Read abua 2 Krọnikuls 21 Bible Online

2 Krọnikuls 21 - abua bible

2 Krọnikuls 21

¹ẠJehosafat amugh ạtuonom bụrude ọdi, kụ oḍi nyọdi sịphe ariiḍi ạbudaam mọ ẹpe ẹmha phọ aDevid kụ ạJehoram ọony ọdi ạsighe esi ọdi ạda.

²ẠJehoram, ọony ạJehosafat ọony phọ aJuda, ạmoogh odiiny abumor: Azaria, Jẹhiel, Zẹkaraya, Azariahu, Mạikel, rꞌaSefataya.

³Ọde ạbidi ạngo ni bịdi gol dị ạmanam, silva rꞌịnon ạraraar dị ẹman ikpoki, kụ aseere oniin ọnyo ạbidi tọrobo ẹmha dị okpeki sịphe Juda. Kụ loor esi dị ạJehoram kụ ọkpana, ạJehosafat ạḅogh ọmar phọ ạngo nyọdi.

⁴Mem dị ạJehoram mạpham eelhe phọ ạkparami, ọdi ạze ni oomo abumor phọ ọdi, rꞌabuniin ikpolom awe iiḍighi Ịzirel.

⁵ẠJehoram ạman bọ 32 ạsia mem mọ ọdi aḍighi bọ ọdaam mọ, kụ ọdi ạda Jeruselem ọphaanya ạsia.

⁶Ọdi ạdaphan ḍịkaraph ạdol phọ Ehab ọdaam mọ rꞌạbueri phọ ạbudaam mọ Ịzirel loor esi dị ọdi aphin oniin ọnyani Ehab. Ọdi ạpioghom esi Ọmoogh-we phọ,

⁷kụ ọlo ị́ḅeeraan Ọmoogh-we phọ ophiemi oḍigh asiya aDevid, ịdi eḍighi bọ ọdi maghiran ịyo rꞌaDevid kụ aguanaan mọ ạnmuny ạnmuny ọdi kụ kọda ghan.

⁸Mem mọ ạJehoram ạda bọ, Idom uruphiom ni ẹgham Juda kụ eḍighi eelhe dị ẹmoogha loor.

⁹Kụ ạJehoram rꞌawe ẹgham ọdi omitenom rughuugh ẹgham, ozuom Idom. Sịphe phọ awe ẹgham Idom okoom bịdi, kụ ḍughul bịdi ọkpar osuma.

¹⁰Idom mọmoogha loor ọgbatanaan Juda kꞌaḍiodi. Eniin phọ amem mọ ạmuen, ẹmha phọ aLibna ọḅile oḍeenaan émeera, loor esi dị ạJehoram maghel Ọmoogh-we Ẹnaan ạburude ạburude phọ ọdi.

¹¹Ọdi ạḅile ni adoghoḍi ruutu ooseeny ghan aruru sịphe aroogbolom mọ aJuda, kụ aḍiemiom we aJuda rꞌaJeruselem ọpioman esi Ọmoogh-we phọ.

¹²Ilaija oyil phọ ạghiomaan Jẹhoram ḍịnya dị ẹḅem ịduon, “Ẹnaan aDevid ọde ọde ạna, Ọmoogh-we phọ aghel nyịna loor esi dị nạ ọ́daph ruwol ạJehosafat ọdaam mọ ọde ạna mụghumo eḍighinom Ạsa ọdaam mọ ọde ọde ạna.

¹³Kpạripe nạ ạḅile ạdaph eḍighinom ạbudaam mọ phọ Ịzirel kụ maḍiemiom we aJuda rꞌaJeruselem dị úmeeraam mun Ẹnaan, ịdipho Ehab rꞌạbuphe ọdaph bọ bịdi oḍiemiom bọ Ịzirel reten émeeraam. Nạ ụze ni bumor ạna, bụdi oḍighi igey awe opu nyịna.

¹⁴Esi ịikpia, Ọmoogh-we phọ kạliom ni agey we ạna, nmụny ạna, rꞌạnmariir ạna, kụ apiemi ruphua ạna.

¹⁵Nạ rꞌaloor kạmiinom ni ẹkaraph ẹzegh dị keḍighi ịlha ọkuruḅaka kụ ebeeph ghan ḍio etum ḍio.”

¹⁶Buniin awe aFilistia rꞌArebia ụrol otuman esi dị buniin awe ạSudan odi ghan ọgbal ọphiiny phọ. Ọmoogh-we phọ ạkpaariom ni bịdi mọ ozuom ẹgham Jẹhoram.

¹⁷Bịdi ozuom Juda, owum rạraar sịphe otu ọdaam mọ kụ osiphi oomo phọ ạnmariir rꞌạnmuny ọdaam mọ ọḍuanam, emuton Ahazaya ọbam ọony ọdi.

¹⁸Ịphen phọ reten bọ, Ọmoogh-we phọ ạngo ni ọdaam mọ ẹkaraph ẹzegh dị ẹrol ịlha ọkuruḅaka.

¹⁹Esi dị ẹwa ọman ịyal ạsia, ieeph ghan bịn tụtu amughom dọl igbogh ịminimiin. Awe ẹmha phọ ọdi ụ́su egu ạnian, ịdipho oḍighi ghan bọ omoghiom bụrude ạburude ọdi.

²⁰ẠJehoram aḍighi bọ ọdaam kꞌamem dị ọdi ạman bọ 32 ạsia kụ ạda Jeruselem 8 ạsia. Rꞌoniin oye ókururu mem mọ ọdi amugh bọ. Uḍi nyọdi ẹpe ẹmha phọ aDevid, kụ kị́siphe ariiḍi ạbudaam mọ.