Read abua 2 Krọnikuls 28 Bible Online

2 Krọnikuls 28 - abua bible

2 Krọnikuls 28

¹Ehaz aḍighi ọdaam mem dị ọdi ạman 20 ạsia, kụ ạda sịphe Jeruselem ḍioph rꞌodiiny ạsia. Ọdi ọ́daph reten aDevid, ọde ọde ọdi. Ọdi óḍighi ịdi ẹḅeeraan Ọmoogh-we phọ

²kụ ạdaph ghan reten ạbudaam mọ Ịzirel. Ọdi ạto mọ ọsighe ạmama ọkaaghiom rụmugh aBaal,

³ạsu ghan ịnsens sịphe Eḍiiny aHinom, aḍighinom rịkia nmụny ọdi ạngo ịkaaneen ạrumugh, ạtuughaany eḍighinom ịyaar isa awe phọ Ọmoogh-we phọ maphorogh bọ sịphe ade phọ mem mọ awe phọ Ịzirel rotu bọ.

⁴Riisi ọoḅereghi aruru phọ, ạnyu aroogbolom rꞌiizin oomo ạrugboko, Ehaz aḍighi yogh ni rịkia kụ ạsuughi ịnsens.

⁵Loor ịkaraph Ehaz ọdaam mọ, Ọmoogh-we Ẹnaan phọ ọdi ạngo ọgel kụ ọdaam mọ ạSiria ạkpar apu nyọdi kụ asiphi bụminighan awe aJuda ạghimom ẹpe Dạmaskos. Ọmoogh-we phọ ạngo kẹn ọgel ọdaam Ịzirel Peka ọony ạRemalaya ạkpar apu nyọdi kụ ạze 120,000 ạbugbagara awe ẹgham aJuda eniin aḍio. Ọmoogh-we Ẹnaan ạburude ạburude phọ ạbidi imeera mọ ịphen phọ emite loor esi dị awe phọ aJuda moghel nyọdi.

⁷Oniin ọnyo ẹgham Ịzirel dị oghol mọ aZikri aghiigh Maaseya ọony Ehaz ọdaam mọ, Azrikam ọpo rapogh ghan bọ otu ọdaam mọ, rꞌElkana oye phọ atum bọ ọdaam mọ.

⁸Ghạlamo ịdipho awe aJuda oḍighi bọ buniin awe rꞌạbidi, awe ẹgham Ịzirel usiphi ni 200,000 ạnmariir rꞌịbam ạnmuny ọghimom ẹpe Sameria, ạḅaram ruphua dị owum.

⁹Oniin oye dị oghol mọ Oded, oyil kꞌỌmoogh-we phọ, ạrol ẹmha aSameria. Ọdi aazuanan ni we ẹgham Ịzirel dị rotigheel rꞌawe aJuda phọ mosiphi bọ ẹgham kụ rọwa oḍigh ẹmha phọ, kụ ạḅem mọ, “Ọmoogh-we Ẹnaan ạburude ạburude phọ anyina ạghagham bọ ologhi we aJuda kụ ạngo ọgel mọ ịkpar epu bịdi, kụ nyịidipho ọdi mạnaghan ịdi nyina ẹze bịdi dị ighirigiir ị́nma.

¹⁰Kụ nyịidipho nyina rẹwa oḍighi alephiri rꞌạnmariir aJeruselem rꞌaJuda rẹbene anyina. Nyina ílegheri mọ nyina kẹn mẹpioman ni esi Ọmoogh-we Ẹnaan phọ anyina ḍụghum?

¹¹Iler rụru ẹnaghan! Awe phọ ạbuen phọ osiphi bọ abumor alephiri rꞌạnmariir anyina. Ịbile bịdi ogheel, ọbo Ọmoogh-we phọ kịliom inyina rꞌophin ologhi.”

¹²Inya aruwo ẹmhu esi arughunughun phọ ạga ephunom mọ, Azaria ọony aJehohanan, aBerekaya ọony aMesilemot, aJehizkaya ọony aSalum, rꞌAmasa ọony aHadlai ụukonoghian eḍighinom ịyaar awe ẹgham mọ.

¹³Bịdi ọḅem mọ, “Kẹ́sighe bụo ikoli ẹgham mọ ạbuen etumom sịen! Yoor mọpioman ni esi Ọmoogh-we phọ kụ ọngo nyọdi ophin ologhi dị ẹkpe ọliom ayira. Nyịidipho nyina rẹwa oḍighi ịlo ọbughe apum mọ ayira.”

