Read abua 2 Krọnikuls 24 Bible Online

2 Krọnikuls 24 - abua bible

2 Krọnikuls 24

¹AJoas aḍighi ni ọdaam aJuda mem dị ạman oḍual ạsia, kụ ọdi ạda sịphe Jeruselem inyadi ạsia. Onhiin ọdi ughol mọ aZibia ọlo ẹmha aBeersheba.

²Oomo amem mọ ạJehoyada oyil ạrikia ạrol bọ, ọdi aḍighi ghan ịdi ẹḅeeraan Ọmoogh-we phọ.

³ẠJehoyada aphinanaan ịyal ạnmariir aJoas ọdaam mọ kụ bịdi ọmaranaan nyọdi ilephiri rꞌạnmanyaan.

⁴Ọdi roḍighi bọ ọdaam mọ ẹnum amem reten, kụ ọdi ạatughian oselemi Otu Ịiḅereghi phọ.

⁵Ọdi ạto ni ạngo riil ạrikia phọ rꞌạbuo aLivai phọ mọ ọghiighi rạmha phọ aJuda kụ ạanyi ikpoki oselemiom riisi lọ meḅu sịphe Otu Ịiḅereghi phọ lhạ etum lhạ. Ọdi ạḅeni bịdi mọ ọghi egina amem kụ ạbuo aLivai phọ oobinyemi.

⁶Loor ịduon ọdi ạmagh Jẹhoyada uwo ẹmhu ạbidi kụ apuru mọ, “Uḍighi ika kụ nạ ọ́kpaariom bụo aLivai ạanyi ikpoki ḍịghaagh awe phọ aJuda rꞌaJeruselem dị aMozis otelhedom Ọmoogh-we phọ mụbonyi bọ oḍighinom Ogbogo Ạdol Ọmoogh-we phọ.”

⁷(Ạbumatuan Atalaya ạnir phọ ọpo ạapuan bọ loor kụ ạbudi mọphue Otu Ịiḅereghi phọ kụ ọḅile kẹn ọsighe rạraar iigbia ooseenyom aBaal.)

⁸Ọdaam mọ ạto ạḅeni bụo aLivai phọ mọ ọka igbe ạanyiom iisogh kụ ọḅam eḍighom Otu Ịiḅereghi phọ.

⁹Bịdi urom ni dom ọghiom oomo aJeruselem rꞌaJuda ẹrol dị tọrobo oye atuomonaan Ọmoogh-we phọ osogh phọ aMozis otelhedom Ẹnaan phọ ạphur bọ ạanyi ẹpe ẹdala phọ.

¹⁰Ịphen phọ ẹḅeeraan we phọ rꞌabuḍiemiom mọ ạbidi kụ bịdi ọsighe ikpoki osogh phọ oruughi omuzeḍi igbe phọ.

¹¹Ḍio ḍio ḍio ạbuo aLivai phọ ụsighe ghan ni igbe ọghiom oye phọ rạpam ghan bọ oḍighi phọ. Tọrobo amem lọ emuza, ọgeeghia phọ rꞌotelhedom uwo ẹmhu oyil ạrikia phọ uuku ghan ikpoki phọ ọsighe kụ oḅulemi igbe phọ esi phọ rẹtol ghan bọ. Ịduon kụ ẹdi bịdi oḍighi kụ ookpomoghi iboom ikpoki.

¹²Ọdaam mọ rꞌạJehoyada ụngo ghan ikpoki phọ ruwo ẹmhu ạbuphe roselemi bọ Otu Ịiḅereghi phọ, kụ bịdi ophir bụo oogbo ghan asighiigh, bụo ạmaka rꞌạbudi rọlem ghan ạmama, oselemi Otu Ịiḅereghi phọ.

¹³Oomo awe iiḍighi phọ uḍighi ni agey kụ oḅulemi Otu Ịiḅereghi ịpe ạrol ghan bọ kụ amiigh bịn kꞌagee-pọ.

¹⁴Mem dị ọmadan bọ oḍighi phọ, gol phọ rꞌasilva phọ asugha bọ, ụngo ọdaam mọ rꞌạJehoyada dị ọsighe ọlemom iḍukuru ạsigbagba rꞌịnon ạraraar arukumuan ịlo Otu Ịiḅereghi phọ. Oomo amem mọ ạJehoyada ạrol bọ, uḍighi ghan rịkia Otu Ịiḅereghi phọ egbamem.

