Read abua 2 Krọnikuls 25 Bible Online

2 Krọnikuls 25 - abua bible

2 Krọnikuls 25

¹Amazaya ạman bọ 25 ạsia kụ ọdi aḍighi ọdaam, kụ ọdi ạda ẹpe Jeruselem 29 ạsia. Onhiin ọdi ughol mọ aJehoadan ọlo aJeruselem.

²Ọdi aḍighi ịdi ẹḅeeraan Ọmoogh-we phọ kụ aḍighinom rꞌọokpukian.

³Mem dị ọdi mạpham eelhe phọ ạkparami, bịn ọdi ạzeeghi bụo iiḍighi phọ oghiigh bọ ọde phọ ọdi.

⁴Ọdi ọ́ziom nmụny ạbidi, kụ ạdaphan ịpe Ọmoogh-we phọ ạto bọ sịphe Ologh phọ aMozis mọ, “Kẹ́tuan ghan ịkaraph ạnmuny ẹze ọde rꞌonhiin, ḅịle kẹn kẹ́tuan ịkaraph ọde rꞌonhiin ẹze nmụny. Tọrobo oye katelhian ghan rꞌịkaraph ọdi.”

⁵Amazaya ọdaam mọ aakpomoghi oomo awe ạbuo arughunughun phọ aJuda rꞌạBenjamin aḍighi yogh sita awe ẹgham, ọdaphan bụo ọto rꞌopolo, kụ asereghi ruwo ẹmhu dị ophogh ghan we, buniin ḍita 1,000 awe, buniin ḍita 100 awe. Bụen phọ ụḅaram nmụny lọ ọman 20 ạsia rꞌạbudi opel sịen, 300,000 oomo phọ ạbidi. Bịdi uḍighi we dị ọson, ọnya ẹgham, dị ọmaar ookpereghian asiloor rꞌịsuaram ḅịle rꞌoroph ịsoph.

⁶Esi ọḅaram, ọdi aphir 100,000 awe ẹgham ẹpe Ịzirel kụ ạkpe 3,400 igbogh ịtoom ẹemor asilva.

⁷Kụ ọlo, oniin oyil ạghi ạteeny ọdaam mọ kụ ạḅeni nyọdi, “Kạ́pam we ẹgham Ịzirel phọ ạbuen. Ọmoogh-we phọ ólhoonaan we ạga ephunom mọ ạbuen.

⁸Nạ ragbi mọ bịdi kọngo nyịna ịnyaam ọkpar-opu mem ẹgham, kụ Ẹnaan kụ ịmoogh ọkpar-opu mụghumo ẹ́kpar, kụ ọdi kaḍighi ịdi ạbumulogh-ḍien kọkpar opu nyịna.”

⁹Amazaya apuru oyil phọ mọ, “Kụ uḍighi ika oomo asilva ọpo mị maghol bọ ạkpe?” Oyil phọ ạphagharanaan mọ, “Ọmoogh-we phọ kạngo ni aḅulemi nyịna ịdi epu ịpe phọ!”

¹⁰Kụ Amazaya ạḅeni we ẹgham mọ ophir bọ mọ ogheel. Sịen phọ bịdi ogheel ẹmha kụ ọmooghom ophin ologhi we aJuda.

¹¹Amazaya ạkparami ni ologhi ọdi kụ aḍiemiom we ẹgham ọdi ạghimom Eḍiiny Aboph. Sịphe kụ ẹdi bịdi ee kụ ọze 10,000 awe ẹgham Idom,

¹²kụ asiphi ịnon 10,000. Bịdi ọsighe bụphe osiphi bọ ọghimom ạnyu esi dị ekpululu ẹpe ẹmha phọ ạSela kụ onyuughi bịdi osumeeny ẹrol dị bịdi omuughu loor asighiigh phọ edi bọ ude phọ.

¹³Ịduon phọ awe ẹgham Ịzirel dị Amazaya kőmeera ọghi ẹgham rꞌọdi uzuom ni rạmha aJuda ịpe edi bọ ogbo aSameria rꞌạBet Horon, ọze ịraar ọonir awe, kụ ookoroghi rạraar dị owum.

¹⁴Mem mọ Amazaya mạkpar bọ apu we Idom mọ, ọdi ạsighiogh ni ịkaaneen ạrumugh phọ ạbidi arighelom kụ ạsuanaan bịdi ịnsens.

¹⁵Ịphen phọ iphin ologhi Ọmoogh-we phọ, kụ ọdi arom oyil ạghiomaan Amazaya. Oyil phọ apuru mọ, “Eeghe kụ iḍighi kụ nạ maaseeny bọ iiruen ạrumugh dị ítue ị́pel we ạbidi bịn ẹsighe esi ịikpo ạna?”

