Read abua Ẹzra 5 Bible Online

Ẹzra 5 - abua bible

Ẹzra 5

¹Mem mọ ọpo phọ ịyal ariil, aHagai rꞌạZekaraya ọony Ido, umiigh ni ọghaaph esi aḍien Ẹnaan phọ Ịzirel ọḅeni ạbuo aJu phọ ạbuphe orugh bọ sịphe Juda rꞌaJeruselem.

²Mem dị ạZerubabel ọony ạSialtiel, rꞌaJosua ọony ạJehozadak ọnaghan bọ sidom mọ ạbidi, bịdi ụḅile ni omiigh ọḅile ọlogh Otu Ịiḅereghi phọ sịphe Jeruselem, kụ ịyal phọ ariil phọ ụlogh ni ḍịghaagh ọngo bịdi.

³Ịdi ẹwa ni oḍighi egina phọ amem mọ, aTatenai, ọdaam eelhe aYufratis ạga phọ ọpo erumuḍio phọ remeel ghan bọ, aSetar Bozenai, rꞌạbunon ạbuo ịtooghi ạbidi uru ni sịphe Jeruselem kụ opuru: “Ạnhian kụ ạto bọ ịḅeni inyina ọlogh Otu Ịiḅereghi phọ ọphon kụ osereghi ạraraar sịphe?”

⁴Bịdi ọḅile kẹn opuru ịlo asiḍien oomo phọ awe phọ ạbuphe ọloghonaan ghan bọ ḍịghaagh ọlogh Otu Ịiḅereghi phọ.

⁵Kụ Ẹnaan ikori ghan ni buḍiemiom aJu phọ, kụ ạbuo ịtooghi phọ aPasia oopuruan mọ bụno kóḍighi ịyaar tụtu bụno ọge ọghiom Dạrios ọḅile kẹn ọmoogh ọphagharanaan.

⁶Ịphen kụ ịdi bịdi ọge bọ ọghiom ogbogh ọdaam mọ:

⁷“Ọkiom Dạrios ogbogh ọdaam mọ. Nạ dạ ni rꞌẹepho!

⁸“Yoor rọwa Igbogh phọ Ạna kalegheri mọ yoor ụghi ni ẹpe eelhe phọ aJuda kụ ọmiin mọ mọḅile rọlogh Otu Ịiḅereghi egbogh Ẹnaan rꞌigbogh iiḅoghoḍi asighiigh ḅịle rꞌipoḍi ạsupo dị ọkanagh ruukuna iikpe phọ. Oḍighi phọ ọkaraghi ni omiigha loor kụ roḍighi kụ ạḅile kẹn ni rạki ghisigh igey.

⁹“Ịduon kụ iḍighi kụ yoor opuru buḍiemiom awe phọ mọ ụḅeni iyoor nyọpo ạngo bọ bịdi ịto ọḅile ọlogh Otu Ịiḅereghi phọ kụ oselemi.

¹⁰Yoor ụḅile kẹn ni opuru bịdi siḍien ạbidi ọbo yoor ọḅeni nyịna bụphe oḍighi bọ buḍiemiom oḍighi phọ ọphon.

¹¹“Bịdi ụphagharanaan, ‘Yoor abutelhedom Ẹnaan kꞌạke rꞌade phọ, kụ yoor ọḅile rọlogh Otu Ịiḅereghi phọ ọpo ẹḅel amem mọ ọdaam Ịzirel dị ạmoogh ịikpo kụ ạlogh bọ aselemi ịbadi ạsia dị meten.

¹²Kụ loor esi dị ạburude ạburude phọ ayoor oḍighi ịdi Ẹnaan kꞌạke phọ ẹghagh ologhi, ọdi ameera mọ ạNebukadnezar ọdaam eelhe phọ ạBabilon, oniin ọnyo oghiil ạraalha ạbuo aKaldia, ạkpar apu bịdi. Otu Ịiḅereghi phọ oḅomoghi, kụ we phọ ọsighe ọghi iiruen ẹpe Bạbilonia.

¹³Reru reten, ḍịḅel ạlha ọda phọ ạSairos ogbogh ọdaam ạBabilon, ạSairos ạngo ni ịto ọḅile ọlogh Otu Ịiḅereghi phọ.

¹⁴Ọdi aḅulemi rụkpa agol rꞌasilva Otu Ịiḅereghi phọ ịpe ạNebukadnezar ạsighe bọ sịphe Otu Ịiḅereghi phọ ẹpe Jeruselem kụ asereghi bọ sịphe otu iigbia phọ ẹpe Bạbilon. ẠSairos ạḅogh rụkpa phọ ịphen ạlogh ḍịghaagh oye dị oghol mọ aSesbazar ọpo ọdi ạma bọ ọda aJuda.

¹⁵Ogbogh ọdaam mọ ạḅeni nyọdi ọsighe ạbidi oḅulemi ịsiphe Otu Ịiḅereghi phọ ẹpe Jeruselem, kụ ọḅile ọlogh Otu Ịiḅereghi phọ esi phọ ịsiphe ọdi ạrol bọ ẹḅel amem mọ.

¹⁶Esi ịduon phọ aSesbazar aru aphighi ephighiom mọ; oḍighi phọ odi ghan bọ kꞌaḍio phọ ạḍiphe tụtu kꞌarodon, kụ ọlo Otu Ịiḅereghi phọ kőmuneen.’

¹⁷“Yoor ọotughian mọ, eru mạar dị ẹḅeeraan Igbogh phọ Ạna, pọ tọ awe oḅiligha ịpe ạbuo-ọda phọ ọgeeghi bọ oseere sịphe Bạbilon ọwa ophogh mụghumo ạSairos ạngo ni mọ ọ́ngo ịtooghi ọḅile ọlogh Otu Ịiḅereghi phọ ọphon sịphe Jeruselem kụ agbi ọḅeni ayoor ịlo edi esi ạna ịlo ọghaaph phọ ọphon.”