Read abua 1 Krọnikuls 10 Bible Online

1 Krọnikuls 10 - abua bible

1 Krọnikuls 10

¹Awe aFilistia eeghi ni ẹgham rꞌawe Ịzirel ẹpe Eegum aGilboa. Ụze ni bụminighan awe Ịzirel ẹpe phọ; kụ bụphe osugha bọ ọḅaram Sọl rꞌạnmuny phọ ọdi oghiil osumughu.

²Kụ ọlo awe aFilistia phọ uphorogh ni bịdi ọteeny kụ ọze ịraar ạnmuny phọ ạSol, Jọnatan rꞌẠbinadab rꞌaMalkisua.

³Kụ ẹgham mọ ewiririom Sọl iboom dị ẹkpina ẹpomoghian phọ imeelom ni nyọdi eḍighi eboom ịyaar.

⁴Kụ ạSol ạḅeni onyugheel ọony dị aroolaan nyọdi rẹenema ẹgham mọ, “Mitiom elhool ẹgham mọ ạna ughiighom ịmi, ọbo bụen úḍuna bọ kotu ghan bọ ughiigh ịmi bịn mị aafola.” Kụ eepuph ímeera mọ ọony phọ aḍighi ịdipho phọ. Ọpo kụ esi dị ạSol ạmeremi elhool phọ ọdi kụ ameelom.

⁵Ọony phọ ạmiin ni mọ ạSol mamugh kụ ọdi kẹn ạmeremi aani elhool phọ ọdi ameelom bịn aghiigha aani loor ọdi.

⁶Ịphen kụ ịdi ạSol rꞌịraar phọ ạnmuny phọ ọdi ḅịle rꞌonyugheel ọony phọ omuughu bọ. Oomo awe phọ ạSol umuughu ni ḍio phọ ạḍiphe phọ.

⁷Mem dị awe phọ Ịzirel phọ ọrol bọ ḍịeri phọ ạḍighaagh Eḍiiny ạJezreel ọmiin bọ mọ awe Ịzirel mosumughu, ḅịle kẹn mọ mọze Sọl rꞌạnmuny phọ ọdi, bịdi ụwile ni rạmha phọ ạbidi bịn osumughu. Ẹpe kụ esi dị bụo aFilistia phọ oru sịphe ạramha phọ orughogh.

⁸Ẹgham mọ reten rẹḅaal ẹnon aḍio kụ bụo aFilistia phọ ọghi ọkarion ạraraar awe phọ ạbuphe bịdi ọze bọ, kụ bịdi ọmiin ruzu ạSol rꞌịraar phọ ạnmuny phọ ọdi dị ẹmina ẹpe Eegum aGilboa,

⁹Kụ bịdi osoph ẹmhu ạSol ọkporion rẹenema ẹgham mọ ọdi. Ọsighe rạraar phọ ịphen ọngo rụukpaany oghirom ooḅi ọghaaph phọ ọphon oleenye oomo eelhe phọ aFilistia ọḅeni ịkaaghineen ạrumugh rꞌawe phọ ạbidi.

¹⁰Kụ bịdi osereghi rẹenema ẹgham mọ ọdi ọlogh oniin otu ạrumugh ạbidi; kụ ọkereri ẹmhu phọ otu eniin eru ạbidi dị oghol mọ aDagon.

¹¹Mem dị awe phọ ạbuphe orugh bọ ẹpe Jabes Gịliad ọnaghan bọ ịphen bụo aFilistia phọ oḍighi bọ Sọl,

¹²buniin ịgbagara awe ụghi ọsighiogh ruzu phọ ạSol rꞌạnmuny phọ ọdi ọpham ogheelom Jabes. Bịdi uḍi bịdi ẹpe eeḍian ạḍiogh kụ ọkaagh ẹḍogh oḍual aḍughul-otu.

¹³ẠSol amugh ịdi eḍighi bọ ọdi ạḅitonaan Ọmoogh-we phọ. Ọdi ạḅaar ẹmhu esi ịto Ọmoogh-we phọ kụ ạwa oroma esi aruwaloor iḍim

¹⁴kụ ómeera ópuru Ọmoogh-we phọ ịyaar. Kụ iḍighi kụ Ọmoogh-we phọ aghiigh nyọdi kụ ạngo eepoogh Devid ọony phọ ạJesi ọda eelhe phọ.