¹⁶“Kꞌapuramem,” Amazaya apuru, “kụ ẹdi yoor ọma nyịna oye oromoghiom ọdaam mọ? Kpereghi ọnhu ạna, ọbo mị kaghiigh nyịna!” Oyil phọ asophe, kụ ạḅem ạloghom, “Nyịidipho mị alegheri ni mọ Ẹnaan mẹetughian ophiemi ạna loor esi dị nạ maḍighi oomo ịphen kụ mạḅitonaan oroma ạmi.”

¹⁷Amazaya ọdaam mọ aJuda rꞌawe oromoghiom mọ ọdi ụmooghom Ịzirel ẹkaraph ezue. Ọdi arom dom ạghiomaan ạJehoas Ọdaam mọ Ịzirel, ọpo aḍighi bọ mọony ạJehoahaz rꞌọony oko aJehu, ạpaghan nyọdi elephiri.

¹⁸ẠJehoas ạghiomaan ọphagharanaan phọ ọphon Amazaya mọ, “Ooḅurom ọpo odi bọ ạnyu ạraaḅaraph ạLebanon arom ạghiom ọsaga phọ ẹpe Lẹbanon ạḅeni mọ ạngo ọnyani phọ ọdi mọony phọ ọno dị aphin. Kụ elhom ẹnam ẹlo ạLebanon dị reten ekul ooḅurom eler.

¹⁹Nyịidipho, Amazaya, nạ uubaga mọ nạ mạkpar apu we Idom, kụ mị ạḅeni nyịna mọ tọl otu. Uḍighi ika kụ nạ rasumeeny bọ ịiḅaghami dị kephiemi nyịna rꞌawe ạna?”

²⁰Kụ Amazaya ómeera ọnaghanan. Iḍighi ogbi Ẹnaan mọ ọkpar opu Amazaya, loor esi dị ọdi maaseeny ịkaaneen ạrumugh awe Idom mọ.

²¹Kụ ạJehoas ọdaam mọ Ịzirel ạghi ẹgham eenom rꞌAmazaya ọdaam mọ aJuda. Ekeeny rꞌelhiom awe ẹgham mọ uzuan ni sịphe Bẹt Semes eelhe aJuda.

²²Ụkpar opu we ẹgham mọ aJuda, kụ bịdi osumughu uwo kꞌọdi asuma agheel kꞌọdi.

²³ẠJehoas asiph Amazaya kụ ạpham agheelom Jeruselem. Sịphe kụ ẹdi ọdi alhereghi iikpe oghoony ẹmha phọ emiigh Ọnhu-aḍibuo Ifraim kụ ẹteeny Ọnhu-aḍibuo Ẹkul; ẹdoony kụ esi dị ẹwa ọman ịyal okuron akuḅu.

²⁴Ọdi awum ạsighe arighelom Sameria oomo agol rꞌasilva phọ ẹrol bọ sịphe Otu Ịiḅereghi phọ, rạraar arukumuan Otu Ịiḅereghi phọ ịpe ạnmuny ạnmuny Obed Idom rokori ghan bọ, ḅịle rꞌaruphua ịsiphe otu ọdaam mọ. Kụ ọdi asiph we ạḍuanam kụ agheel Sameria.

²⁵Amazaya ọdaam mọ aJuda kụ ạkpo apu ạJehoas Ọdaam mọ Ịzirel ḍioph rꞌoogh ạsia.

²⁶Oomo ịpheri phọ ạraraar dị Amazaya aḍighi kꞌemiighom kꞌekureriom ọda phọ ọdi ọgeeghi sịphe Ạḍinya Ịpe Emiteghu bọ Mem Ạbudaam aJuda rꞌỊzirel.

²⁷Emiigh kꞌamem mọ ọdi ạḅaar bọ ẹmhu esi Ọmoogh-we phọ, ọmooghom ghan ni nyọdi ẹkaraph ezue ẹpe Jeruselem. Ekureriom mọ, ọdi asuma agheel ẹmha phọ aLakis, kụ ạbumulogh-ḍien ọdi ụdaph nyọdi osi ẹpe phọ kụ oghiigh nyọdi.

²⁸Ụsighe ḍizu phọ ọdi ọsaany ạnyu ạsu ọpham orighelom Jeruselem, kụ oḍi nyọdi sịphe ariiḍi ạbudaam mọ ẹpe Ẹmha aDevid.