Read abua 2 Krọnikuls 11 Bible Online

2 Krọnikuls 11 - abua bible

2 Krọnikuls 11

¹Mem dị aRehoboam ọdaam mọ asi Jeruselem, ọdi aakpomoghi ni oomo awe arughunughun aJuda rꞌạBenjamin, kụ bịdi ọson 180,000 igeny awe ẹgham mọ ọghi ẹpe ephunom mọ oruphiom ẹgham Ịzirel ạar ọda ẹmha phọ oḅulemi ọngo Rehoboam ọony phọ ạSolomon.

²Kụ Ọmoogh-we phọ ạḅeni Semaya oyil phọ

³mọ ạḅeni dom mọ ạḍien Rehoboam ọdaam mọ rꞌoomo awe arughunughun aJuda rꞌạBenjamin:

⁴“Kébenan bụeri abumor anyina Ịzirel. Tọrobo oye agheel kꞌọdi. Ịpe emite bọ ogbi ạmi.” Kụ bịdi ọnaghanan ịto Ọmoogh-we phọ bịn ụ́ki mun eenan aJeroboam.

⁵ARehoboam ạrol ẹpe Jeruselem kụ ạngo ịtooghi okpekima ạramha aJuda rꞌạBenjamin phọ ịphen:

⁶Bẹtilihem, Ẹtam, Tekoa,

⁷Bẹt Zur, Sọko, Ạdulam,

⁸Gạt, Maresa, Zịf,

⁹Adoraim, Lakis, Azeka,

¹⁰Zora, Aizalon, rꞌạHebron.

¹¹Ọdi ạmaar ri akpekima yogh kụ ạmaaghi buḍiemiom ẹmha ẹmha phọ, asereghi riiḍien ole, mụnum-ọliv rꞌamiim,

¹²ạngoom ịsuaram rꞌịsoph ẹmha ẹmha phọ. Ịduon kụ ẹdi ọdi ạmooghom Juda rꞌạBenjamin.

¹³Oomo eelhe phọ Ịzirel kụ ẹdi ạbupinyon rꞌạbuo aLivai ọḍua kụ osi Juda.

¹⁴Ạbuo aLivai phọ ọwile yogh rọogho phọ rꞌịnon arere phọ ạbidi kụ oru Juda rꞌaJeruselem, loor esi dị aJeroboam ọdaam mọ Ịzirel rꞌạbuphe ọsighe bọ esi phọ ọdi úmeera bịdi oḍighi riil ạrikia Ọmoogh-we phọ.

¹⁵AJeroboam ạmaaghi riil ạrikia bụo ọdi dị koḍighi ghan oḍighi riisi ooseeny ghan ruru rꞌạrumugh phọ ọdi ạkaaghi bọ ạghighemi ịya ạsinam.

¹⁶Sịphe oomo arughunughun phọ Ịzirel, awe dị rọwa ooseeny Ọmoogh-we Ẹnaan phọ Ịzirel rꞌoomo ologhi, ụdaph ni bụo aLivai phọ ọghi Jeruselem, ọbo bịdi orue oḍighi rịkia ọngo Ọmoogh-we Ẹnaan ạburude ạburude ạbidi.

¹⁷Ịphen kụ ịkparami eelhe phọ aJuda, kụ esi ịraar ạsia bịdi umeeraam Rehoboam ọony phọ ạSolomon kụ ọrol ịdipho bịdi ọrol bọ mem mọ aDevid rꞌạSolomon ọda bọ.

¹⁸ARehoboam aphin Mahalat, ọpo ọde ọdi aghol bọ mọ aJerimot ọony aDevid rꞌonhiin ọdi oghol bọ mọ Abihel, ọnyani Eliab rꞌọnyani ọnyani ạJesi.

¹⁹Bịdi ụmoogh ịraar alephiri: Jeus, Semaraya, rꞌaZaham.

²⁰Ọdi ạḅile aphin Maaka, ọnyani Ạbsalom, kụ bịdi ọmoogh inya alephiri: Abaija, Atai, Zịza, rꞌaSelomit.

²¹Ookpomoghi, aRehoboam aphinogh ḍioph rꞌọphaanya ạnmariir rꞌodiinydi ạruga, kụ ạmaraghi ịyaldi rꞌọphaanya ạnmuny rꞌodiinydi ạnmanyaan. Sịphe oomo ạnmariir phọ rꞌạruga phọ ạbuen, aMaaka kụ oophineen,

²²kụ Abaija ọony ọdi kụ ạḅeeraan ọde phọ apu oomo ạbueri phọ kụ ạsaḅar nyọdi kụ ọsighe ạgada ọdaam mọ mem lọ ọdi amugh.

²³ARehoboam ạsighe ologhi kụ aḍiemiom odiiny ạnmuny ọdi riisi ọpham, kụ asereghi bịdi oomo aJuda rꞌạBenjamin sịphe ạramha phọ mokpekima bọ. Ọdi ạpham bịdi rꞌophooph ologhi kụ aphinoghonaan bịdi nmạriir.