Read abua Ẹḍua 16 Bible Online

Ẹḍua 16 - abua bible

Ẹḍua 16

¹Oomo ookpomoghan awe Ịzirel uḅerenu ni ọḍua sịphe Ẹlim orelhe ọghi osi ẹpe ẹdala phọ ạSin dị edi ịbaay Ẹlim rꞌaSainai, ḍioph rꞌoogh aḍughul-otu ụnwanyu phọ ọpo amuneniom bọ ịyal phọ kꞌamem mọ bịdi ọḍua bọ ẹpe Ijipt.

²Kụ oomo phọ ạbidi oru ọteeny Mozis rꞌEeron ẹpe ẹdala phọ rogum.

³Ọḅeni bịdi mọ, “Mịḅeeraan ghụn iyoor lọ Ọmoogh-we phọ mụze iyoor ẹpe Ijipt; ẹpe phọ yoor mụtol li ude ạany ịnam ọḅile olhe eḍien ẹpher, kụ nạ ụsighe iyoor asiemi ẹphen ẹdala phọ, mọ ọkoony ạze oomo phọ ayoor?”

⁴Ọmoogh-we phọ ạḅeni Mozis mọ, “Nyịidipho mị kamitiom eḍien ịdipho ikpo ọlophia dị kẹḍua okuaḍio kụ ekar ịngo inyina, kụ awe phọ kọki ghan aḍio etum ḍio ookoroghi ẹlo aḍio phọ bịn. Mị kạdegh bịdi apogh mụghumo bịdi kọdaph ni iilogh phọ ạmi kụ otelhiom mụghumo bịdi kọ́daph.

⁵Ḍịphe kemuneniom bọ odiiny aḍughul-otu phọ, bịdi kookoroghi ẹlo ịyal aḍio kụ oselemi.”

⁶Kụ aMozis rꞌEeron ọḅeni oomo awe Ịzirel mọ, “Dulhe phọ arodon nyina kelegheri ni mọ Ọmoogh-we phọ kụ ịsighe bọ inyina amitenom ẹpe Ijipt.

⁷Kụ ḍịroor nyina kẹmiin ni eegu Ọmoogh-we phọ, ịdi eḍighi bọ ọdi mạnaghan ịgum mọ nyina ẹgumom bọ nyọdi, yoor eeghe awe, dị nyina kẹgumom?”

⁸AMozis ạḅeni bịdi mọ, “Ọmoogh-we phọ kụ kịngo inyina ịnam ạany dulhe, rꞌạtoro eḍien dị kịpher inyina ḍịroor, ịdi eḍighi bọ ọdi mạnaghan ịgum mọ nyina ẹgumom bọ nyọdi. Mem lọ nyina imoghiom iyoor, pọ nyina remoghiom ghan Ọmoogh-we phọ.”

⁹AMozis ạḅeni Eeron mọ, “Ḅẹni oomo ookpomoghan awe phọ Ịzirel oru ọmeregha ghisigh Ọmoogh-we phọ, ịdi eḍighi bọ ọdi mạnaghan ịgum mọ ạbidi.”

¹⁰Ịdipho Eeron ạghaaph bọ ạḅeni oomo ookpomoghan phọ Ịzirel, bịdi okiton osoman ẹdala phọ bịn eegu Ọmoogh-we phọ amite egaan loor ọotu.

¹¹Ọmoogh-we phọ ạḅeni Mozis mọ,

¹²“Mị mạnaghan ni ịgum mọ awe phọ Ịzirel. Ḅẹni bịdi mọ, ‘Mem dị rẹwepheghian nyina kẹmoogh ịnam ạa; kụ ḍịroor nyina kẹmoogh eḍien epaany. Kụ nyina egbi olegheri mọ mị kụ Ọmoogh-we Ẹnaan phọ anyina.’”

¹³Dulhe ạrasaraghu esoroghu bịn emuza oomo asimarugh phọ ạbidi; kụ ḍịroor ọotu asoor akoom rugbogo phọ ạbidi.

¹⁴Kụ ọotu phọ rokpoghoronu bịn, sịphe ạnyu ẹdala, ịsimisimi ikpo dị ẹghigh ịdipho ibikpo emuza sịphe ẹdala phọ.

¹⁵Mem dị awe Ịzirel ọmiin bọ, bịdi úlegheri ịyaar lọ eru kụ oniin apuru nyoniin mọ, “Ẹpe phọ eeghe?” Kụ aMozis ạḅeni bịdi mọ, “Ẹpe phọ eḍien dị Ọmoogh-we phọ ịngo inyina olhe.

¹⁶Ịphen phọ kụ ẹdi Ọmoogh-we phọ ạtuan kụ ạlogh bọ ologh mọ ịki eekoroghi, tọrobo oye aakoroghi ghan ịlo kẹper nyọdi bịn, ịyal ạrukpa ịlo oniin oye; ạtuugh ọnhu awe phọ ạbuphe nạ arughom bọ.”

¹⁷Awe phọ Ịzirel ụtuugh ni ịdipho phọ oḍighi. Buniin ookoroghi ịminighan, buniin ookoroghi ẹphurukpu.

