Read abua 1 Krọnikuls 17 Bible Online

1 Krọnikuls 17 - abua bible

1 Krọnikuls 17

¹ADevid ọdaam mọ mem mọ ạmuen odi ghan otu ọdi. Eniin aḍio ọdi arom ạghiom Netan oyil phọ kụ ạḅeni nyọdi, “Sịen phọ mị atugh otu dị ọloghom rạsaga, kụ ọlo Igbe Ịyo Ọmoogh-we phọ edi ghan ogbogo!”

²ANetan ạphagharanaan mọ, “Ḍighi tọrobo ịlo edi ologhi ạna loor esi dị Ẹnaan odi ni rꞌạna.”

³Kụ ọlo ḍughul phọ ạḍiphe Ọmoogh-we phọ ạḅeni ni Netan mọ,

⁴“Kịa ạḅeni Devid otelhedom mọ ạmi mọ mị ạḅeni nyọdi mọ, ‘Nạ kụ kạ́logh otu ịiḅereghi dị mị katugh.

⁵Emiigh kꞌamem mọ mị ạtagharan bọ we phọ Ịzirel ḍịghaagh Ijipt kụ ẹteeny rodon, mị kőrugh ghan otu ịiḅereghi dị ọlogh; mị ratelhe ghan kakitonom karugh rugbogo.

⁶Esi oomo erelhe phọ ạmi rꞌawe phọ Ịzirel, mị kőpuru ghan rꞌoniin oḍiemiom lọ mị ạsaḅar ịpe eḍighi bọ kụ bịdi ụ́sighe bọ rạsaga ụ́loghonaan ịmi otu ịiḅereghi.’

⁷“Kụ iḍighi kụ ḅẹni Devid otelhedom mọ ạmi mọ mị Ọmoogh-we Oomo Ịikpo phọ rạḅeni nyọdi mọ, ‘Mị ụsighe nyịna dị nạ odi rapogh ghan iyool-ịga ẹpe eḍum mọ kụ ạsighe nyịna ạdaami weye phọ ạmi Ịzirel.

⁸Mị odi ghan ni rꞌạna tọrobo ekpisi lọ nạ ạghi, ḅịle nạ rạki ọteeny ẹpomoghian phọ ạna bịn mị ụngo ghan ni nyịna ọkpar opu. Mị kamitiom ni ḍien phọ ạna ịdipho aḍien ọkar abugbogh abuḍiemiom dị odi aḅirini phọ.

⁹Mị mạsaḅar esi aseenaan weye phọ ạmi Ịzirel, kụ marughemi bịdi sịphe phọ, esi dị bịdi kotugh dị oye kạ́gbiphoghom mun bịdi. Kꞌagee phọ bịdi oḍigh bọ de phọ ạḍien, ạbukaraph awe rotuphiom ghan ni bịdi rạagham, kụ ọlo ịphen kémite mun. Mị aguanaan ọmaar ooko ạna esi oomo ạmulogh-ḍien phọ ạna ḅịle rꞌọngo ạna ẹemara ẹemara.

¹¹Mem lọ nạ amugh kụ oḍi nyịna nạ ạtuonom bụrude phọ ạna, mị kạsighe ni oniin ọony ạna aḍighi ọdaam kụ ọmar phọ ọdi kạmoogh ni ịikpo.

¹²Ọdi kụ kụloghonaan ịmi otu ịiḅereghi kụ mị kạwa ni ạmiin mọ oḍigh phọ ọdi ạtol kꞌagee-pọ.

¹³Mị kaḍighi ọde ọdi kụ ọdi aḍighi mọony ạmi. Mị kạ́bile ọloghonaan ọdi ḍịghaagh ịdipho mị aḍighi bọ Sọl, ọpo mị asoore bọ pịdi nạ aḍighi ọdaam.

¹⁴Mị kạmeremi nyọdi ophogh ghan awe phọ ạmi rꞌọmar phọ ạmi kꞌagee-pọ. Oḍigh ạbudaam mọ ọdi kási eekuna.’”

