Read abua 1 Krọnikuls 29 Bible Online

1 Krọnikuls 29 - abua bible

1 Krọnikuls 29

¹ADevid ọdaam mọ agbeel ạḅeni oomo ookpomoghan phọ: “Ọony phọ ạmi Sọlomon kụ ọdi Ẹnaan mẹsaḅar, kụ ọlo ọdi aḍighi ọbumoony kụ olegheri-ịyaar ọdi kọ̋bugh. Oḍighi dị odi ghisigh ạbugh ni iboom, loor esi dị ọphon kógiga awe kụ ọlo Otu Ịiḅereghi Ọmoogh-we Ẹnaan phọ.

²Mị mạkparagha ni aakolobian rạraar ịlo Otu Ịiḅereghi phọ — gol, silva, enaba, rukuron, ikulha ireeny, ịma asighiigh, asighiigh ịnme rꞌịminighan asighiigh dị ẹgonyian.

³Ghạlamo rꞌoomo ịphen mị mamiteghom bọ ni, mị mạngo silva rꞌagol dị aḍighi ruphua ạmi loor esi ạḍiḅeeraan dị mị ạmooghaan Otu Ịiḅereghi phọ Ẹnaan.

⁴Mị mạngo ịma agol dị apel oniin okuron ọonir ọkaraghi igbogh ịtoom ẹemor rꞌịma asilva dị esugha ẹnum ọman ịyal okuron rꞌinyadi ọonir ọkaraghi igbogh ịtoom ẹemor ịlo ọnighemiom iikpe Otu Ịiḅereghi phọ,

⁵rꞌoomo ạraraar lọ ạbuo ẹmaar phọ koḍighi yogh. Nyịidipho ạnhian kụ aakolobian ọngo aani inmo ophooph-ologhi Ọmoogh-we phọ?”

⁶Kụ ạbuo ạrumhu aropolo phọ, awe iiḍighi arughunughun phọ, ạbuo ịtooghi ẹgham mọ, rꞌạbuphe ropogh ghan bọ ruphua ọdaam mọ ọnya ọngo aani rꞌophooph ologhi

⁷rạraar phọ ịphen dị koḍighinom Otu Ịiḅereghi phọ: gol dị epel oniin okuron rꞌoḍualdi ọkaraghi igbogh ịtoom ẹemor, silva dị epel ịraar okuron rꞌinyadi ọkaraghi igbogh ịtoom ẹemor, enaba dị ẹnum kụ isugha ọman odiinydi okuron rꞌịyaldi ọkaraghi igbogh ịtoom ẹemor, rꞌarukuron dị epel ịraar ọonir rꞌinya okuron ọkaraghi igbogh ịtoom ẹemor.

⁸Bụdi ọmoogh ịma asighiigh ụngo otu ikpoki Otu Ịiḅereghi phọ, ọpo ạJehiel ọnyo ọto aGerson ọlo eghun aLivai kụ aphogh ghan bọ.

⁹Awe phọ ụngo ni Ọmoogh-we phọ rꞌophooph ologhi kụ ikpoki phọ mọngo bọ ẹḅaalami iloghi phọ ạbidi iboom. ADevid ọdaam mọ ạmoogh ni ọḅaal ologhi iboom.

¹⁰Sịphe ghisigh ookpomoghan phọ kụ ẹdi aDevid ọdaam mọ aboom Ọmoogh-we phọ. Ọdi ạḅem mọ, “Ọmoogh-we Ẹnaan ọde ọde ayoor Jẹkob, ạḍiseph ẹrolonaan nyịna kꞌagee-pọ kꞌagee-pọ!

¹¹Nạ ạbugh ni kụ ạmoogh ịikpo, eegu, ẹnighe rꞌigbogh. Oomo ạraraar kꞌạke kꞌade ịlo ạna, kụ nạ ọdaam, ogbogh ọdi ạda oomo ạraraar.

¹²Oomo aruphua rꞌẹelha ẹḍua kꞌạna; nạ ạda tọrobo ịyaar rꞌịnyaam ạna rꞌịikpo ạna; kụ nạ katue ni aḍighi oye ogbogh, ạkparami.

¹³Nyịidipho, Ẹnaan ayoor, yoor ọngo nyịna ḍịseph ḅịle yoor oboom ḍien eghuan phọ ạna.

¹⁴“Ghạlamo rꞌịduon phọ, awe ạmi rꞌạmi kótue ọkaraghi ọngo nyịna ịyaar loor esi dị oomo ạraraar aruunmo kꞌạna, yoor moḅulemi ịpe eḍighi bọ ni ịlo ạna.

¹⁵Nạ alegheri ni, Ọmoogh-we, mọ yoor odi ghan dọl aruuruen ḅịle rꞌawe lọ odi eeruen ẹmha, ịdipho ạburude ạburude phọ ayoor oḍighi bọ. Asiḍughul-otu phọ ayoor ẹkigh oogho dị raten, kụ yoor kótue okpetenaan ḍuugh.

