Read abua 1 Krọnikuls 19 Bible Online

1 Krọnikuls 19 - abua bible

1 Krọnikuls 19

¹Ịphen phọ reru reten kụ aNahas ọdaam mọ Amon amugh kụ aHanun ọony ọdi ạsighe dọl phọ ọdi ạda.

²ADevid ọdaam mọ ạḅem mọ, “Mị kạtolom ni ḍigey ạdol Hanun ọony phọ aNahas, ịdipho ọde phọ ọdi ụrolom bọ ịmi ḍigey ạdol phọ.” Kụ iḍighi kụ aDevid arom butelhedom mọ ọghi ọodereghi nyọdi loor ọde phọ ọdi amugh bọ. Mem dị bịdi ọghi bọ osi ẹpe Amon,

³abuḍiemiom Amonait ọḅeni ọdaam mọ mọ, “Nạ ragbi ghan mọ esi arughuenian ọde phọ ạna kụ ẹdi aDevid arom bọ weye phọ ạbuen mọ oru ọḅeni nyịna mọ oloḍio phọ ḍụghum? Kị́dipho. Ọdi atom weye phọ ạbuen phọ mọ oru oḅiligha ọmiin ịlo ẹmha phọ edi, pịdi atu uzuom iyira ẹgham akpobiom.”

⁴Kụ aHanun asiphi butelhedom mọ aDevid, ạboor oniin ạḍighaagh ọleem mọ ạbidi, kụ aagbo ogboku ạrusuoma phọ ạbidi asiemi ẹphen ude phọ kụ ạḅeni bịdi mọ ogheel.

⁵Bịdi útue úsi ologhi otu esi umugholoor. Mem dị aDevid ạnaghan bọ ịphen phọ memite bọ, ọdi arom ni dom mọ bịdi ọrol ẹpe Jeriko mọ kútigheel tụtu ạreleem mọ ạbidi ẹḅile esiighi.

⁶AHanun ọdaam mọ rꞌAmonait phọ uloghoma ni mọ bụno mọpioman ropur ẹkaraph eḍu esi aDevid, kụ iḍighi kụ bịdi ọghi ọkpe ịraardi rꞌinya ọonir igbogh ịtoom ẹemor asilva ophirom rughuugh-ude rꞌawe dị rokiilom ghan rụsu ạga Ẹsiinyom aMesopotamia ḅịle rꞌareelhe ạSiria, Maaka rꞌaZoba.

⁷Ịraardi rꞌịyal ọonir arughuugh ẹgham mọ bịdi ophir bọ rꞌawe ẹgham ọdaam mọ aMaaka uru ni kụ ọrol otuman Medeba. Kụ awe phọ Amon kẹn omiteghu sịphe ạramha phọ ạbidi kụ ookolobian ịlo elephiri.

⁸ADevid ạnaghan ni ịphen remite bọ kụ arom Joab rꞌoomo aḍita awe ẹgham mọ mọ ọghi eenan rꞌạbidi.

⁹Amonait phọ ugiriph ni ọghi ọsighe dọl ạbidi ẹpe eḍighom ẹmha phọ aRaba, ẹkpana ẹmha phọ ạbidi, kụ ạbudaam mọ bụphe oru bọ ọloghonaan ạbidi ḍịghaagh phọ ọsighe dọl ạbidi ẹpe ẹyaghaghaany esi.

¹⁰AJoab ạmiin ni mọ awe ẹgham ẹpomoghian phọ ạbuno kọḍua risigh rꞌọman kụ otu ozuom ạbuno ẹgham mọ, kụ ọdi ạson ọkar igey awe ẹgham mọ Ịzirel kụ asereghi riisi dị ẹkar ẹda weye ạSiria.

¹¹Kụ ọdi ạsighe bụeri phọ asita awe phọ ọdi ạḅogh ạlogh ḍịghaagh Abisai umor ọdi dị ạsighe bịdi asereghi riisi dị ẹdaanaan rꞌawe Amon phọ.

¹²AJoab ạḅeni nyọdi mọ, “Eḍighi ịyaar dị nạ ạmiin mọ awe ạSiria phọ mọkpar rupu ịmi, pọ tue ụlhoghonaan ịmi ḍịghaagh, ḅịle kẹn eḍighi ịyaar dị Amonait phọ mọkpar ropu nyịna, pọ mị katu ni ạloghonaan nyịna ḍịghaagh.

¹³Mạar ạkpar ḅịle kẹn kákiil eepuph, ẹrol dị yira ọmoogh ịikpo, loor ẹmhu awe phọ ayira rꞌạramha phọ Ẹnaan phọ ayira. Ọmoogh-we phọ aḍighi ni ịpe ẹnighe bọ esi ọdi!”

¹⁴AJoab rꞌawe phọ ọdi oḍuraan ọobeeph ozuom ẹgham, kụ awe phọ ạSiria osumughu ọḍua egbodo ọdi.

¹⁵Mem dị Amonait phọ ọmiin bọ mọ awe ạSiria phọ rokiil kosumughu, bịdi kẹn oghiilaan Abisai osumughu oḅula ẹpe ẹmha phọ. Kụ aJoab aḅula ạghi ẹpe Jeruselem.

¹⁶Awe phọ ạSiria uloghoma ni mọ awe Ịzirel phọ mọkpar opu bụno, kụ iḍighi kụ bịdi ọsighe bụo ẹgham reelhe ạSiria ạga emitenom erumuḍio phọ Ọphiiny aYufratis kụ ọḅogh ọlogh ḍịghaagh aSobak, uwo ẹmhu awe ẹgham aHadadezer ọdaam mọ aZoba.

¹⁷Kụ mem dị ọghaaph bọ ịphen phọ ọḅeni Devid, ọdi aakpomoghi ni oomo Ịzirel egina esi; kụ ọḅeeny Jọdan ophun, kụ ọmeremi bịdi riisi dị ephogh we ạSiria. Elephiri phọ emiigh,

¹⁸kụ ạbuo ẹgham Ịzirel phọ ophorogh we ẹgham ạSiria oḅulemi ọman. ADevid rꞌawe ọdi ọze oḍual ọonir awe ạSiria bụo oghiilom arughuugh-ude ḅịle rꞌinyadi ọonir ạbuo ẹgham owol ade. Bịdi ughiighom kẹn ni Sobak uwo ẹmhu awe ẹgham ạSiria.

¹⁹Mem mọ ạbudaam mọ ạbuphe odi bọ eeḍian aHadadezer ologhoma bọ mọ awe Ịzirel mọkpar bụno, bịdi ọwa ẹepho esi aDevid kụ ọrolan ghan eeḍian ọdi. Amem ị́tol mun dị awe ạSiria ọnya ọphel awe Amon.