Read abua 2 Krọnikuls 26 Bible Online

2 Krọnikuls 26 - abua bible

2 Krọnikuls 26

¹Oomo awe phọ aJuda ụsaḅar ri Uzaya ọony Amazaya dị ạman ḍioph rꞌodiiny ạsia mọ ạsighe ạgada ọde phọ ọdi.

²(Ọde phọ ọdi romugh bọ kụ Uzaya ạmooghom Elat kụ ạḅile aselemi ẹmha phọ.)

³Uzaya aḍighi ọdaam mem dị ọdi ạman ḍioph rꞌodiiny ạsia, kụ ạda sịphe Jeruselem ooghdi ạsia. Onhiin ọdi ughol mọ aJekolaya ọlo aJeruselem.

⁴Esi ọdaphan eḍighinom ọde phọ ọdi, ọdi aḍighi ghan ịdi ẹḅeeraan Ọmoogh-we phọ.

⁵Oomo amem mọ ạZekaraya otomoghiom mọ ọdi ạrol bọ, ọdi aghuraam Ọmoogh-we phọ rꞌoomo aloor ọdi kụ Ẹnaan ẹseph nyọdi.

⁶Uzaya azuom ni ẹgham we aFilistia. Ọdi alhereghi iikpe oghoony ạramha ạGat, ạJamnia, rꞌẠsdod, kụ ạloghoḍi rạmha okpekiom dị etumeriom Ạsdod rꞌịnon arikpisi aFilistia.

⁷Ẹnaan ịngo ni ọkpar opu we aFilistia, we Arebia phọ odi ghan bọ Gur Baal, ḅịle rꞌawe aMeunait.

⁸Awe Amonait usogh ghan iisogh ọngo Uzaya, kụ ọdi ạmoogh ịikpo iboom dị aḍien ọdi eleeny oomo Ijipt.

⁹Uzaya ạḅile ni akpeki ạkparami Jeruselem, adoghoḍi iiphopha aruutu sịphe Ọnhu-aḍibuo Ẹkul, sịphe Ọnhu-aḍibuo Eḍiiny rꞌịsiphe iikpe phọ ekitonom bọ.

¹⁰Ọdi ạḅile ni adoghoḍi iiphopha aruutu sịphe ịphalagbal kụ aguphogh riisi ooko ạmuum, loor esi dị ọdi ạmoogh ịbadi ịga ạga emeelom erumuḍio phọ zin aroogbolom rꞌarikpisi dị ẹyaghagha. Loor esi dị ọdi ạphomoghian ọzuph ịizupha, ọdi ạḅeni ghan we mọ ọzuphogh ireeny oḍighinom amiim ẹpe aroogbolom mọ kụ oḅeph eḍien de ẹnuum.

¹¹Ọdi ạmoogh we ẹgham dị ọmanam kụ ọnya ẹlo elephiri. ẠJeyel rꞌaMaaseya, ạbugeeghia ọdi, kụ useere ghan oomo ịgeeghi ịlo ẹgham kụ aHananaya, ọnyo iiḍighi ọdaam mọ, kụ aphogh ghan.

¹²Abugbogh dị ọtooghi ghan ịtooghi bịn ụman 2,600 awe.

¹³Awe ẹgham dị ọrol eeḍian ạbidi ụman 307,500 dị ọmaar eenan ẹpomoghian ọdaam mọ.

¹⁴Uzaya ạngo ghan we ẹgham mọ ịsuaram, ịsoph, roghoony-okuron, rụsuoma ạgbagba ịsuaram, sịkumugh, ịkpina, rꞌikulha asighiigh oroph.

¹⁵Ẹpe Jeruselem awe ọlem ọdi ụlemogh rạraar ọrapham ghan ịkpina rꞌịlo orophom ikulha asighiigh ẹḍua iiphopha aruutu phọ rꞌạrughulukul iikpe oghoony ẹmha phọ. Aḍien ọdi eleeny oomo ariisi, kụ ọdi ạmoogh ịikpo dị ẹbugh loor esi ọloghonaan ạḍighaagh Ẹnaan.

¹⁶Kụ ọlo mem dị Uzaya ọdaam mọ ạmoogh ịikpo iboom, bịn ọdi amiigh ophoophe aloor; ịpe kụ iḍighi ịyaar dị ọdi ameel. Ọdi aḍighi ugbini ugbini Ọmoogh-we Ẹnaan phọ ọdi, esi dị ọdi aḍigh Otu Ịiḅereghi phọ bịn ọsu ịnsens ạnyu enmeny ịnsens phọ.

¹⁷Azaria oyil ạrikia phọ rꞌạbunon ọphaanyadi ariil ạrikia dị ọkpo ekpeḍien ụdaphan ọdaam mọ

¹⁸reten émeera. Bịdi ọḅem mọ, “Uzaya. Nạ ọ́moogh elhiom ọsuanaan ịnsens Ọmoogh-we phọ. Ạbupinyon rịkia phọ bịn, bụo ẹemara ẹemara phọ Eeron kụ moselemian loor ọsu ghan ịnsens. Mite sịen esi iigbia phọ ẹphen. Nạ maḍighi ịlo ophin ologhi esi Ọmoogh-we Ẹnaan phọ, kụ nạ ọ́moogh mun ḍịseph phọ ọdi.”

¹⁹Uzaya ạmeera sịphe Otu Ịiḅereghi phọ ịigaany enmeny ịnsens kụ ạpham ọsuom ịnsens ḍịghaagh. Ọdi ạmooghom ophin ologhi rꞌariil ạrikia phọ, kụ mem mem mọ bịn ẹkaraph ẹzegh emite elhor ọdi.

²⁰Azaria rꞌạbueri phọ ariil ạrikia phọ unaan elhor ọdaam mọ rꞌoghiilaan, kụ ọkpaariom nyọdi mọ amite sịphe Otu Ịiḅereghi phọ. Ọdi aagborion omite loor esi dị Ọmoogh-we phọ mạlhiom nyọdi.

²¹Esi ịpheri ạsia phọ ọdi, Uzaya ọdaam mọ ọ́serere mun loor ẹzegh phọ ọdi. Órue mun óḍigh Otu Ịiḅereghi phọ, ọdi ạrol ghan kꞌọdi bịn, óḍighi mun oomo iiḍighi. AJotam ọony ọdi kụ ạḅile aphogh eelhe phọ.

²²Azaya oyil phọ, ọony Amoz, kụ adoghoḍi ḍịnya oomo ịpheri phọ ạraraar phọ Uzaya ọdaam mọ aḍighi bọ mem ọda phọ ọdi.

²³Uzaya amugh kụ oḍi nyọdi ẹkaraph eḍum oḍigh ạbudaam, kụ loor esi ẹkaraph ẹzegh phọ ọdi, úḍi nyọdi sịphe ariiḍi ạbudaam mọ. AJotam ọony phọ ọdi kụ ạsighe ạgada ọdaam mọ ọdi.