¹⁵Mem dị ọdi mạkar kụ ạkpo, ạman 130 ạsia, kụ ọdi amugh.

¹⁶Bịdi uḍi nyọdi sịphe ariiḍi ạbudaam mọ ẹmha phọ aDevid, esi oghueniom oḍighi phọ ọdi aḍighinaan bọ we phọ Ịzirel, aḍighinaan Ẹnaan rꞌOtu Ịiḅereghi phọ.

¹⁷ẠJehoyada romugh bịn abuḍiemiom awe aJuda ọkpaariom Joas ọdaam mọ mọ ạnaghanan ghan bụno.

¹⁸Bịn awe phọ osophe ooseeny ghan ịsiphe Otu Ịiḅereghi Ọmoogh-we Ẹnaan ạburude ạburude phọ ạbidi, ọḅile kụ ooseeny ghan ịkaaneen ạrumugh rꞌigbudu um-ạke Asera. Apum ạbidi esi ịkaraph phọ ịphen kụ ịsighe ophin-ologhi Ọmoogh-we phọ eruomaan Juda rꞌaJeruselem.

¹⁹Ọmoogh-we phọ arom ni riil ọphur ạbidi rụru mọ oḅula esi ọno, kụ awe phọ úmeera ọnaghanan.

²⁰Kụ Uwaloor Ẹnaan phọ aḍigh loor ạZekaraya ọony phọ ạJehoyada oyil ạrikia phọ. Ọdi ạmeera esi dị awe phọ kọmiin nyọdi kụ ạmagh, “Ọmoogh-we Ẹnaan phọ apuru mọ eeghe kụ nyina ẹḅaar bọ ẹmhu esi ịto phọ ọdi kụ ẹsighe bọ igbogh ịminimiin retuomaan loor anyina! Nyịna ẹḅitonaan nyọdi, kụ ọdi mighel inyina!”

²¹AJoas ọdaam mọ ạḅophan we kụ omitenom ẹkaraph ezue Zẹkaraya, kụ esi ịto ọdaam mọ awe phọ oroḅol ikpo Zẹkaraya sịphe ogiga Otu Ịiḅereghi phọ.

²²Ọdaam mọ awula ọloghonaan ạḍighaagh phọ ạJehoyada ọde phọ ạZekaraya ạloghonaan ghan bọ nyọdi kụ aghiigh mọony ọdi. Ịdipho ạZekaraya ramugh bọ kụ ạlho ạghiom ạnyu, “Ọmoogh-we phọ ạmiin ni ịphen nạ raḍighi bọ ạliom nyịna!”

²³Mem dị rẹteeny eekuna ạlha phọ ạḍiphe, aḍita awe ẹgham ạSiria uru ni ozuom Juda rꞌaJeruselem, ọze oomo abuḍiemiom mọ, kụ owum iboom ạraraar orighelom Dạmaskos.

²⁴Awe ẹgham ạSiria ughom ni, kụ Ọmoogh-we phọ aḍighi ịdi bịdi kụ ọkpar we ẹgham aJuda dị bịdi kụ ọbugh opu, loor esi dị awe phọ moghel nyọdi Ọmoogh-we Ẹnaan ạburude ạburude phọ ạbidi. Ịduon phọ kụ ẹdi ọliom Ọdaam aJoas.

²⁵Uḍighi nyọdi ịyaar dị ẹbugh, kụ mem dị ạmulogh-ḍien oḅula ọman, ịyal ạbumatuan ọdi omitenom nyọdi ezue kụ oghiigh nyọdi ạnyu ẹmina ọdi oḅulemian ịpe oghiigh bọ mọony phọ ạJehoyada oyil ạrikia phọ. Uḍi nyọdi Ẹmha aDevid, kụ kị́siphe ariiḍi ạbudaam mọ.

²⁶(Bụphe ọmooghaan bọ nyọdi ẹkaraph ezue phọ, ạbuen: aZabad, ọony ạnir ọnyo Amonait dị oghol mọ aSimiat, rꞌạJehozabad, ọony ạnir ọnyo ạMoabait dị oghol mọ aSimrit).

²⁷Sịphe Ọoḅeghion Ophogh Ạḍinya Ạbudaam, ọge ni rạghaaph ạnmuny aJoas, ịmiin phọ ọmiinaan bọ nyọdi, rꞌoomo ịpe ọdi ạḅile bọ aselemi Otu Ịiḅereghi phọ. Amazaya ọony ọdi ạsighe ạgada ọdi ạda.