Read abua 2 Krọnikuls 29 Bible Online

2 Krọnikuls 29 - abua bible

2 Krọnikuls 29

¹ẠHezekaya aḍighi ọdaam mem dị ọdi ạman 25 ạsia, kụ ạda sịphe Jeruselem 29 ạsia. Ḍien onhiin ọdi ughol mọ Abaija, ọnyani ạZekaraya.

²Ọdi ạdaph ghan reten aDevid, ọde ọde ọdi, kụ aḍighi ghan ịpe ẹḅeeraan bọ Ọmoogh-we phọ.

³Ọḅel ụnwanyu ạḍiḅel ạlha ọda phọ ọdi, ạHezekaya ạḅile aghughuron rụnhu-aḍibuo Otu Ịiḅereghi phọ kụ ạto mọ oselemi yogh.

⁴Ọdi aakpomoghi ḍita ariil ạrikia rꞌạbuo aLivai sịphe erugh ạga emitenom erumuḍio Otu Ịiḅereghi phọ

⁵kụ ạḅaanaan bịdi sịphe. Ọdi ạḅem mọ, “Bụo aLivai, iselemian siloor anyina kụ egbi ọosa Otu Ịiḅereghi Ọmoogh-we Ẹnaan ạburude ạburude phọ anyina. Ịsighe emitenom tọrobo ịyaar lọ ẹphue esi phọ.

⁶Ạburude ạburude phọ ayira úmeeraam Ẹnaan phọ ayira Ọmoogh-we phọ kụ úḍighi ghan ịdi ẹḅeeraan nyọdi. Bịdi ọḅitonaan nyọdi kụ ọgumom ọman esi dị ọdi ạrol.

⁷Bịdi oghughi yogh rughuugh Otu Ịiḅereghi phọ, oḍime ịtozi kụ ụ́su mun ịnsens ḅịle úḍighi mun rịkia oguom ạnian sịphe Otu Ịiḅereghi Ẹnaan phọ Ịzirel.

⁸Loor ịphen phọ Ọmoogh-we phọ mạghagham ologhi we aJuda rꞌaJeruselem, kụ ịpe ọdi maḍighi bọ bịdi eḍighi okpereghaan rꞌiikia esi oomo awe. Nyina elegheri ni ịphen ekuphom owol.

⁹Bụrude ayira ụze risigh ẹgham, kụ nmạriir rꞌạnmuny ayira mosiphi ịdipho awe ikoli ẹgham ọsighiogh ọḍuanam.

¹⁰“Mị magbiighi oghiran ịyo Ọmoogh-we Ẹnaan phọ Ịzirel, ọbo ọdi kụ́ghagham mun iyira ophin ologhi.

¹¹Nmụny ạmi, kétoph mem. Nyina kụ ạbudi Ọmoogh-we phọ mạsaḅar ọsuanaan ọdi ịnsens rꞌoḍiemiom awe phọ ooseeny ọdi.”

¹²Bụen ạbuo aLivai dị ọrol esi phọ: Bụo ọto aKohat, aMahat ọony Amasai, rꞌaJoel ọony Azaria Bụo ọto aMerari, aKis ọony Abdi, rꞌAzaraya ọony ạJehalelel Bụo ọto aGerson, aJoa ọony aZimna, rꞌIden ọony aJoa Bụo ọto Elizafan, aSimri rꞌạJewel Bụo ọto Asaf, ạZekaraya, rꞌaMatanaya Bụo ọto aHeman, ạJehuel rꞌaSimei Bụo ọto aJedutun, aSemaya rꞌỤziel

¹⁵Awe phọ ạbuen uukpomoghi bụeri ạbuo aLivai phọ, kụ oomo ạbidi oselemian siloor ạbidi. Pọ kụ amem dị, ịdipho ọdaam mọ mạto bọ bịdi oḍighi, bịdi omiigh ọosa Otu Ịiḅereghi phọ, ọdaphan Ologh Ọmoogh-we phọ.

¹⁶Ạbupinyon rịkia phọ oḍigh Otu Ịiḅereghi phọ ọosa, kụ bịdi omiteghom erugh tọrobo ịyaar lọ ẹepu. Emiigh kꞌịsiphe kụ ẹdi ạbuo aLivai phọ ọsighiogh oomo phọ ịne ọḍuanam ẹmha phọ kụ osiemi Eḍiiny phọ ạKidron.

¹⁷Umiigh oḍighi phọ ḍịḅel aḍio ọḅel ụnwanyu, kụ rẹman ọphaanya aḍio bịn bịdi ọmadan, ọḅaram eḍighom osoph Otu Ịiḅereghi phọ. Kụ bịdi oḍighi oḍighi ịpheri phọ ọphaanya asiḍughul-otu phọ tụtu ẹman ḍioph rꞌodiiny aḍio ụnwanyu phọ, oselemi ghan Otu Ịiḅereghi phọ ẹlo ooseeny ghan Ọmoogh-we phọ.

¹⁸Ạbuo aLivai phọ ụghaaph ịduon kụ ọḅeni Hẹzekaya ọdaam mọ mọ, “Yoor mokunughi ọosa Otu Ịiḅereghi phọ, ọḅaran enmeny ạrikia oguom ạnian, ịdaabili ọḅam ẹkia ạbred phọ, rꞌoomo ạraraar arukumuan phọ ạbidi.

¹⁹Yoor moḅulemi kẹn oomo ạraraar phọ ịpe Ehaz ọdaam mọ ạsighiogh bọ ạḍuanam sịa phọ ịpe ọdi ụ́moogh mun bọ omeeraam Ẹnaan, kụ yoor mọḅile ọḅogh ọngo. Oomo phọ ịne edi risigh enmeny Ọmoogh-we phọ.”

