Read abua 2 Krọnikuls 36 Bible Online

2 Krọnikuls 36 - abua bible

2 Krọnikuls 36

¹Awe phọ aJuda ụsaḅar ri Joahaz ọony aJosaya ọsagharan nyọdi mụnum oḍighi ọdaam sịphe Jeruselem.

²AJoahaz ạman bọ 23 ạsia kụ aḍighi ọdaam aJuda, kụ ọdi ạda sịphe Jeruselem ịraar ụnwanyu.

³ANeko Ọdaam mọ Ijipt asiph ni nyọdi kụ ạkpaariom mọ aJuda osogh iisogh 3,400 igbogh ịtoom ẹemor asilva ra 34 igbogh ịtoom ẹemor agol.

⁴ANeko ạma Ẹliakim umor aJoahaz ạdaami Juda kụ anme ḍien ọdi kụ aghol mọ aJehoyakim. ANeko ạsighe Joahaz agheelom Ijipt.

⁵AJehoyakim ạman bọ ịyaldi rꞌoogh ạsia kụ aḍighi ọdaam aJuda, kụ ọdi ạda sịphe Jeruselem ḍioph rꞌoniin ạsia. Ọdi ạpioghom esi Ọmoogh-we Ẹnaan phọ ọdi.

⁶ẠNebukadnezar ọdaam eelhe phọ ạBabilon azuom ni Juda, asiph Jehoyakim ạkpoom izime, kụ ạsighe nyọdi ạghimom Bạbilonia.

⁷ẠNebukadnezar ạsighiogh iniin aruphua phọ ẹrol bọ sịphe Otu Ịiḅereghi phọ ạḍuanam kụ adoghoḍi otu-ọolha ọdi ẹpe Bạbilon.

⁸Oomo ạraraar dị aJehoyakim aḍighi yogh, ọḅaran sịḅaphanya rꞌịkaraph phọ ọdi, ọgeeghi loor ạḍinya ịpe emiteghu bọ mem ạbudaam mọ Ịzirel rꞌaJuda. AJehoyasin ọony ọdi kụ ạsighe dọl ọdaam mọ ọdi.

⁹AJehoyasin ạman bọ ḍioph rꞌọphaanya ạsia kụ aḍighi ọdaam aJuda, kụ ọdi ạda sịphe Jeruselem ịraar ụnwanyu rꞌaḍioph aḍughul-otu. Ọdi kẹn ạpioghom esi Ọmoogh-we phọ.

¹⁰Mem dị ẹteeny unu, ạNebukadnezar ọdaam mọ ạsighe Jehoyasin dị osiph agheelom Bạbilonia, kụ aakoroghi ruphua phọ ẹrol bọ sịphe Otu Ịiḅereghi phọ, ạsighiogh ạḍuanam. Kụ ạNebukadnezar ạma Zẹdekaya umor ọde aJehoyasin ạdaami Juda rꞌaJeruselem.

¹¹ẠZedekaya ạman bọ 21 ạsia kụ aḍighi ọdaam aJuda, kụ ọdi ạda sịphe Jeruselem ḍioph rꞌaḍiniin ạsia.

¹²Ọdi ạpioghom esi Ọmoogh-we phọ kụ ọ́ḅaram osooromi aloor kụ ọnaghanan Jerimaya oyil phọ, ọpo ạḅa bọ ikpo ọnhu Ọmoogh-we phọ.

¹³ẠZedekaya ạḅaar ri ẹmhu esi ạNebukadnezar ọdaam mọ, ọpo ạkpaariom bọ nyọdi mọ aghunya rꞌaḍien Ẹnaan mọ ọdi kaḍugh ni oye. Ọdi ạmoogh oḅom ẹmhu kụ ómeera okiton oḅula esi Ọmoogh-we Ẹnaan phọ Ịzirel.

