịyal ạsikpuru ạghoroghi rꞌịyal areenmenemineen ạrusuoma ạngo ịyal phọ awe phọ ọdi, ạsighe ạleti ẹmhu ạbidi, kụ bịdi orool ọḍua sịphe kꞌọdi oḍiemiom risigh aGehazi.

²⁴Bịdi ọghi osi sịphe eegbolom phọ kụ ọdi ạar bịdi rạraar phọ ạghi ạlogh ologhi otu. Kụ ọdi ạḅeni we phọ mọ ịki, kụ awe phọ ogheel.

²⁵Kụ ọdi ạghi aḍigh otu ạmeera risigh ọde-otu phọ ọdi. Kụ Ilaisa apuru nyọdi mọ, “Gehazi, nạ ụghi ẹghen?” Kụ ọdi ạḅeni mọ, “Otelhedom mọ ạna esi ọ́ghi.”

²⁶Kụ Ilaisa ạḅeni nyọdi mọ, “Uwaloor phọ ạmi nyịna ọ́daph, ọ́ghi, mem mọ oye phọ ạḍua bọ sịphe oghuugh-ude phọ ọdi asoor, aru ạteeny nyịna? Kẹ̋teeny mem ạanyi ghan ikpoki rꞌạrusuoma rꞌiizo rꞌiimuma rꞌiizo avain rꞌiyool-ịga rꞌạsinam rꞌạnmuny-otu rꞌạnmanyaan-otu?

²⁷Ẹzegh ọku ufe phọ aNemon eten nyịna rꞌọto kꞌạna kꞌagee-pọ.” Kụ ọdi amite ạḍua sịphe risigh Ilaisa rꞌẹzegh ọku ufe dị ẹḅaal forororo kụ ẹraphan.