Read abua 1 Krọnikuls 16 Bible Online

1 Krọnikuls 16 - abua bible

1 Krọnikuls 16

¹Bịdi ụsighe Igbe Ịyo phọ osiom ogbogo phọ aDevid aseleminaan bọ kụ oseere ologhi, kụ bịdi oḍighi rạraar aghuḍum, ọḅile ọphinyon rịkia ẹboroph ọngo Ẹnaan.

²Mem dị aDevid mạmadan ọphinyon ạrikia phọ, ọdi ạseph we phọ esi aḍien Ọmoogh-we phọ

³kụ adiighi bịdi riiḍien. Ọdi ạngo tọrobo oye rꞌạtorobo ạnir ọlo Ịzirel eniin eeḅoghoḍi ạbred rꞌetigh ẹnam dị ọphoghi rꞌịgharaghar iimuma avain.

⁴ADevid ạmaaghi buniin ạbuo aLivai phọ oḍiemiom ịiḅereghi Ọmoogh-we Ẹnaan phọ Ịzirel, sịphe aghisigh Igbe Ịyo phọ, ọmoor ghan ạsuor ọsephom ọdi.

⁵Asaf kụ ọdi ọma oḍiemiom rꞌạZekaraya otum ọdi. ẠJeyel, aSemiramot, ạJehiel, aMatitaya, Eliab, aBenaya, Obed Idom rꞌạJeyel kụ ạbuo oti ạrene. Asaf kạkpaala ghan ịkpaalaam,

⁶kụ ịyal ariil ạrikia, aBenaya rꞌạJahaziel, kụ kopula rọkuodu oomo amem ghisigh Igbe Ịyo phọ.

⁷Pọ kụ ẹḅel amem dị aDevid ạngo Asaf rꞌạbunon ạbuo aLivai oḍighi ọmoor ghan oboom Ọmoogh-we phọ.

⁸Ịngo ḍịseph Ọmoogh-we phọ, egbeelom igbogh phọ ọdi; ịḅeni reelhe phọ ịpe ọdi maḍighi bọ.

⁹Ịmoor sụor eboomiom Ọmoogh-we phọ; ẹghaaph ịlo iiḍighi ịiḍaany phọ ọdi maḍighi bọ.

¹⁰Itu ọmoogh ọḅaal ologhi ịduon yira oḍighi bọ bụo ọdi; ẹkpianaan oomo ạbulo ooseeny nyọdi ọmoogh iboh.

¹¹Ịiḅereghi Ọmoogh-we mọ ịloghonaan inyina ḍịghaagh kụ eeseeny nyọdi oomo amem.

¹²Nyina ạnmuny ạnmuny ạJekob otelhedom mọ ọdi; nyina ạnmuny ạnmuny Ịzirel, oye phọ ọdi ạsaḅar bọ: ịitughian ịiḍaany phọ Ẹnaan eḍighi bọ rꞌịiruen phọ ọdi aagbo bọ.

¹⁴Ọmoogh-we phọ kụ Ẹnaan ayira; ịto phọ ọdi ịlo oomo aḅirini phọ.

¹⁵Kébula ịyo phọ Ẹnaan, ịpe ọdi aseere bọ mọ ẹrol kꞌagee-pọ,

¹⁶ịyo phọ ọdi aghiran bọ rꞌEbraham ruguanaan phọ ọdi aguanaan bọ Ạizik.

¹⁷Ọmoogh-we phọ aghiran ịyo rꞌạJekob dị kẹtol kꞌagee-pọ.

¹⁸Ọdi ạḅem mọ, “Mị kịngo inyina de phọ aKenan. Ade phọ ạḍiphe keḍighi bin anyina.”

¹⁹Awe Ẹnaan ụ́bugh ḍita, oḍighi ruuruen sịphe ade phọ aKenan.

²⁰Bịdi oyeela ọḍua eelhe ọgba eelhe, ọḍua eniin ạga aḅirini osi ẹnon.

²¹Kụ Ẹnaan ímeera mọ oye aviilom bịdi; esi ọmaar ọpham ạbidi, ọdi ạphur rụru bụdaam mọ.

²²Ọdi ạḅem mọ, “Kéḍighi ịyaar butelhedom mọ mị mạsaḅar bọ; kẹ́ḅogh riil phọ ạmi.”

²³Ịmooraan Ọmoogh-we phọ, oomo aḅirini. Igbeelom tọrotoro aḍio ooḅi ọghaaph phọ mọ ọdi mụphel iyira.