¹⁵ANetan ạḅeni Devid oomo ịpe Ẹnaan eḍeenaan bọ nyọdi.

¹⁶Kụ aDevid ọdaam mọ ạghi aḍigh Ogbogo Ạdol Ọmoogh-we phọ kụ ạaḅereghi mọ, “Mị ụ́kpianaan oḍighinaan ịphen nạ muḍighinaan bọ ịmi, nạ Ọmoogh-we Ẹnaan, ghạlamo eghunotu phọ ạmi kẹn ni bịn ị́kpe.

¹⁷Kụ ghạlamo ạnyiidipho phọ nạ ạḅile bịn raḍighi ghan ịnon, nạ Ọmoogh-we Ẹnaan; nạ maguanaan rạraar ẹemara ẹemara ạmi esi ạsia dị retu. Kụ nạ Ọmoogh-we Ẹnaan ameera ni mọ oye ạmiin ịphen phọ.

¹⁸Mịna kạḅile ạḅeni nyịna eeghe? Nạ ulegheri ni ịmi otelhedom mọ ạna.

¹⁹Iḍighi ni ogbi ạna rꞌịto ạna oḍighinaan ạmi ịphen phọ rꞌọsighe oḍeenaan ạmi ḍịbugh ạmi mem dị retu.

²⁰Oye dị ạghigh nyịna ólho; yoor molhegheri ni mọ nạ bịn kụ Ẹnaan.

²¹Ẹnon eelhe sịen ade phọ dị ẹghigh Ịzirel ílho, bụen nạ ạtagharan bọ dọl ạrebene phọ kụ ạsighe aḍighi weye ạna. Igbogh rꞌịikia ạraraar phọ nạ aḍighinaan bọ bịdi memitiom ḍien phọ ạna eleenye aḅirini phọ. Nạ uphorogh ni ịnon areelhe rꞌạrumugh phọ ạbidi ạsighiogh mem mọ awe phọ ạna rotu bọ, awe phọ nạ ạtagharan bọ ẹpe Ijipt, mọ oḍighi bụo ạna.

²²Kụ nạ ạsighe Ịzirel aḍighi weye ạna kꞌagee-pọ, kụ nạ, Ọmoogh-we, maḍighi Ẹnaan ạbidi.

²³“Kụ nyịidipho, Ọmoogh-we Ẹnaan, ḍighi ni amitiom oomo amem ịpe nạ uguanaan bọ ịmi rꞌẹemara ẹemara phọ ạmi, ạḅile aḍighi ịpe nạ ạḅem bọ mọ nạ kaḍighi phọ.

²⁴Aḍien phọ ạna keeleghaan ni, kụ awe ọḅem ghan oomo amem mọ, ‘Ọmoogh-we Oomo Ịikpo kụ Ẹnaan phọ repogh bọ Ịzirel.’ Ḅịle nạ kạmaar ri ạpam oḍigh ạbudaam mọ ạmi oomo amem.

²⁵Mị ạmoogh ni ạkpo ologhi ọoḅereghi ạna ịduon phọ, loor esi dị nạ muḍeenaan ịmi otelhedom mọ ạna oomo phọ ịphen phọ, kụ ạḅile kẹn ụḅeni ịmi mọ ẹemara ẹemara ạmi koḍighi ni rạalha.

²⁶Nạ Ọmoogh-we kụ Ẹnaan, kụ nạ muguanaan ịmi ọokia oguan phọ ọphon.

²⁷Mị rạlhom ni nyịna mọ sẹph ni nmụny ạnmuny phọ ạmi pịdi bịdi ọkelom igey phọ ạna ọkiom risigh. Nạ Ọmoogh-we maguanaan ni ịphen phọ, ḅịle kẹn ạḍiseph phọ ạna kẹtolan nmụny ạnmuny phọ ạmi kꞌagee-pọ.”