Read abua Ẹḍua 15 Bible Online

Ẹḍua 15 - abua bible

Ẹḍua 15

¹AMozis rꞌawe Ịzirel ọmooraan Ọmoogh-we phọ ḍụor phọ ạḍien mọ, “Mị kạmooraan Ọmoogh-we phọ, ịdi eḍighi bọ ọdi ophelegbe arughuenian; ạrusu phọ rꞌạbuphe rokiilom bọ bịdi, ọdi maḅiemi ọphiiny phọ.

²Ọmoogh-we phọ kụ ịnyaam ạmi rꞌạḍuor ạmi; Ọdi kụ ọpelia ạmi. Ọdi kụ Ẹnaan ạmi. Mị kaboom ghan ni nyọdi. Ọdi kụ Ẹnaan ọde ạmi, mị kabagaam ni nyọdi.

³Ọmoogh-we phọ kụ ophelegbe ẹgham; Ọmoogh-we phọ kụ aḍien ọdi.

⁴“Odi maḅiemi sịphe ọphiiny phọ rughuugh-ude ọdaam eelhe phọ rꞌaḍita awe phọ ọdi; ọdi maḅiemi ikpolom awe ẹgham mọ ọdi sịphe Ọphiiny Igbilha phọ.

⁵Ạḍikel ọphiiny phọ ẹminoghom bịdi; bịdi oḅi ịdipho aḍighiigh.

⁶“Ạḍighaagh elhiom mọ ạna, Ọmoogh-we, ạḍighaagh iphelegbe; Ạḍighaagh elhiom mọ ạna mẹegbighiḍi mụlogh-ḍien phọ ạna.

⁷Esi arughuenian phọ ạna, nạ mạkpar apu bụphe oḅetenu bọ bịn oru ozuom nyịna; Nạ mạghagh ologhi apiemi bịdi ịdipho ịpherepher.

⁸Ạḍizia ạna resoor bịn ạmuum mọ aakpomoghan egina esi, ạmuum mọ akpolan rugu, bịn aḍigher phọ eḅologhan sịphe ude ọphiiny phọ.

⁹Ạmulogh-ḍien phọ ạḅem mọ, ‘Mị kaporogh ni bịdi, ạboor eten; azirion ruphua phọ ịlo ịgbaanyan ịmi; mị amooph elhool ẹgham mọ ạmi, apiemiom bịdi.’

¹⁰Ḍiniin aḍiphooghu ạna bịn ọphiiny phọ ạminoghom bịdi; kụ awe phọ Ijipt oḅi ịdipho ạleezu sịphe ogbo ọphiiny phọ.

¹¹“Ạnhian kụ ạḅile ạghigh nyịna, Ọmoogh-we, sịphe oomo ạrumugh phọ? Ạnhian kụ ạghigh nyịna, rꞌeegu, rꞌiigbia, rꞌoḍighi yogh ịiḍaany?

¹²Nạ uzin ḍịghaagh iphelegbe phọ ạna, bịn ade phọ ẹmin bịdi.

¹³Esi ọnma ighirigiir phọ ạna kụ ẹdi nạ arororiom we phọ ạna, bụphe nạ ạtagharan bọ; esi ịnyaam mọ ạna kụ ẹdi nạ arelhiom bịdi asiemi sịphe amarugh iigbia phọ ạna.

¹⁴Awe ịnon areelhe mọnaghan kụ aḍiigu esiph bịdi; awe phọ ẹpe Filistia odimom rꞌọto.

¹⁵Ạraalha phọ Idom kookpeka yogh ni; ạbuo ạrumhu awe ạMoab rokpereghaan ni; oḅio oomo awe aKenan mạpheeph.

¹⁶Eepuph rꞌokaphian oomiigh kụ odianaan bịdi. Loor ạḍighaagh iphelegbe phọ ạna, bịdi monaghagha yogh ịdipho asighiigh, tụtu awe phọ ạna bụphe nạ Ọmoogh-we phọ ạtagharan bọ dọl ạrebene phọ ogbiriph oten.

¹⁷Nạ kạsighe ni bịdi asiemi otu, kụ ạzuph bịdi sịphe eegum amarugh phọ ạna, sịphe esi phọ ẹpe nạ Ọmoogh-we phọ aḍighi bọ marugh phọ ạna, sịphe ạdol iigbia phọ ạraghaagh phọ ạna eselemi bọ.

¹⁸Nạ, Ọmoogh-we, kụ kạda kꞌagee-pọ kꞌagee-pọ.”

¹⁹Mem mọ ạrusu ọdaam eelhe phọ, rꞌarughuugh-ude phọ rꞌabukiilom mọ osi bọ ogbo ọphiiny phọ, Ọmoogh-we phọ aḅulemi ni mụum ọphiiny phọ ạminoghom bịdi. Awe Ịzirel urelhe ạnyu aḍikpokoro ade sịphe ogbo ọphiiny phọ kụ ọḅeeny.

²⁰ẠMiriam oyil-ạnir phọ Ẹnaan, umarani Eeron, ạsighe ịsagha ạpham, kụ oomo ạnmariir phọ oḅerenu ọdaph nyọdi rꞌịsagha ạbidi kụ rọker.

²¹ẠMiriam ạḅeni bịdi mọ, “Ịmooraan Ọmoogh-we phọ ḍụor iphelegbe, ịdi eḍighi bọ ọdi maḅiemi rụsu phọ rꞌabukiilom mọ sịphe ọphiiny.”

²²AMozis ạsighe we phọ Ịzirel ạḍuanam Ọphiiny Igbilha phọ kụ arorori bịdi ạḅeenye ẹpe ẹdala phọ aSur. Ịraar aḍughul-otu bịdi urelhe sịphe ẹdala phọ, kụ mụum ụ́miin.

²³Bịdi osi esi dị oghol mọ aMara, kụ ạmuum dị ạrol sịphe phọ aghiḍim ni ịdi bịdi útue ụ́pughol. (Ụtuan ịdipho kụ oghol bọ mọ aMara).

²⁴Kụ awe phọ ọgumom Mozis kụ opuru mọ, “Yoor kọpughol eeghe?”

²⁵Kụ aMozis amoghiom Ọmoogh-we phọ, kụ Ọmoogh-we phọ aḍeenaan nyọdi ekulha oreeny dị ọdi asumeeny ologhi ạmuum mọ bịn ạmuum mọ ạnighe ọphughol. Sịphe phọ kụ ẹdi Ọmoogh-we phọ ạngo bịdi iilogh ọrolom ghan; ịsiphe kẹn kụ ẹdi ọdi ạdegh olegheri iloghi phọ ạbidi.

²⁶Ọdi ạḅem mọ, “Eḍighi ịyaar lọ nyina kesereghian ni ẹnaghanan ẹḍogh ạmi, kụ eḍighi ghan ịlo ẹnighe, kụ eeko ghan iilogh phọ ạmi rꞌịtooghi phọ ạmi, pọ mị kị́lhiom inyina rꞌeniin ọdo ẹzegh phọ mị ạlhiomom bọ we Ijipt, ịdi eḍighi bọ mị kụ Ọmoogh-we phọ, ọpo raakonom bọ rẹezegh phọ anyina.”

²⁷Kụ ọḅile ọghi osi Ẹlim, esi dị ḍioph rꞌịyal ạruudu rꞌoḍualdi areelhe edi. Ịsiphe kụ ẹdi bịdi ophooghian otuman ọgbal ạmuum mọ.