Read abua Esta 8 Bible Online

Esta 8 - abua bible

Esta 8

¹Ḍio phọ ạḍiphe aZakzis ọdaam eelhe phọ ạngo Esta ukueni-ạnir phọ oomo aruphua phọ aHaman, ạmulogh-ḍien ạbuo aJu phọ. Esta ạḅeni ọdaam mọ mọ aModekai ọnyo asiya ọno. Emiigh kꞌamem mọ ọpo kụ ẹghiom risigh, momeera mọ aModekai aḍigh ghan esi dị ọdaam mọ odi.

²Ọdaam mọ ạkpotonaan gulu ọpo ọdi ạmoogh elegh ọdi, dị ọdi mạar bọ Haman kụ ạngo Modekai. Esta ạlogh Modekai dom ophogh ghan aruphua phọ aHaman.

³Ịphen reten kụ Esta ạḅile ạḅaanaan ọdaam mọ kụ akpuḍian ruwol ọdi rꞌemoghi. Ọdi ạaḅereghian nyọdi oḍighi ịyaar dị kekureri ẹkaraph ezue phọ aHaman, ọpo ẹemara ẹemara phọ Ạgag mamitenom bọ ịlo ọmiine ạbuo aJu phọ.

⁴Ọdaam mọ ạpham ẹḅu agol phọ amitiom asomoriom nyọdi. Esi ịduon phọ ọdi ạmeera kụ ạḅem mọ,

⁵“Eru mạar dị ẹḅeeraan ni dọl Igbogh phọ ạna, kụ nạ ụmanami ịmi ịyaar kụ eḍighi mạar dị ẹghigh ni elhiom esi ạna, seseeny ngọ igbeel lọ kekikima ịtooghi phọ aHaman ọghi aghisigh — ịtooghi ịpe ọony aHamedata ọlo ẹemara ẹemara Ạgag ạngo bọ ịlo ophiemi oomo ạbuo aJu phọ sịphe eelhe ọda phọ.

⁶Ika kụ ẹdi mị kạkparam bọ ịphen phọ eru mạar dị amuphe phọ ạmuen aru esi awe phọ ạmi, kụ siya ạmi ọze?”

⁷AZakzis ọdaam eelhe phọ ạḅeni Esta ukueni-ạnir rꞌaModekai ọlo aJu phọ mọ, “Ipogh mị masin Haman loor ẹmhu egir ophiemi ạbuo aJu phọ kụ mị mạngo Esta ruphua phọ ọdi.

⁸Kụ ọlo ịge dị oghol esi aḍien ọdaam mọ kụ ọdaphari elegh ọda phọ kótue mun onme. Ghạlamo ịduon ni, nyina etue ni ẹge ẹkiom bụo aJu phọ tọrobo ịlo ịḅeeraan inyina; ḅịle nyina etue ni ẹge ḍịnya esi aḍien ạmi kụ ẹdaphariom elegh ọda phọ.”

⁹Ịphen imite ịyaldi rꞌịraar aḍughul-otu ụnwanyu dị amuneniom ịraar, ụnwanyu aSivan. AModekai ạamaghagh bụgeeghia ọdaam mọ kụ ọge rịnya ọghiom bụo aJu phọ rꞌạbudaam areelhe phọ rꞌạbuo ịtooghi rꞌạbuo iiḍighi ịsiphe oomo okuron rꞌịyaldi rꞌoḍual ạriikpigh emiigh India kụ esi Sụdan. Rịnya phọ ụge ọghiom bụo aJu phọ rꞌạtorobo ẹkpigh eelhe esi ọnhu ạbidi ḅịle rꞌịdi bịdi rọge ghan.

¹⁰AModekai ạto mọ ọge rịnya phọ esi aḍien aZakzis ọdaam eelhe phọ kụ ọdaphariom bịdi elegh ọda phọ ọdi. Bụphe rokiilom ghan bọ rụsu kꞌọdaam mọ ịpe reegborion ghan bọ kụ ụsighe ọghi.

¹¹Ạrinya phọ ịphen ịghaaph ni mọ ọdaam mọ mameera mọ ạbuo aJu phọ odi bọ sịphe tọrobo ẹmha ookolobian ịlo okoronaan. Eru mạar dị awe ẹgham dị odi tọrobo eelhe mụghumo ẹkpigh eelhe kụ ozuom ẹgham weye aJu phọ, nmụny ạbidi mụghumo ạnmariir ạbidi, pọ ẹkpianaan ni bịdi ee oḅulemian ophiemi bụphe ozuom bọ; bịdi orue pọ ọze ni ọmadan ọḅile ọsighiogh rạraar phọ ạbidi

¹²Ịto phọ ịphen igbolomaam oomo eelhe phọ aPasia ḍio dị ọsaḅar ọzeeghi ạbuo aJu phọ, ḍio phọ ạḍiphe emuneniom bọ ḍioph rꞌịraar ụnwanyu dị aḍighi ḍioph rꞌịyal, ụnwanyu phọ Adar.

¹³Igbeel phọ ịphen ịlo oḍeenaan ạtorobo oye sịphe ạtorobo ẹkpigh eelhe phọ mọ eḍighi ni ologh dị ạbuo aJu phọ kookolobian ee oḅulemian esi ạbumulogh-ḍien ạbidi mem lọ aḍio phọ ạḍiphe ẹteeny.

¹⁴Esi ịto ọdaam mọ ạbuo eghiil uḍiku ni rụsu ọdaam ẹmha phọ kụ oghiilom ọghi rꞌoboom oogborion. Ụḅile kẹn ni ogananami ịto phọ ịphen oḍeenaan oomo awe sịphe Sụsa ẹkpana ẹmha phọ.

¹⁵Rọkpologhian iinmenan dị eḍighi ạbiloogh rꞌịphalaḅaal, rꞌạsuoma dị ozuom ạnyu dị oḍighinom ịma ọyegheyeghe ukpe rꞌeboom eghoony agol, kụ aModekai ạwile ogiga ọdaam mọ. Sịphe areten phọ ạSusa, iboh rꞌịlooghi ọḅaal ologhi kụ emuza.

¹⁶Esi ạbuo aJu phọ, iboh rꞌamalhe rꞌophooghian kụ ịrol, rꞌọḅaal ologhi loor ẹmhu ọkpar opu.

¹⁷Tọrobo ẹmha rꞌẹkpigh eelhe phọ, tọro ekpisi lọ ạal ịge ọdaam mọ, ạbuo aJu phọ ụmoogh ghan ni iboh kụ ophooghian esi iiḍighi phọ ạbidi kụ olhe malhe rꞌọḅaal ologhi. Ịdi etum pạ, ịbadi ạbunon awe okiton oḍighi bụo aJu, ịdi eḍighi bọ bịdi rokiilaan bịdi nyịidipho.