Read abua Esta 9 Bible Online

Esta 9 - abua bible

Esta 9

¹Iru ni ẹteeny ḍio phọ emuneniom bọ ḍioph rꞌịraar aḍughul-otu ụnwanyu phọ Adar. Ḍịphe kụ aḍio phọ kọkaaph bọ ịḅel ịge ọdaam mọ, aḍio phọ ạbumulogh-ḍien ạbidi oḍuom bọ ologhi okpobiom ạbuo aJu phọ. Ikitonaan ghụn dị ạbuo aJu phọ ụkpar opu bịdi.

²Sịphe amarugh awe phọ aJu tọrobo ẹmha eelhe phọ, awe phọ aJu uukolobian siloor ạbidi ịlo ozuom tọro oye lọ ạwa oḍighi ạbidi ịyaar. Tọrobo ekpisi awe ughiilaan ni bịdi, kụ rꞌoniin ọ́merenyan bịdi.

³Igey ni, oomo ạbuo iiḍighi ạriikpigh eelhe phọ — abupoghom areelhe, ạbuo ịtooghi rꞌạbudi omerenyan enye oḍighi ogiga ọdaam mọ kụ ọmeera — ụlhoghonaan ni ḍịghaagh bụo aJu phọ ịdi eḍighi bọ oomo ạbidi ughiilaan ni aModekai.

⁴Iḍighi ni ịdi eeleghaan oomo eelhe ọda phọ mọ aModekai nyịidipho maḍighi oye ịikpo sịphe ogiga ọdaam mọ kụ ịikpo phọ ọdi rẹbugh ghan bịn.

⁵Esi ịduon phọ ạbuo aJu phọ uḍighi ni ịlo bịdi rọwa bụmulogh-ḍien phọ ạbidi kụ ọsighe rolhool ẹgham ozuom bịdi ọzeeghi.

⁶Sịphe Sụsa ẹkpana ẹmha phọ rꞌaloor, ạbuo aJu ụze oogh okuron awe.

⁷Buniin ạbidi uḍighi ḍioph ạnmuny phọ aHaman ọony aHamedata ạmulogh-ḍien aJu phọ: aPasan Data, Dalfon, Aspata, aPorata, Adalia, Ạridata, Pamasta, Arisai, Aridai rꞌaVazata. Tọro ịpe ẹrol bọ, ibum ị́tol.

¹¹Ḍio ḍio phọ ạḍiphe ụḅeni ni ọdaam mọ ọnhu awe phọ ọze bọ sịphe Sụsa.

¹²Ịphen reten ọdi ạḅeni Esta ukueni-ạnir phọ mọ, “Sịen Sụsa bịn ạbuo aJu phọ mọze oogh okuron awe ọḅaram ḍioph ạnmuny phọ aHaman. Eeghe kụ ẹdi nạ agbi mọ bịdi moḍighi sịphe ạriikpigh areelhe phọ! Eeghe kụ ẹdi nạ rạwa nyịidipho? Nạ kạmoogh ni. Ụḅeni ịmi ịnon ịlo nạ rạwa bịn nạ kạmoogh ni.”

¹³Esta ạphagharanaan: “Eru mạar dị ẹḅeeraan ni dọl Igbogh phọ ạna, pọ meera ạbuo aJu phọ sịphe Sụsa ọḅile oḍighi iḍue ịpe omeera bọ bịdi oḍighi rodon. Ḅịle kẹn, tọ mọ ọkereri ruzu aḍioph ạnmuny phọ aHaman sịphe ịyaar phọ ọka bọ ịlo osinoghom awe phọ.”

¹⁴Ọdaam mọ ạto ạḅeni mọ oḍighi ịphen phọ, kụ ọngo ịge phọ sịphe Sụsa. Ruzu aḍioph ạnmuny phọ aHaman uḍeenaan ogbo.

¹⁵Ḍio dị emuneniom ḍioph rꞌinya aḍughul-otu ụnwanyu phọ Adar, ạbuo aJu phọ ẹpe Sụsa ọḅile ookpomoghan kụ ọze ịraar okuron ạbunon awe sịphe ẹmha phọ. Kụ ḅịle kẹn bịdi rạraar awe ụ́sighe.

¹⁶Ạbuo aJu phọ sịphe ạriikpigh areelhe phọ ọḅile ookpomoghan kụ ookolobian siloor ạbidi. Bịdi ụze ni oḍualdi rꞌoogh awe dị ọlogh bịdi ḍien, kụ bịdi ịyaar oye ụ́sighe.

¹⁷Ịphen phọ imite ḍio dị emuneniom ḍioph rꞌịraar ụnwanyu phọ Adar. Ḍịeri phọ aḍio phọ, ḍioph rꞌinya phọ, ọḅile ọze awe ọ́rol mun, kụ bịdi oḍighi ḍio phọ ạḍiphe ḍio iboh rꞌamalhe.

