Read abua Ẹḍua 1 Bible Online

Ẹḍua 1 - abua bible

Ẹḍua 1

¹Ịphen kụ asiḍien ạbuphe ọdaph bọ Jẹkob kụ ọghi Ijipt oye ye rꞌọto ọdi:

²Ruben, Sịmion, Livai, Juda,

³Ịsaka, Zẹbiulon, Bẹnjamin,

⁴Dạn, Nạftalai, Gạd rꞌẠser.

⁵Aḍita oomo ạnmuny phọ ạJekob ụman ni oḍualdi awe; mebia ni dị ạJosef ọony phọ ọdi odi ghan bọ ẹpe Ijipt.

⁶Iru ẹteeny mem dị ạJosef rꞌabumor phọ ọdi rꞌoomo oghiil phọ ọpo phọ omuughu omuneen,

⁷kụ ọkuruḅaka ẹemara ẹemara awe phọ Ịzirel adugh ni, kụ ọmaraghi oḍiza kụ ọkpar ịikpo, ọḅile oleeny eleeny oomo ade phọ Ijipt.

⁸Kụ ẹteeny mem dị omoom ọdaam eelhe dị Jọsef úlegheri aru ạda Ijipt.

⁹Kụ ọdi ạḅeni we phọ ọdi mọ, “Awe Ịzirel phọ ạbuen moḍiza iboom ọkpar upu iyira.

¹⁰Eḍighi mạar dị ẹgham esoor, bịdi otue ni oḍighan bụmulogh-ḍien kụ eenom iyira kụ ogbi ọḍua sịen ade phọ osumughu. Itu ọwa reten oghome aḍita phọ ạbidi.”

¹¹Pọ kụ ẹdi bụo Ijipt phọ ọmaaghi bụo ạrumhu iiḍighi, kụ ọḅeni bịdi mọ owinighiom ruwaloor awe phọ Ịzirel, ọngo bịdi rukumuan ịlo bịdi kọmiinom. Bụen phọ kụ ạbudi ụkpaariom bọ bịdi ọloghonaan ọdaam eelhe phọ ịyal igbogh ạramha Pitom rꞌaRameses, dị keḍighi rikpisi ooko ghan aruphua phọ ọdi.

¹²Ịduon bịdi rọmiine bọ we phọ Ịzirel, pọ kụ amem dị awe phọ Ịzirel ọḅile roḍiza ghan kọrara de phọ. Awe phọ Ijipt omiigh oghiilaan awe phọ Ịzirel kụ oḍighi ịdi ạdol ạrebene phọ ạbidi eeph iboom.

¹³Bụo Ijipt phọ orom we phọ Ịzirel odoghoḍi aruutu rꞌoḍighi iiḍighi iizo, kụ ọnma ighirigiir ọ́rol. Kụ oseere bịdi dọl ạrebene mọ ọzer ghan ọogha ọḅolom abiriki, kụ iloghi ạbidi ị́ḅaal loor ọdo kịrokiro ịikpara arukumuan dị ịghor ụ́min.

¹⁵Pọ kụ amem dị ọdaam eelhe phọ Ijipt arom ịyal ạbumaramia phọ ạnmariir aHibru dị oghol mọ aSifra rꞌaPua.

¹⁶“Mọ mem lọ nyina reḍighi oḍighi ạbumaramia phọ anyina esi ạnmariir aHibru, ịmaar ghan ephogh. Ạmar olephiri pọ eghiigh, aḍighi ọnyani pọ ẹwile.”

¹⁷Ạbumaramia phọ ughiilaan Ẹnaan, kụ ụ́daph ịpe ọdaam eelhe phọ Ijipt ạḅeni bọ bịdi kụ oḍighi, ụḅile ghụn ọwile lephiri ạnmuny bịn ụ́ze.

¹⁸Ọdaam mọ Ijipt ạmagh bụmaramia phọ kụ apuru bịdi mọ, “Eeghe kụ iḍighi kụ nyina ị́tuugh bọ ịpe mị ịḅeni bọ inyina kụ eḍighi, nyina rẹ́ze bọ lephiri ạnmuny phọ?”

¹⁹Ạbumaramia phọ ọphagharanaan ọdaam eelhe phọ mọ, “Ạnmariir aHibru phọ ụ́tol ịdipho ạnmariir Ijipt. Bịdi ọkparagh ni dị tụtu yoor rosi aani bịdi mọmaraghi.”

²⁰Ẹnaan ịrolonaan ni rꞌạbumaramia phọ kụ eḍighi ghan bịdi igeny. Kụ awe phọ Ịzirel oḍiza ghan rꞌịnyaam.

²¹Loor ịdipho ạbumaramia phọ oghiilaan bọ Ẹnaan bịdi ụḅeeraan ni nyọdi, kụ ạngo bịdi nmụny bụo ạbidi.

²²Ekureriom mọ, ọdaam eelhe phọ ạlogh ologh ạḅeni we phọ ọdi mọ, “Tọrobo olephiri ọony lọ ạnir ọlo aHibru ạmar isumeeny ghan Ọphiiny aNail, kụ eru ọnyani pọ ẹwile.”