Read abua Ẹḍua 17 Bible Online

Ẹḍua 17 - abua bible

Ẹḍua 17

¹Oomo ookpomoghan awe phọ Ịzirel uḅerenu ni ọḍua sịphe ẹdala phọ ạSin omiigh ẹghi phọ ạbidi. Bịdi ọdaph ghan iilogh Ọmoogh-we phọ kụ ọḍua esi ọgba esi. Rosi Refidim, bịdi odoghoḍi rugbogo kụ ạmuum ọ́rol sịphe phọ ọphughol.

²Awe phọ Ịzirel ọwa sighiton Mozis kụ ọḅeni nyọdi mọ, “Ụngo iyoor mụum ọphughol.” AMozis apuru bịdi mọ, “Nyina ịtuan eeghe kụ retu bọ esi ạmi? Nyina ịtuan eeghe kụ rẹdegh bọ Ọmoogh-we phọ?”

³Kụ ọlo ẹephua ạmuum mọ ịphughan ni, kụ awe phọ ọḅile ghan ọgumom Mozis kụ ọḅem mọ, “Nạ ụtuan eeghe ụsighe bọ iyoor ẹpe Ijipt arumom ẹphen mọ ẹephua ạmuum ịze iyoor, rꞌạnmuny phọ ayoor rꞌịnam mọ ayoor?”

⁴AMozis ạaḅereghi agey Ọmoogh-we phọ kụ ạḅem mọ, “Mị kaḍighi ika we phọ ạbuen? Nyịidipho bịdi mọnyaaghian ịlo oroḅol ạmi ikpo.”

⁵Ọmoogh-we phọ ạḅeni Mozis mọ, “Sịghe buniin ikumoor awe phọ Ịzirel ạḅaram rꞌạna ẹghi ẹpe risigh kụ ạpham ịkpara phọ ạna ịpe nạ ạgurom bọ Ọphiiny aNail phọ, ạghimom.

⁶Mị kaḍiemi ghan ạmeera ạnyu aḍighiigh phọ ẹpe Eegum aSainai, kụ nạ ạgur ḍighiigh phọ kụ ạmuum kạḍua ni sịphe aloor aḍighiigh phọ amite, ẹrol dị awe phọ ọpughol.” Kụ aMozis ạtuugh ịdipho aḍighi ghisigh ikumoor awe phọ Ịzirel.

⁷AMozis aghol ḍien esi phọ mọ aMasa rꞌaMeriba loor esi dị bịdi ugum ni ophogh ịpe Ọmoogh-we phọ kaḍighi bọ dị bịdi opuru mọ, “Ọmoogh-we phọ odi ni rꞌayira ḍụghum kụ ólho?”

⁸Kụ awe Ạmalek oru ozuom we Ịzirel elephiri sịphe Refidim.

⁹AMozis ạḅeni Josua mọ, “Sọn we ọghi eenan rꞌạbuo Ạmalek phọ iḍue. Mị kạpam ịkpara phọ Ẹnaan kụ ạmeeraam ẹpe ạnyu ẹeḅaraph phọ.”

¹⁰Kụ aJosua ạdaph ịpe aMozis ạḅeni bọ nyọdi kụ anyeene eenan rꞌạbuo Ạmalek phọ. AMozis rꞌEeron rꞌaHur ọghi ọsiiny ạnyu ẹeḅaraph phọ.

¹¹Tọro amem lọ aMozis aphoophe rạghaagh ọdi ạghiom ạnyu, awe Ịzirel ọkpar opu; tọro amem lọ aMozis aseere ude rạghaagh phọ ọdi, ạbuo Ạmalek phọ omiigh ọkpar opu.

¹²Mem dị ẹpher rạghaagh aMozis, bịdi ụsighe ḍighiigh oseere kụ ọdi ạrolom; kụ Eeron rꞌaHur ọrologhu ịigaany ọdi kụ ophoophe rạghaagh phọ ọdi ọpham ịdi kékagh tụtu erumuḍio emeel ighool.

¹³Ịduon kụ ẹdi aJosua ạkpar bọ apu bụo Ạmalek phọ.

¹⁴Kụ Ọmoogh-we phọ ạḅeni Mozis mọ, “Gẹ ịlo ọkpar opu phọ ọphon loor ạḍinya ẹrol dị ọsighe ghan ọotughianam, kụ ạghaaph ịphen phọ adoghoḍi reḅeri aJosua. Ḅẹni nyọdi mọ mị kaagulemi ni bụo Ạmalek phọ ịdi kọ́otughian ghan mun bịdi sịen aḅirini phọ.”

¹⁵AMozis ạkan enmeny ạrikia, kụ aghol ḍien enmeny phọ mọ “Ọmoogh-we phọ kụ ạlagba ạmi.”

¹⁶Kụ ọdi ạḅem mọ, “Pạm aphoophe ạnyu ạlagba Ọmoogh-we phọ. Ọmoogh-we phọ kabianan ghan ni bụo Ạmalek phọ, oghiil atum oghiil.”