¹⁴Kụ egina amem bịn awe ẹgham mọ ọḅogh we ikoli ẹgham mọ rꞌaruphua phọ bịdi owum bọ ọngo we phọ rꞌabuḍiemiom mọ ạbidi.

¹⁵Kụ ọma inya phọ awe phọ mọ ọsighe rukpe sịphe ịpe owum bọ ọngo bụphe osiphi bọ. Bịdi ụngo ni bịdi rukpe rꞌarokoro oḍighinaan, ọngo bịdi eḍien olhe rꞌạmuum ọphughol, kụ ọsighe mụnum-ọliv ogbulogh riisi ạbidi. Bụphe odugh bọ iboom orelhe phọ ụsiinye rạman ịnam adool, kụ ọsighe oomo awe ikoli ẹgham mọ oḅulemi eelhe aJuda sịphe Jeriko, egbogh ẹmha areelhe. Kụ awe Ịzirel ogbi origheel ẹpe Sameria.

¹⁶Awe Idom ụḅile kẹn ozuom Juda kụ osiphi ịbadi awe. Kụ Ehaz ọdaam mọ arom dom ạghiom Tịglat Pileser ọdaam eelhe phọ Asiria mọ aru ạloghonaan ḍịghaagh.

¹⁸Eniin phọ amem mọ awe aFilistia rozuom rạmha phọ etuman bọ roogbolom ạga emeelom erumuḍio phọ rꞌạramha aJuda ạga esoorom mọ. Bịdi ọmooghom rạmha ạBet Semes, Aizalon, rꞌaGederot ḅịle rꞌạramha ạSoko, aTimna, rꞌaGimzo rꞌịbam ạramha ạbidi, kụ ọgbemian dọl ẹpe.

¹⁹Loor esi dị Ehaz ọdaam mọ aJuda mạpharanaan riliom awe phọ kụ ạḅaar ẹmhu esi Ọmoogh-we phọ, Ọmoogh-we phọ ạsighe ịiḅaghami aruomaan Juda.

²⁰Ọdaam eelhe phọ Asiria, kpạripe rꞌọloghonaan ạḍighaagh Ehaz, amitiom émeera esi ọdi kụ ạngo nyọdi ịiḅaghami.

²¹Kụ Ehaz ạsighe gol sịphe Otu Ịiḅereghi phọ, otu ọdaam mọ rꞌasimarugh abuḍiemiom awe phọ kụ ạngo ọdaam eelhe phọ, kụ ịphen phọ bịn ị́loghonaan ḍịghaagh.

²²Mem dị ịiḅaghami ọdi mẹphughan, Ehaz, ọkaraph oye phọ ọpo, ạpioman ni esi Ọmoogh-we phọ ịdi kꞌekulha ímite.

²³Ọdi aḍighi ni ẹkia ạngo ịkaaghineen ạrumugh awe phọ ạSiria, bụphe mọkpar bọ opu nyọdi. Ọdi ạḅem mọ, “Ịkaaneen ạraraar phọ ạSiria rẹloghonaan ghan ḍịghaagh rạalha ạSiria, kụ eḍighi ịyaar dị mị aḍighi ẹkia ạngo bịdi, iini bịdi kịlhoghonaan ịmi ḍịghaagh kẹn.” Ịphen phọ kụ iruomaan igbogh ịiḅaghami nyọdi rꞌeelhe ọdi.

²⁴Ẹdi etum, ọdi ạsighiogh oomo ạraraar ạraraar arukumuan Otu Ịiḅereghi phọ ạgurogh aḅomoghi. Ọdi aghughi Otu Ịiḅereghi phọ bịn ạkan renmeny ạrikia tọrobo ạga aJeruselem.

²⁵Tọrobo ẹmha ẹpe Juda, egbogh rꞌẹbam, ọdi adoghoḍi riisi ịiḅereghi aruru, riisi dị kọsuughi ghan ịnsens ọngo ruuruen aruru. Ịduon phọ kụ ẹdi ọdi aḍur ophin ologhi Ọmoogh-we phọ aruom loor ọdi, rꞌophin ologhi Ọmoogh-we Ẹnaan ạburude ạburude phọ ọdi.

²⁶Iiḍighi phọ ịpe esugha bọ kꞌemiighom kꞌekureriom ọda phọ ọdi, ọsighe ni ịphen ọge sịphe ạḍinya phọ ịpe emiteghu bọ mem ạbudaam mọ Ịzirel rꞌaJuda.

²⁷Ehaz ọdaam mọ amugh kụ oḍi nyọdi ẹpe Jeruselem, kụ káriiḍi ạbudaam mọ. Kụ ạHezekaya ọony ọdi kụ ạsighe ạgada ọdaam mọ ọdi.