Read abua 2 Krọnikuls 4 Bible Online

2 Krọnikuls 4 - abua bible

2 Krọnikuls 4

¹ẠSolomon ọdaam mọ ạto mọ ọsighe enaba ọkanam enmeny ạrikia dị oomo ịigaany eḍighi 9 akuḅu, kụ aḍiphoph 4.5 akuḅu.

²Ọdi ạḅile ạlhem oghuugh dị aaghiraan dị aḍighinom enaba, 2.2 akuḅu ḍịkel ude, 4.4 akuḅu egbororian, 13.2 akuḅu eeghiraan.

³Ooghironom aruukuna oghuugh phọ usereghi ịyal ạsikool ibura, ḍiniin ẹrol ạnyu aḍiniin. Ibura phọ ịghigh ịya ạsinam dị mọḅaraghi eniin esi rꞌịpheri phọ oghuugh phọ.

⁴Oghuugh phọ ạbedenom rạman aḍioph rꞌịyal ạsinam dị ọlemom enaba kụ ephogh erugh, ịraar ịne esoman tọrobo ạga.

⁵Ịigaany oghuugh phọ iḍighi 0.75 ẹkulom ạḍighaagh oogbiim. Eekuna phọ ịghigh ọnhu ạmogo, ẹkula ịigaany phọ mụdi eekuna ạfalaway. Oghuugh phọ aḍigh ẹnum kụ isugha ọman 60,000 aruuku.

⁶Bịdi ọḅile ọlem ḍioph igbogh ạsigbagba, oogh koseere ạga esoorom mọ Otu Ịiḅereghi, oogh koseere ạga ephunom mọ. Kọsighe kụ ootolom riisi ịnam dị ọphophoghi ịdipho ẹkia. Ạmuum ịsiphe ogbogh oghuugh phọ mụo ariil ạrikia ootolaam ghan asiloor.

⁷ Bịdi ụlhem ni ḍioph ịmeremiom ịtozi agol ịdipho rẹtol ghan bọ, ḅịle rꞌaḍioph ịdaabili, kụ oseere ologhi ọkar osoph Otu Ịiḅereghi phọ, oogh ịmeremiom ịtozi rꞌoogh ịdaabili ḍịghaagh. Bịdi ụlhem kẹn 100 ạsigbagba agol.

⁹Bịdi ụlhoghonaan esi ạdol ẹlo ariil ạrikia phọ, eniin ologhi eniin erugh. Ịnhu-aḍibuo phọ edi bọ igbo ariisi ạdol phọ uukpereghiom enaba.

¹⁰Useere oghuugh phọ otumeriom ọogaany Otu Ịiḅereghi phọ ạga esoorom-emitenom erumuḍio phọ.

¹¹AHuram ạlhem kẹn ni suugh, rụsua ḅịle rꞌạrukpa. Ọdi ạmadan ni oomo oḍighi phọ ọdi aḍighinaan bọ Sọlomon ọdaam mọ ịlo Otu Ịiḅereghi Ọmoogh-we phọ: Ịyal ạroko phọ Ịyal areme mọ ẹrol bọ ẹpe ạnyu ạroko phọ Ịnme izime phọ eeteneghian bọ ạnyu areme phọ Inya okuron arughuuny ekpetughe enaba phọ ịyal ạsikool, ịyal okuron ḍịkool ekitonom ịnme ạtorotoro eme Ḍioph arughuugh ẹgham phọ Ḍioph igbogh ạsigbagba phọ Oghuugh enaba phọ Ḍioph rꞌịyal ilephiri ạsinam mọ ẹpham bọ oghuugh enaba phọ Asuugh phọ, rụsua phọ rꞌịsughom mọ AHuram, ogbogh oye ẹmaar phọ, kụ ạlhemogh oomo ạraraar phọ ịphen dị ọsighe enaba dị ogbuur kụ oḍighinom, ịdipho Sọlomon Ọdaam mọ mạto bọ, oḍighinom Otu Ịiḅereghi Ọmoogh-we phọ.

¹⁷Ọdaam mọ aḍighi yogh oomo phọ ịne sịphe esi ọlem mọ ogbo aSukot rꞌaZereda ẹpe Eḍiiny ạJodan.

¹⁸Ụlhem ni ịbadi ạraraar dị oye órue olegheri oomo ẹemor enaba dị ọlemom.

¹⁹ẠSolomon ọdaam mọ ạto mọ ọsighe gol ọdamaghi Otu Ịiḅereghi kụ omitiom rạraar phọ ịphen: enmeny ẹkia phọ rꞌịdaabili ạbred dị ọngo ghan Ẹnaan;

²⁰ịmeremiom ịtozi rꞌịtozi phọ oḍighinom bọ ogey agol dị kẹemor ghan risigh Ẹphan phọ, ịdipho ogbiighi bọ;

²¹ibura ạfalaway phọ, ịtozi phọ rꞌịsunyonom;

²²isiphom ịtozi, ạsigbagba, ạrukpa oseeriom ịnsens rꞌạsigbagba okpophom iiḅu. Oomo ạraraar phọ ịphen uḍighinom ogey agol. Arughuugh emitenom Otu Ịiḅereghi phọ rꞌarughuugh Ẹphan phọ ukpoghom gol.