Read abua 2 Krọnikuls 19 Bible Online

2 Krọnikuls 19 - abua bible

2 Krọnikuls 19

¹ẠJehosafat ọdaam mọ aJuda arigheel rꞌẹwoor sịphe otu ọdi ẹpe Jeruselem.

²Oniin oyil, Jehu ọony aHanani, ạghi ạteeny ọdaam mọ kụ ạḅeni nyọdi, “Nạ ragbi mọ eḍighi ni elhiom ọloghonaan ạḍighaagh we ẹkaraph ẹzo ḅịle ọrolan rꞌawe dị ọlogh ḍien Ọmoogh-we phọ ḍụghum? Ịpe nạ aḍighi bọ mẹsighe ophin ologhi Ọmoogh-we phọ eruom nyịna.

³Ghạlamo ịduon phọ bịn, iniin igey edi ni loor ạna. Nạ magborion oomo igbudu um-ạke Asera phọ, ịpe awe ooseeny ghan bọ, kụ nạ ạwa oḍighi ịpe ẹḅeeraan bọ Ẹnaan.”

⁴Ghạlamo ịduon ạJehosafat ọdaam mọ ạrol bọ sịphe Jeruselem, ẹgba mem ọdi ạghi ghan erelhe ogbo awe, ạḍua Beersheba ẹpe esoorom mọ kụ asi zin aroogbolom sịphe eelhe Ifraim ẹpe ephunom mọ, ịlo ọmagh awe phọ oḅulemi oruom Ọmoogh-we Ẹnaan ạburude ạburude phọ ạbidi.

⁵Ọdi ạmaaghi we iiruen oomo ạramha phọ mokpeki yogh bọ ẹpe Juda,

⁶kụ ạphur bịdi rụru mọ, “Ịmaar egona loor kụ eegbo ghan ịiruen; nyina rẹdaphan ịtooghi Ọmoogh-we phọ, kị́tooghi awe, kụ odi odianaan rꞌanyina mem osophonaan oye ọoruen.

⁷Ịlogh eegu Ọmoogh-we phọ kụ ẹmaar emiighe loor, loor esi dị Ọmoogh-we Ẹnaan phọ ayira rakel bụlo oogbegheḍiom we, rꞌạbulo oḍighan ạga rꞌạbulo ọsighe oti ọman.”

⁸Sịphe Jeruselem ạJehosafat ạmaaghi weye aLivai, riil ạrikia rꞌabuniin ikpolom awe ẹmha phọ oogbo ghan ịiruen sighiton lọ eḍighi ọḅaar ẹmhu esi Ologh Ọmoogh-we phọ ḅịle rꞌasighiton ologh dị emitenaan bụphe orugh bọ sịphe ẹmha phọ.

⁹Ọdi ạto ịphen ạngo bịdi mọ, “Iḍighi iiḍighi anyina eghueniom Ọmoogh-we phọ, esooromi loor ẹnaghanan nyọdi esi ạtorobo ịyaar lọ nyina reḍighi.

¹⁰Tọrobo amem lọ bụo anyina lọ odi tọrobo ẹmha orumom ọghaaph aḍuugh egbo, ḅịle rꞌọghaaph ọḅaar ẹmhu esi ologh mꞌịtooghi, ịmaar eromoghiom bịdi ịlo bịdi koseere siloor ạbidi mem ạraghaaph phọ, ọbo bịdi kọpioman ghan bọ ọmoogh apum esi ịkaraph risigh Ọmoogh-we phọ. Emuton lọ nạ aḍighi, nạ rꞌạbuo anyina keloghoma eephina ophin ologhi Ọmoogh-we phọ. Kụ ọlo nạ aḍighi ni ịphen, nạ kạ́moogh apum.

¹¹Amaraya ogbogh oyil ạrikia phọ kụ kạḅa ẹḍogh okureriom oomo asighiton ịlo iilogh phọ Ẹnaan, kụ ạZebadaya ọony Ịsmael ọdaam eelhe phọ aJuda kụ kạḅa ẹḍogh okureriom oomo asighiton ogbo awe. Ạbuo aLivai phọ kụ kọmiin ghan mọ ọtuugh ni oḍighi omitiom rạghaaph aruutu ịiruen phọ. Ịmoogh oḅio ẹdaphan ịtooghi phọ ịphen kụ eḍighi, kụ Ọmoogh-we phọ ạrolan ạga elhiom mọ!”