Read abua Nehemaya 8 Bible Online

Nehemaya 8 - abua bible

Nehemaya 8

¹Esi omuneniom oḍual ụnwanyu phọ, awe phọ Ịzirel mọmoogh sịdol dị memiigh ẹpe ạramha phọ. Ḍịḅel aḍio ụnwanyu phọ ọpo, oomo awe uukpomoghan ni ẹpe Jeruselem sịphe egbogh erugh phọ, ologhi ịsiphe rokol ghan bọ mọ Ọnhu-aḍibuo Ạmuum mọ. Kụ bịdi ọḅeni Ẹzra, oyil ạrikia rꞌoye ịtuugha Ologh phọ ọpo Ọmoogh-we phọ kụ ạngo bọ we phọ Ịzirel esi aMozis, mọ ạghi ạsighe ḍịnya Ologh phọ.

²Kụ Ẹzra ạsighe aru sịphe oomo awe phọ mookpomoghan bọ, alephiri rꞌạnmariir rꞌịbam ạnmuny dị mọmanam ọnaghanan ạḍughum.

³Sịphe egbogh erugh phọ ọgbal ọnhu-aḍibuo phọ kụ ẹdi ọdi ạal bọ Ologh phọ ạḅeni bịdi, emiigh ḍịroor kụ ẹghi ẹteeny ootaany, kụ oomo phọ ạbidi ọmaar ọnaghanan.

⁴Ẹzra ạmeera ạnyu ịkaaneen ireeny dị ọtuan ẹyaal phọ kụ oḍighi. Ḍịghaagh elhiom ọdi ọmeregha aMatitaya, Sema, Anaya, Yuraya, Hịlkaya rꞌaMaaseya; ḍịghaagh ekeeny ọdi aPedaya, Mịsael, Malkaija, Hasum, Hasbadana, Zẹkaraya rꞌaMesulam.

⁵Ịdipho Ẹzra ạmeera bọ ạnyu ireeny phọ ephoph bọ epu we phọ, oomo awe phọ usomoghi nyọdi riḍien ạbidi. Ọdi rakpegheron bọ ḍịnya phọ bịn oomo awe phọ oḅerenu ọmeera.

⁶Kụ Ẹzra ạḅem mọ, “Iboom Ọmoogh-we phọ, egbogh Ẹnaan phọ!” Oomo phọ awe phọ uphophoghi rạghaagh ạbidi ọghiom ạnyu kụ ọphagharanaan mọ, “Ẹrol li ịdipho! Ẹrol li ịdipho!” Kụ bịdi okpuḍughian rꞌasighisigh dị ozumeri yogh ude ooseeny Ẹnaan.

⁷Kụ bịdi oḅerenu ọmeregha riisi lọ ẹkpe ọmeera kụ awe ạbuo aLivai phọ ạbuen ọgo bọ kụ uuleghemi ghan Ologh phọ ọḅeni bịdi: Jesua, Bani, Serebaya, Jamin, Akub, Sabetai, Hodaya, Maaseya, Kelita, Azaria, Jọzabad, Hanan rꞌaPelaya.

⁸Bịdi ukiton ni ọnhu phọ ọghaaph Ologh phọ Ẹnaan ọogelion ịdi awe phọ kọnaghanan kụ ogananami ẹmhu phọ.

⁹Mem dị awe phọ ọnaghanan bọ ịpe Ologh phọ ạḅem bọ, ịḅogh ni bịdi sịphe arokpom mọ, kụ bịdi omiigh emoghi. Esi ịduon phọ, aNehemaya ọdaam mọ, Ẹzra oyil ạrikia rꞌoye ịtuugha Ologh phọ, rꞌạbuo aLivai ạbuphe ọghaaph ghan bọ Ologh phọ ogananami ẹmhu phọ, ụḅeni ni oomo awe phọ mọ, “Aḍio phọ arodon aḍio iigbia Ọmoogh-we Ẹnaan phọ anyina, kụ ịduon kụ iḍighi ịyaar dị nyina kẹ́moogh ọto ḅịle mꞌemoghi.

¹⁰Nyịidipho, ikeel ologhi otu ẹmoogh malhe, edi ẹngo aani bụlo ịyaar ụ́moogh. Arodon aḍio iigbia Ọmoogh-we phọ ayira, kụ oye kúkururu. Iboh phọ ịpe Ọmoogh-we phọ rịngo ghan bọ inyina kịkparami ni inyina.”

¹¹Ạbuo aLivai phọ urelhe yogh ni ọḅeni ghan awe phọ mọ kụ́to ọto ọdo aḍio dị ẹrol ịduon.

¹²Kụ awe phọ ogheel iloghi aruutu ạbidi, ole, ọphughol rꞌibo, ọḅile ọngo aani bụlo ụ́moogh, ịdi eḍighi bọ bịdi ụnaghanan ni ịpe ạal bọ ọḅeni bịdi.

¹³Ẹpheri phọ aḍio phọ abuḍiemiom aropolo phọ ọḅophoghan rꞌariil ạrikia rꞌạbuo aLivai kụ ọghi ọteeny Ẹzra ọtuugha ịtughemi Ologh phọ.

¹⁴Bịdi ụwaaghi olegheri mọ Ologh phọ Ọmoogh-we phọ ạngo bọ esi aMozis ẹḅem mọ awe Ịzirel orughogh rugbogo dị ọloghom rịnya ireeny mem Ẹyaal Arugbogo.

¹⁵Kụ bịdi orom sidom ịlo ịphen phọ ọghiomonaan we oomo aJeruselem rꞌịpheri phọ ạramha phọ, ịbam rꞌigbogh, mọ, “Ịki ẹpe aroogbolom mọ ẹwaaghi sịgo arelhe rꞌịnon ịdo kịrokiro ireeny eru ẹloghom rugbogo esi ịdipho ọge bọ sịphe Ologh phọ.”

¹⁶Kụ awe phọ ọghi ọwaaghi ịphiph ireeny kụ oru ọzaam ạnyu aruutu phọ ạbidi rꞌiloghi arigiga ạbidi rꞌogiga Otu ịiḅereghi phọ rꞌigbogh arurugh phọ pạkiri phọ ẹpe Ọnhu-aḍibuo Ạmuum mọ rꞌỌnhu Aḍibuo Ifraim.

¹⁷Oomo awe phọ ạbuphe ọḍua bọ iiruen origheel ụlogh ni rugbogo phọ ịphen kụ orughogh. Mụen kụ ạmuḅel amem dị moḍighi ghan ịduon, emiigh kꞌasiḍughul otu phọ ịpe aJosua ọony phọ ạNon, kụ itir ri tọrobo oye kụ ọḅile ọmoogh ọḅaal ologhi.

¹⁸Kꞌemiighom amalhe phọ kụ ẹghi ẹteeny eekuna phọ, bịdi ạal ghan pạkiri Ologh phọ Ẹnaan ḍio etum ḍio. Bịdi ule ẹyaal phọ oḍual aḍughul-otu, kụ ḍio phọ emuneniom bọ ọphaanya aḍughul-otu phọ, kụ ọḅile ookpomoghan esi ịiḅereghi okureriom ẹyaal phọ ịdipho Ologh phọ ạḅem bọ.