Read abua 2 Krọnikuls 31 Bible Online

2 Krọnikuls 31 - abua bible

2 Krọnikuls 31

¹Ariiḍio ẹyaal phọ reten rẹman, kụ oomo awe phọ Ịzirel ọghi tọrobo ẹmha phọ aJuda kụ oḅomoghi sighiigh dị ọmeremi yogh, oogbo olhereghi igbudu um-ạke Asera kụ ọphueghi renmeny ạrikia rꞌariisi ooseeny ghan aruru phọ. Bịdi uḍighi iniin phọ eḍighinom ịpheri phọ arikpisi aJuda rꞌareelhe ạBenjamin, Ifraim rꞌạManase, kụ oomo ạbidi ogbi origheel ẹmha.

²ẠHezekaya ọdaam mọ ạḅile asereghi iiḍighi ariil ạrikia rꞌạbuo aLivai phọ, ạngo oye ye uwo oḍighi rꞌoḍighi. Iḍighi phọ ạbidi ịḅaraghiom ọphinyon ghan ạrikia oguom ạnian rꞌạrikia ẹboroph, omite ghan mem ooseeny sịphe Otu Ịiḅereghi phọ, ḅịle rꞌọngo ghan ạḍiseph rꞌibo oomo ariisi kịrokiro sịphe Otu Ịiḅereghi phọ.

³Sịphe aḍita phọ, ọdi amitiom ni ịnam ọphinyonom ạrikia oguom ạnian tọrobo ạḍiroor rꞌadulhe rꞌịpe ọngo ghan bọ ḍio ophooghian phọ, mem ẹyaal omoom ụnwanyu, rꞌịpheri phọ ạrayaal phọ ịpe Ologh Ọmoogh-we phọ kụ ạḅem bọ.

⁴Ẹdi etum, ọdaam mọ ạḅeni we phọ aJeruselem mọ ọpham ruunmo phọ esi bọ riil ạrikia phọ rꞌạbuo aLivai phọ, ọbo bịdi ọsighe oomo amem ạbidi ọkuom esi ịpe Ologh Ọmoogh-we phọ kụ ạḅem bọ.

⁵Egina amem mọ ọto bọ ọḅem, awe phọ Ịzirel ụsighe ni inmo oru dị emite loor ịkar igey ịbiakpa ạbidi, amiim rꞌạmunum-ọliv, ẹnuum aḍiowo rꞌịnon ariiḍien iizo kụ bịdi odi ḍioph abin tọro ịyaar lọ bịdi ọmoogh kụ ọsighe muniin abin.

⁶Oomo awe phọ orugh bọ rạmha phọ aJuda urumom muniin abin ạsinam rꞌiyool-ịga ạbidi kụ ọsighe kẹn ruunmo dị ẹmanam ọḅogh ọngo Ẹnaan phọ ạbidi Ọmoogh-we phọ.

⁷Inmo phọ emiigh oru ụnwanyu dị aḍighi ịraar kụ ọḅamaghi eniin phọ esi phọ tụtu kꞌịpheri phọ inya ụnwanyu phọ.

⁸Mem dị ạHezekaya ọdaam mọ rꞌawe iiḍighi ọdi ọmiin iboom dị mọngo, bịdi ụseph ni Ọmoogh-we phọ kụ ọseph aani Ịzirel awe phọ ọdi.

⁹Ọdaam mọ ạḅaanaan riil ạrikia phọ rꞌạbuo aLivai ịlo aruunmo phọ ịphen,

¹⁰kụ Azaria, uwo ẹmhu oyil ạrikia phọ, ọnyo ẹemara ạZedok, ạḅeni nyọdi, “Emiigh kꞌaḍio phọ omiigh bọ ọsighe aruunmo phọ oru Otu Ịiḅereghi phọ, eboom eḍien olhe kụ ịrol ghan kụ ẹḅile esugha. Yoor ụmoogh ghan oomo phọ ịphen loor esi dị Ọmoogh-we phọ mạseph we ọdi.”

¹¹Ọdaam mọ arom kụ bịdi ookolobian iisoph osereghi ariiḍien esi dị etuman Otu Ịiḅereghi phọ,

¹²kụ ookpomoghi oomo aruunmo rꞌasibin phọ odoghoḍi ologhi ooko ghan. Bịdi useere ọnyo aLivait dị oghol mọ aKonania ophogh ghan, kụ aSimei umor ọdi atum nyọdi.

¹³Ụmaaghi oḍighi ghan eeḍian ạbidi ḍioph ạbuo aLivai phọ ạbuen: Jẹhiel, Azazaya, Nahat, Ạsahel, Jerimot, Jọzabad, Eliel, Ismakaya, Mahat, rꞌaBenaya. ẠHezekaya ọdaam mọ rꞌAzaria uwo ẹmhu oyil ạrikia phọ kụ bụdi ọngo ịtooghi oḍighi ịphen phọ.

¹⁴AKore ọony Imna, ọnyo aLivait dị aḍighi ogbogh okoriom Ọnhu-Aḍibuo ạga emitenom erumuḍio phọ sịphe Otu Ịiḅereghi phọ, kụ ạanyi ghan ạḅile adiighi ruunmo phọ ọngo bọ Ọmoogh-we phọ.

¹⁵Ịpheri phọ ạramha phọ, rikpisi lọ ariil ạrikia ọrol, bụnon ạbuo aLivai ụḅoph ọnhu rꞌọdi oḍighi oḍighi: Iden, Miniamin, Jesua, Semaya, Amaraya rꞌaSekanaya. Bịdi udiighi riiḍien oolemi ọngo bumor awe aLivait phọ, ọdaphan iiḍighi oye rꞌoye,

¹⁶ụ́daphan ropolo. Bịdi ụngo bin oomo alephiri dị ọman 30 ạsia rꞌạbudi opel sịphe, lọ ọmoogh iiḍighi ḍio ḍio sịphe Otu Ịiḅereghi phọ ọdaphan ẹmeremiom oye rꞌoye.

¹⁷Udiemi ghan iiḍighi ariil ạrikia phọ ọdaphan ropolo, kụ iiḍighi ạbuo aLivai dị ọman 20 ạsia rꞌạbudi opel sịphe udiemi ghan ọdaphan sita.

¹⁸Bịdi rꞌạnmariir ạbidi, nmụny rꞌạbunon awe eghunotu phọ, siḍien ạbidi kụ ọgeeghi loor esi dị ụwa mọ oomo ạbidi oḍighi iiḍighi lọ eghol bịdi tọrobo amem.

¹⁹Sịphe ogbo ariil ạrikia dị ọrol sịphe ạramha phọ ọḅogh bọ ọngo ẹemara kꞌEeron, eeni kẹn sịphe arere ạroogho lọ eḍighi ịlo ạramha phọ ịphen, awe eghuan ụrol dị odiighi ghan eḍien ọngo oomo alephiri arughunotu ariil ạrikia phọ rꞌạtorobo ọnyo aropolo aLivait lọ ḍien ọdi ọgeeghi.

²⁰Oomo eelhe phọ aJuda, ạHezekaya ọdaam mọ aḍighi ghan ịdi ẹnighe kụ ẹḅeeraan Ọmoogh-we Ẹnaan phọ ọdi.

²¹Igey ịteeny nyọdi, ịdi eḍighi bọ tọrobo ịyaar lọ ọdi aḍighinaan Otu Ịiḅereghi phọ ḅịle rꞌọdaphan Ologh phọ, ọdi aḍighinom ghan uwaloor ọḅogh-aloor-ọngo Ẹnaan ọdi rꞌoomo ologhi ọdi.