Read abua 2 Krọnikuls 7 Bible Online

2 Krọnikuls 7 - abua bible

2 Krọnikuls 7

¹Mem dị ạSolomon ọdaam mọ ạaḅereghi ạwile, ạnian ịḍua ni kꞌạke esoorom rịkia phọ ọphinyon bọ, kụ ạḍinmananmana ạḍiḅaal ạdol Ọmoogh-we phọ emuza Otu Ịiḅereghi phọ.

²Loor esi dị ạḍinmananmana ạḍiḅaal phọ emuza bọ Otu Ịiḅereghi phọ, ariil ạrikia phọ útue uḍigh ologhi.

³Mem dị awe phọ Ịzirel ọmiin nịan dị ẹḍua kꞌạke esoor kụ ạḍiḅaal emuza Otu Ịiḅereghi phọ, bịdi uḅololo ni ọsighe ghisigh ozuemi ude ịisua, ooseeny ghan Ẹnaan kụ ọseph ghan nyọdi esi ịma eḍighinom rꞌẹphomoghian phọ ọdi edi ghan bọ bịn.

⁴Kụ ạSolomon rꞌoomo awe phọ ogbi oḍighi yogh ạrikia ọngo Ọmoogh-we phọ.

⁵Ọdi ạze ni 22,000 ạsinam ra 120,000 iyool-ịga ạphinyonom rịkia ẹboroph. Ịduon phọ kụ ẹdi ọdi rꞌoomo awe phọ ọosa Otu Ịiḅereghi phọ.

⁶Ạbupinyon rịkia phọ ọmeregha riisi dị osereghi bịdi, kụ ạbuo aLivai phọ ọrol ophogh bịdi, kụ oboomiom ghan Ọmoogh-we phọ rạraar ephegh phọ ịpe aDevid ạngo bọ bịdi kụ rọmoor ghan ḍụor phọ mọ, “Ẹphomoghian ọdi kẹtol bịn!” ịdipho aDevid ạtooghi bọ. Ạbupinyon rịkia phọ uphula ghan ruuḍue kụ oomo awe ọmeregha.

⁷ẠSolomon ạasa ni oghoony phọ odi bọ esomanan Otu Ịiḅereghi Ọmoogh-we phọ ạlogh iigbia, kụ aḍighi rịkia oguom ạnian, rịkia ịbiakpa, rꞌẹnuum ạrikia ẹboroph. Ọdi aḍighi ịphen phọ loor esi dị enmeny ạrikia phọ ẹpe ọdi ạsighe bọ enaba ạkanam ighom ẹphughan oḍighi oomo ạraraar phọ ịphen.

⁸ẠSolomon rꞌoomo awe phọ Ịzirel ule ni ẹyaal arubughotu phọ oḍual aḍughul-otu. Aḍita dị ookpomoghan ụbugh ni iboom dị ọḍua kꞌẹpe eḍighom ạHamat ạga ephunom mọ kụ osi ọku Ijipt ạga esoorom mọ.

⁹Ẹman bọ oḍual aḍughul-otu ọosa enmeny ạrikia phọ rꞌịnon oḍual aḍughul-otu ole ẹyaal phọ. Ḍigbogh aḍio phọ ẹyaal phọ kekeel bọ, bịdi ụmoogh ni rephegh okureriom,

¹⁰kụ ḍio dị etum, ḍio phọ emuneniom bọ 23 ụnwanyu dị aḍighi oḍual, ạSolomon ạḅeni we phọ mọ ogheel. Ọḅaal ologhi ạrolonaan bịdi esi oomo ạḍiseph phọ Ọmoogh-we phọ mạngo bọ we phọ Ịzirel, ạngo Devid ḅịle rꞌạSolomon.

¹¹Mem dị ạSolomon ạmadan bọ ọlogh Otu Ịiḅereghi phọ rꞌotu ọdaam mọ, amuneni bọ oomo ịpe ọdi ạatughian bọ ẹḅeeraan nyọdi ịlo oḍighi,

¹²Ọmoogh-we phọ amite ni egaan esi ọdi ḍughul, kụ ạḅeni Sọlomon mọ, “Mị mạnaghan ịiḅereghi ạna, kụ mị ạsighe Otu Ịiḅereghi phọ ọphon mọ esi oḍighi ghan ạrikia ọngo ạmi.

¹³Tọrobo amem lọ mị akikima ọlophia, mụghumo mị urom igurubia ole iimuma, mọ mị ụngo ẹkaraph ẹzegh kụ ẹteeny we ạmi,

¹⁴eḍighi ịyaar dị bịdi ụuḅereghi ịmi, okiton esi ịkaraph lọ bịdi roḍighi ghan, mị kạnaghanan ni bịdi ẹpe kꞌạke, ạsar ịkaraph ạbidi ạbilenaan, kụ ạḅile ạngo ẹeḍiom de ạbidi.

¹⁵Mị kapogh ghan Otu Ịiḅereghi phọ ọphon kụ ạnya ọnaghan oomo ịiḅereghi lọ ọoḅereghi sịen,

¹⁶loor esi dị mị mạsaḅar esi phọ kụ ạsighe mọ esi dị kuuseeny ghan ịmi kꞌagee-pọ. Mị kapogh ghan ḅịle akikima tọrobo ịyaar oomo amem.

¹⁷Eḍighi ịyaar dị nạ kukumu ịmi rꞌoomo ologhi ịdipho aDevid ọde phọ ạna aako bọ iilogh ạmi, kụ aḍighi tọrobo ịlo mị ạto ạḅeni nyịna,

¹⁸pọ mị kaḍighi ni amuneni oguan phọ mị ạmooghaan bọ Devid ọde phọ ạna mem dị mị ạḅeni nyọdi mọ ạnmuny ạnmuny ọdi kụ kọda Ịzirel mem mem.

¹⁹Kụ eḍighi ịyaar dị nạ rꞌawe ạna rọḅaar ẹmhu esi iilogh rꞌịtooghi phọ mị mịngo bọ inyina kooseeny ịkaaneen ạrumugh,

²⁰pọ mị kiphorogh inyina sịphe ade phọ mị ịngo bọ inyina, kụ mị kakel li Otu Ịiḅereghi phọ ọphon mị maseerian bọ mọ esi dị kuuseeny ghan ịmi. Tọrobo ekpisi awe kọgilaam kụ opogh bịn ọḅitonaan.

²¹“Otu Ịiḅereghi phọ nyịidipho ọngo ni eboom eghuan, kụ tọrobo oye lọ raten kụ aphogh keḍigh ni iikia kụ apuru, ‘Uḍighi ika kụ Ọmoogh-we phọ aḍighi ịphen de phọ ạḍien rꞌOtu Ịiḅereghi phọ ọphon?’

²²Awe kọpagharanaan, ‘Ịdi eḍighi bọ bịdi ughel Ẹnaan phọ ạbidi Ọmoogh-we phọ, ọpo ạsighe bọ bụrude ạburude phọ ạbidi amitenom ẹpe Ijipt. Bịdi ụngo omeeraam ạbidi ịkaaghineen ạrumugh kụ ooseeny. Ịpe kụ iḍighi kụ Ọmoogh-we phọ aseere bọ mabi phọ ạmuen.’”