Read abua 2 Krọnikuls 35 Bible Online

2 Krọnikuls 35 - abua bible

2 Krọnikuls 35

¹AJosaya ọdaam mọ alhe ni ẹyaal ọphel otene phọ ẹpe Jeruselem oghueniom Ọmoogh-we phọ; ḍio dị emuneniom ḍioph rꞌinya ọḅel ụnwanyu phọ bịdi ụze ni ịnam mọ ịlo ẹyaal phọ.

²Ọdi ạngo riil ạrikia phọ iiḍighi dị bịdi koḍighi sịphe Otu Ịiḅereghi phọ kụ ạkparami iloghi ạbidi ọkuami oḍighi.

³Ọdi ạngo kẹn oromoghian phọ ịphen bụo aLivai, bụtughemia phọ Ịzirel, dị ọḅogh ọngo Ọmoogh-we phọ: “Ịlogh Igbe Ịyo iigbia phọ sịphe Otu Ịiḅereghi phọ ạSolomon ọdaam mọ, ọony aDevid, ạlogh bọ. Kékironom mun ọḍua esi ọghi esi. Ịtol sịen eḍighi ghan oḍighi phọ Ọmoogh-we Ẹnaan phọ anyina rꞌỊzirel awe phọ ọdi.

⁴Ịtologhu riisi anyina sịphe Otu Ịiḅereghi phọ, ọto atum ọto, ọdaphan iiḍighi phọ aDevid rꞌạSolomon ọony ọdi ọḅogh bọ ịngo inyina,

⁵kụ ẹrologhu dọl dị oye oye anyina katue ạloghonaan ḍịghaagh tọrobo eghunotu Ịzirel.

⁶Nyina kẹze nmụny iyool rꞌạrutu-ịga olhiom ẹyaal ọphel otene phọ. Nyịidipho iselemian siloor anyina kụ eekolobian rịkia phọ ọbo abumor awe Ịzirel phọ anyina ọdaphan oromoghiom mọ Ọmoogh-we phọ ạḅeni bọ Mozis mọ ạngo phọ.”

⁷Ịlo awe phọ koliom ẹyaal phọ, aJosaya amitiom ni loor aḍita ịnam ọdi ịraardi ọonir iyool-ịga, ạnmuny iyool-ịga phọ rꞌạnmuny ạrutu-ịga, rꞌịraar ọonir ilephiri ạsinam.

⁸Awe iiḍighi ọdi ụngo aani ni ịnam ịlo awe phọ, ariil ạrikia phọ, rꞌạbuo aLivai koḍighinom. Kụ awe iiḍighi phọ ropogh bọ Otu Ịiḅereghi phọ — ạHilkaya ogbogh oyil ạrikia phọ, ạZekaraya, rꞌạJehiel — ụngo riil ạrikia phọ 2,600 ạnmuny iyool rꞌạrutu-ịga ra 300 ilephiri ạsinam oḍighinom ạrikia mem ẹyaal phọ.

⁹Abuḍiemiom aLivait phọ — aKonania, aSemaya rꞌumor ọdi Nẹtanel, aHasabaya, ạJeyel, rꞌạJozabad — ụngo 5,000 ạnmuny iyool-ịga rꞌạnmuny ạrutu-ịga ra 500 ilephiri ạsinam ịlo ạbuo aLivai phọ kọphinyonom rịkia.

¹⁰Mem dị mosereghi rạraar ịlo esi rꞌesi ịlo ẹyaal ọphel otene phọ, ariil ạrikia phọ rꞌạbuo aLivai phọ ọmeregha riisi ạbidi, ịdipho ọdaam mọ ạto bọ.

¹¹Mem dị mọze nmụny iyool-ịga rꞌạrutu-ịga phọ, ạbuo aLivai ọkponyon ruzu phọ, kụ ariil ạrikia phọ ọsaraghiom ịḅaal ạnyu enmeny phọ.

¹²Kụ bịdi ọsighe ịnam mọ, ọngooghi we bụo eghunotu rꞌeghunotu, ọbo bịdi ọphinyonom rịkia oguom ạnian ọdaphan oromoghiom mọ edi bọ sịphe Ologh phọ aMozis.

¹³Ạbuo aLivai phọ ọphophoghi rịkia ẹyaal ọphel otene phọ loor ạnian ịdipho ologh phọ ạḅem bọ, kụ ọsaaghi rịkia iigbia loor asuugh, ạsigbagba, asuugh odiiny rꞌạrukpa, kụ aagborion adiemi ịnam mọ we phọ.

¹⁴Ịphen phọ reten, bụo aLivai phọ umitiom ịnam ịlo aloor ạbidi rꞌịlo ariil ạrikia ạbuo ẹemara phọ Eeron, ịdi eḍighi bọ ariil ạrikia phọ uḍighi oḍighi tụtu eghulom, ọphophoghi ghan ịnam dị ọsu ikpom rꞌẹnuum ạrikia mọ.

