Read abua 2 Krọnikuls 16 Bible Online

2 Krọnikuls 16 - abua bible

2 Krọnikuls 16

¹Ạsa ạda bọ Juda rẹman ịraardi rꞌodiiny ạsia, kụ aBaasa ọdaam mọ Ịzirel ạghi azuom Juda kụ ạlogh Rama ạkparami asophoghom mọ oye kụ́ḍua úmite ḅịle kẹn oye kúḍigh.

²Kụ Ạsa ạghi ạsighiogh silva rꞌagol sịphe eekoom Otu Ịiḅereghi phọ rꞌotu ọdaam mọ kụ ạghiomaan ẹpe Dạmaskos ọngo ạBen Hadad ọdaam mọ ạSiria rꞌadom phọ ạḍien:

³“Yira ọmoogh mụḅoph ịdipho ạburude phọ ayira ọmoogh bọ. Asilva rꞌagol phọ ịphen aruunmo ạna. Nyịidipho gboogbonyon mụḅoph phọ ạna rꞌaBaasa ọdaam mọ Ịzirel ọbo ọdi ụkporion ịmi rạghaagh ạwile eelhe phọ ạmi.”

⁴ẠBen Hadad ạnaghanan ni ịpe Ạsa ạḅem bọ kụ arom bụo ịtooghi ọdi rꞌawe ẹgham mọ ạbidi mọ ọghi ozuom igbogh ạramha phọ Ịzirel. Bịdi ọmooghom Ijon, Dạn, Ebel Bẹt Maaka rꞌoomo ạramha ạNaftalai dị osereghi ruuphua ooko ghan.

⁵Mem dị aBaasa ọdaam mọ ạnaghan ịpe emite bọ, ọdi ạwile ọ́lhogh mun ọ́kparami Rama.

⁶Pọ kụ ẹdi Ọdaam Ạsa aakpomoghi we oomo aJuda ạtooghi mọ ọghi orool ọsighiogh oomo asighiigh rꞌireeny phọ ịpe aBaasa ạsighe bọ ọloghom aRama, kụ bịdi ọsighe ọloghom okpeki rạmha aGeba rꞌaMizpa.

⁷Mem mọ ọpo phọ aHanani oyil phọ ạghi ạteeny Ọdaam Ạsa kụ ạḅeni mọ, “Loor esi dị nạ aḍuom ologhi ọdaam mọ ạSiria kpạripe rꞌoḍuom ologhi Ọmoogh-we Ẹnaan phọ ạna, awe ẹgham ọdaam mọ Ịzirel mokpetenaan nyịna.

⁸Awe phọ ạSudan rꞌawe phọ ạLibia ụmoogh ni ḍigbogh aḍita awe ẹgham rꞌịbadi arughuugh ẹgham rꞌawe dị rokiilom ghan rụsu. Kị́duon? Loor esi dị nạ uḍuom ologhi Ọmoogh-we phọ, ọdi ạngo ni nyịna ọkpar-opu esi ạbidi.

⁹Ọmoogh-we phọ anaan kụ rapogh oomo aḅirini phọ, ọngo ịnyaam bụphe iloghi phọ emeeraam bọ nyọdi. Nạ maḍighinom elologhi, kụ emiigh nyịidipho kụ ẹghiom ghisigh nạ kabe ghan rạagham.”

¹⁰Ịphen phọ kụ iḍighi ịdi ephin ologhi Ạsa kụ arom mọ ọghoroghiom oyil phọ izime. Eniin phọ amem mọ ạmuen kẹn kụ ẹdi Ạsa amiigh oḍighi ghan abuniin awe ịlo ịnam.

¹¹Oomo ịpe emiteghu sịphe ọda phọ Ạsa kꞌemiighom kꞌekureriom, ọsighe ni ịphen ọge sịphe ạḍinya ịpe emiteghu mem ạbudaam mọ aJuda rꞌỊzirel.

¹²Ạsa ạda bọ Ịzirel rẹman ịraardi rꞌesugha ạsia, kụ ọdi aagughuḍian rꞌẹzegh dị ẹrol owol; rꞌịdipho phọ bịn ọdi ókiton óphogh Ọmoogh-we phọ ọmoogh ẹpelenaan, ạghi ghan kꞌariil eekonom.

¹³Ịyal ạsia reten bịn amugh

¹⁴kụ oḍi nyọdi oḍi ọdi dị oguph loor asighiigh sịphe Ẹmha aDevid. Bịdi ugbulogh rolho eeḅi eḍu rꞌaghuudia omuur ookolobian aḍizu ẹlo amaḍi, kụ bịdi ọkpooni egu ạnian kụ omoghiom ḍuugh phọ ọdi.