Read abua Esta 6 Bible Online

Esta 6 - abua bible

Esta 6

¹Ḍughul aḍio phọ ạḍiphe ọdaam mọ órue ọnaani. Esi ịduon phọ, ọdi ạto ạngo we phọ ọdi mọ ọsighe rịnya phọ ịpe ọge bọ ịlo ịpe emiteghu bọ sịphe eelhe ọda phọ oruom nyịno, ọḅile ạal ọḅeni nyịno.

²Ẹkpigh ịpe bịdi ạal bọ ịḅaram ọghaaph ịlo ezue oghiigh ọdaam mọ aModekai ạwa amitiom, ezue phọ ẹpe aBigtana rꞌaTeres, ịyal aroophoony awe ịsiphe otu ọdaam mọ, omitenom bọ, bụphe okori ghan bọ iisoph ọdaam mọ.

³Ọdaam mọ apuru, “Ika kụ ịdi yira moghueni kụ ọkpe Modekai esi ịphen phọ?” Abutelhedom mọ ọphagharanaan mọ, “Kőḍighinaan nyọdi ịyaar.”

⁴Ọdaam mọ apuru mọ, “Rꞌoniin ọlo iiḍighi ạmi odi ni ologhi ogiga phọ ḍụghum?” Pụruku aHaman aḍigh ni ogiga phọ; ọdi maru ọoḅereghian ọdaam mọ ịlo osin aModekai ạnyu ịsiphe phọ ọka bọ kụ ookolobian oseere ẹlo osinom mọ.

⁵Esi ịduon phọ abutelhedom mọ ọphagharanaan mọ, “AHaman odi ni sịen rakori ghan ọmiin ạna.” Ọdaam mọ ạḅeni bịdi mọ, “Itorori nyọdi iruom ịmi.”

⁶AHaman aḍigh ni ologhi kụ ọdaam mọ ạḅeni nyọdi mọ, “Odi ni oniin oye dị mị rạwa ọngo ọkaraghi igey arughuenian. Eeghe kụ ẹdi mị kaḍighinaan oye phọ ọpo?” AHaman ạatughian sịphe ologhi ọdi, “Nyịidipho ạnhian kụ ẹdi ọdaam mọ rạwa bọ oghueni oomo ịphen? Ạmi ni, iikia ílho.”

⁷Esi ịduon ọdi ạphagharanaan kụ ạḅeni ọdaam mọ mọ, “Tọ mọ ọsighe iinmenan ọdaam ẹmha phọ, oru ọngo oye phọ ọphon — iinmenan ịpe nạ rꞌaloor rạkpologhian ghan bọ. Tọ ọsighe ibura ọdaam ẹmha dị kọkpologhi ạsu phọ ạna.

⁹Ịphen reten, mạ oniin ogbogh oye eghuan ạna aanmenemi oye phọ ibura phọ ẹphen. Oye phọ ọphon aḍiemiom nyọdi, dị mọrolomi ạnyu ạsu phọ, ạghimom ạḅeenye egbogh erugh ẹmha phọ. Meera oye eghuan phọ agbeel ghan ịdipho bịdi rọki bọ mọ, ‘Ịmiin ịdi ọdaam mọ rạkpe ghan oye dị ọdi rạwa oghueni.’”

¹⁰Pọ kụ amem dị ọdaam mọ ạḅeni Haman, “Nụun ạsighe iinmenan rꞌạsu phọ kụ ạngo rughuenian phọ ịphen aModekai ọlo aJu phọ. Ḍighi oomo ạraraar phọ ịpe nạ magbiighi bọ. Nạ kạmiin ni nyọdi dị ạrol ude sịphe eḍighom ogiga ọdaam mọ.”

¹¹AHaman ạghi ni ạmiin iinmenan phọ rꞌạsu phọ, kụ ạsighe iinmenan phọ ạkpologhi aModekai. AModekai aḍigh ạsu phọ kụ aHaman aḍiemiom nyọdi agbeel ghan ạḅeni we phọ ịdipho bịdi rọki bọ kọḅeeny egbogh erugh ẹmha phọ mọ, “Ịmiin ịdi ọdaam mọ rạkpe ghan oye dị ọdi rạwa oghueni.”

¹²Ịphen phọ reten kụ aModekai aḅula ọman sịphe eḍighom ogiga ọdaam mọ kụ aHaman aagborion agheel kꞌọdi, akpereghi ghisigh ọdi esi iikia rꞌịlo ọḅem.

¹³Ọdi ạḅeni ạnir ọdi rꞌoomo ạrighiri ọdi oomo ịpe memitenaan bọ nyọdi. Kụ ọdi rꞌạbuo oroma phọ ọdi ọḅeni nyọdi mọ, “Nạ ramiigh oroph ịikpo ọngo aModekai. Ọdi ọlo aJu kụ ạmoogh ịikpo dị epu ịikpo ạna. Ọkaraghi igey ni, ruukuna phọ, ọdi kạkpar ri apu nyịna.”

¹⁴Ịduon bịdi odi bọ ni ọḅile rọkaaph, bịn aroophoony awe ogiga ọdaam mọ osi ọnuun ọsighe Haman ọghi ẹpe ẹyaal phọ Esta.