²⁴Igbeelom eegu phọ ọdi eleenye reelhe, ịiḍaany phọ ọdi ẹḅeni oomo areelhe.

²⁵Ọmoogh-we phọ ạbugh ni iboom kụ ạkpe ni ooseeny iboom; ọdi ạkpe oghueni opuemi oomo ạrumugh.

²⁶Ạrumugh oomo ịpheri phọ areelhe phọ eḍighi ịkaaghineen ạrumugh kụ ọlo Ọmoogh-we phọ kụ ạlhem sịke phọ.

²⁷Eegu rꞌigbogh ekoom nyọdi; ịikpo rꞌibo emuza Otu Ịiḅereghi phọ ọdi.

²⁸Iboom Ọmoogh-we phọ, oomo awe sịen ade phọ; iboom eegu phọ ọdi rꞌigbogh phọ ọdi.

²⁹Iboom ḍien eegu Ọmoogh-we phọ; ịsighe ruunmo erumom Otu Ịiḅereghi phọ ọdi. Izumeri rụmhu ghisigh Oye Iigbia phọ mem lọ ọdi aru amite

³⁰ikpekper egbodo ọdi, oomo ade phọ. De phọ opighi ni kụ kótue ọpighiron.

³¹Ịmoogh iboh, de rꞌạke. Ịḅeni oomo areelhe phọ mọ, “Ọmoogh-we phọ ọdaam.”

³²Imoogha, ọphiiny rꞌoomo ịlo repooghu loor ạna. Ịmoogh iboh, iizo rꞌoomo ịlo edi loor anyina.

³³Ireeny phọ edi bọ rụukpua phọ kẹlo ḍịolho iboh, mem dị Ọmoogh-we phọ aru ọda ade phọ.

³⁴Itu ọngo ḍịseph Ọmoogh-we phọ, ịdi eḍighi bọ ọdi ạnighe ni; ẹphomoghian phọ ọdi edi ghan bịn.

³⁵Ịḅeni nyọdi, “Ụphel iyoor, Ẹnaan Ọpelia ayoor, uukpomoghi iyoor eniin esi; ụsighe iyoor ạḍuanam sịphe aḍita areelhe phọ, ọbo yoor ọngo ḍịseph ọḅile oboom ḍien iigbia phọ ạna.”

³⁶Iboom Ọmoogh-we Ẹnaan phọ Ịzirel! Iboom nyọdi nyịidipho ḅịle kꞌagee-pọ! Kụ oomo awe phọ ọḅem mọ, “Ẹrol li ịdipho,” kụ ọseph Ọmoogh-we phọ.

³⁷ADevid ọdaam mọ aseere Asaf rꞌạbunon aLivai mọ oḍiemiom ghan ịiḅereghi phọ rọpam ghan bọ sịphe oseere bọ Igbe Ịyo phọ; mọ bịdi oḍighi ghan iiḍighi phọ ạbidi ḍio etum ḍio.

³⁸Obed Idom ọony phọ aJedutun ḅịle rꞌodiinydi rꞌọphaanya awe ạbuo ọto ọdi kụ ạbudi kọloghonaan ghan ḍịghaagh. AHosa rꞌObed Idom kụ awe dị oseere ophogh ghan ạrunhu-aḍibuo phọ.

³⁹ẠZedok oyil ẹkia phọ rꞌạbunon ariil ạrikia kụ ạbuo oḍiemiom ịiḅereghi Ọmoogh-we phọ esi phọ rọpam ghan bọ ịiḅereghi sịphe Gịbion.

⁴⁰Tọrobo ạḍiroor rꞌadulhe bịdi ụsighe ghan okpom ạnam oguom nịan sịphe enmeny ạrikia phọ, ọdaphan ịpe ọge bọ sịphe Ologh phọ Ọmoogh-we phọ ạngo bọ Ịzirel.

⁴¹Sịphe phọ ọrol bọ rꞌạbidi aHeman rꞌaJedutun rꞌạbunon kụ awe dị ọkar kụ ọsaḅar ọmoor ghan oboom Ọmoogh-we phọ esi ẹphomoghian phọ ọdi edi ghan bọ bịn.

⁴²AHeman rꞌaJedutun ụḅile kẹn ophogh ghan rụkuodu rꞌịkpaalaam rꞌịnon ạraraar ephegh dị opheghom ghan mem lọ rọmoor sụor oboom. Awe ọto aJedutun kụ ukori ghan rụnhu-aḍibuo phọ.

⁴³Kụ tọrobo oye agheel kꞌọdi, kụ aDevid agheel kꞌọdi ọrolan ẹnum amem rꞌọto ọdi.