¹⁴Ẹdi etum, abuḍiemiom mọ aJuda, ariil ạrikia phọ rꞌawe phọ ụdaphan ẹkaraph eḍighinom ịyaar areelhe phọ ịpe ekoom bọ bịdi ooseeny ghan ịkaaneen ạrumugh, kụ bịdi ọphue Otu Ịiḅereghi phọ, ọpo Ọmoogh-we phọ rꞌaloor maseere bọ mọ aḍighi esi iigbia.

¹⁵Oomo amem Ọmoogh-we Ẹnaan ạburude ạburude phọ ạbidi arom ghan ni riil ọphur ạruru we phọ ọdi, loor esi dị ọdi ạwa ọphel ạbidi rꞌOtu Ịiḅereghi phọ.

¹⁶Kụ bịdi ọgilaam ghan rụukpaany phọ ọdi, ọḅitonaan ikpo ọnhu phọ ọdi kụ ọmilogh riil phọ ọdi tụtu ẹteeny mem dị Ọmoogh-we phọ ạmooghom ophin ologhi we phọ ọdi dị ạbugh iboom kụ okpetenaan ọ́rol.

¹⁷Ịduon kụ iḍighi kụ Ọmoogh-we phọ ạsighe ọdaam eelhe phọ ạBabilon mọ eeghiom bịdi. Ọdi ạze ni ugheel ạnmuny phọ, ghạlamo rꞌịsiphe Otu Ịiḅereghi phọ. Ọdi ọ́mooghaan ọnma ighirigiir oye, mꞌonyugheel mꞌokumoor oye, mꞌolephiri mꞌạnir, mꞌómoom mꞌamoon. Ẹnaan ịḅogh ni oomo ạbidi ẹngo nyọdi.

¹⁸Ọdaam eelhe phọ ạBabilon awum ruphua Otu Ịiḅereghi phọ, eekoom otu ịiḅereghi, rꞌẹelha ọdaam mọ rꞌạbuo iiḍighi ọdi kụ ạsighiogh oomo phọ ịne agheelom Bạbilon.

¹⁹Ọdi ạsu nịan Otu Ịiḅereghi phọ rꞌẹmha phọ, rꞌoomo arigiga phọ rꞌaruphua phọ kụ alhereghi iikpe ẹmha phọ.

²⁰Ọdi ạsighiogh oomo awe lọ usugha agheelom Bạbilonia, eelhe dị bịdi oḍighinaan nyọdi rꞌạnmuny ạnmuny ọdi iiḍighi ịdipho ạrebene tụtu ẹteeny mem mọ ọmar phọ aPasia aru bọ asi.

²¹Ịduon phọ ịpe Ọmoogh-we phọ mạḅeni bọ Jerimaya oyil phọ emiteghu ni: “Ade phọ keḍighi ni ọkpagha esi rꞌoḍualdi ạsia omuneniom ophooghian phọ ọpo awe úpooghian ghan bọ.”

²²Ḍịḅel ạlha phọ ạḍiphe ạSairos aḍighi bọ ọdaam mọ aPasia, Ọmoogh-we phọ aḍighi amitiom ịpe ọdi mạḅeni bọ Jerimaya oyil phọ. Ọdi ạkpaariom ni Sạiros ọlogh ologh dị kọge ọkiomonaan tọrobo ekpisi sịphe eelhe phọ ọdi mọ ạal omitiom:

²³“Ịphen kụ ịto phọ ạSairos ogbogh ọdaam eelhe aPasia. Ọmoogh-we Ẹnaan kꞌạke phọ muḍighi ịmi ọdaam oomo areelhe ịsien aḅirini phọ kụ mụḅogh ịmi ọngo oḍighi ọloghonaan otu ịiḅereghi nyọdi ẹpe Jeruselem ẹpe Juda. Nyịidipho, oomo phọ anyina oḍighi bọ we Ẹnaan, ịki ẹpe, kụ Ẹnaan phọ anyina Ọmoogh-we phọ ịrolan inyina.”