Read abua 2 Ạbudaam 6 Bible Online

2 Ạbudaam 6 - abua bible

2 Ạbudaam 6

¹Aḍita ariil phọ Ẹnaan ọḅeni Ilaisa mọ, “Mịin esi phọ nạ rꞌayoor orugh bọ ekom ẹpughan.

²Seseeny, meera yoor ọghi ẹpe Jọdan oogbo ịgurom ịlo ẹdoony. Tọrobo oye asoph ghan ḍiniin ạḍilo ẹdoony ọsighe oḍighinom ẹpe esi lọ yira kotugh.” Kụ ọdi ạphagharanaan mọ, “Ịki.”

³Kụ oniin ọnyo ạbidi ạḅeni nyọdi mọ, “Seseeny, kạ́le. Ụdaph aani iyoor, abutelhedom mọ ạna ọghi.” Kụ ọdi ameera.

⁴Kụ ọdi ạdaph bịdi ạghi. Bịdi ọghi osi ẹpe Jọdan kụ bịdi olhereghi ireeny, kụ oogbo ireeny phọ.

⁵Oniin ọnyo ạbidi raler ḍịgurom bịn ẹmhu akubu phọ emeel esuma ologhi ạmuum, kụ ọdi ạlho kụ ạḅem ghan mọ, “Sey, ọde-otu ạmi. Mị kaḍighi ika nụun? Akubu phọ ọphon phọ mị ụlhom ni.”

⁶Kụ oye phọ kꞌẸnaan apuru mọ, “Iḍighen esi kụ ẹdi ameel bọ?” Kụ ọdi aḍeenaan nyọdi esi phọ, kụ ọdi asoph oreeny asumeeny esi phọ. Kụ okuron phọ aphooph.

⁷Kụ ọdi ạḅeni nyọdi mọ, “Sịghe aphune.” Kụ ọdi asele ḍịghaagh ọdi ạpham aphune.

⁸Ọdaam mọ ạSiria azuom Ịzirel ẹgham. Kụ ọdi rꞌaruwo ẹmhu ạbuo ẹgham mọ ọdi ọpham ezue kụ omeera mọ ọdo esi dị ẹrol ịduon kụ esi dị arugbogo phọ ạbidi kẹtol.

⁹Kụ oye phọ kꞌẸnaan arom ạghiom ọdaam mọ Ịzirel kụ ạḅeni mọ, “Gona loor ạna, ụ́ḅeeny ghan úphun ẹphen ịdi eḍighi bọ bụo ạSiria phọ moḍigh ẹphen.”

¹⁰Kụ ọdaam mọ Ịzirel arom ạghiom ekpisi phọ oye phọ kꞌẸnaan ạphur bọ rụru ạbidi ịlo ekpisi phọ, ọbo bịdi ọphel ghuḍum ạbidi ọsighe, kámem, kị́yal amem.

¹¹Kụ ẹeḅaghami iboom ologhi ọdaam mọ ạSiria loor ịphen phọ, kụ ọdi ạmagh ruwo ẹmhu ạbuo ẹgham mọ ọdi kụ apuru bịdi mọ, “Iḍeenaan sịen aḍita phọ ayira, ạnhian kụ ọlo kꞌọdaam mọ Ịzirel?”

¹²Kụ oniin uwo ẹmhu ạbuo ẹgham mọ ọdi ạḅeni nyọdi mọ, “Eeye, ọde-otu ạmi ọdaam, ọnyo ayira ólho. Ilaisa oyil phọ odi bọ ẹpe Ịzirel kụ rạḅeni ghan bọ ọdaam mọ Ịzirel oomo ịpe nạ rạkaaph ghan bọ ẹpe osoph phọ nạ rạmina ghan bọ.”

¹³Kụ ọdi ạḅeni bịdi mọ, “Ịki eḅiligha elegheri esi phọ ẹpe ọdi odi bọ mị utom ọghi osiph nyọdi.” Kụ ọḅeni nyọdi mọ, “Ọdi odi ghan ẹpe Dotan.”

¹⁴Kụ ọdi ạsighe rụsu rꞌarughuugh-ude rꞌaḍita ạbuo ẹgham ọghi ẹpe phọ. Kụ bịdi ọghi osi ẹpe phọ ḍughul kụ oko ẹmha phọ okitonom.

¹⁵Kụ otelhedom oye phọ kꞌẸnaan aḅon aḅetenu esoph ạḍiroor kụ pogh, aḍita awe ẹgham rꞌạrusu rꞌarughuugh-ude eko ẹmha phọ ekitonom. Kụ otelhedom mọ ạḅeni nyọdi mọ, “Sey, ọde-otu ạmi, yira koḍighi ika?”

¹⁶Kụ Ilaisa ạphagharanaan kụ ạḅeni nyọdi mọ, “Kákiilaan. Awe dị odi rꞌayira opu bụphe ạbidi.”

¹⁷Kụ Ilaisa ạaḅereghi kụ ạḅem mọ, “Ọmoogh-we, ḅạrion riḍien ọnyo ugheel phọ.” Kụ Ọmoogh-we phọ ạḅarion riḍien ọnyo ugheel ọony phọ kụ ọdi ạmiin ịdi ịnam adool rꞌarughuugh-ude ạnian emuza sịphe aroogbolom mọ eko Ilaisa ekitonom.

¹⁸Mem dị bụo ạSiria phọ ọghi bọ ọteeny nyọdi, Ilaisa ạaḅereghi kụ ạḅem mọ, “Ọmoogh-we, seseeny, lịom we phọ ạbuen, bịdi ookula.” Kụ Ọmoogh-we phọ ạlhiom bịdi, bịdi ookula, ịdipho Ilaisa ạaḅereghi bọ.

