Read abua 1 Krọnikuls 24 Bible Online

1 Krọnikuls 24 - abua bible

1 Krọnikuls 24

¹Ịphen kụ asita ịlo ạnmuny ạnmuny Eeron. Eeron ạmoogh inya alephiri: Nạdab, Abihu, Ẹliazar, rꞌItamar.

²ẠNadab rꞌAbihu umugh ni kụ ọde ạbidi agbi omugh, kụ nmụny ụ́moogh. Kụ iḍighi kụ Ẹliazar rꞌItamar uḍighi riil ạrikia.

³ADevid ọdaam mọ asereghi nmụny nmụny Eeron sita dị ẹdaphan iiḍighi ạbidi. ẠZedok, ọony ọony Ẹliazar, ḅịle rꞌẠhimelek, ọony ọony Itamar, kụ ụlhoghonaan ni nyọdi ḍịghaagh.

⁴Ạnmuny ạnmuny Ẹliazar, usereghi bịdi sita dị ẹman ḍioph rꞌodiiny; ạnmuny ạnmuny Itamar, osereghi bịdi ọphaanya asita. Uḍighi ịduon phọ loor esi dị sịphe ạnmuny ạnmuny Ẹliazar ụrol ịbadi alephiri aruwo ẹmhu arughunotu.

⁵Loor esi dị awe iiḍighi Otu Ịiḅereghi rꞌabuḍiemiom iiḍighi aruwaloor ụrol sịphe ạnmuny ạnmuny phọ Ẹliazar rꞌItamar, mem lọ kọngooghi iiḍighi, udi ghan ẹdo.

⁶Ạnmuny ạnmuny Ẹliazar rꞌItamar, buniin mem mem kụ odi ghan. Kụ aSemaya ọony phọ ạNetanel ọgeeghia ọnyo aLivai kụ ạgeeghi ghan loor ạḍinya. Ọdaam mọ, awe iiḍighi ọdi, ạZedok oyil ẹkia phọ, Ạhimelek ọony phọ Ạbayata rꞌaruwo ẹmhu arughunotu ạbuo ariil ạrikia rꞌạbuo aLivai, oomo phọ ạbidi kụ ụrol ọmiin aani ghan.

⁷Ịduon kụ ẹdi ọdaph kụ ọngooghi ịyaldi rꞌinya asita arughunotu phọ iiḍighi ạbidi: 1. — Jehoyarib 2. — Jedaya 3. — Harim 4. — Siorim 5. — Malkaija 6. — Mijamin 7. — Hakoz 8. — Abaija 9. — Jesua 10. — Sekanaya 11. — Eliasib 12. — Jakin 13. — Hupa 14. — Jesebeab 15. — Bilga 16. — Imer 17. — Hezir 18. — Hapizez 19. — Petahaya 20. — Jẹhezkel 21. — Jakim 22. — Gamul 23. — Delaya 24. — Maazaya

¹⁹Ụgeeghi siḍien awe phọ ạbuen ọdaphan iiḍighi ịsiphe Otu Ịiḅereghi phọ ịdipho Eeron ọde ọde phọ ạbidi aseere bọ, ọnaghanan ịto Ọmoogh-we Ẹnaan phọ Ịzirel.

²⁰Bụen ạbunon aruwo ẹmhu arughunotu dị omite kꞌaLivai: Jedaya, ọony ọony Ạmram ḍịghaagh ạSebuel;

²¹Ishaya, ọony ọony aRehabaya;

²²Jahat, ọony ọony Izhar ḍịghaagh aSelomit;

²³Jeraya, Amaraya, Jạhaziel, rꞌaJekamiam, ạnmuny ạHebron, ọdaph ikumoor;

²⁴Samir, ọony ọony Ụziel ḍịghaagh aMaika;

²⁵Zẹkaraya, ọony ọony Ụziel, ḍịghaagh Ishaya umor phọ aMaika;

²⁶Mahli, Musi, rꞌaJaazaya, ạnmuny ạnmuny aMerari.

²⁷AJaazaya ạmoogh ịraar ạnmuny: Soham, Zakur, rꞌIbri.

²⁸AMahli ạmoogh ịyal alephiri, Ẹliazar rꞌaKis. Ẹliazar mọony ọ́mar, kụ aKis ạmoogh oniin olephiri, Jerameel.

³⁰AMusi ạmoogh ịraar alephiri: Mahli, Eder, rꞌaJeremot. Ịphen arughunotu ạbuo aLivai.

³¹Uwo ẹmhu ạtorobo eghunotu rꞌoniin ọbam umor ọdi udi ẹdo kụ olegheri iiḍighi ạbidi, ịdipho asiya ạbidi ariil ạrikia phọ omite bọ kꞌEeron oḍighi bọ. ADevid ọdaam mọ, ạZedok, Ạhimelek, rꞌaruwo ẹmhu arughunotu ariil ạrikia phọ rꞌạbuo aLivai, oomo phọ ạbidi kụ ụrol ọmiin aani ghan.