¹⁶Ọmoogh-we Ẹnaan phọ ayoor, yoor mookpomoghi oomo ẹelha phọ ẹphen ọloghom Otu Ịiḅereghi oghueniom aḍien iigbia phọ ạna, kụ oomo phọ ịne ịḍua kꞌạna kụ eru, ịlo ạna.

¹⁷Mị alegheri ni mọ nạ rạaḅeghion ghan ni ịitughian iloghi ạtorobo oye kụ ogey oye ạḅeeraan ni nyịna. Esi ọkar ọghaaph, rꞌịpe eru bọ igey, mị ạngoom nyịna oomo phọ ịphen rꞌophooph ologhi, kụ mị mạmiin ni mọ awe phọ ạna ookpomoghan bọ sịen ọmoogh ni ọḅaal ologhi ọpham inmo oruom ạna.

¹⁸Ọmoogh-we Ẹnaan ạburude phọ ayoor Ebraham, Ạizik rꞌạJekob, ḍighi ịdi awe phọ ạna kọkuom loor ạbidi okumu ghan ạna kꞌagee-pọ kụ omeeraam nyịna oomo amem.

¹⁹Ngọ mọony phọ ạmi Sọlomon ogey ologhi rꞌẹephua ọnaghanan ghan ịlo nạ ạto ḅịle rꞌọlogh Otu Ịiḅereghi phọ ọpo mị ạtuan bọ kụ aakolobian ịphen.”

²⁰Pọ kụ amem dị aDevid ạto ạngo we phọ mọ, “Iboom Ọmoogh-we Ẹnaan phọ anyina!” Ḅịle oomo ookpomoghan phọ oboom Ọmoogh-we Ẹnaan ạburude ạburude phọ ạbidi, ọḅile ozumeri rụmhu ạbidi ude kụ ọngo rughuenian Ọmoogh-we phọ ḅịle rꞌọdaam phọ.

²¹Ḍịeri phọ aḍio phọ, bịdi ụze ni ịnam ọphinyonom ạrikia, ọḅogh ọngo Ọmoogh-we phọ kụ ogbi ọngo awe phọ mọ ạa. Esi ọḅaram, bịdi ụze ni oniin ọonir ilephiri ạsinam, oniin ọonir idughuna rꞌoniin ọonir ạnmuny iyool-ịga dị ọphophoghi ikpom sịphe enmeny ạrikia phọ. Bịdi urumom kẹn ni miim ẹkia.

²²Kụ ḍio phọ ạḍiphe bịdi ụmoogh ni ọḅaal ologhi loor esi dị bịdi ulhe ni ọphughol ghisigh Ọmoogh-we phọ. Ẹnon amem kẹn, bịdi uuleghemi ni Sọlomon mọ ọdaam. Rꞌaḍien Ọmoogh-we phọ bịdi ụsighe ni mụnum ọsagharan ẹmhu ọdi mọ ọdi ạda bụno, ḅịle rꞌẹmhu ạZedok mọ aḍighi oyil ẹkia phọ.

²³Kụ ạSolomon ạsighe esi ọde phọ ọdi Devid sịphe ạgada ọdaam mọ ọpo Ọmoogh-we phọ kụ amitiom bọ. Ọdi aḍighi ni ọdaam dị aḍum, kụ oomo eelhe phọ Ịzirel ụnaghanan ni nyọdi.

²⁴Oomo awe iiḍighi rꞌawe ẹgham mọ ḅịle rꞌạbueri phọ ạnmuny phọ aDevid uguanaan ni osooromi aloor ọngo ạSolomon mọ ọdi ọdaam.

²⁵Ọmoogh-we phọ aḍighi ịdi oomo eelhe phọ ọlogh eegu Sọlomon, kụ ọdi ạngo nyọdi rughuenian apuemi oomo ạbueri phọ mạda ghan bọ Ịzirel.

²⁶ADevid ọony phọ ạJesi ạda ni oomo Ịzirel

²⁷esi inyadi ạsia. Ọdi ạda ẹpe Hẹbron esi oḍual ạsia kụ ẹpe Jeruselem ịraardi rꞌịraar ạsia.

²⁸Ọdi ạmoogh ni ẹelha kụ aḍighi ọdaam dị awe ọlogh eegu, ạkpo ni agey kụ agbi omugh; ạSolomon ọony ọdi ạsighe esi phọ ọdi kụ aḍighi ọdaam.

²⁹Iphiligba ịlo aDevid kꞌemiighom kụ esi eekuna ọsighe ni ọge sịphe ạrinya ịraar ariil phọ, Sạmuel, Netan rꞌạGad.

³⁰Ạrinya phọ ẹkaaph ịpe ọdi ạda bọ, ịikpo dị ọdi ạmoogh, rꞌoomo ạraraar dị emiteghunaan nyọdi, ịdi emite Ịzirel rꞌareelhe phọ ekoom bọ.