Read abua 2 Krọnikuls 12 Bible Online

2 Krọnikuls 12 - abua bible

2 Krọnikuls 12

¹Iru ẹteeny mem dị aRehoboam mạkparami ọda phọ bịn ọdi rꞌawe ọdi oghel Ologh Ọmoogh-we phọ.

²Ịman oogh ạsia kụ bịdi ọmiin ghẹlhe Ọmoogh-we phọ. ASisak ọdaam mọ Ijipt azuom ni Jeruselem.

³Ọdi ạpham 1,200 arughuugh ẹgham, 60,000 awe dị rokiilom ghan rụsu, rꞌaḍita awe ẹgham dị útue úgbi, ọḅaraghi we ẹgham ạLibia, Suk rꞌạSudan.

⁴Ọdi ee ạmoogh rạmha phọ okpekima bọ ẹpe Juda, kụ ạghi risigh tụtu asi Jeruselem.

⁵ASemaya oyil phọ ạghi ạteeny Rehoboam ọdaam mọ rꞌaruwo ẹmhu aJuda dị mookpomoghan Jeruselem okpetenaan aSisak. Ọdi ạḅeni bịdi, “Ḍịen adom Ọmoogh-we phọ dị iruom inyina: ‘Nyina mighel ịmi, kụ nyịidipho mị mighel inyina ạngo Sisak.’”

⁶Ọdaam mọ rꞌabuḍiemiom mọ uloghoma ni mọ bụno moḍighi ni ịkaraph, kụ bịdi ọḅem, “Ịpe Ọmoogh-we phọ raḍighi bọ, ọ́pioman.”

⁷Mem dị Ọmoogh-we phọ ạmiin ịphen, ọdi ạḅile ni ạḅaanaan Semaya kụ ạḅeni nyọdi, “Loor esi dị bịdi ologhoma mọ bịdi moḍighi ịkaraph, mị kápiemi bịdi. Kụ mem dị aSisak azuom, bịdi kokpetenaan ẹnum bịn. AJeruselem kóloghoma ophin ologhi ạmi iboom,

⁸kụ ọlo aSisak kạkpar ri apu bịdi kụ bịdi kọmiin ọgbaranaan sịphe ọrolan ạmi rꞌọrolan awe aḅirini dị ọda we.”

⁹ASisak ọdaam mọ aru azuom Jeruselem kụ ạsighe ruphua ịsiphe Otu Ịiḅereghi phọ rꞌịlo otu ọdaam mọ ạḍuanam. Ọdi arool ạsighiogh oomo ạraraar kụ ạḅaram ịsuaram agol ịpe ạSolomon ọdaam mọ aḍighi bọ.

¹⁰Kụ aRehoboam ạḅile ni ạsighe enaba aḍighinom ịnon ịsuaram, ạḅogh ạlogh rạghaagh abugbogh bụphe oseere bọ ophogh ghan ịnhu-aḍibuo otu ọdaam mọ.

¹¹Tọrobo amem lọ ọdaam mọ rạki oḍigh Otu Ịiḅereghi phọ, abukoriom mọ otool ịsuaram ọkimom ọḅile otool oḅulolom oseere sịphe otu-eḍighom mọ.

¹²Loor esi dị ọdi asooromi loor ạngo Ọmoogh-we phọ, ophin ologhi Ọmoogh-we phọ óphiemi nyọdi ọ́man, kụ ạraraar ịnighe aani Juda.

¹³ARehoboam ạda Jeruselem kụ ạkparami ịikpo ọda phọ ọdi. Ọdi ạman 41 ạsia mem dị ọdi aḍighi ọdaam kụ ọdi ạda 17 ạsia ẹpe Jeruselem, ẹmha phọ Ọmoogh-we phọ ạsaḅar bọ sịphe oomo eelhe phọ Ịzirel mọ esi dị kooseeny ghan nyịno. Ḍien onhiin aRehoboam ughol mọ aNaama ọlo ade phọ Amon.

¹⁴Ọdi aḍighi ịdi eeph, loor esi dị ọdi ọ́moogh ẹephua ọwa ịpe ẹḅeeraan bọ Ọmoogh-we phọ.

¹⁵Iiḍighi phọ aRehoboam rꞌeghunotu phọ ọdi, kꞌemiighom kꞌekureriom ọsighe ni ịphen ọge sịphe ạḍinya Iiḍighi aSemaya Oyil phọ, rꞌịsiphe ạḍinya Ịmiin Ido Oyil phọ. ARehoboam rꞌaJeroboam ueeghi yogh ghan ẹgham oomo amem.

¹⁶ARehoboam amugh ạtuonom bụrude phọ ọdi. Ọsighe nyọdi oḍi sịphe ariiḍi ạbudaam mọ, ẹpe ẹmha phọ aDevid, kụ Abaija ọony phọ ọdi ạsighe dọl phọ ọdi ạda.