Read abua 1 Krọnikuls 22 Bible Online

1 Krọnikuls 22 - abua bible

1 Krọnikuls 22

¹Kụ aDevid ạḅem mọ, “Ịsien kụ ẹdi Otu Ịiḅereghi Ọmoogh-we Ẹnaan phọ kạtol. Pọrono sịen enmeny dị awe phọ Ịzirel kọpinyon ghan rịkia oguom ạnian.”

²ADevid ọdaam mọ ạto ni ạḅeni mọ oomo aruuruen dị ọrol ghan de phọ Ịzirel ookpomoghan, kụ ọdi ạngo bịdi iiḍighi. Buniin ạbidi oselemi ghan iiḅoghoḍi asighiigh ịlo ọloghom Otu Ịiḅereghi phọ.

³Ọdi amitiom ọminighan okuron ọlemom iḍugh rꞌikpoghom ạrunhu-aḍibuo phọ ọkaaghiom bọ ireeny, rꞌẹminighan enaba dị oye kátue alegheri ẹemor.

⁴Ọdi aḍighi ịdi awe phọ aTaya rꞌaSaidon kotuomaan nyọdi ịminighan ikulha ọsaga.

⁵ADevid ạatughian mọ, “Ẹkpe ni dị Otu Ịiḅereghi phọ ọony phọ ạmi Sọlomon kạlogh bọ kạnighe igey ọmiin kụ aaleghaan oomo ịsien aḅirini phọ. Kụ ọlo ọdi ọony ni ḅịle olegheri-ịyaar ọdi kọ̋bugh, kụ iḍighi kụ mị kaakolobian kụ ẹteeny.” Kụ aDevid aakpomoghi ịminighan ạraraar ọloghom otu phọ kụ agbi omugh.

⁶Ọdi arom ni ạghiom mọony phọ ọdi Sọlomon kụ ạto ạḅeni mọ ọdi ạloghonaan otu ịiḅereghi Ọmoogh-we phọ, Ẹnaan phọ Ịzirel.

⁷ADevid ạḅeni nyọdi, “Mọony ạmi, ịrol ologhi ạmi ọlogh otu ịiḅereghi oghueniom Ọmoogh-we Ẹnaan phọ ạmi.

⁸Kụ ọlo Ọmoogh-we phọ ụḅeni ịmi mọ mịna mạze ịbadi awe, abeeghi ịbadi ạraagham. Esi ịduon phọ, loor ẹmhu oomo ịḅaal phọ mị mazuughi bọ, ọdi ọ́wa dị mị kạlogh otu ịiḅereghi aseenaan nyọdi.

⁹Ịlo eḍighi eḍighi, ọdi uguanaan ni ịmi oguan. Ọdi ạḅem mọ, ‘Nạ kạmoogh ni mọony dị kạda rꞌẹepho, loor esi dị mị kạngo nyọdi ẹepho dị rꞌoniin ọnyo ạbumulogh-ḍien ọdi kạ́aḅaghami. Ḍien ọdi kokol mọ ạSolomon, loor esi dị mem mọ ọdi kạda bọ mị kạngo Ịzirel ẹepho rꞌạdol dị ịyaar kẹ́eḅaghami.

¹⁰Ọdi kụ kụloghonaan ịmi otu ịiḅereghi. Ọdi kaḍighi mọony ạmi, kụ mị kaḍighi ọde ọdi. Ẹemara ẹemara ọdi kẹda Ịzirel kꞌagee-pọ.’”

¹¹ADevid ạghaaph rạkiom, “Nyịidipho, mọony ạmi, Ọmoogh-we Ẹnaan phọ ạna ạrolonaan nyịna, aḍighi oguanaan phọ ọdi amitiom dị nạ kạloghonaan nyọdi otu ịiḅereghi.

¹²Kụ Ọmoogh-we Ẹnaan phọ ạna ạngo nyịna olegheri-ịyaar rꞌologhi ẹrol dị nạ ạda Ịzirel ịdi emeeraam ologh phọ ọdi.

¹³Nạ ạnaghanan oomo iilogh phọ Ọmoogh-we phọ ạngo bọ Mozis ọphamam Ịzirel, kẹnighenaan ni nyịna. Mọogh omeeraam kụ ạmoogh oḅio, ḅịle kámeera ịyaar ẹngo nyịna eepuph.

¹⁴Ịlo Otu Ịiḅereghi phọ, mị maakpomoghi gol dị epel ịraardi rꞌinya okuron ọkaraghi igbogh ịtoom ẹemor rꞌasilva dị epel ịraardi rꞌinya ọonir ọkaraghi igbogh ịtoom ẹemor dị kọloghom otu phọ. Otigheri ịpe, enaba dị ọsighe oru kémuneen. Mị ạmoogh kẹn ireeny rꞌasighiigh dị edi ghan bịn kụ nạ kạḅile ni ạwa ịnon.

¹⁵Nạ ạmoogh ni ịbadi ạbuo iiḍighi. Awe odi oḍighi esi oogbo ghan asighiigh, rꞌạbuo ọḅiir rꞌạbuo ạmaka odi rꞌịbadi awe ẹmaar ẹlo ẹkpigh rꞌẹkpigh dị kotue oḍighi iiḍighi

¹⁶rꞌagol, silva, enaba rꞌarukuron. Nyịidipho miigh oḍighi kụ Ọmoogh-we phọ ạrolonaan nyịna.”

¹⁷ADevid ạto ni ạḅeni oomo abuḍiemiom mọ Ịzirel mọ ọloghonaan ḍịghaagh Sọlomon.

¹⁸Ọdi ạḅem, “Ọmoogh-we Ẹnaan phọ anyina mạrolan ni rꞌanyina kụ mịngo inyina ẹepho oomo ịigaany. Ọdi aḍighi ịdi mị ạkpar apu oomo awe dị ọrol ghan sịen ade phọ ạḍien, kụ bịdi moḍighi nyịidipho we dị odi eeḍian anyina rꞌỌmoogh-we phọ.

¹⁹Nyịidipho iḍighi oḍighi ẹngo Ọmoogh-we Ẹnaan phọ anyina rꞌoomo ologhi anyina rꞌuwaloor anyina. Imiigh ọlogh Otu Ịiḅereghi phọ, ẹrol dị nyina ẹlogh ologhi Igbe Ịyo Ọmoogh-we phọ rꞌoomo ịpheri phọ ạraraar iigbia phọ rọoḅereghiom ghan bọ nyọdi.”