¹⁵Ạroko-ạsuor phọ ạbuen bụo ọto Asaf ọlo eghun phọ aLivai ụrol riisi dị osereghi bịdi, ọdaphan oromoghian aDevid ọdaam mọ: Asaf, aHeman, rꞌaJedutun oyil ọdaam mọ. Abukoriom ạrunhu-aḍibuo Otu Ịiḅereghi ụ́kpe ọḍua ariisi ẹmeera phọ ạbidi, loor esi dị bụnon awe aLivait kụ ụsaanaan eḍien ẹyaal ọphel otene phọ ạbidi.

¹⁶Loor ịduon phọ, ịdipho aJosaya ọdaam mọ mạto bọ, oomo ạraraar uḍighi ḍio phọ ạḍiphe ẹlo ooseeny Ọmoogh-we phọ, ooko ghan ẹyaal ọphel otene phọ ḅịle rꞌoḍighi ạrikia oguom ạnian sịphe enmeny phọ.

¹⁷Oḍual asuḍughul-otu, oomo awe Ịzirel dị ọrol, ule ghan ẹyaal ọphel otene phọ rꞌẹyaal ạbred dị yist ụ́logh.

¹⁸Emiigh kꞌamem ạSamuel oyil phọ kőlhe ghan ẹyaal ọphel otene phọ ịduon. Rꞌoniin ọdaam dị mạrol ghan dị ale ẹyaal phọ ẹphen ịduon aJosaya ale bọ ólho, nyẹen ariil ạrikia phọ, bụo aLivai phọ rꞌawe aJuda, Ịzirel rꞌaJeruselem olhe bọ

¹⁹lhạ phọ ạḍiphe emuneniom bọ ḍioph rꞌọphaanya ọda phọ aJosaya.

²⁰Mem dị aJosaya ọdaam mọ maḍighi oomo ịphen aseenaan Otu Ịiḅereghi phọ, aNeko Ọdaam mọ Ijipt aḍiemiom ni we ẹgham eeghi ẹpe Kakemis ọgbal Ọphiiny aYufratis. AJosaya ạkparagha ịlo osophoghom ọdi,

²¹kụ aNeko arom dom mọ aḍien ạghiomaan Josaya mọ, “Ẹgham mọ ẹphen mị rabe bọ nyịna ẹ́moogh, ọdaam aJuda. Mị útu eeghi rꞌạna, kụ eeghi rꞌạbumulogh-ḍien ạmi, kụ Ẹnaan mịḅeni ịmi oogborion. Ẹnaan edianaan rꞌạmi. Ịduon kụ iḍighi kụ émeera kị́tol esi ạna, ọbo ọdi kạphue ghan bọ nyịna.”

²²Kụ aJosaya ạnya ni ee elephiri. Ọdi ómeera ọnaghan ịlo Ẹnaan rẹkaaph sịphe ikpo ọnhu phọ aNeko Ọdaam mọ, kụ ọdi ạaghi loor ọdi bịn ạghi ẹgham ẹpe ạḍiyaghaghaany ade phọ aMegido.

²³Ọdi robe ẹgham mọ, bịn ịkpina ạbuo Ijipt ẹteeny nyọdi. Ọdi ạto ạḅeni butelhedom ọdi mọ, “Ịsighe ịmi ẹḍuanam; muḍighi ịmi ịyaar!”

²⁴Bịdi ophoophe nyọdi ọsighe sịphe oghuugh-ude phọ ọdi, ọlogh nyọdi ologhi ọnon oghuugh dị ọdi ạmoogh, kụ ọghimom nyọdi Jeruselem. Sịphe kụ ẹdi ọdi amugh kụ oḍi nyọdi ẹpe ariiḍi ạburude phọ ọdi. Oomo awe phọ aJuda rꞌaJeruselem umoghi ḍuugh phọ ọdi.

²⁵AJerimaya ạlogh ḍụor ọotughianam aJosaya ọdaam mọ. Meḍighi eseeriom ẹpe Ịzirel dị ạroko-ạsuor, lephiri rꞌạnmariir, ụmoor ghan ḍụor phọ ạḍien mem dị bịdi romoghi nyọdi. Ḍụor phọ mọmiin esi dị ookpomoghi ịdo ạsuor phọ ịphen.

²⁶Oomo iiḍighi phọ aJosaya — ọkuom aloor ọdi esi Ọmoogh-we phọ, ọnaghanan Ologh phọ,

²⁷rꞌịlo aghuḍum kꞌemiighom kꞌekureriom — ọge sịphe ạḍinya ịpe emiteghu bọ mem ạbudaam mọ Ịzirel rꞌaJuda.