Read abua Ẹḍua 18 Bible Online

Ẹḍua 18 - abua bible

Ẹḍua 18

¹AJetro oyil ạrikia phọ ạMidian ọyogo phọ aMozis ạnaghan oomo ịpe Ẹnaan meḍighinaan bọ Mozis rꞌawe Ịzirel awe phọ ọdi, mem mọ Ọmoogh-we phọ ạsighe bọ bịdi ạḍuanam ẹpe Ijipt.

²Kụ ọdi aru ạteeny Mozis, ạphamam Zipora ạnir phọ aMozis, ọpo asugha bọ ọman,

³rꞌịyal phọ ạnmuny ạnir phọ. (Oniin ughol mọ aGersom, ịduon phọ rẹḅem ghan mọ, “Mị maḍighi ooruen eeruen ẹmha.”

⁴Nyọori phọ ughol mọ Eliezer. Ẹmhu aḍien phọ rẹḅem ghan mọ, “Ẹnaan ọde phọ ạmi kụ ịloghonaan ịmi ḍịghaagh kụ ịphel ịmi ẹsighe dị ọdaam eelhe phọ Ijipt ịmi úghiigh.”)

⁵AJetro ọyogo phọ aMozis rꞌịyal phọ ạnmuny phọ rꞌạnir phọ ọghi osi ẹpe ẹdala phọ, sịphe eegum mọ Ẹnaan, kụ ọrol ropooghian.

⁶Mem dị aMozis ạnaghan mọ aJetro ọyogo phọ ọno, ạnir phọ ọno, rꞌịyal ạnmuny phọ ọno rotu,

⁷ọdi amite ạghi azuan ọyogo phọ ọdi, kụ akpuḍian ghisigh ọdi kụ ạkpun nyọdi. Kụ oniin apuru ghan nyoniin ịlo aloor phọ, kụ ọghi oḍigh sịphe ogbogo phọ.

⁸AMozis ạghaaph ạḅeni ọyogo phọ ọdi oomo ịpe Ọmoogh-we phọ ạtuan bọ ẹmhu awe Ịzirel aḍighi ọdaam eelhe phọ Ijipt rꞌawe phọ ọdi. Ọdi ạḅeniom kẹn nyọdi ịminimiin phọ awe phọ ọmiinom bọ ẹpe eten phọ, rꞌịpe Ọmoogh-we phọ ạphel bọ bịdi.

⁹Mem dị aJetro ạnaghan bọ oomo ịphen phọ, ologhi ọdi ạḅaal li

¹⁰kụ ạḅem mọ, “Ạḍiseph ẹrolonaan Ọmoogh-we phọ ịphel bọ inyina ạsighe esi ọdaam eelhe phọ rꞌawe phọ Ijipt.

¹¹Nyịidipho mị malhegheri mọ Ọmoogh-we phọ ạbugh apu oomo ịnon ạrumugh, ịdi eḍighi bọ ọdi mạphel we phọ ọdi dọl ịminimiin rạghaagh awe Ijipt phọ, mem mọ bịdi rọmiine bọ bịdi.”

¹²AJetro ọyogo phọ aMozis amiteghom rạraar ạkpuyanaan Ẹnaan ịkpuy, kụ Eeron rꞌikumoor awe phọ Ịzirel ọdaphan nyọdi ọghi olhe ịkpuy phọ risigh Ẹnaan.

¹³Ḍịeri phọ aḍio phọ aMozis aagbo ghan ịiruen ạngo we phọ, rꞌịnon iiḍighi emiigh kꞌạḍiroor kụ ẹteeny dulhe.

¹⁴Mem dị aJetro ọyogo phọ aMozis ạmiin oomo ịpe ọdi raḍighi bọ we phọ, kụ ọdi apuru mọ, “Ịphen nạ raḍighi bọ we phọ ịghen? Uḍighi ika kụ ogina ạna bịn kụ raḍighi ghan bọ, kụ aḍita awe phọ ọmeregha sịen ẹḍua kꞌạḍiroor kụ ẹteeny dulhe rọwa ghan ọghaaphan rꞌạna?”

¹⁵AMozis ạḅeni ọyogo phọ ọdi mọ, “Mị ạmoogh oḍighi ịduon phọ loor esi dị awe phọ rotu ghan esi ạmi ọtuugha ịlo Ẹnaan.

¹⁶Tọrobo amem lọ bịdi ọmoogh sighiton, bịdi otu esi ạmi kụ mị asophonaan ọoruen ịyal phọ ạbidi, kụ mị aḍighi ịdi bịdi kolegheri ịtooghi phọ rꞌiilogh phọ Ẹnaan.”

¹⁷Kụ aJetro ạḅeni Mozis mọ, “Nạ ráḍighi egeny eḍighinom.

¹⁸Kẹpher ri nyịna rꞌawe phọ ạbuen phọ. Ịphen phọ ẹpughan dị ogina ạna bịn kụ kaḍighi ghan.

¹⁹Nạghan ịphen mị raroma bọ nyịna, bịn Ẹnaan kẹrolonaan ni nyịna. Eḍighi ni elhiom dị nạ kạmeeranaan enye we phọ kụ ạsighe ghan sighiton ạbidi atuomonaan Ẹnaan.

²⁰Tụghemi bịdi ịtooghi phọ rꞌiilogh phọ Ẹnaan, kụ ạgba aagbunion ạḅeni bịdi ịlo bịdi kọtol rꞌịlo ẹkpe oḍighi.

²¹Kụ esi ọḅaram, sọn ikakara awe amitiom sịphe ogbo awe phọ Ịzirel ạmaaghi buḍiemiom dị kopogh ghan sita ọonir, mꞌoniin okuron, mꞌooghdi, mꞌaḍioph. Bịdi oḍighi we oghiilaan Ẹnaan dị koḍuom ologhi ḅịle kúḍighi we ole oti-ọman.

²²Bịdi kụ oogboonaan ghan we phọ ịiruen oomo amem. Kụ aḍighiton lọ epel bịdi loor kụ bịdi ọsighe ghan oruomonaan nyịna. Oomo ịbam asighiton phọ bịdi kụ ọḅem ghan. Ịduon kụ kedughanaan nyịna, loor ịdipho bịdi mophoor bọ dool phọ ạna.

²³Eru mạar dị nạ ạtuugh ịphen phọ kụ aḍighi, ịdipho Ẹnaan ẹto bọ, nạ kạmoogh ni ọninom, kụ oomo awe phọ ạbuen kokeleghu ni rꞌẹwoor ịdi eḍighi bọ mọghaaphogh sighiton phọ ạbidi.”

²⁴Kụ aMozis ạnaghanan ọyogo phọ ọdi, kụ ạtuugh oomo phọ ịpe ọdi ạḅeni bọ nyọdi aḍighi.

²⁵Kụ aMozis ạson ikakara awe amitiom sịphe ogbo awe phọ Ịzirel kụ ạmaaghi bịdi buḍiemiom dị kopogh ghan sita. Buniin kopogh ọonir, buniin oniin okuron, buniin ooghdi, buniin ḍioph.

²⁶Kụ bịdi ọḅemogh ghan sighiton awe phọ oomo amem. Aḍighiton lọ epel bịdi loor bịdi ọsighe ọkiom Mozis, kụ ọlo oomo ịbam asighiton phọ bịdi kụ ụḅem ghan.

²⁷AMozis rọḅeni mọ ọdi agheel rꞌẹepho, kụ aJetro agheel ẹmha ạbidi.