Read abua 2 Krọnikuls 17 Bible Online

2 Krọnikuls 17 - abua bible

2 Krọnikuls 17

¹ẠJehosafat ạsighe ni ạgada Ạsa ọde ọdi kụ ạkparami dọl ọdi esi Ịzirel.

²Ọdi ạmeremi ni weye ẹgham igbogh ạramha phọ okpeki yogh bọ ẹpe Juda rꞌịphalagbal aJudia rꞌigbogh ạramha phọ Ạsa mạmooghaan bọ ẹpe eelhe phọ Ifraim.

³Ọmoogh-we phọ ạseph ni Jẹhosafat loor esi dị ọdi ạdaphan ẹrolom ọde phọ ọdi mem emiighom aghuḍum mọ kụ óoseeny ghan Baal.

⁴Ọdi akumu ghan Ẹnaan ọde ọdi, ạnaghanan ghan ịtooghi Ẹnaan, kụ óḍighi yogh ghan ịpe ạbudaam mọ Ịzirel oḍighi ghan bọ.

⁵Ọmoogh-we phọ aḍighi ni ịdi ạJehosafat ạpham eelhe phọ aJuda ạkparami kụ oomo awe phọ oruomaan nyọdi ruunmo, kụ eḍighi ịdi ọdi ạmoogh ẹelha kụ ọlogh eghuan dị ẹmanam.

⁶Ọdi ạmoogh oboom ọḅaal ologhi okumu ghan Ọmoogh-we phọ kụ alhereghi oomo ariisi ooseeny aruru rꞌigbudu um-ạke Asera eru-ạnir phọ sịphe Juda.

⁷Lhạ phọ emuneniom bọ ịraar ọda phọ ọdi, ọdi arom ni bụo iiḍighi phọ ạbuen ọghi ọtughemi ẹpe igbogh ạramha phọ aJuda: Bẹn Hail, Obadaya, Zẹkaraya, Nẹtanel rꞌaMikaya.

⁸Awe dị ọdaphan bịdi ụman esugha ạbuo aLivai rꞌịyal ariil ạrikia. Ạbuo aLivai phọ aSemaya, aNetanaya, ạZebadaya, Ạsahel, aSemiramot, ạJehonatan, Adonaija, aTobija rꞌaTobadonaija; kụ ariil ạrikia phọ Elisama rꞌạJehoram.

⁹Bịdi ụsighe ḍịnya Ologh Ọmoogh-we phọ kụ orelhiom oomo ạramha phọ aJuda ọtughemi ghan we phọ.

¹⁰Ọmoogh-we phọ ạlogh ni eepuph loor oomo areelhe phọ ekoom bọ oruphiom ẹgham Jẹhosafat ọdaam mọ.

¹¹Buniin ạbuo aFilistia uruomaan ni Jẹhosafat egu asilva rꞌịnon aruunmo, kụ buniin ạbuo Arebia oruomaan nyọdi 7,700 iyool-ịga ra 7,700 ạrutu-ịga.

¹²Kụ ạJehosafat ạmoogh ghan ịikpo dị ẹmanam. Oomo ịsiphe eelhe aJuda, ọdi adoghoḍi riisi okpeki kụ ạḅaram igbogh ạramha phọ,

¹³riisi dị osereghi riiḍien rꞌịnon ạraraar kụ ekpolan. Ẹpe Jeruselem ọdi ạmeremi ni ikakara awe ẹgham

¹⁴dị ọdaphan ropolo ạbidi. Adna kụ oye ịtooghi awe ẹgham bụo aJuda, kụ ọdi ạmoogh 300,000 awe dị ọrolan nyọdi.

¹⁵Ọdi atum nyọdi, aJehohanan dị ạpham 280,000 awe,

¹⁶kụ oye dị amuneniom ịraar Amasaya ọony aZikri dị ạpham 200,000 awe. (Amasaya ạkuom loor esi okumu ghan Ọmoogh-we phọ rꞌophooph ologhi.)

¹⁷Ọpo ạto ghan bọ rạraar ạngo we ẹgham bụphe eghun ạBenjamin ughol mọ Ẹliada, okakara ọnyo ẹgham, dị ạpham 200,000 awe ẹgham, bụen ụphamagh ịsuaram rꞌạsikumugh.

¹⁸ẠJehozabad dị atum nyọdi ạpham 180,000 awe dị ọnyaaghian igeny ịlo ẹgham.

¹⁹Awe phọ ạbuen ụrolan rꞌọdaam mọ ẹpe Jeruselem; ẹdi etum sịphe, ọdi ạḅile ni ạmeremi bụnon awe ẹgham ịpheri phọ igbogh ạramha phọ okpeki yogh bọ ẹpe Juda.