Read abua Esta 3 Bible Online

Esta 3 - abua bible

Esta 3

¹Ẹnum amem reten, bịn aZakzis ọdaam eelhe phọ aphoophe oye dị oghol mọ aHaman asiemi esi uwo ẹmhu iiḍighi. AHaman aḍighi ọony aHamedata, ọlo ẹemara ẹemara Ạgag.

²Ọdaam mọ ạto mọ oomo ạbuo iiḍighi phọ ịsiphe kꞌọno oḍeenaan osooromi aloor ọngo aHaman esi okpuḍian ghan kụ ozumeri orum ọngo ọdi. Oomo ạbidi uḍighi ni ịduon phọ, emuton aModekai, ọpo úmeera bọ oḍighi ịpe phọ.

³Ạbueri phọ ạbuo ịtooghi ịsiphe iiḍighi kꞌọdaam mọ opuru nyọdi ịpe eḍighi bọ kụ ọdi rạ́naghanan bọ ịto ọdaam mọ;

⁴ḍio etum ḍio bịdi ọkpaariom ni nyọdi mọ ạnaghan kụ ọdi ọ́naghanan bịdi. Ọdi ạghaaph ạḅeni bịdi mọ, “Mị ọlo aJu kụ mị kákpuḍian ạngo Haman.” Kụ bịdi ọḅeni Haman ịphen phọ, ookia ghan mụghumo ọdi kameeraam ni eḍighinom ịyaar phọ aModekai.

⁵AHaman ạghagh ologhi mem dị ọdi aloghoma bọ mọ aModekai rámeeraam okpuḍian ghan ozumeri orum ọngo ọdi.

⁶Mem dị ọdi alegheri bọ dị aModekai ọlo aJu, ọdi agbiighi ịdi epel ọlhiom aModekai bịn. Ọdi amite ezue ọze oomo aJu sịphe oomo eelhe ọda phọ aPasia.

⁷Sịphe ạlha phọ emuneniom bọ ḍioph rꞌịyal kꞌamem mọ aZakzis aḍighi bọ ọdaam mọ, ọḅel ụnwanyu phọ, ụnwanyu phọ aNisan, aHaman ạto mọ ọsa ẹlhel (“purim” ughol ghan ịduon) ọwa omitiom ḍio rꞌụnwanyu dị ạnighe dị koḍighi ịpe ọdi magbiighi bọ. Ḍioph rꞌịraar Aḍughul-otu ụnwanyu phọ ọpo amuneniom bọ ḍioph rꞌịyal ụnwanyu phọ Adar kụ ẹdi ogbiighi omeeraam.

⁸Esi ịduon aHaman ạḅeni ọdaam mọ mọ, “Awe odi ni dị ọwalala oomo eelhe ọda phọ ạna kụ omuza tọrobo ạpakiri. Bịdi ọpam riḍighinom ạraraar dị ẹgbatanaan ịlo ạbunon awe. Ḅịle kẹn, bịdi rọ́daph ghan iilogh eelhe phọ. Esi ịduon phọ kẹ́kpianaan nyịna omeeraam ạbidi.

⁹Eru mạar dị ẹḅeeraan ni igbogh phọ ạna, pọ lọgh ologh mọ ọze bịdi. Eru mạar dị nạ aḍighi ịphen phọ, mị aguanaan mọ mị katue ni ạlogh ịdi epel ịraar okuron rꞌinyadi ọonir igbogh ịtoom ẹemor asilva sịphe otu ikpoki ọdaam mọ ịlo oḍighinom iiḍighi eelhe ọda phọ.”

¹⁰Ọdaam mọ ạkpotonaan gulu phọ ọdi, ọpo ọsighe ghan bọ ọdaphari ịge dị eḍeenaan ịto ọdaam mọ, kụ ạngo mụlogh-ḍien awe aJu phọ, Haman ọony aHamedata, ọpo ẹemara ẹemara phọ Ạgag.

¹¹Ọdaam mọ ạḅeni nyọdi, “Awe phọ rꞌikpoki phọ ạbidi ịlo ạna; ḍighi ịpe ẹḅeeraan bọ nyịna oḍighinom ạbidi.”

¹²Esi ịduon phọ, ḍio dị emuneniom ḍioph rꞌịraar aḍughul-otu ọḅel ụnwanyu phọ, aHaman ạmagh bụgeeghia ọdaam mọ kụ aroma ịge dị kọgba ni tọrobo ọnhu rꞌịlo rọge ghan oḍighinom sịphe eelhe phọ kụ kọsighe ọkiom oomo ạbuo ịtooghi, bụdaam rꞌạbuo ịtooghi iiḍighi. Ịphen ụghiom esi aḍien aZakzis ọdaam mọ kụ ọsighe gulu phọ ọdi ọdaphariom.

¹³Bụo eghiil ụsighe ni ịge phọ ịphen ọghi tọrobo ẹkpigh ịsiphe eelhe ọda phọ. Ịmoogh oroma phọ mọ esi aḍiniin aḍio, ḍio phọ ạḍiphe emuneniom bọ ḍioph rꞌịraar ụnwanyu Adar, oomo ạbuo aJu, ugheel rꞌikumoor awe, nmạriir rꞌịbam ạnmuny, ạbudi kọze. Kọkanyan bịdi ịdi ọnma ighirigiir kạ́tol kụ ruphua ạbidi ọsighiogh.

¹⁴Ịpe edi bọ sịphe ịge phọ ịlo oḍighi ogananami sịphe ạtorobo ẹkpigh eelhe phọ, ọbo tọrobo oye aakolobian mem dị aḍio phọ ạḍiphe ẹteeny.

¹⁵Esi ịto ọdaam mọ uḍighi ni ịdi ologh phọ aganana sịphe ẹkpana ẹmha phọ ạSusa, kụ ạbuo eghiil ọsighe dom mọ ọghi rịikpigh areelhe phọ. Ọdaam mọ rꞌaHaman ụrol ude kụ ọphughol miim mem dị ẹmha phọ ạSusa kụ moroph rosumeeny ologhi ịgbaragbara.