²⁰Ophiemi amem ọ́rol, ạHezekaya aakpomoghi ikpolom awe ẹmha phọ, kụ oomo ạbidi ọghi Otu Ịiḅereghi phọ.

²¹Esi ẹkia ogbuuroghom ịkaraph ọto kꞌọdaam mọ rꞌịpe awe phọ aJuda, ḅịle rꞌọosaam Otu Ịiḅereghi phọ, bịdi ụsighe oḍual ilephiri ạsinam, oḍual idughuna, oḍual ạnmuny iyool-ịga rꞌoḍual ạrutu-ịga. Ọdaam mọ ạḅeni riil ạrikia phọ, bụdi omite sịphe kꞌEeron, mọ ọze ịnam mọ oḍighinom ạrikia sịphe enmeny phọ.

²²Ạbupinyon rịkia phọ ụphur ụze ilephiri ạsinam, kụ ọze idughuna phọ rꞌạnmuny iyool-ịga phọ, kụ ọsaraghi ịḅaal ạtorobo ẹnam sịphe enmeny phọ.

²³Okureriom mọ, bịdi ụsighe rụtu-ịga ọghiomaan ọdaam mọ rꞌạbueri phọ rooseeny ghan bọ, kụ bịdi ọzuughi rạghaagh loor ịnam mọ.

²⁴Kụ ariil ạrikia phọ ọze rụtu-ịga phọ kụ ọsaraghiom ịḅaal sịphe enmeny phọ ịdipho ẹkia ogbuuroghom ịkaraph oomo awe phọ, loor esi dị ọdaam mọ mạto bọ mọ oḍighi rịkia oguom ạnian rꞌạrikia ọsar ọwilenaan ịkaraph oomo Ịzirel.

²⁵Ọdaam mọ ạdaphan ịpe Ọmoogh-we phọ ạḅeni bọ Gạd oyil ọdaam mọ ḅịle rꞌoyil Netan mọ ọto ọḅeni Devid ọdaam mọ mọ aḍighi. Ọdi ạmeremi yogh bụo aLivai sịphe Otu Ịiḅereghi phọ dị ọpham rẹne rꞌịkpaalaam,

²⁶rạraar ephegh dị ẹghigh ịpe aDevid ọdaam mọ apheghom ghan bọ. Ạbupinyon rịkia phọ ụmeera aani ni sịphe phọ kụ ọphamam rụkuodu.

²⁷ẠHezekaya ạto ạḅeni mọ ọsighe ẹkia oguom ạnian phọ oru ọḅamaghi; kụ ịdipho iiḍighi aḍio phọ emiigh bọ, awe phọ ọmoor sụor oboomiom Ọmoogh-we phọ kụ ạbuo iitia phọ omiigh ophula ạrukuodu rꞌịpheri phọ ạraraar iitia phọ.

²⁸Tọrobo oye lọ ạrol aani sịphe ạdaphan ooseeny, kụ ạsuor phọ rꞌịpheri phọ iitia ẹḅophan tụtu ọsuughi oomo ạrikia mọ.

²⁹Pọ kụ amem dị ạHezekaya rꞌoomo awe okpuḍughian kụ ooseeny Ẹnaan.

³⁰Ọdaam mọ rꞌabuḍiemiom areelhe phọ ọḅeni bụo aLivai phọ ọmooraan sụor Ọmoogh-we phọ, sụor phọ ịpe aDevid rꞌAsaf oyil phọ ọgeeghi bọ. Kụ tọrobo oye ạmoor rꞌọḅaal ologhi mem dị okpuḍian kụ ooseeny Ẹnaan.

³¹ẠHezekaya ạḅeni we phọ, “Nyịidipho nyina meselemian bọ siloor phọ anyina, ịsighe rịkia ẹsephom eruomaan Ọmoogh-we phọ.” Bịdi ọnaghanan, kụ buniin ạbidi rꞌọḅaal ologhi ụsighe ịnam oḍighinom ẹkia oguom ạnian kụ orumom.

³²Bịdi ụsighe 70 ilephiri ạsinam, 100 idughuna ra 200 ạnmuny iyool-ịga orumom ịlo oḍighinom rịkia oguom ạnian ọngo Ọmoogh-we phọ;

³³Bịdi ọḅile orumom 600 ilephiri ạsinam ra 3,000 iyool-ịga oḍighinom ẹkia dị awe phọ kọba.

³⁴Ịdipho ariil ạrikia dị ọrol ụ́manam bọ ọzeeghi ịnam mọ ịphen, ạbuo aLivai ụlhoghonaan bịdi ḍịghaagh tụtu oḍighi phọ amineen. Iru ẹteeny mem dị ạbunon ariil ạrikia moselemian siloor ạbidi. (Ạbuo aLivai phọ kụ ụkar ọnaghanan oselemian ghan asiloor opu riil ạrikia phọ.)

³⁵Ọḅaram ạrikia dị ọsu ghan ikpom, ariil ạrikia phọ ụsu ghan ẹnuum lọ omiteghom loor ịnam mọ ạrikia mọ awe phọ olhe bọ, kụ ọḅile kẹn ozu ghan miim mọ ọḅaram bọ rịkia oguom ạnian phọ. Ịduon kụ ẹdi ọḅile omiigh ooseeny sịphe Otu Ịiḅereghi phọ.

³⁶ẠHezekaya rꞌawe phọ ụmoogh ọḅaal ologhi loor esi dị Ẹnaan mẹlhoghonaan ḍịghaagh oogborion oḍighi yogh ịphen phọ.