¹⁸Ạbuo aJu phọ ạSusa, tọro ịpe ẹrol bọ, uḍighi ḍiophdi rꞌoogh phọ ḍio ophooghian, esi dị bịdi mọzeeghi bọ bụmulogh-ḍien phọ ạbidi riiḍio phọ eḍighi bọ ḍiophdi rꞌịraar rꞌaḍiophdi rꞌinya kụ ọwile bọ ḍio phọ ạḍiphe eḍighi bọ ḍiophdi rꞌoogh phọ.

¹⁹Ịphen kụ iḍighi bọ ịyaar phọ ạbuo aJu bụphe orugh bọ ologhi ịbam ạramha phọ rooko ghan bọ ḍio phọ emuneniom bọ ḍiophdi rꞌinya ụnwanyu phọ Adar ịdipho aḍio iboh rꞌophooghian, aḍio amalhe rꞌọngooghi ghan inmo ariiḍien oniin atum nyoniin.

²⁰AModekai ạto mọ ọge ịphen emiteghu bọ oseere kụ ạge rịnya ạghiom oomo ạbuo aJu phọ, eesulom rꞌẹekela, dị orugh eelhe phọ aPasia,

²¹ạḅeni ghan bịdi mọ ooko ḍiophdi rꞌinya rꞌaḍiophdi rꞌoogh aḍughul-otu sịphe ụnwanyu phọ Adar ịdipho aḍio ophooghian esi iiḍighi tọrobo ạlha.

²²Ịphen asiḍughul-otu phọ dị ạbuo aJu phọ ọphela bọ siloor ạbidi esi ạbumulogh-ḍien ạbidi; ọphon phọ ụnwanyu dị mokiton esi amem ọto rꞌamukum ologhi oḍighi esi amem iboh rꞌọḅaal ologhi. Ụḅeni bịdi ooko ariiḍio phọ ịphen rꞌamalhe rꞌarookpomoghan ọḅoph ọnhu, ọngooghi ghan inmo ariiḍien oniin atum nyoniin rꞌarukulom mọ.

²³Esi ịduon phọ ạbuo aJu phọ ụdaph ni ịtooghi phọ aModekai, kụ ẹyaal phọ eḍighi eḍighinom ịyaar tọrobo ạlha.

²⁴AHaman ọony aHamedata — ọlo ẹemara ẹemara Ạgag kụ ạmulogh-ḍien ạbuo aJu phọ — kụ ọdi ạsa ni ẹlhel (“purim” ughol ghan ịduon) ọwa olegheri aḍio phọ kopiemi bọ bụo aJu phọ. Ọdi agbiighi ni ophiemi ạbidi ọmadan.

²⁵Kụ ọlo Esta ạghi ni ạteeny ọdaam mọ, kụ ọdaam mọ kụ ạngo ni ịto dị ọge dị emite ịdi aHaman ạmiinom ịikpia ịpe ọdi agbiighiom bọ bụo aJu phọ — usin nyọdi rꞌạnmuny ọdi sịphe ịyaar phọ ọka bọ osinoghom awe phọ.

²⁶Pọ kụ ịyaar phọ oghol bọ riiḍio ophooghian phọ ịphen mọ aPurim. Loor ẹmhu ạḍinya phọ aModekai ḅịle loor esi oomo ịpe memiteghunaan bọ bịdi,

²⁷bụo aJu phọ ụlogh ologh ọngo siloor ạbidi, ẹemara ẹemara ạbidi rꞌạtorobo ọlo kaḍighi ọnyo aJu, mọ ọkaraghi amem mọ tọrobo ạlha ịyal aḍughul-otu phọ ịphen kogbor ghan ni ooko ọdaphan ịpe aModekai ạtooghi bọ.

²⁸Mọghaaph ọkpaariom mọ tọrobo eghun ọlo aJu oghiil atum oghiil sịphe ẹkpigh eelhe rꞌạtorobo ẹmha ọotughian ghan kụ ooko riiḍio phọ aPurim oomo amem mọ ọpo kẹteeny bọ.

²⁹Ịphen phọ reten, kụ Esta ukueni-ạnir phọ, ọnyani Abihel, ạḅaran rꞌaModekai, kụ ụḅile kẹn ạge ḍịnya, ạlogh ọkaraghi ịikpo ọdi esi ạḍinya ịlo aPurim mọ, ịdipho aModekai mạge ghan bọ ni.

³⁰Ḍịnya phọ ụghiom oomo ạbuo aJu phọ, kụ ipoḍi ụghiom oomo okuron rꞌịyaldi rꞌoḍual ạriikpigh eelhe phọ aPasia. Ịngo ni bụo aJu phọ ẹepho rꞌạdol dị okpereghaan úlho

³¹kụ oroma bịdi rꞌạbuo ẹemara ẹemara ạbidi ịlo ooko ariiḍio phọ aPurim, ịdipho bịdi mọkpaariom bọ iilogh ịlo ooko ghan ạdol ọkoony rꞌamem ọto. Ịphen phọ aModekai rꞌEsta ukueni-ạnir kụ ụto.

³²Ịto phọ Esta, ẹkparami bọ iilogh ịlo aPurim phọ, ụge loor ạḍinya dị okpooghi.