Read abua 2 Krọnikuls 5 Bible Online

2 Krọnikuls 5 - abua bible

2 Krọnikuls 5

¹Mem dị ạSolomon ọdaam mọ mạmadan oomo oḍighi sịphe Otu Ịiḅereghi phọ, ọdi ạsighe oomo ạraraar phọ aDevid ọde phọ ọdi mạḅogh bọ ọngo Ọmoogh-we phọ, silva, gol rꞌịnon ạraraar, adoghoḍi ologhi iisoph ookoom mọ.

²Kụ ạSolomon ọdaam mọ aagbologh oomo aruwo ẹmhu arughunughun rꞌaropolo phọ Ịzirel mọ ookpomoghan Jeruselem, ẹrol dị ọsighe Igbe Ịyo Ọmoogh-we phọ sịphe Zạyon, ẹmha phọ aDevid otumom Otu Ịiḅereghi phọ.

³Oomo ạbidi uukpomoghan ni mem ẹyaal arubughotu phọ.

⁴Mem dị oomo abuḍiemiom mọ mookpomoghan, kụ ạbuo aLivai ophoophe oroolom Igbe Ịyo

⁵kụ osiemi Otu Ịiḅereghi phọ. Ạbupinyon rịkia phọ rꞌạbuo aLivai oḍur kẹn ni Ogbogo Ạdol Ọmoogh-we phọ rꞌoomo ạraraar lọ ẹdapham ọghimom Otu Ịiḅereghi phọ.

⁶ẠSolomon ọdaam mọ rꞌoomo awe Ịzirel uukpomoghan ni ghisigh Igbe Ịyo phọ kụ ọze ịminighan iyool-ịga rꞌạsinam — ẹpughan ogbi.

⁷Kụ ariil ạrikia phọ ophoophe oroolom Igbe Ịyo phọ Ọmoogh-we phọ osiemi Otu Ịiḅereghi phọ kụ ọkar ọlogh sịphe Ẹphan phọ, sịphe ude araphaaph ạruukpaany aghuḍuul phọ.

⁸Araphaaph phọ ạbidi ẹetaranu bọ eghoph Igbe Ịyo phọ rꞌireeny oroolom mọ.

⁹Ruukuna ireeny phọ, tọrobo oye kạmiin ni, lọ ạmeera ọkar eelenyan Ẹphan phọ, kẹ́non ekpisi. (Ireeny oroolom mọ edi ni sịphe kꞌarodon.)

¹⁰Ịyaar ị́tol ologhi Igbe Ịyo phọ emuton ịyal ịdaabili asighiigh phọ ịpe aMozis ạlogh bọ ologhi ẹpe Eegum aSainai mem mọ Ọmoogh-we phọ aghiran bọ ịyo rꞌawe phọ Ịzirel ịdipho bịdi rọḍua bọ ẹpe Ijipt komite.

¹¹ Oomo ariil ạrikia dị ọdi, úpogh ẹkpigh lọ oye phọ amite, moselemian siloor ạbidi. Kụ oomo ạroko-ạsuor ạbuo aLivai — Asaf, aHeman, rꞌaJedutun, rꞌạbuo aropolo phọ ạbidi — ụkpologhian ịyegheyeghe arukpe. Ạbuo aLivai phọ ọrol otuman ạga emitenom erumuḍio enmeny ạrikia phọ ọpham ịkpaalaam rꞌạrene kụ sịphe aḍita phọ ụrol aani 120 ariil ạrikia dị ophula rọkuodu. Bụo ạsuor phọ ụmoogh mụḅoph rꞌạrokuodu, ịkpaalaam rꞌiitia phọ mem dị bịdi roboom Ọmoogh-we phọ kụ rọmoor: “Iboom Ọmoogh-we phọ loor esi ọdi ạnighe ni, kụ ẹphomoghian ọdi kẹtol kꞌagee-pọ.” Mem dị ariil ạrikia phọ romite Otu Ịiḅereghi phọ, ekperenom bịn ọotu dị rạmuanan rꞌạḍinmananmana ạḍiḅaal ạdol Ọmoogh-we phọ isoorom ni Otu phọ eghoph, kụ bịdi útue mun ụ́pam iiḍighi ooseeny phọ.