¹⁹Ilaisa ạḅeni bịdi mọ, “Ẹphen kụ kéten phọ. Ẹphen kụ kẹ́mha phọ nyina rẹwa bọ. Ịdaph ịmi mị kịsighe inyina ạki aḍeenaan oye phọ nyina rẹwa bọ.” Kụ ọdi ạsighe bịdi asiemi Sameria.

²⁰Bịdi rọghi rosi Sameria kụ Ilaisa ạaḅereghi kụ ạḅem mọ, “Ọmoogh-we, ḅạrion riḍien awe phọ ạbuen bịdi ọmiin eten.” Kụ Ọmoogh-we phọ ạḅarion riḍien phọ ạbidi, kụ bịdi ọmiin eten. Ropogh, bịdi odi sịphe ogbo aSameria!

²¹Mem dị ọdaam mọ Ịzirel ạmiin bọ bụo ạSiria phọ kụ ọdi apuru Ilaisa mọ, “Ọde ạmi, mị ụze bịdi, mị ụze bịdi?”

²²Kụ ọdi ạphagharanaan mọ, “Kạ́ze bịdi. Ịdipho ị́nighe. Bụen phọ nạ masiphi bọ, kụ kạ́budi nạ kạḅile ạsighe elhool ẹgham mꞌạkumugh ạziom. Ngọ bịdi eḍien rꞌạmuum bịdi olhe ọphughol ogheel kꞌọde-otu phọ ạbidi.”

²³Kụ ọdi ạsaanaan bịdi eboom eḍien kụ bịdi olhe ọphughol, kụ ọdi ạwile bịdi mọ ogheel. Kụ bịdi ogheel kꞌọde-otu phọ ạbidi. Kụ bụo ạSiria phọ ọwile, ụ́ki ghan mun ẹgham ẹpe ade phọ Ịzirel.

²⁴Ịphen phọ reru reten kụ ạBen Hadad ọdaam mọ ạSiria aakpomoghi oomo awe ẹgham mọ ọdi, kụ bịdi ọghi ozuom ẹgham Sameria.

²⁵Iboom ịgbakuro ịrol li Sameria mem mọ bịdi ọghi bọ ozuom bịdi ẹgham mọ, tụtu eḍighi ịdi aal ghan ẹmhu ẹnam adool ọphaanyadi ipoḍi asilva, ịyal okuron ịtoom ẹemor ạriir ọkurughozo aal ghan oogh ipoḍi asilva.

²⁶Kụ ọdaam mọ Ịzirel atelhe raten sịphe ạnyu iikpe phọ, kụ oniin ạnir ạlho ạmagh nyọdi kụ ạḅeni mọ, “Oye dị ụmoogh ịmi ọdaam, ụlhoghonaan ịmi ḍịghaagh.”

²⁷Kụ ọdi ạḅeni mọ, “Eru mạar dị Ọmoogh-we phọ kụ nyịna ḍịghaagh ụ́loghonaan, mịna katue ni ạloghonaan nyịna ḍịghaagh? Mị ụ́moogh ịgbieneen ịbiakpa mụghumo amiim?”

²⁸Kụ ọdaam mọ apuru ạnir phọ mọ, “Eeghe kụ rẹeḅaghami bọ nyịna?” Ạnir phọ ạphagharanaan mọ, “Siḍughul-otu dị eten ạnir phọ ọphon kụ ụḅeni ịmi mọ mị ụngo mọony ạmi mọ yoor ạa rodon, mọ iḍue kụ yoor ạa nyọpo ọno.

²⁹Kụ yoor ọsighe mọony phọ nyọpo ạmi ọsa ạa, kụ rẹteeny ḍịeri phọ aḍio phọ kụ mị ạḅeni ạnir phọ mọ sịghe mọony phọ nyọpo ạna aru ọsa ạa, kụ ạnir phọ ạsighe mọony phọ ọdi bịn ạaghi.”

³⁰Mem dị ọdaam mọ ạnaghan bọ oomo ịpe ạnir phọ ạghaaph bọ, kụ ạphanyi rukpe ọdi loor ọto. Ọdi arelhe raten ẹpe ạnyu iikpe phọ, kụ awe phọ ophogh, kụ mịin aani, amunughian rukpe-ọto aloor.

³¹Kụ ọdi ạḅem mọ, “Ẹmugh ighiigh ịmi, eḍighi ịyaar dị mị úsoph ẹmhu Ilaisa kụ egbi ọḅaal iḍue.”

³²Ilaisa ạtol ude kꞌọdi. Ikumoor awe phọ rꞌọdi ọtologhu ude. Kụ ọdaam mọ arom oniin oye dị odi esomanan ọdi, kụ tụtu ọokpaany phọ ratu osi, ọdi phọ rꞌaloor ạḅeni ikumoor awe phọ mọ, “Nyina rẹmiin aani ghan ni mọ ọony ọokom-enu phọ marom oye mọ aru asoph ẹmhu ạmi. Mem lọ ọokpaany phọ asi sịen, ikughi eghuugh phọ, ẹpham nyọdi ẹkpaariom eghuugh phọ; ạḍigum ịyal aruwol ọde-otu phọ ọdi edi ni ọman ọdi.”

³³Ọdi ạkaaph ni koseere, kụ ọdaam mọ aru asi, kụ ạḅem mọ, “Ịkaraph phọ ịphen phọ ịḍua esi Ọmoogh-we phọ kụ eru. Esi ika kụ ẹdi mị kakori bọ kẹn ịdi Ọmoogh-we phọ kụ kaḍighi?”