¹⁸Kụ mem dị bịdi ọsighe ọtoom kụ ọtooghiom, kụ ọpo aakoroghi bọ ịminighan phọ ịyaar ípeel; ọpo aakoroghi bọ ẹphurukpu phọ ịyaar nyọdi íkuom. Kụ tọrobo oye aakoroghi ghan ịlo ọdi katue ale.

¹⁹AMozis ạḅeni bịdi mọ, “Oye kúseerian rꞌeniin ẹteeny iḍueneen.”

²⁰Kụ buniin ạbidi ụ́naghanan Mozis kụ oseerian ẹphurukpu. Ẹḅaal ḍịroor, mẹḅor, ịsu meḍiku rẹpur, kụ aMozis ạghagham bịdi ologhi.

²¹Kụ bịdi ọghi ghan tọrobo ạḍiroor ookoroghi ghan, kụ tọrobo oye aakoroghi ghan ịpe ọdi katue bọ ale; kụ mem lọ ogogo rạkologhol bịn mẹgbo.

²²Omuneniom odiiny aḍughul-otu, bịdi uukoroghi ghan ịyal ariisi, tọrobo oye inya ạrukpa; kụ oomo ạbuo ạrumhu phọ ropogh bọ bịdi oru ọghaaph ọḅeni Mozis.

²³AMozis ạḅeni bịdi mọ, “Ịduon kụ ịdi Ọmoogh-we phọ ạḅem bọ. Iḍue aḍio ophooghian, aḍio iigbia Ọmoogh-we phọ. Ịgbaghaḍi ẹlo nyina kẹgbaghaḍi, epoolomi ẹlo nyina kepoolomi; kụ oomo ịpe kesugha bọ iseerian ẹḅaal iḍue.”

²⁴Bịdi ọdaph ịpe aMozis ạḅeni bọ bịdi kụ oseerian tụtu ẹteeny ḍịeri phọ aḍio phọ kụ ị́sikiri ḅịle kẹn ịsu íḍigh.

²⁵AMozis ạḅeni bịdi mọ, “Ile ni nyẹen phọ rodon, ịdi eḍighi bọ arodon aḍio ophooghian dị mọḅogh ọngo Ọmoogh-we phọ. Nyina kẹ́miin ịyaar ẹpe elegheḍum mọ rodon.

²⁶Odiiny aḍio kụ ẹdi nyina keekoroghi ghan bọ. Aḍio phọ ạḍiphe emuneniom bọ oḍual aḍughul-otu phọ eḍighi bọ ḍio ophooghian phọ, eḍien kẹ́tol.”

²⁷Kụ ḍio phọ ạḍiphe emuneniom bọ oḍual aḍughul-otu phọ kụ buniin ạbidi umite ni ookoroghi; kụ bịdi rꞌẹnum ụ́miin.

²⁸Ọmoogh-we phọ ạḅeni Mozis mọ, “Kꞌạpur amem kụ nyina ẹbile ọḅitonaan iilogh phọ rꞌịtooghi phọ ạmi?

²⁹Ịitughian, Ọmoogh-we phọ mịngo inyina ḍiniin aḍio ophooghian kụ iḍighi kụ ạtu bọ kịngo inyina eḍien dị ẹmanam ịyal aḍio, omuneniom odiiny aḍio phọ. Tọrobo ọnyo anyina ạrol kꞌọdi kúmite ụ́ki esi, ḍio dị kemuneniom oḍual aḍughul-otu phọ.”

³⁰Kụ iḍighi kụ awe úḍighi ịyaar ḍio phọ ạḍiphe oḍual aḍughul-otu phọ.

³¹Kụ awe phọ Ịzirel oghol ḍien ịyaar phọ mọ ạmana. Ạkigh ẹbam ẹphalaḅaal eemuma, ạḅaal, kụ radugh ịdipho ịbam ipoḍi ạkikia lọ oḍighinom ẹnuum aḍiowo.

³²AMozis ạḅem mọ, “Ọmoogh-we phọ mạto ụḅeni iyira mọ oseerian iniin ạmana dị kẹtolonaan nmụny ạnmuny ayira, ọbo bịdi ọmiin olegheri eḍien phọ ẹpe ọdi ụngo bọ iyira mọ olhe ẹpe ẹdala phọ mem mọ ọdi ụsighe bọ iyira sịphe Ijipt ạḍuanam.”

³³AMozis ạḅeni Eeron mọ, “Sịghe ookoom ạlogh ịyal ịtoom ạmana ologhi, kụ aseere ghisigh Ọmoogh-we phọ ọdi koseenaan nmụny ạnmuny ayira.”

³⁴Esi ịpe Ọmoogh-we phọ mạto bọ ạḅeni Mozis, kụ Eeron aseere ghisigh Igbe Ịyo phọ, ẹrol dị ọmaar oseere.

³⁵Awe Ịzirel ule mạna phọ inyadi ạsia, kụ bịdi ogbi osi ẹpe ade phọ aKenan ẹpe bịdi kotugh bọ.

³⁶(Ọtoom dị ọtoom ghan mem mọ ọpo ạman ịyaldi ạrukpa.)